Lucas 13:1-35
-
Pipis arrepenticunanpaj o ushacashga cananpaj (1-5)
-
Mana wayoj higo plantapaj parlar tincuchishgan (6-9)
-
Mana derechacayta puedej warmita sábado junajcho jampin (10-17)
-
Mostaza murupaj y levadurapaj parlar tincuchishgancuna (18-21)
-
Quichqui puncupa yaycunapaj imaycataraj ruranapaj (22-30)
-
Chay atoj Herodes (31-33)
-
Jerusalenpaj Jesús laquicun (34, 35)
13 Chay junajcunachomi waquin runacuna Jesusta wilapargan, waquin galileo runacuna sacrificiuncunata rurarcaycaptin paycunata Pilato wanuchishganpita.
2 Chayta mayarcushpan Jesús cayno nirgan: “Cay runacuna nacapäcushganpitaga, ¿gamcuna yarparcaycanqui waquin galileucunapita paycuna más juchayoj cashganta?
3 Manami chaynochu. Gamcunapis mana arrepenticärishpayquega ushacaymanmi chayapäcunqui.
4 Siloam torripis 18 runacunapa jananman juchur paycunata wanuchirgan, ¿yarparcaycanqui Jerusalencho lapan runacunapita paycuna más juchayoj cashganta?
5 Manami chaynochu. Gamcunapis mana arrepenticärishpayquega paycunanomi ushacayman chayapäcunqui”.
6 Chaypitana cay tincuchicuywan yachachicurgan: “Juc runapa uva chacranchoshi higo plantancuna caycargan. Wayuyninta palaj aywarga manashi imatapis tarirganchu.
7 Nircur uva chacrata täpaj runata cayno nirgan: ‘Cay higo plantata muturiy, quimsa watapana wayuyninta ashej shamuycä, pero imatapis tarëchu, ¿manachu yangala chacrächo ichiraycan?’.
8 Chay runana nirgan: ‘Tayta, juc wata masla shuyaycushun, ojtiparir ojtiparir chulpata* gaycapäshaj.
9 Nircur wayumuptenga alimi canga, pero mana wayumuptenga muturinqui’”.
10 Sábado junajcho juc sinagogacho Jesús yachachicuycargan.
11 Chaychomi caycargan derechacayta mana puedej juc warmi, payga 18 watapa chayno gueshyaycargan juc demoniuraycu.
12 Jesús chay warmita ricaycur cayno nirgan: “Mamay, gueshyayquipita aliyashgana queday”.
13 Nircur jananman maquinta churarcuptilan payga derechuna ichircur Diosta alabar galaycurgan.
14 Sábado junajcho Jesús jampishganta ricaycur, sinagogacho autoridäyoj runa pasaypa piñacur* chaycho caycaj runacunata cayno nirgan: “Sojta junaj caycan arunapaj, chay junajcunacho shapäcamuy jampicärinayquipaj, sabaduchoga ama”.
15 Señor Jesusna nirgan: “Ishcay cara runacuna, ¿manachu maygalayquipis sábado captinpis corralcho wataraycaj toruyquita burruyquita pascarcur yacuta upuchej apanqui?
16 Cay warmiga Abrahanpa wamran caycan, payta 18 watapa Satanás nacachishga captenga, ¿manachu nacayninpita librashga canman sábado junaj captinpis?”.
17 Chayno nishganta wiyarcur, contrancho caycajcunaga pasaypa pengacärirgan, pero waquin runacunaga almiracuypaj cajcunata Jesús rurashganta ricar alapa cushicärirgan.
18 Jina caytapis nirgan: “¿Imamantaj Diospa Gobiernunga tincun, y imawanraj tincuchëman?
19 Huertancho juc runa mostaza muruta murushganno caycan. Chay muru winarcur jatun yoraman ticrargan y ramancunachopis pishgucuna gueshwancunata* rurargan”.
20 Yapaypis cayno nirgan: “¿Imawanraj Diospa Gobiernunta tincuchëman?
21 Levadurata juc warmi quimsa medida* harinawan tincuchishgannomi caycan, y lapan masaga shumaj jacacurcurgan”.
22 Jerusalenman aywaycarnami marcacunacho y caseriucunacho runacunata yachachej.
23 Chaycho juc runa tapurgan: “Señor, ¿walcajlachu salvacunga?”. Jesusna nirgan:
24 “Quichqui puncupa yaycupäcunayquipaj imaycataraj rurapäcuy. Achcaj yaycuyta munarpis puedipäcungachu.
25 Wasiyoj runa puncunta llavircuptin, gamcunaga puncuta tacar wajtacho quedacärinqui cayno nir: ‘¡Señor, puncuta quichayculay ari!’. Pero chay runana nenga: ‘Piraj capäcunquipis’.
26 Gamcunana cayno nipäcunqui: ‘Naupayquichomi micur upur capäcushcä, y jatun callëcunachopis yachachicushcanqui’.
27 Pero wasiyoj runa nenga: ‘Maypitaraj cacärinquipis. ¡Mana ali cajta rurajcuna, naupäpita lapayqui witicäriy!’.*
28 Gamcunaga wajtacho gargushga cashgayquichomi pasaypa wagar quiruyquicunatapis cachupäcunqui, Diospa Gobiernuncho Abrahanta, Isaacta, Jacobta y lapan profetacuna carcaycajta ricar.
29 Jina inti yargamunan y jeganan ladupita, norte caj y sur caj ladupita runacuna shapäcamunga, y Diospa Gobiernuncho juc mesacho jamacäringa.
30 Cayno nishgäta mayapäcuy: waquin ultimucho caycajcuna naupacho caycanga, y waquin naupacho caycajcuna ultimucho caycanga”.
31 Chay horalacho fariseucuna shamur Jesusta cayno nirgan: “Caypita aywacuy. Herodes wanuchishunayquipaj caycan”.
32 Payna nirgan: “Aywarcur chay atojta cayno nipäcuy: ‘Ricay, cananpis waraypis demoniucunata gargushaj, runacunata jampishaj y quimsa junajcunacho usharishaj’.
33 Pero canan, waraypis y warantinpis nogaga jinalami viajaycäshaj. Jerusalenpita juc laduchoga manachi juc profetata wanuchipäcunmanchu.
34 Wawalau, Jerusalén, Jerusalén, profetacunata wanuchej y wilacojcunatapis sagmaypa wanuchej. ¡Achca cutimi chipshancunata walpa oglashganno churiquicunata shuntayta munargä! Pero gamcunaga munapäcushcanquichu.
35 Tayta Diosmi wasiquicunata jaguirishga. Cananpitaga gamcuna ricapäcamanquinachu, cayta nipäcushgancama: ‘¡Jehovapa* jutincho shamoj cajga bendito cayculächun!’”.
