NOS ta biba den un mundu ku tin asina tantu religion ku e ta konfundí hende. Resientemente, tabatin un enkuesta ku a revelá ku rònt mundu tin 19 religion prinsipal i alrededor di 10.000 religion mas chikitu. E gran variedat akí ta duna hende, mas ku nunka na ántes, e posibilidat di skohe. Pues, ta importá kua religion bo skohe?

Segun algun hende, diferente religion ta meskos ku diferente kaminda pa subi un seru. Pa nan, no ta importá kua kaminda nan skohe pasobra tur ta hiba na e mesun lugá. Nan ta rasoná ku ta ún Dios Todopoderoso so tin, p’esei tur religion finalmente mester hiba na dje.

Kiko Hesukristu, un di e maestronan religioso di mas respetá den historia, a bisa tokante e tópiko akí? El a bisa su disipelnan: “Drenta dor di e porta smal.” Dikon? “Pasobra hanchu ta e porta i espasioso e kaminda ku ta hiba na destrukshon, i hopi ta esnan ku ta drenta dor di dje. Pasobra chikitu ta e porta i smal e kaminda ku ta hiba na bida, i poko ta esnan ku ta hañ’é.”—Mateo 7:13, 14.

Realmente Hesus tabata ke men ku algun religion ta hiba “na destrukshon”? Òf el a siña hende ku ta solamente personanan ku no ta kere den  Dios ta riba e kaminda hanchu miéntras ku esnan ku ta kere den Dios, sin importá nan religion, ta riba e kaminda smal ku ta hiba na bida?

Djis despues ku Hesus a bisa ku ta dos kaminda so tin, el a bisa: “Tene kuidou ku profeta falsu, ku ta bin serka boso bistí manera karné, ma di paden nan ta lobo hambrá.” (Mateo 7:15) Despues el a sigui bisa: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu.” (Mateo 7:21) Si un hende ta ser yamá profeta òf ta bisa ku Hesus ta su “Señor,” ta rasonabel pa konkluí ku e ta un persona religioso i no un hende ku no ta kere den Dios. Ta klaru anto ku Hesus a spièrta hende ku no ta tur religion ta bon i ku no ta tur maestro religioso ta digno di konfiansa.

Siendo ku no ta tur kaminda ta hiba na Dios, kon bo por haña e kaminda smal ku ta hiba na bida entre e míles di opshonnan ku tin? Konsiderá e komparashon akí: Imaginá ku bo a pèrdè kaminda den un stat grandi. Bo ta disidí di pidi yudansa. Ku siguransa, un hende ta bisa bo bai na man robes. Un otro hende ta bisa bo bai na man drechi. Pero, un otro hende ta konsehá bo pa skohe e kaminda ku abo ta haña ta bon. Finalmente, un otro ta saka un mapa konfiabel i ta mustra bo e ruta korekto. Despues, e ta duna bo e mapa pa bo por konsult’é segun ku bo ta sigui bo kaminda. Awor bo ta mas sigur ku lo bo yega bo destinashon, no ta bèrdat?

Asina tambe, ora nos ke skohe e kaminda òf e religion korekto, nos mester di un guia spiritual konfiabel. Ta eksistí un guia asina? Sí. E guia òf mapa ei ta Beibel. E ta deklará: “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia.”—2 Timoteo 3:16.

Tin vários tradukshon di Beibel na papiamentu ku bo por usa komo un guia spiritual. Testigunan di Yehova, kendenan ta publiká e revista akí, ta produsí un tradukshon di Beibel konfiabel na hopi idioma ku ta konosí komo Tradukshon di Mundu Nobo di e Santu Skritura. Bo por usa kualke tradukshon ku bo tin ora bo ta konsiderá e siguiente artíkulonan ku ta yuda bo kon pa distinguí e religion ku ta bon for di esnan ku ta malu. P’esei, den e seri di artíkulo akí nos ta sita for di tradukshonnan di Beibel ku religionnan lokal ta respetá.

Segun ku bo ta lesa e siguiente artíkulonan, kompará loke bo sa ku loke Beibel ta bisa. Kòrda loke Hesus a bisa ora el a mustra kon nos por distinguí e religion ku ta bon for di esnan ku ta malu. El a bisa: “Tur bon palu ta duna bon fruta; ma e palu malu ta duna mal fruta. Un bon palu no por duna mal fruta, ni un palu malu no por duna bon fruta.” (Mateo 7:17, 18) Laga nos konsiderá solamente tres di e frutanan ku segun Beibel ta identifiká e “bon palu.”