Lucas 3:1-38
3 Tiberio César 15 watana rey caycaptin, Judeacho Poncio Pilato mandacuycargan, Galilea distritucho* Herodes,* wauguin Filipuna Iturea y Traconítide distrituta. Abilene distrituchona Lisanias jutiyoj runa mandacuycargan,
2 Anaswan Caifaspis mandacoj sacerdoticuna caycargan, chay wichancho Zacariaspa churin Juan chunyaj sitiucho Diospa juc wilacuyninta chasquirgan.
3 Chaymi payga Jordán sitio uranpa yachachicuycargan arrepenticur runacuna bautizacärinanpaj, chaynopa juchancuna perdunashga cananpaj.
4 Chayga pasashga profeta Isaiaspa libruncho cayno escribicashgannola: “Chunyaj jircacho gaparayparaj juc voz cayno mayacan: ‘¡Jehovapa caminunta quichapäcuy! Caminuncuna ali cananpaj quichapäcuy.
5 Lapan ragracuna pampachashga cachun, jatun jircacuna ichic jircacunapis parijashga cachun. Wicsu caminucunapis derechula aywananpaj ruracächun, y uchcu uchcu caminucunapis alchashga cachun.
6 Dios salvashgantaga lapanmi ricapäcunga’”.*
7 Chauraga bautizacunanpaj shamoj achca runacunata Juan cayno nirgan: “Achca viboracuna,* gamcuna yarpaycanquichi Diospa castigunpita salvacärinayquipaj. ¿Imata munartaj caycho carcaycanqui?
8 Arrepentido capäcushgayquega rurayniquichoraj ricacämunman. ‘Abrahanga taytämi’ nir ama parlaylapis parlapäcuychu. Munarga, cay rumicunapitapis Abrahanpa churincunata Dios sharcachinmanmi.
9 Jina ächapis* arbulcunapa chaquincho o sapinchona amänula caycan, chaymi ima arbulpis mana wayumuptenga mutushga y ninaman gaycushga canga”.
10 Y chaycho caycaj runacuna tapupäcurgan: “Chauraga, ¿imatataj rurananchi?”.
11 Juanna nirgan: “Pilapis visticunanpaj ishcay ropan captenga mana charaj cajta goycuchun, y micunanpaj charaj cajpis chaynola rurachun”.
12 Impuestuta cobrajcunapis bautizacunanpaj shapäcamur tapupäcurgan: “Maestro, ¿imatataj rurananchi?”.
13 Payna nirgan: “Impuestutaga cobranayquipaj cajlata cobrapäcuy”.
14 Soldaducunapis “¿imatataj rurapäcöman?” nir tapupäcurgan. Juan nirgan: “Ama pipa guellaynintapis alasmalasga quitapäcuychu, ni pitapis manacajpita acusapäcuychu. Paguta chasquishgayquilawan contentacäriy”.
15 Cristo chayamunanpaj cajta shuyaraj runacuna tapucärej “¿Juanchuraj caycan Cristo?” nir.
16 Chayta mayarcur lapancunata Juan cayno nirgan: “Nogaga yaculawan bautizä, ichanga nogapita más autoridäyoj cajmi chayaycämunna, llanquinpa watunta pascaylatapis merecëchu. Paymi bautizanga santo espirituwan y ninawanpis.
17 Jorquetantapis* aptaraycanna triguta wayrananpaj y erantapis shumaj pichapacunanpaj, trigutapis shuntarcur cosechancunata churacunanman apananpaj, pero ojshancunataga* imaypis mana upej ninaman gaycunga”.
18 Y lapan runacunata ali consejaycurpis jinalami ali wilacuycunata wilacuycargan.
19 Pero Galileapa mandacojnin Herodesga mana alicunata rurashganraycu y wauguinpa warmin Herodiaswan cacushganraycu, cutin cutin Juan gayapaptinmi,
20 pasaypa mana alita rurar Juanta carcelman wichgachirgan.
21 Chaypitana lapan runacuna bautizacuptin Jesuspis bautizacurgan, chaycho Diosta mañacuycaptin cielupis quichacargan,
22 y ricacargan santo espíritu juc palumano payman uraycämojta, chaypitana cielupita mayacargan juc voz cayno nir: “Gammi caycanqui cuyay Wamralä. Gamwanmi goyay goyay cushishga caycä”.
23 Jesusga 30 watanona caycargan predicar galaycuptin. Waquincuna nishgannopayga cargan Josepa wamran,Josena cargan Helipa wamran.
24 Helina cargan Matatpa wamran,Matatna cargan Levipa wamran,Levina cargan Melquipa wamran,Melquina cargan Janaipa wamran,Janaina cargan Josepa wamran.
25 Josena cargan Matatiaspa wamran,Matatiasna cargan Amospa wamran,Amosna cargan Nahumpa wamran,Nahumna cargan Eslipa wamran,Eslina cargan Nagaipa wamran.
26 Nagaina cargan Maatpa wamran,Maatna cargan Matatiaspa wamran,Matatiasna cargan Semeinpa wamran,Semeinna cargan Josecpa wamran,Josecna cargan Jodapa wamran.
27 Jodana cargan Joananpa wamran,Joananna cargan Resapa wamran,Resana cargan Zorobabelpa wamran,Zorobabelna cargan Sealtielpa wamran,Sealtielna cargan Neripa wamran.
28 Nerina cargan Melquipa wamran,Melquina cargan Adipa wamran,Adina cargan Cosampa wamran,Cosamna cargan Elmadampa wamran,Elmadamna cargan Erpa wamran.
29 Erna cargan Jesuspa wamran,Jesusna cargan Eliezerpa wamran,Eliezerna cargan Jorimpa wamran,Jorimna cargan Matatpa wamran,Matatna cargan Levipa wamran.
30 Levina cargan Simeonpa wamran,Simeonna cargan Judaspa wamran,Judasna cargan Josepa wamran,Josena cargan Jonanpa wamran,Jonanna cargan Eliaquimpa wamran.
31 Eliaquimna cargan Meleapa wamran,Meleana cargan Menapa wamran,Menana cargan Matatapa wamran,Matatana cargan Natanpa wamran,Natanna cargan Davidpa wamran.
32 Davidna cargan Jesepa wamran,Jesena cargan Obedpa wamran,Obedna cargan Boazpa wamran,Boazna cargan Salmonpa wamran,Salmonna cargan Nahsonpa wamran.
33 Nahasonna cargan Aminadabpa wamran,Aminadabna cargan Arnipa wamran,Arnina cargan Hezronpa wamran,Hezronna cargan Perezpa wamran,Perezna cargan Judapa wamran.
34 Judana cargan Jacobpa wamran,Jacobna cargan Isaacpa wamran,Isaacna cargan Abrahanpa wamran,Abrahanna cargan Tarepa wamran,Tarena cargan Nacorpa wamran.
35 Nacorna cargan Serugpa wamran,Serugna cargan Reupa wamran,Reuna cargan Pelegpa wamran,Pelegna cargan Eberpa wamran,Eberna cargan Selapa wamran.
36 Selana cargan Cainanpa wamran,Cainanna cargan Arpaksadpa wamran,Arpaksadna cargan Sempa wamran,Semna cargan Noepa wamran,Noena cargan Lamecpa wamran.
37 Lamecna cargan Matusalenpa wamran,Matusalenna cargan Enocpa wamran,Enocna cargan Jaredpa wamran,Jaredna cargan Mahalaleelpa wamran,Mahalaleelna cargan Cainanpa wamran.
38 Cainanna cargan Enospa wamran,Enosna cargan Setpa wamran,Setna cargan Adanpa wamran,Adanna cargan Diospa wamran.
Ichic wilacuycuna
^ Griego rimaycho nin “tetrarca”. Roma nación reypa jutincho mandacoj.
^ Herodes Antipaspaj parlaycan.
^ Caynopis ninman “Dios imano salvananpaj cajta”.
^ Griego rimaycho nin “viboracunapa wawancuna”.
^ Caynopis ninman “jächapis”.
^ Caynopis ninman “orquetantapis”. Chayga caycan cosechacho triguta wayranapaj gueru.
^ Caynopis ninman “punshancunataga”.
