Moukerebai er Ngike el Mo Meskid a Diak a Ulebengelel el Klengar
Moukerebai er Ngike el Mo Meskid a Diak a Ulebengelel el Klengar
“Chelechal mcheleoch el ngelekel a Dios, e ng kiriu el melasem el mo ua ingii.”—EFE. 5:1.
NGSEBECHEM EL MESAOD?
Ngmilekerang a Jesus e oukerebai a blekerdelel a Jehovah?
Kede mekerang e oukerebai a blekerdelel a Jehovah el uldimukl er a bltkil a rengul?
Ngera uchul me ngkired el mo kerekikl er a uldesued?
1. Ngera el duch a ngosukid el mo oukerebai er a Jehovah?
A JEHOVAH a milebid el ngar er ngii a duch er kid el mo medengei a uldesuir a rechad, alta ngdirkak bo dechelebangel a tekoi el lechelebangel er ngii. (Monguiu er a Efesus 5:1, 2.) Ngmekerang e tia el duch a ngosukid el mo oukerebai er a Jehovah? E ngera uchul me ngkired el mo kerekikl er a rolel a dousbech er tia el duch er kid?
2. Ngmo ua ngera uldesuel a Jehovah sel lomes er kid el chormang?
2 A Jehovah a mla tibir a kmal ungil el klengar el kired el diak a ringel er ngii. Me a rengellitel me a ‘rekuk bebil el sib’ a omes el bedul uchei el kirel a diak a ulebengelel el klengar el ngar er a eanged me a chutem. (Jn. 10:16; 17:3; 1 Ko. 15:53) Me nguaisei, engdi a Jehovah a ungil el medengei a ringel el sebechel el duubech el me er kid er chelechang. A ngar er a mong, e a Jehovah a kmal mlo mekngit a rengul er sel taem el rechedal a chilarm er a beluu er a Ekipten. (Isa. 63:8, 9) Me a uriul, e sel taem el rechedal a liluut el meleketek er a templo e dirrek el mlo medakt er a recherrouir e a Jehovah a mle medengei a uldesuir. Me ngdilu er tir el kmo: “Ngikel mo merutech er kemiu a rutechii a chelsul a medak.” (Sek. 2:8) Me ngdi ua chedil el betik a rengul er a ngelekel e a Jehovah a betik a rengul er a remesiungel e soal el olengeseu er tir. (Isa. 49:15) Kede oukerebai er a bltikerreng er a Jehovah sel dolasem el mo medengei a uldesuir a rechad e melatk er a uldesued okmo kede mo chelebangel a tekoi el lechelebangel er ngii.—Psa. 103:13, 14.
A JESUS A ULUUBLTIKERRENG EL UA JEHOVAH
3. Ngmle ua ngera uldesuel a Jesus el kirir a rechad?
3 A Jesus a mle ungil el medengei a ringelel a uldesuir a rechad alta ngdirkak a ta el lechelebangel a tekoi el lechilarm er ngii. El ua tiang, ngmle medengei el kmo a rebetok el chad a kmal mle meringel a klengar er tir. A remengeteklel a klechelid a uluumulak er tir e dirrek el riruul a betok el llach el dimlak el ngar er a Dios el mei. Me a rechad a kmal mle medakt er tir. (Mt. 23:4; Mk. 7:1-5; Jn. 7:13) Me alta e a Jesus a dimlak lemedakt er tir e dirrek el dimlak loumerang a blulekngir, engdi ngmle ungil el medengei a uldesuir a rechad. Ngkmal mlo mekngit a rengul er a lesterir el chuarm. Ngdimlak a ngeso el mo er tir, “el ua sib el diak a mengkerengel.” (Mt. 9:36) Me a Jesus a mle ua Demal el “chubechub e betik a rengul.”—Psa. 103:8.
4. Ngmilekerang a Jesus er a lesterir a rechad el chuarm?
4 A Jesus er a lesterir a rechad el kmal chormang, e ng ngilsuterir e le ngmle betik a rengul er tir el di ua Demal. El ua tiang, ngmla er ngii a taem el Jesus me a rechapostol er ngii a mirrael er a kemanget el omerael el mo omerk er a klumech, me te kmal mlo mesaul a bedengir me ngmle kirir el mo olengull. Engdi a Jesus a milsterir a rebetok el chad el mengiil er ngii. Me alta ngkmal mle mesaul a bedengel, engdi ngmle medengei el kmo te uluusbech a ngeso, me ngmlo “olisechakl er tir a betok el tekoi.”—Mk. 6:30, 31, 34.
BO LEBETIK A RENGUM EL UA JEHOVAH
5, 6. Ngkired el mekerang a lsekum ngsoad el mo oubltikerreng el ua Jehovah? Mosaod. (Momes er a siasing er a uchelel a suobel.)
5 Ngkired el mekerang a lsekum ngsoad el mo oubltikerreng el ua Jehovah? Ka molatk er a kekerei el odam el ngklel a Alan. Ngmelatk er a chuodel el odam el diak el sebechel el merael e dirrek el mekngit a osengel. Me ngmelatk er a tekingel a Jesus el kmo: “Moruul el mor a re chad a ikel somiu a loruul el ekor kemiu.” (Lk. 6:31) Me a Alan a di mle ngii el oker el kmo, ‘Ngera el tekoi a soak a rebebil a loruul el kirek?’ e melekoi el kmo, ‘Ngkmal soak a kibo mousekool a basket!’ Engdi ngikang a rubak, me ngdiak el sebechel el oubasket. Me a Alan a bai kirel el di ngii el oker el kmo, ‘Okmo ak ngike el odam, e ngera el tekoi a soak a rebebil a loruul el kirek?’
6 Me alta e a Alan a dirk kekerei el chad, engdi ngmelatk el kmo ngua ngera klengar er ngika el rubak. Me ngmengoit a taem el obengkel e kerekikl el orrenges sel longedecheduch. E seikid e ngmocha medengei el kmo ngmeringel er ngika el odam el menguiu er a Biblia e mo merael el oldingel a obliil. Me ngmedengei a ngeso el lousbech, e kmal soal el meruul aike el sebechel el olengeseu er ngii. Me sel bo dodengei a uldesuir a rechad e doubltikerreng el mo er tir, e kede mo ua Jehovah.—1 Ko. 12:26.
7. Kede mekerang e mo medengei a ringelir a rudam er kid?
7 A lebebil er a taem e ngmeringel er kid el mo medengei a ringelir a rechad, el ileakl a lsekum ngdirkak bo dechelebangel a osisiu el tekoi. El ua tiang, a rebetok el odam er kid a chuarm a ringel e le te smecher, me a lechub e te miltemall, me a lechub e te chudelang. A rebebil a kmal chuarm e le ngmekngit a uldesuir el di kirir, me a lechub e ngkmal suebek a rengrir, me a lechub e ngmle mekngit a omeruul el mo er tir er a lengalek. Me a rekuk bebil a di tir el omekeroul er a rengelekir me a lechub e a rechedal a telungalek er tir a diak losiou er a Jehovah. A rebek el chad a ngar er ngii a mondai er tir, e oumesingd er ngii a kuk ngodech er a mondai er kid. Me nguaisei, engdi ngsoad el olecholt a bltikerreng el mo er tir e ngosuterir. Me kede mekerang? A rebek el chad a kakerous a ngeso el lousbech. Me a lsekum kede mo kerekikl el orrenges e melasem el mo medengei a uldesuel a chad, e kede mo meduch el olengeseu er ngii. Nglocha sebeched el omeklatk er ngii er a uldesuel a Jehovah el kirel a mondai er ngii me a lechub e kede ngosuir el okiu a kuk ta er a rolel. E sel doruul el uaisei, e kede oukerebai er a Jehovah.—Monguiu er a Rom 12:15; 1 Petrus 3:8.
BO LUNGIL A BLEKERDELEM EL UA JEHOVAH
8. Ngera ngilsuir a Jesus el mo ungil a blekerdelel?
8 A Jehovah a ungil a blekerdelel el mo er a rokui el chad. (Lk. 6:35) Me a Jesus a kmal di ua Demal. Ngera ngilsuir a Jesus el mo ungil a blekerdelel el mo er a rechad er sera lengar er a chutem? Ngmle sebechel el melatk er a uldesuir el kirel aike el bo lolekoi me a bo loruul. El ua tiang, a ta el redil el riruul a betok el mekngit el tekoi a mlo er a Jesus. Ngkmal lilangel me a iuechel a medal a dilekimes a ochil a Jesus. A Jesus a mle sebechel el mesa el kmo ngkmal uluuchel er a rengul er aike el mekngit el tekoi el lurruul. Me ngmilechesuar el kmo a bo lemekngit a tekingel el mo er ngii e ngkmal mo mekngit a rengul. Me ngbai chilat er ngii er a ungil el omerellel e uluusubes a kngtil. A Jesus a dirrek el mle ungil el mengedecheduch er ngike el Farisi el mle mekngit a uldesuel el kirel a tekoi el dilubech.—Lk. 7:36-48.
9. Ngmekerang e mo ungil a blekerdeled el ua Jehovah? Mosaod.
9 Kede mekerang e mo ungil a blekerdeled el ua Jehovah? Ngkired el mo ungil omdasu er a uchei er a doruul me a lechub e dolekoi a tekoi el mo tomall a rengrir a rechad. A Paulus a milluches el kmo, a Kristiano a “diak le kirel toketok. Ng bai ungil er a re bek el chad.” (2 Ti. 2:24) El ua tiang, molatk er a rolel el sebechel el mo ungil a blekerdelem el ngar er aika el blekeradel: Ke mo mekerang a lsekum a merreder er a urerem a diak lungil el meruul a urerel? Ke mo kmo ngerang el mo er a odam el mei er a miting er a uriul er a ble ledibus el betok el buil? Ke mekerang e mo ungil er a chad el melekoi el kmo ngkmal mechesang sel moldingel a obliil? A lsekum a bechim a oker er kau er a uchul me ngdimlak msbedii el kirel a tekoi el bo moruul, e kau ngmo ungil a blekerdelem el mo er ngii? Ngkired el melatk a uldesuir a rechad e melatk el kmo a tekinged ngerang mo rullii el mo er tir. E seikid e kede mo medengei a tekoi el kired el melekoi e dirrek el meruul me bo lungil a blekerdeled el ua Jehovah.—Monguiu er a Osisechakl 15:28.
BO LEMELLOMES A RENGUM EL UA JEHOVAH
10, 11. Ngera mo ngosukid el oukerebai er a llomeserreng er a Jehovah? Mosaod.
10 A Jehovah a kmal mellomes a rengul me ngsebechel el melilt aike el tekoi el lodengei el kirel a ngar medad el klebesei. Me alta ngdiak el sebeched el mo medengei a ngar medad el klebesei, engdi ngsebechel el mo mellomes a rengud. El mekerang? A uchei er a dengiltii a tekoi el bo doruul e ngkired el melatk el kmo tiang ngerang mo rullii el kired kid me a rebebil. Ngdiak el soad el mo ua rechad er a Israel. Ngdimlak lolatk er a tekoi el mo duubech el mo er tir a lsekum te mo diak lolengesenges er a Jehovah. E dirrek el dimlak lolatk er sel deleuill er tir me Ngii me aike el rokui el tekoi el bla leruul el kirir. A Moses a mlo melechesuar tia el tekoi me ngmle medengei el kmo a rechad er a Israel a mo meruul a mekngit el tekoi. Me ngdilu el kmo: “A Israel a diak a uldesuel beluu; ng di diak a llomeserreng er tir. Ng diak lesa el kmo ng ngera uchul me te mlo mechitechut, ng diak el sebechir el mtebengii sel dilubech.”—Dut. 31:29, 30; 32:28, 29.
11 El ua tiang, a lsekum ke kelatk kau me a ta er a chad, e lak mobes el kmo a uldesuem el soam el mo obengkel ngii el chad a kmal mo mesisiich. Me a leuaisei, e bo mkerekikl me lak moruul a ngii di el ngerang el sebechel el tomellii sel mekreos el deleuill er kau me a Jehovah! Ngbai kirem el mo oltirakl er a uleklatk er a Jehovah el kmo: “A medengei a tekoi el chad a mo mesa tellemall a le mei e oibngii er ngii, e ngdi diak lomdasu el chad a di mong, e a uriul e ng ouuchel er a rengul.”—Osi. 22:3.
BO MKEREKIKL ER A ULDESUEM
12. Ngmekerang a uldesued e sebechel el tomellid?
12 A mellomes a rengul el chad a kerekikl er a uldesuel. A uldesued a di ua ngau el sebechel el ngosukid me a lechub e ngtomellid. Sel dekerekikl, e a ngau a sebeched el ousbech er ngii el meruul a keled. Engdi a lsekum ngdiak dekerekikl e ngsebechel el sosebii a blid e dirrek el mekodkid. Me ngdi osisiu, ngungil a bo dolatk aike el tekoi el bla desuub er a Jehovah. Engdi a lsekum kede melemolem el omdasu el kirel a deleboes el omeruul, e ngmukeroul a ngelbesel a rengud, e tia sebechel el rullid el mo meruul aika el tekoi. E tiang a mo tomellii sel deleuill er kid me a Jehovah.—Monguiu er a Jakobus 1:14, 15.
13. Ngerang millatk er ngii a Eva?
13 Ngsebeched el ngma klubeled er a omerellel a kot el redil el Eva. A Jehovah a dilu er a Adam me a Eva me lak bo longang er a rodech er a “kerrekar er a mo medengei a ungil ma mekngit.” (Gen. 2:16, 17) Engdi a Satan a dilu er a Eva el kmo: “Ng kmal diak le merang, ng diak bo mad. A Dios a melekoi el ua isei ele ng medengei el kmo sel bo mkelii e ng mo mellomes a rengmiu, e mo ua ingii el mo medengei a ungil ma mekngit.” Me a Eva a millatk el kmo ngkmal mo ungil a klengar er ngii a bo el di lengii el melilt el kmo ngera ungil me a ngera mekngit. Ngmillemolem el omdasu er tia el tekoi e milsa “tial kerrekar el kmal klebokel ma redechel lungil osenged er ngii.” Me ngera dilubech? “Ng ngiluu a redechel el menga er ngii e sola e msa bechil me ng dirrek el milenga er ngii.” (Gen. 3:1-6) Me seikid e “a klengit a siliseb er a beluulchad . . . ma kodall a ulekiu a klengit el mei.” (Rom 5:12) Me a Eva a dimlak el kirel el melemolem er a mekngit el uldesuel!
14. Ngera el uleklatk a lebeskid a Biblia el kirel a deleboes el omeruul?
14 Kede medengei el kmo, a kngtil a Eva a dimlak el deleboes el omeruul. Engdi a Biblia a mengelechel er kid me lak di domdasu el kirel a deleboes el omeruul. A Jesus a dilu el kmo: “A chad el omes er a redil e mo nguibes er ngii a mla mor a laokreng er a chelsel a rengul.” (Mt. 5:28) Me a Paulus a milengelechel el kmo: “Le mereko di oltirakl a bedengiu el melemolem a ngelbesel.”—Rom 13:14.
15. Ngera kired el mengudel, e ngera uchul?
15 A Biblia a dirrek el melekoi el kmo ngkired el mo odeuir a rengul a Jehovah e diak di dolemolem el omdasu el kirel a ilteet. Ngmo lmuut me a lsekum a chad a meteet, e a ududel a diak el sebechel el omekerreu er ngii. (Osi. 18:11) A Jesus a dilu el kmo a rechad a mekebelung, a lsekum te “mengudel a kerruul el di kirir e diak le merau er medal a Dios.” (Lk. 12:16-21) Me sel ‘dongudel a mekreos el klalo er a eanged’ el okiu sel doruul a soal a Jehovah, e ngmo dmeu a rengul me kid me ngdirrek el mo dmeu a rengud. (Mt. 6:20; Osi. 27:11) Me a ungil el deleuill er kid me a Jehovah a lmuut el klou a kerresel er a ngii di el tekoi.
LAK DI LESEBEK A RENGUM
16. Ngera sebechel el ngosukid sel bo lesebek a rengud?
16 A lsekum kede melasem el mo merau, e ngbai mo uchul e ngdi suebek a rengud. (Mt. 6:19) A Jesus a dilu el kmo tirke el blechoel el suebek a rengrir el kirel a udoud a mo meringel er tir el nguu a Rengedel a Dios el mo kot er a klengar er tir. (Mt. 13:18, 19, 22) A rebebil a suebek a rengrir er a bek el taem el kirel a mekngit el tekoi el sebechel el duubech el mo er tir. Engdi a lsekum ngdi suebek a rengud, e ngsebeched el mo smecher me a lechub e ngmo mechitechut a klaumerang er kid er a Jehovah. Ngbai kired el mo mui el oumerang er a Jehovah el kmo ngmo ngosukid. A Biblia a kmo: “A sebekreng a mekberedii a rengul a chad, e a ungil tekoi a rullii el mo ungil a rengul.” (Osi. 12:25) Me a lsekum ngsuebek a rengum, e mongedecheduch er a chad el ngii a mesiou er a Jehovah e dirrek el ungil el medengelkau. A demam me a lechub e ngdelam, me a lechub e ngbechim, me a lechub e ngkmeed el sechelim a sebechel el smisichau el mo mui el oumerang er a Jehovah e ngosukau me lak el sal mo suebek a rengum.
17. Ngmekerang a Jehovah e ngosukid sel bo lesebek a rengud?
17 A Jehovah a kot el ungil el medengelkid el kuk ngaruchei er a ngii di el chad, me ngsebechel el ngosukid el mo chelellakl a rengud. A Paulus a milluches el kmo: “Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, el di blechoel el mereng a sulel. E a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu el oltirakl er a Kristus Jesus.” (Fil. 4:6, 7) Me sel bo lesebek a rengum e molatk a ngeso el bo lomeskau a Jehovah me lolemolem el mesisiich a deleuill er kau me ngii. Ngmo ngosukau el okiu a rudam me a rudos er kau, me a remechuodel er a ongdibel, me a blak a rengul el mesiou, me a rechanghel, me a dirrek el Jesus.
18. Ngmekerang a duch er kid el melatk a tekoi e ngosukid?
18 Kede mla suubii el kmo, kede oukerebai er a Jehovah sel dousbech er a duch er kid el mo medengei a uldesuir a rechad. (1 Ti. 1:11; 1 Jn. 4:8) Ngmo dmeu a rengud sel doubltikerreng e mo ungil a blekerdeled el mo er a rechad, e mesa tellemall a lemei e oibngid er ngii, e mo diak lesebek a rengud er a bek el taem. Me dolemolem el melatk el kirel a klengar er kid er a chelsel a beches el beluulechad e mo er sel tkurrebab el sebeched el oukerebai er a Jehovah.—Rom 12:12.
[Aike el Ker er a Suobel]
