Lucas 4:1-44
4 Chauraga Jesús santo espirituta chasquircur Jordán mayupita witicurgan. Y Diospa poderninmi pushargan chunyaj jircaman
2 40 junaj, y micanaywan caycargan chay junajcuna imalatapis mana micushga car. Chaychomi Diablupis pruebaman churargan.
3 Chauraga payta Diablo cayno nirgan: “Diospa churin carga mä cay rumita tantaman ticrachiy”.
4 Jesusna cayno nirgan: “Escribishgami caycan: ‘Runacunaga manami micuylawanchu* cawan’”.
5 Chaypitana Diabluga alto caj sitiuman aparcur, cay mundupa lapan gobiernuncunata elajpita* yurircachimur ricachirgan.
6 Chauraga Diablo cayno nirgan: “Maquiquicho cananpaj lapan gobiernucunapa imaycancunata goycushayqui. Nogatapis maquëcho caycänanpaj entregamashga y nogapitami caycan pitapis goycunäpaj.
7 Chaymi juc cutilapis aduramaptiquega cay lapanta goycushayqui”.
8 Jesusna nirgan: “Escribishgami caycan: ‘Jehová Dioslata aduray, paylata sirviy’”.
9 Chaypitana Diabluga, Jerusalencho caycaj templo janancho, cantun cajman aparcur cayta nirgan: “Diospa churin carga mä caypita uraman saltay.*
10 Escribishgami caycan: ‘Diosmi angelnincunata mandamunga salvashunayquipaj’,
11 y ‘maquincunawanmi charishunqui chaquiquitapis rumiman mana tacacunayquipaj’”.
12 Jesusna nirgan: “Escribishgami caycan: ‘Manami Jehovata obligashwanchu yanapamänanchipaj’”.
13 Chay pruebacunapa pasarcachirna Diabluga aywacurgan, juc cuticho pruebata yapay churapashgancama.
14 Chaypitana Jesusga santo espiritupa poderninwan Galileaman cutirgan, y chaycho caycaj entero marcacunachomi musyacargan pay pï cashganta.
15 Sinagogancunachopis yachachicojmi y pï maypis paypitaga ali cajlata parlapäcoj.
16 Nircur winashgan Nazaret marcaman aywargan y sábado junajcuna imaypis rurashgannola sinagogaman yaycurgan. Chaycho ichircurgan leinanpaj.
17 Chaypitana profeta Isaías escribishgan rolluta Jesusta macyaycurgan.* Payna chay rolluta quichaycur tarirgan cayno nir escribishga caycashganta:
18 “Jehovapa espiritun nogacho caycan, paymi acramashga pobricunata ali wilacuycunata wilapänäpaj. Mandamashga ashmaycuna* libre cananpaj wilacunäpaj, gapracunapis ricananpaj y nacaycajcunapis librashga cananpaj,
19 jina Jehovapa favorninta chasquinapaj tiempo chayamushganta wilacunäpäpis”.
20 Nircurna rolluta wancuycur sinagogacho yanapacoj runata cutiycachir jamacurgan. Chaycho caycaj lapancuna jinala payta ricarpaycargan.
21 Jesusga caynopis parlar galaycurgan: “Cay Diospa palabrancho leimushgäga cananmi cumplicaycan”.
22 Lapan runacunami Jesuspita alita parlapäcoj y almiracärejpis lindo parlamushganta wiyar. Cayno nipäcoj: “Paymi caycan Josepa churin ¿au?”.
23 Jesusna nirgan: “Waquincuna cayno nishganta nipäcamanquichi: ‘Doctor carga mä quiquiqui jampicuy’. Caytapis nipäcunquichi: ‘Capernaúm marcacho rurashgayquita mä yurishgayqui marcacho ruray ari’”.
24 Caytapis nirgan: “Rasunpami niycä, maygan profetatapis jinan marcanchoga chasquipäcunchu.
25 Elías cawashgan wichanchoga Israel marcacho achca viudacuna cargan, jina chay wichancho quimsa wata, sojta quillacuna mana tamyaptin may chaycho alapa muchuy cargan.
26 Eliastaga Dios mandarganchu chay viudacunaman aywananpaj, paytaga mandargan Sidoncho caycaj Sareptapita juc viudalaman aywananpaj.
27 Jina profeta Eliseupa tiempuncho, Israel marcacho achca runacuna lepra gueshyawan caycaptinpis, payga maygantapis jampirganchu. Siriapita Naamán jutiyoj runalata aliyächirgan”.
28 Chauraga Jesús nishganta mayar, sinagogacho caycajcunaga lapancunami pasaypa rabiacärirgan.
29 Chaymi sharcupäcur Jesusta charircur apapäcurgan chay marcapa más tunannin cajman, chaypita tangaripäcunanpaj.
30 Pero payga chaupincunapa pasarir aywacurgan.
31 Nircur Galileacho caycaj Capernaúm marcaman urämurgan. Chaychoga sábado junajcuna runacunata yachachej,
32 yachachicushgancuna Diospita shamushganraycu runacunaga almirashgaraj quedacärirgan.
33 Chay sinagogacho juc endemoniado runa caycargan y gaparayparaj cayno nirgan:
34 “¿Imatataj nogacunapita munanqui Nazareno Jesús? ¿Shamushcanqui ushachipäcamänayquipaj? Musyämi pï cashgayquita, gamga caycanqui Diospa Santunmi”.
35 Pero Jesusga chay demoniuta gayaparcurmi cayno nirgan: “Upälacuy. Paypita yarguy”. Nircur chay demoniuga runata pampacho sajtarcur mana dañaylapa yargucurgan.
36 Chayta ricaycur lapancuna almirashga ninacärirgan: “¡Ricay cay runa demoniucunata imano parlapashganta! ¡Mandacuptenga, runacunapita jucla yargun!”.
37 Chay urancho caycaj marcacunachoga pï maypis parlapäcojmi Jesuspita.
38 Chaypitana sinagogapita yargurir Jesús Simonpa wasinman yaycurgan. Y Simonpa suedran pasaypa fiebriwan caycargan. Chaymi Jesusta ruwacurgan jampiycunanpaj.
39 Chaymi pay cajman witircur* fiebrinpita aliyächirgan, chauraga fiebrin ilacargan. Nircurna chay warmiga paycunapaj yanucurgan.
40 Inti jegarcuptinna, runacunaga ima gueshyawanpis nacaycajcunata apapargan, y payna jucnin jucninman maquinta churarcur aliyächirgan.
41 Achca runacunapitapis demoniucuna ‘gammi Diospa Churin caycanqui’ nir gaparayparaj yargoj. Chaymi Jesús paycunata upälachirgan, Cristo cashganta musyashganpita mana parlapäcunanpaj.
42 Wararcuptin payga chaypita yargurgan y chunyaj sitiupa aywacurgan, pero achca runacuna ashipäcurgan. Pay cashganman chayaycärirna mana aywacunanpaj ruwacärirgan.
43 Jesusna nirgan: “Waquin marcacunamanpis aywashämi Diospa Gobiernunpita ali wilacuynincunata wilacunäpaj. Chaypämi Tayta Dios mandamashga”.
44 Chauraga Judeapa sinagogancunacho jinalami yachachicur caycargan.
