Feel leit sinn concerned veyyich’s shawda es si mayna es mensha am du sinn zu di eaht, un zu di sacha es layva uf di eaht. Bei vass samm hohch-glandi leit sawwa, mensha sinn feel shawda am du zu sacha uf di eaht, may es selayva difoah. Un si sawwa sell macht es sirtendi sacha als vennichah un vennichah vadda zayla.

 Zayla mensha di eaht fadauva? Adda zayla si selayva able sei fa layva inna vayk es si kenn shawda may doon zu di eaht adda zu di sacha uf di eaht?

 Feel leit es research doon sinn shuah es mensha di eaht protekta kenna un layva inna vayk es si nett di eaht shawda doon. Un anri sawwa fa dess macha shaffa missa en latt tshaynshes gmacht sei un awl an di saym zeit. Samm funn di tshaynshes sinn:

•   Bessah vadda in da vayk es leit acht gevva uf’s land, da bush, di marshes, un di oceans.

•   Diffandi vayya droh gay fa bavvahra un electricity macha.

•   Tshaynsha in da vayk es ess-sach gmacht un kshibt vatt, so es leit may plant-based sacha essa un vennichah flaysh, un so es nett so feel ess-sach gyoost un gwayst vatt.

•   Vissa es en goot layva nett yusht kumd funn en latt sacha havva.

 Vass daytsht du sawwa? Is’s reasonable fa denka es governments, businesses, un anri leit zammah shaffa zayla vann si nee nett henn difoah? Adda denksht du es dess nett possible is koss dayl leit sinn reeli greedi, selfish, un gevva nix drumm veyyich da future?​—2 Timotheus 3:1-5.

 Di Bivvel sawkt di eaht zayld nett fadauva gay. Es sawkt favass mensha nett selvaht di eaht sayva kenna, un ekshplaynd vass fa tshaynshes es gmacht sei missa. Es sawkt uns aw vi dee tshaynshes gmacht sei zayla.

 Favass mensha nett selvaht di eaht sayva kenna. Unsah Gott, Jehova, a hott di eaht gmacht un hott mensha ksawt fa acht gevva druff. (1 Mosi 1:28; 2:15) Da aynsisht vayk es si sell du kenna is vann si’s doon vi eah sawkt un no een heicha. (Shpricha 20:24) Avvah, in blatz funn sell henn si nett Jehova keicht un henn boviaht decisions macha fa sich selvaht. (Breddichah 7:29) Uf iahra ayknes kenna mensha nett acht gevva uf di eaht, un even vann si kenda es dayt nett lang laesta.​—Shpricha 21:30; Jeremia 10:23.

 Da tshaynsh es gmacht sei muss. Gott zayld mensha halda funn di eaht fadauva. (Offenbarung 11:18) Eah zayld nett di governments, di businesses, adda leit es di eaht am shawda du sinn helfa di tshaynshes macha, avvah eah zayld ebbes shunsht du. (Offenbarung 21:1) Sell is favass Jehova sawkt in Offenbarung 21:5, “Gukk moll, ich mach alles nei.”

 Vi dee tshaynshes gmacht sei zayla. Jehova zayld mensha governments replaysa mitt en government in da himmel, un sell is Gott Sei Reich. Da Jesus is da kaynich funn sellah government un’s zayld no ivvah di eaht roola.​—Daniel 2:44; Matthäus 6:10.

 Gott Sei Reich zayld mensha teetsha vi fa layva vi Gott havva vill. Vann mensha abheicha zu een, no zayla si able sei fa bessah acht gevva uf di eaht un alles es druff is. (Jesoiya 11:9) Di Bivvel sawkt vi Gott Sei Reich leit helfa zayld en haebbi layva havva un alles enjoya uf di eaht unni si shawda du. Do sinn dayl sacha es Gott Sei Reich du zayld:

•   Macha es alli-ebbah ess-sach hott.​—Psalm 72:16.

•   Alles uf di eaht viddah pirfikt macha.​—Jesoiya 35:1, 2, 6, 7.

•   Macha es mensha un animals goot along kumma mitt nannah.​—Jesoiya 11:6-8; Hosea 2:18.

•   Macha es nix shlechtes may haebbend koss funn shlimm veddah, earthquakes, un sacha vi sell.​—Markus 4:37-41.

 Miah kenna shuah sei es Gott Sei Reich glei dee tshaynshes macha zayld. Fa may information, lays da article “When Will God’s Kingdom Rule the Earth?”