Pakiko Hasi Loke Ta Korekto?

UN HÒMBER bon siñá a yega di bisa: “E deseo ta presente den mi, ma e hasimentu di bon sí no t’ei. Pasobra e bon ku mi ta deseá di hasi, mi no ta hasi; ma mi ta praktiká eksaktamente e maldat ku mi no ta deseá di hasi.” Dikon tabata difísil pa e hòmber aki praktiká e bon ku e tabata deseá di hasi? El a splika: “Asina mi ta deskubrí e lei aki: ora mi ta deseá di hasi loke ta bon, maldat ta presente den mi. Pasobra segun e hende interior mi ta deleitá mi mes den e lei di Dios, ma den e miembronan di mi kurpa mi ta mira un otro lei ku ta batayá kontra e lei di mi mente i ta hasi mi prezu di e lei di piká, kual ta den mi miembronan.”​—⁠Romanonan 7:​18, 19, 21-⁠23.

E palabranan aki di apòstel Pablo, skirbí kasi 2.000 aña pasá, ta splika dikon ta asina difísil pa hende imperfekto hasi loke ta korekto. Pa nos pega na bon prinsipio, spesialmente bou di sirkunstansianan trabahoso, nos mester tin fortalesa moral. P’esei ta bon pa nos puntra: Kiko ta e motibu mas importante pa hasi loke ta korekto?

Wak kiko e Skritura ta bisa tokante e futuro di un persona moralmente rekto. Na Salmo 37:⁠37 i 38, nos ta lesa: “Tuma nota di e hende perfekto [“sin kulpa,” NW ], i opservá esun ku ta rekto; pasobra e hende di pas lo tin desendiente. Ma transgresornan konhuntamente lo wòrdu destruí; e desendientenan di e malbado lo wòrdu kòrtá kitá afó.” Proverbionan 2:⁠21 i 22 ta bisa nos: “E rektonan lo biba den e tera, i e perfektonan [“esnan sin kulpa,” NW ] lo keda den dje; ma e malbadonan lo wòrdu kòrtá kitá for di tera, i e traidónan lo wòrdu ranká for di dje ku rais ku tur.”

Ounke e promesanan aki i otronan mas ku nos ta haña den Beibel ta duna nos un insentivo pa sigui e rumbo ku ta agradá Dios, no ta pa esei nos ta sirbié. E motibu fundamental pakiko nos ke agradá Dios ta konektá ku un kuestion ku ta enbolbé tur kriatura inteligente personalmente. E siguiente artíkulo lo konsiderá kiko e kuestion ei ta i kon e ta toka nos.