Nos Lektornan Ta Puntra

Dios Ta Tuma Mucha den Shelu pa Nan Bira Angel?

Ora un mucha muri, amigunan di e famia ku a pèrdè nan ser kerí kisas ta purba konsolá nan dor di bisa: “Dios tabatin mester di un angel mas den shelu.” Bo ta haña esei rasonabel?

Si di bèrdat Dios ta laga mucha muri pasobra e tin mester di mas angel den shelu, esei lo nifiká ku Dios ta sin sintimentu i asta kruel. Pero loke Beibel ta bisa ta kontrali di esei. (Jòb 34:10) Un tata kompasivo lo no ranka un yu for di su mayornan djis pa amplia su mes famia. I no papia mes di Yehova, kende su kualidat dominante ta amor. (1 Juan 4:8) P’esei, ningun mayor humano no tin mas kompashon ku Yehova. Su gran amor nunka lo permitié aktua na un manera kruel asina.

Puntra bo mes: ‘Dios tin mester di mas angel den shelu?’ Beibel ta bisa ku tur Dios su aktividatnan ta bon i perfekto. (Deuteronomio 32:4) Dios personalmente a krea míles i míles di angel i su trabou tabata perfekto, no tabata falta ningun. (Daniel 7:10) Òf Dios a hasi un mal kalkulashon di e kantidat di angel ku e tabatin mester? Esei ta imposibel! Nos por ta sigur ku e Dios Todopoderoso nunka lo por kometé un eror asina. Ta bèrdat ku Yehova a skohe algun hende pa bira kriaturanan spiritual pa forma parti di su Reino selestial. Pero e personanan ei lo no ta mucha chikitu ora nan muri.—Revelashon 5:​9, 10.

Un otro motibu pakiko Dios lo no tuma mucha for di tera pa bira angel den shelu ta pasobra esei no ta na armonia ku su propósito original relashoná ku mucha. Dios a bisa Adam i Eva den e hardin di Edén: “Sea fruktífero i multipliká, i yena e tera i hasi esaki someté na bo.” (Génesis 1:28) Pues, yunan ta un regalo di Dios. Ta Dios mes a hasi posibel pa hende haña yu pasobra esaki ta na armonia ku su propósito original, esta, pa yena e tera ku un famia humano hustu. Nunka tabata Dios su propósito pa mucha muri i pa despues nan ser transformá den kriaturanan spiritual. Beibel ta bisa bon kla ku yunan ta ‘un herensia di Yehova.’ (Salmo 127:3) Yehova, e Dios di amor, lo duna mayornan un regalo pa despues tum’é bèk? Klaru ku nò!

E morto prematuro di un mucha ta trese masha tristesa, pena i doló. Ki speransa tin pa mayornan den tristesa? Beibel ta primintí ku Dios lo resusitá míles di miónes di hende pa biba den un paradeis aki riba tera mes. Djis imaginá bo, muchanan bon di salú ku a wòrdu resusitá i ta huntu ku nan sernan kerí atrobe. (Juan 5:​28, 29) Ta Dios su boluntat pa muchanan krese bira grandi, gosa di bida i siña tokante Dios i su propósito pa ku e tera. P’esei, muchanan ku a muri no ta angel den shelu. Mas bien, nan ta den graf sperando un resurekshon pa biba riba un tera kombertí den paradeis. Na e tempu ei, bou di e kuido amoroso di nos Kreador, tantu hóben komo bieu lo deleitá den e adorashon di Yehova Dios pa tur eternidat.