1-2. Ngera el mengasireng el tekoi a dilubech er a Pentekost er a 33 C.E.?

NGTUTAU er a Sandei er a beluu er a Jerusalem. E tiang a rak er a 33 C.E., el sils er a Pentekost. A kekerei el cheldellir a 120 el disaiplo a kldibel er a delemerab er bab. (Rel. 1:13-15; 2:1) A sesei el klebesei er a uchei, e a Jesus a mlengelechel er tir me lolemolem el kiei er a Jerusalem e le te mo melai er a ileakl el sengk. (Rel. 1:4, 5) Me ngera dilubech?

² “Ng di mle mereched el mor ngii a orreek er a eanged el ua rrekel a mesisiich el eolt.” Tia el rrekel a eolt a mle mekekii a blai el rokir. E sola e “a kor a ngau el ua teletelel a chural a chad” a mlo er bebrir a redisaiplo, me te rokui el “meltuchel er a Chedaol Reng.” (Rel. 2:2-4) Me ngokiu tia el mengasireng el rolel, e a Jehovah a ultengelii a chedaol reng er ngii el mo er tia el cheldellir a rechad. (Rel. 1:8) Me tirkang a mle kot el ngellitel el mlengilt lokiu a chedaol reng * er a Dios, e te dirrek el ngiluu a omelatk el mo mengedereder lobengkel a Jesus el ngar a eanged.

3. Ngera uchul me tirke el chad er a taem er a Pentekost a mle ulterekokl a rengrir el kmo te mlengilt lokiu a chedaol reng?

³ Oleko kau a mle ta er tirke el disaiplo el mle kldibel er sel delemerab er bab er sel sils, e ngulterekokl el diak el sebechem lobes er tia el tekoi. A kora chucher el ngau a mlei er bebul a bdelum,  e sola e ke mocha melekoi a ngodech el tekoi! (Rel. 2:5-12) Ke ulterekokl el mo oumerang el kmo ke mla mengilt lokiu a chedaol reng er a Dios. Engdi a rokui el ngellitel el mengilt lokiu a chedaol reng, te nguu lokiu a mengasireng el rolel el ngar a osisiu el taem er a klengar er tir? Ngdiak leuaisei. Kede mekera e mo medengei?

4. Tirke el rokui el mlo ngellitel er a irechar, te milengilt er a osisiu el taem er a klengar er tir?

⁴ Me chelechang e kede mo mesaod er a temel a okedongel a chad el mo ngellitel. Sel kekerei el cheldellir a 120 el Kristiano a dimlak di el tir el tang a mlengilt lokiu a chedaol reng er a Pentekost, 33 C.E. A uriul el ngar sel osisiu el sils, e a rebekord el 3,000 a dirrek el mlengilt lokiu a chedaol reng. Te mlo ngellitel er sel taem er a lemetecholb. (Rel. 2:37, 38, 41) Engdi ngar aike el uleakuriul el rak, e ngdiak el rokui el ngellitel el Kristiano a ngmlengilt er sel taem er a bo lemetecholb. A rechad er a Samaria a mlo ngellitel er a telkib el taem er a uriul er a lemetecholb. (Rel. 8:14-17) E sel kmal ngodech el tekoi el dilubech, a sel taem el Kornelius me a rechedal a telungalek er ngii a mlo ngellitel er a uchei er a lemetecholb.​—Rel. 10:44-48.

5. A doltirakl er a 2 Korinth 1:21, 22, e ngera mo duubech sel lemengilt a chad lokiu a chedaol reng?

⁵ E chelechang e kede kuk mesaod a tekoi el duubech sel lebo el ngellitel a chad. A rebebil el ngellitel a locha mo meringel er tir er a uchelel el kongei el kmo a Jehovah a mla melilt er tir. Te locha mo omdasu el kmo, ‘Ngera uchul me a Dios a ngileltak?’ E a rebebil a kuk ngodech a uldesuir. Me tiang a diak lultuil er a uldesuel a chad, e le apostol Paulus a milsaod a tekoi el mo duubech el mora rokui el ngellitel el kmo: “Kom mlo oumerang er a Kristus, ma Dios a lilia olengchelel * er kemiu el kmo kom chedal er a le beskemiu a Chedaol Reng el ua ikel le dilung . . . a uchul me kede ulterekokl el mo nguu sel le tilbir a Dios.” (Efe. 1:13, 14) Me a Jehovah a ousbech er a chedaol reng er ngii el meketeklii el mo er tirka el Kristiano el kmo Ngii a mla melilt er tir. Ngoeak tiang, e a chedaol reng a ua “olechotel [telbiil]” el oterekokl a rengrir el kmo a ngar mederir el klebesei, e te  mo kiei er a eanged el mo cherechar el diak el tia el chutem.​—Monguiu er a 2 Korinth 1:21, 22.

6. Ngera kirel a ngellitel el Kristiano el meruul me bo lsebechel el nguu a ngkedel el mora eanged?

⁶ Me a lsekum a Kristiano a ngellitel, e ngmla mo ulterekokl el mora eanged? Ngdiak leuaisei. Ngii a ulterekokl el mla mengilt el mora eanged. Me nguaisei, engdi ngkirel el melatk er tia el omengelechel el kmo: “Rudam er ngak, e lluut el mo meduch a rengmiu el oltirakl er a Dios el milekedongemiu e ngiltemiu el mo chedal, me lak bo mcheroid er ngii; e cho bo mua isei e ng diak bo lak moumerang.” (2 Pe. 1:10) Me alta e ngmla mengilt el ta er a ngellitel el Kristiano me a lechub e ngmla mokedong el mora eanged, engdi ngdi mo sebechel nguu a ngkedel a lsekum e ngmelemolem el blak a rengul.​—Fil. 3:12-14; Heb. 3:1; Och. 2:10.

7. Ngoeak a ngera el rolel e a rengellitel a mo medengei el kmo te mla nguu okedong el mora eanged?

⁷ Engdi ngmekerang a chad e medengei el kmo ngmla nguu a okedong el mora eanged? A nger er tiang a kmal bleketakl el meues er a tekingel a Paulus el mora rechad er a Rom el “mlokedong el mo chedal” a Dios. Ngdilu er tir el kmo: “Ele Reng el mngiluu er a Dios a dimlak le rellemiu el mo sibai me medakt; ng bai rirellemiu el mo ngelekel a Dios, me kede mo okiu ngii el oldiu el mor a Dios el kmo, ‘Abba! Chedam!’ A Reng er a Dios ma rengud a dmak el dmu el kmo kede ngelekel a Dios.” (Rom 1:7; 8:15, 16) Me ngokiu a chedaol reng, e a Dios a meketeklii el mora rengellitel el kmo te mla nguu tia el okedong el mora eanged.​—1 Th. 2:12.

8. Ngokiu a ngera el rolel e a 1 Johanes 2:20, 27 a meketeklii el kmo a rengellitel el Kristiano a diak lousbech er a ngii di el chad el mo olterekokl el kmo te ngellitel?

⁸ A Jehovah a kmal oterekokl a rengrir me a uldesuir tirke el nguu tia el okedong el mora eanged. (Monguiu er a 1 Johanes 2:20, 27, NW.) * Me nguaisei, engdi tirka el ngellitel el Kristiano a dirk kirir el mosisechakl er a Jehovah lokiu a ongdibel el ua rebek el chad. Engdi ngdiak lousbech er a ngii di el chad el mo olterekokl el kmo te ngellitel. A Jehovah a mla ousbech er a kot el klou el klisiich er a eanged me a chutem el ngii a chedaol reng er ngii el meketeklii el mo er tir el kmo te ngellitel!

9. Ngera el omelodech a bo lolechesuar a ngellitel el ua losaod er ngii a Efesus 1:18?

⁹ A ruumesingd el mesiungel a Dios er chelechang a locha mo meringel er tir el mo medengei a tekoi el duubech er sel taem el Dios a ngiltii a chad el mo ngellitel. E tiang a uaisei, e le tir el dirkak lemengilt el mo ngellitel. A Dios a ulemeob er a rechad el kirir el kiei er tia el chutem el mo cherechar, el diak el eanged. (Gen. 1:28; Psa. 37:29) Engdi a Jehovah a mla melilt er a rebebil el mo kiei er a eanged. Me sel lolilt er tir, e ngrullii a kmal klou el omeldechel a uldesuir me a omeltkir, el rulleterir me te mo omes el bedul a klengar el ngar a eanged.​—Monguiu er a Efesus 1:18.

10. Ngera belkul a tekoi el “mechell el beches”? (Dirrek el momes er a footnote.)

¹⁰ Sel taem el Rekristiano a mo ngellitel lokiu a chedaol reng, e te “mechell el beches.” * A Jesus a dirrek el silodii el kmo ngmeringel el dosaod er tia el tekoi el “mechell el beches” me a lechub e ng “mlechell ra Reng” el mora chad el dirkak bo lengellitel.​—Johanes 3:3-8, BT.

11. Mosaod er a rolel e ngmengodech a uldesuel a chad el mo ngellitel.

 ¹¹ Ngoeak a ngera el rolel e a Rekristiano a omuchel el mengodech a rolel a lomdasu a tekoi sel bo lengellitel? A uchei er a lolilt er tir a Jehovah, e tirkang a uleba omelatk el mo kiei er tia el chutem el mo cherechar. Te mle semeriar el omes el beduluchei el kirel sel taem el Jehovah a mo rullii tia el chutem el mo baradis e lokngemed a rokui el mekngit lomeruul. Te locha millatk el mo omes er tirke el betik er a rengrir el sechelirir me a rechederir el mla mad. Engdi uriul er a bo lengellitel, e ngulemuchel el mengodech a uldesuir. E ngera uchul? Ngdiak lebelkul a kmo ngmlo chetirir a omelatk el mo kiei er a chutem. Ngdirrek el dimlak lemengodech a uldesuir e le tir el mle chuarm me a lechub e ngmle meringel a uldesuir. E dimlak bo leseselk a rengrir er tia el klengar el mo cherechar el ngar tia el chutem. Ngbai Jehovah a uluusbech er a chedaol reng er ngii el melodech er a rolel a lomdasu a tekoi me a dirrek el omelatk el lomes el beduluchei el kirel.

12. A doltirakl er a 1 Petrus 1:3, 4, e ngmo uangera uldesuel a ngellitel el Kristiano el kirel a omelatk el lobang?

¹² A chad el mengilt el mo ngellitel a locha mo omdasu el kmo ngdiak lerredemelel tia el ileakl el techall. Engdi ngdiak a ta el bung er a klok el bo loumededenger el kmo a Jehovah a mla ngiltii. A rengul a bai kmal mui er a deurreng me a omereng el saul sel lolatk el kirel tia el omelatk el lobang el mo kiei er a eanged.​—Monguiu er a 1 Petrus 1:3, 4.

13. Ngua ngera uldesuir a rengellitel el kirel a klengar er tir er tia el chutem?

¹³ Me tiang belkul a kmo a rengellitel a sorir el mad? A apostol Paulus a ulenger er tia el ker. Ngulemekesiu er a bedengel a chad el mora tento e dilu el kmo: “Ele chelechal dirk de bliull [er tia el tento] er a bedenged er tial beluulchad, e ng olengerool a rengud er a ringel. Ng diak le belkul a kmo lobedobed er kid a bedenged. Ng diak, ng bai soad a bo dobail er isel bedenged el ngar a eanged el mei, miseikid e sel mo mad a mo obult el mo nguu a klengar.” (2 Ko. 5:4) Tirka el Kristiano a dirkak loriid a klemeriarreng er tir, me luchul e ngsorir el mereched el mad. Ngbai kmal dmeu a rengrir er a klengar er tir e sorir lousbech aike el bek el sils er tir el mesiou er a Jehovah lobengterir a rechederir me a resechelirir. Me nguaisei, engdi te di blechoel el melatk er tia el ileakl el omelatk el lobang el kirel a ngar mederir el klebesei.​—1 Ko. 15:53; 2 Pe. 1:4; 1 Jn. 3:2, 3; Och. 20:6.

14. Ngera el ochotel a diak loterekeklii el kmo a chad a mla mo ta er a ngellitel?

¹⁴ Me ke locha mo melatk el kmo ke mla mengilt el mo ta er a ngellitel. A leuaisei, e molatk aika el meklou a ultutelel el ker: Kau, ngkmal mesisiich a uldesuem el soam el meruul a soal a Jehovah? Ke melechesukau el kmal blak a rengum el omerk er a klumech? Ngkmal soam el mesuub er a Biblia e dirrek el mesuub el kirel aike el “dmolech ra Dios”? (1 Ko. 2:10, BT) Ngsebechem el mes a rdechel a urerem er a omesiou el bla lebeskau a Jehovah? Ke melechesukau el kmal soam lolengeseu er a rebebil el mo mesuub el kirel a Jehovah? Ke mla mes a ochotel el kmo a Jehovah a mla ngosukau er a bebil tekoi er a klengar er kau? A lsekum a nger er kau er aika el ker a choi, e tiang belkul a kmo ke mla nguu a okedong el mora eanged? Ngdiak leuaisei. E ngera uchul? E le rokui el mesiungel a Dios a omelechesiu aika el tekoi, alta te ngellitel me a lechub e ngdiak. Ngdirrek el okiu a chedaol reng e a Jehovah a sebechel merous er a osisiu el klisiich el mora ngii di el mesiungel el diak lultuil er a omelatk el lobang. E a mera er ngii, a lsekum ke melechedech er a rengum el kmo ke mla mengilt el mo ngellitel, e ngbelkul a kmo ngdiak kom ngellitel. E le tirke el mokedong er a Jehovah a diak a ta el bo  lolechedech el kmo te ngellitel me a lechub e ngdiak! Te kmal ungil medengei!

15. Kede mekera e mo medengei el kmo ngdiak el rokui el ngiluu a chedaol reng er a Dios a milengilt el mora eanged?

¹⁵ Me ngar a chelsel a Biblia, e ngar ngii a betok el kerebai er a rechad el uluumerang e dirrek el ngiluu a chedaol reng er a Dios, engdi ngdimlak bo loba omelatk el mo kiei er a eanged. A David a mlukrael er a chedaol reng. (1 Sa. 16:13) A chedaol reng a ngilsuir el mo medengei a dmolech el tekoi el kirel a Jehovah, e dirrek el ulemekrael er ngii el mo meluches a bebil babier er a Biblia. (Mk. 12:36) A apostol Petrus a dirrek el milsaod el kmo a “David a dimlak le ngasech el mor a eanged.” (Rel. 2:34) A Johanes el Chad er a Techolb a mle “mui er a Chedaol Reng.” (Lk. 1:13-16) A Jesus a milsaod el kmo a Johanes a ngarbab er a rebek el chad er a uchei er ngii, engdi ngdirrek el dilu el kmo a Johanes a diak bo lechedal a Rengedel a Dios el ngar a eanged. (Mt. 11:10, 11) A Jehovah a uluusbech er a chedaol reng er ngii el mesterir tirka el chad a klisiich el mo meruul a mengasireng el tekoi, engdi ngdimlak lousbech er tia el chedaol reng er ngii el melilt er tir el mo kiei er a eanged. Me tiang belkul a kmo tirkang a mle kekerei a klaumerang er tir er tirke el milengilt el mora eanged? Ngdiak leuaisei. Ngbai belkul a kmo a Jehovah a mo okiseterir me te lmuut el mo nguu a klengar er tir er a chelsel a Baradis el chutem.​—Jn. 5:28, 29; Rel. 24:15.

16. Ngera el sengk a lomes el beduluchei el kirel a ruumesingd el mesiungel a Dios er chelechang?

¹⁶ A klou el ildois er a remesiungel a Dios el ngar tia el chutem er chelechang a diak loba omelatk el mo kiei er a eanged. Te di ua Abraham me a Sara, me a David , me a Johanes el Chad er a Techolb, me a lmuut el bebil el sechal me a redil er a taem er a Biblia, el omes el beduluchei el kirel a klengar er tia el chutem er sel taem el bo lechederedall er a Rengedel a Dios.​—Heb. 11:10.

17. Kede mo mesaod a ngera el ker er a ongingil suobel?

¹⁷ Chelecha el taem e te dirk ngar ngii a rengellitel el ngar a delongeled, me nglocha mo duubech a bebil ker. (Och. 12:17) El ua tiang, a lsekum a chad a kmo ngii a ngellitel, e ngmo uangera uldesued el bedulngii? Me a lsekum a tang er a chelsel a ongdibel er kau a omuchel el melai a klekedall er a Chedaol Belsoil, e ngmo uangera omerellem el bedulngii? E kuk mo uangera uldesuem a lsekum a ildisir a rechad el melekoi el kmo te ngellitel a di meleketek? Ke kora mo bekikl? Kede mo onger aika el ker er a ongingil suobel.