Lucas 2:1-52
2 Chay wichancho, César* Augusto juc mandatuta gorgan lapan runacuna censacärinanpaj.
2 Siriacho Quirinio runa gobernador caycaptinmi, chay punta caj censo ruracargan.
3 Chaymi lapancuna yurishgan marcaman censacoj aywargan.
4 Josepis Davidpa castan cashpan Galileapita Judeaman aywargan censacunanpaj, Nazaretpita Davidpa marcan Belencama.
5 Majachacashga María warminwanmi censacoj aywargan. Payga gueshyacunanpänami caycargan.
6 Chaycho carcaycaptinna wachay nanay Mariata charirgan.
7 Chauraga guechpa caj wamran yurirgan. Chay marcacho posada manana captin, uywacunata garapacunapaj sitiulaman wamranta telacunawan pituycur punuycachirgan.
8 Chay marcapa washa ladun pampa urancho, michicojcuna chacaypa uyshancunata täparcaycargan.
9 Elajpita* Jehovapa angelnin paycunata yuripargan,* Jehovapa chipchipyayninpis achicyamurgan. Chay michicojcunaga alapami manchacurgan.
10 Pero chay ángel cayno nirgan: “Ama manchacäriychu. Ali wilacuycunatami apaycämö, cay ali wilacuycunawanga lapan runacunami cushicäringa.
11 Cananmi Davidpa marcancho juc salvacoj yurishga, payga Señorninchi Cristo caycan.
12 Wilapäshayqui imano taripäcunayquipaj: chay iti wamraga telacunawan pitushga, uywacunata garapacunapaj sitiulachomi punuraycanga”.
13 Niycaptilan maychica angelcuna yuripäcamurgan* y Diosta alabarcaycargan cayno nir:
14 “Cielucho Dios alabashga cayculächun, y cay pachacho favorninta tarejcuna ali goyäcuchun”.
15 Angelcuna cieluman cuticäriptinna uyshata michejcuna cayno ninacärirgan: “Imanopapis Belenman aywananchi, Jehová musyachimashganchinola ima pasashganta ricanapaj”.
16 Chayno nirmi apuradula aywacärir, uywacunata garapacunapaj cajcho iti wamra punuraycajta taripäcurgan. Josewan Mariapis chaychomi caycargan.
17 Chayaycurmi wilapäcurgan chay itipita ángel ima wilapashgancunata.
18 Lapan chaycho caycajcuna almiracärirgan michicojcuna wilacushgancunata mayar.
19 Chay wilacuycunataga shongunman María churargan, chaylaman yarparar mana gongananpaj.
20 Ángel nishgannola lapanta wiyapäcushganpita y ricashganpita michicojcuna Diosta alabaraycar cuticärirgan.
21 Pusaj junajcuna pasarcuptin itipa chiulacunan* puntanta señalananpaj tiempo chayamuptin, Jesús nirmi jutinta churapäcurgan. María gueshyaj manaraj ricacuptinmi ángel mayna wilacurgan chay jutita apananpaj.
22 Jinamanpis Moisespa Leynin mandacushgannola paycuna purificacunanpaj* tiempo chayamurgan. Jerusalenman aywapäcurgan y chaycho wamrantapis Jehovapa naupanman apapargan.
23 Jina Jehovapa Leyninchopis escribiraycan: “Lapan guechpa olgu wamracuna Jehovapaj raquishga canga”.
24 Jehovapa Leynin nishgannola “ishcay culcushta o ishcay malwa* palumata” ofrendacärinanpaj apargan.
25 Jerusalenchomi cawaj alita ruraj y Diosta sirvej Simeón jutiyoj runa. Payga shuyaraycargan Israel marca consolashga* cananpaj y santo espiritupis paycho caycargan.
26 Jina Diosga santo espiritunwan Simeonta musyachirgan, Jehová mandamushgan Cristuta ricaycurraj wanunanpaj cajta.
27 Chauraga santo espíritu pushaptin templuman yaycurgan. Josewan Mariapis wamran Jesuswan yaycupäcurgan Ley nishgannola imata rurapäcunanpaj.
28 Chaychonami wamrata margarcur y Diosta alabar Simeón cayno nirgan:
29 “Lapanta Gobernaj Señorlä, cananga nishgayquinola ashmayniqui* tranquilula wanucunäta permitiycanqui,
30 nawëcuna ricayculashgana piwantaj salvaciunta apamunayquipaj cajta.
31 Chayno camacächishcanqui lapan runacuna ricapäcunanpaj.
32 Chacaraycaj naciuncunapa achquinmi caycan, y payraycu Israel marcayquipis ali ricashga canga”.
33 Wamrapita chayno wilacushganta wiyar taytan maman pasaypa almiracärirgan.
34 Chaypita Simeón paycunata bendicir, wamrapa maman Mariata cayno nirgan: “Wiyay, cay wamraraycu Israel marcacho achcajmi ishquipäcunga y achcajmi sharcupäcunga y contrantapis parlapäcunga,
35 chaynopa runacuna alita o mana alita yarpashgancunapis musyacanga. Gampa shonguyquipis espadawan tucsishgannorämi laquicuypita nanangapaj”.
36 Chaychomi Diospa profetan Ana jutiyoj chacwanpis caycargan, payga Aser tribupita Fanuelpa wamranmi cargan, y casaracushgan runanwan ganchis watalami targan,
37 cananga 84 watayoj viudana caycargan. Payga templucho ayunar y mañacushpan pagasta junajta Diosta sirviycälar caycargan.
38 Chay hora paycuna caycashganman aywarcur Diosta agradecicurgan y Jerusalén librashga cananta shuyarajcunata chay wamrapita parlar galaycurgan.
39 Chauraga Jehovapa Leynin nishgannola lapanta rurapacurir, paycunaga Galileacho caycaj Nazaret marcanman cuticärirgan.
40 Chay wamraga winarna* galaycurgan, calpasapa y yachaj mozumanna ticraycargan. Diospa favorninpis paycho imaypis caycargan.
41 Taytancunaga Jerusalencho ruracaj Pascua fiestaman aywapäcoj.
42 Chaymi Jesús 12 watayojna caycaptin costumbrincuna cashgannola, Jerusalencho chay fiestaman aywapäcurgan.
43 Fiesta ushariptinna paycunaga marcanpa cuticärirgan, pero Jesús* Jerusalencho quedacurgan. Taytancunaga chayta musyarganchu.
44 ‘Waquincunawanchari aywaycan’ nirmi paycuna entero junajna viajarcaycargan. Chaypitana familiancunacho y reguinacushgan runacunacho ashir galaycärirgan.
45 Mana taripäcurna Jerusalenman cutipäcurgan, chaychomi caypa wacpa ashipäcurgan.
46 Quimsa junaj pasarcuptinraj, templucho maestrucunapa chaupin cajcho jamaraycajta taripäcurgan, paycunata wiyaycargan y tapupaycarganpis.
47 Chaycho caycajcunaga almiracärirgan ali tantiacoj cashganpita y ima tapucärishgantapis ali contestashganta wiyar.
48 Chaycho caycajta ricaycurmi almirashga quedacärirgan, y maman nirgan: “Wamralä, ¿imanirtaj chayta rurashcanqui? Taytayquiwan pasaypa laquicurmi caypa wacpa mana jamaypa ashipäcushcä”.
49 Payna nirgan: “¿Imanirtaj ashircaycämashcanqui? ¿Manachu musyapäcushcanqui Taytäpa wasincho caycänäpaj cajta?”.
50 Chayno nishgantaga taytancuna tantiacärirganchu.
51 Chaypitana payga taytancunawan Nazaretman cutipäcurgan, y paycunapa maquincho* winargan. Mamanga lapan ima pasashgancunata shongulanman churargan.
52 Jesusga winashganman tupu imachopis yachaj cashgan y Diospa favorninta charashganpis ricacargan, y runacunapa naupanchopis ali ricashgami cargan.
Ichic wilacuycuna
^ Caynopis ninman “Romata gobernaj”.
^ Caynopis ninman “mayänipita”.
^ Caynopis ninman “ricaripargan”.
^ Caynopis ninman “ricacamurgan”.
^ Caynopis ninman “ishpacunan”.
^ Chayga cargan gueshyacushganpita limpiacunanpaj.
^ Caynopis ninman “pushapa”, “pichón”.
^ Caynopis ninman “shogashga”.
^ Caynopis ninman “uywayniqui”.
^ Caynopis ninman “jatunyar”.
^ Griego rimaycho nin “Jesús wamra”.
^ Caynopis ninman “paycunata casucular”.
