Lucas 7:1-50
7 Lapan runacunata chayno nircushpanna, Capernaúm marcaman yaycurgan.
2 Soldaducunata mandacoj runa juc ashmayninta* alapa cuyargan, chay ashmayninmi pasaypa gueshyar wanunanpäna caycargan.
3 Jesús ima ruraycashganta mayar y ashmayninta aliyächinanta munar, Judeacho autoridäyoj waquin runacunata mandargan Jesusta pushamunanpaj.
4 Paycuna Jesús cajman chayar cutin cutin ruwacuyparaj cayno nirgan: “Chay runaga mereciyculanmi yanapanayquita,
5 payga naciunninchita cuyanmi y sinagogatapis rurapämashcanchi”.
6 Chaura Jesús paycunawan aywargan, ichanga wasiman chayananpäna caycaptin soldaducunapa mandacojnin amiguncunata mandargan Jesusta cayno ninanpaj: “Señor, amanashi afanacur aywanquichu, wasinman yaycunayquitapis manashi merecinchu.
7 Chayshi gamwan tincunalanpäpis shamushgachu, pero ashmaynin gueshyanpita cachacänanpaj caylapitashi niyculanqui.
8 Paypis casucunshi pipis mandaptin y maquincho caycaj soldaducunatapis mandan. Maygalantapis ‘¡aywacuy!’ niptin, aywacun. ‘¡Shamuy!’ niptin, shamun. Jina ashmaynintapis ‘¡cayta ruray!’ niptin, ruran”.
9 Chayta wiyarcur Jesús pasaypa almiracurgan, y chaycho caycaj lapan runacunata ricaycushpan nirgan: “Gamcunata në, Diosman alapa yaracoj cay runatanoga Israelcho manami ricashcächu”.
10 Chay wilacojcuna wasiman cutipäcuptinna, ashmaytaga aliyashgatana taripäcurgan.
11 Chaypitana discipuluncunawan Jesús Naín marcaman viajapäcurgan, achca runacunapis paycunawan viajapäcurgan.
12 Chay marcachomi juc viudapa japalan wamran* wanurgan. Chay ayata runacuna jorguycaptinmi marca yaycunancho Jesuswan tincupäcurgan. Chay marcapita achca runacuna viudata yanagarcaycargan.
13 Señor Jesús chay warmita ricaycushpan laquicuypita shongunpis nanarganraj, y payta nirgan: “Ama wagaynachu”.
14 Jinan hora aya caycashganman aywargan quirmata* yataycunanpaj, apaycajcunaga chaylacho quedacärirgan. Chauraga Jesús nirgan: “Mozo, gamta në, ¡sharcuy!”.
15 Chay wanushga mozo cawarircamur jamaycushpan parlar galaycurgan. Jesusna chay wamrata mamanta cutiycachirgan.
16 Chaycho caycaj runacuna manchacärirganmi, y Diosta alabar galaycärirgan cayno nir: “Noganchipita juc ali profeta yargushga”, y “marcanta Dios yarpayculashga”.
17 Jesús ima rurashgan wilacuycunaga entero Judeacho caycaj marcacunaman chayargan.
18 Juan cajman aywaycur paypa discipuluncunapis lapanta wilapargan.
19 Chaura ishcay discipuluncunata gayarcachimur Juan mandargan Señor Jesusta cayno tapunanpaj: “¿Gamtachu Dios acrashushcanqui shamunayquipaj o juc runatachu shuyaräshun?”.
20 Jesús caycashganman chayaycärishpan chay runacuna cayno nirgan: “Bautizacoj Juan musyayta munan gamta Dios acrashushcanqui shamunayquipaj o juc runataraj shuyaränapaj”.
21 Chauraga jinan horami Jesusga aliyächirgan ima gueshyawanpis nacaycaj achca runacunata, fiyu demoniucuna nacaycächejcunata y achca gapra runacunapa nawincunatapis quichargan.
22 Nircur paycunata Jesús nirgan: “Aywapäcuy, ricashgayquicunata y mayashgayquicunata Juanta wilapay, cananga mana ricajcunapis ricanna, puriyta mana puedejcunapis purinna, lepra gueshyawan cajcunapis aliyanna, mana wiyajcunapis wiyanna, wanojcunapis cawarimunna* y pobricunapis ali wilacuyta wiyannami.
23 Nogaman mana dudaypa yaracojga cushicuchun”.
24 Juanpa discipuluncuna aywacäriptinna, Juanpita parlar chaychica runacunata Jesús cayno nirgan: “¿Ima ricajtaj chunyaj jircaman aywapäcurgayqui? ¿Shogushtano juc runata wayra ishquichiycajta ricayta munar?
25 ¿Imata ricayta munartaj? ¿Shumaj ropawan vistishga juc runata? ¡Shumaj vistishga rico runacunaga reycunapa wasincunachomi caycan!
26 Chauraga, ¿ima ricajtaj yargupäcushcanqui? ¿Juc profetata? Aumi, paynoga manami maygan profetapis cashgachu.
27 Paypitami cayno nir escribiraycan: ‘¡Ricay! Juc wilacojnëtami mandashaj gampa naupayquipa aywananpaj, paymi gampaj juc caminuta alistanga’.
28 Noga në, Juannoga manami ni pï runapis canchu. Ichanga Diospa Gobiernuncho ichic reguishga cajmi paypita más reguishga canga”.
29 Chaycho caycaj lapan runacuna y impuestuta cobrajcuna Jesús ima nishganta mayarcur Dios alita ruraj cashganta nipäcurgan. Paycunata Juan bautizashga captinmi chayno nipäcurgan.
30 Pero fariseucuna y Leyta reguejcuna Juan bautizananta mana munar, paycunapaj Diospa voluntänin ima cashganta despreciapäcurgan.
31 Jinala parlar Jesús caytapis nirgan: “¿Piwantaj tincuchëman cay runacunata? ¿Pïcunanotaj carcaycan?
32 Paycunaga mercaducho jamaraj wamracunano carcaycan, jucnin jucnin gaparayparaj cayno ninacärin: ‘Flautata tucarcaycaptëpis gamcunaga tushupäcushcanquichu, pampapacuycho canciuncunata cantapäcuptëpis gamcunaga wagapäcushcanquichu’.
33 Tantata mana micur vinuta mana upur Bautizacoj Juan chayamushganpitami gamcunaga nipäcunqui ‘demoniuyojmi caycan’ nir.
34 Pero Runapa Churin chayarcamur, micushganpita upushganpita gamcuna nipäcunqui: ‘¡Ricay! ¡Micular upular cacun, impuestuta cobrajcunapa y juchata rurajcunapa amigunpis caycan!’.
35 Imano captinpis, pipis lapanta alicunata rurashganchomi ricacämunga yachaj runa cashganta”.
36 Nircurna juc fariseo cutin cutin Jesusta nirgan wasinman micoj aywananpaj. Chaynami fariseupa wasinman yaycur mesacho jamacurgan.
37 Juchacunata rurar cawaj juc warmi, fariseupa wasincho Jesús micuycashganta musyar, shumajla mushcoj aceitiyoj botellan aptash aywargan.
38 Chayaycurna, Jesuspa guepanman yaycur chaquincuna caycashgancho unchurcur wagar galaycurgan. Weguinwan chaquincunata ushmashgantaga ajchanwan chaquichirgan, jinapis Jesuspa chaquinta cuyacuylawan muchaycur apashgan perfumashga aceitiwan lushipargan.
39 Chayta ricaycur Jesusta invitashgan fariseo shongulancho cayno yarpargan: “Cay runa rasunpa profeta carga, maynachi cuentata gocunman juchalata ruraj warmi yataycashganta”.
40 Chay runa ima yarpaycashganta musyar Jesús cayno nirgan: “Simón, wilapäshayqui”. Payna nirgan: “¡Mä wilapämay, Maestro!”.
41 “Ishcay runashi guellayta prestaj runapa jagan cargan, jucnin caj 500 denario* guellayta debej, jucnin cajna 50 denario guellayta.
42 Imanopapis pagayta mana puedipäcuptinshi, guellayta prestaj runa lapan jagancunata perdunaycurgan. Chauraga, ¿mayganraj chay prestaj runata masraj cuyanga?”.
43 Simón nirgan: “Más achca jaganta perdunashgan runachi”. Jesusna nirgan: “Aumi, chaynomi”.
44 Chauraga warmi caycashganman ticraycur Simonta cayno nirgan: “¿Cay warmita ricanquichu? Wasiquiman yaycamuptë yaculatapis chaquëcunapaj gomashcanquichu, pero cay warmi weguilanwan chaquëcunata ushmarcachir ajchanwan chaquichish.*
45 Jina yaycamushgaläpitami cay warmiga chaquëcunata cuyacuywan muchayculashga, pero gamga saludamarpis muchamashcanquichu.
46 Umämanpis aceitita winapämashcanquichu, cay warmi ichanga chaquëcunata perfumashga aceitiwan lushipämashga.
47 Chaymi alapa cuyacoj cashganraycu juchancuna jatun captinpis perdunashgana caycan. Ichiclata perdunta chasquej cajga ichiclata cuyan”.
48 Nircur chay warmita nirgan: “Juchayquicunapita perdunashgana caycanqui”.
49 Paywan mesacho jamarpaycajcuna cayno ninacärirgan: “¿Pitaj cay runaga caycan juchacunata perdunananpäga?”.
50 Pero Jesús chay warmita nirgan: “Yaracushpayquimi salvacushcanqui. Tranquilala aywacuy”.
