Informe di Proklamadónan di Reino

Salon di Reino Ta Habrí pa Tur Hende

ORA Hesukristu tabata train su disipelnan pa e ministerio públiko, el a animá nan pa ‘proklamá for di riba dak di kas.’ (Mateo 10:27) Sí, nan mester a realisá nan ministerio kristian abiertamente, den pleno bista di públiko. Den kuadro di e konseho aki, e aktividat di Testigunan di Yehova tambe ta tuma lugá den un forma públiko. Esaki riba su mes a permití e Testigunan vense oposishon i haña un bon nòmber.

Ounke e reunionnan di kongregashon di Testigunan di Yehova ta habrí pa públiko, prehuisio ta pone ku algun hende ta duda pa drenta un Salon di Reino. Esaki ta e kaso na Finlandia. Otronan ta simplemente un poko tímido pa drenta un lugá nobo. Ora kaba di konstruí un Salon di Reino nobo òf renobá unu eksistente, e rumannan sa tene un open house. Nan ta hasi un esfuerso spesial pa invitá bisiñanan pa bishitá e Salon di Reino i pa sera konosí ku e aktividat di Testigunan di Yehova.

Den un área, e Testigunan a hasi areglo pa pone un kampaña di revista riba e mesun dia ku nan a tene un open house na nan Salon di Reino nobo. Dos Testigu a topa un hòmber di edat ku a bisa ku e ta gusta lesa e revistanan Toren di Vigilansia i Spièrta! E rumannan a inform’é tokante e open house i a ofresé pa hib’é Salon di Reino. E hòmber a aseptá ku muchu gustu pa bai ku nan. Despues ku su esposa a tende e kòmbersashon, el a grita: “Mi tambe ta bai!”

Despues ku e hòmber a drenta e Salon di Reino, el a wak rònt i a bisa: “Esaki ta leu for di kolo pretu. Esta un bunita koló kla! Nan a bisa mi ku e Salon di Reino ta pretu!” E pareha a keda un ratu i a pidi algun literatura ku tabata riba bali.

Un kongregashon kier a anunsiá den korant lokal tokante un open house na okashon di e dedikashon di nan Salon di Reino. Ora e hefe di redakshon a haña sa dje evenemento, el a sugerí pa laga skirbi un artíkulo riba e tópiko. E rumannan a bai di akuerdo, i poko tempu despues a sali un artíkulo hopi faborabel di mitar página den korant ku a kubri e evenemento i deskribí e aktividatnan dje kongregashon lokal di Testigunan di Yehova.

Despues ku e artíkulo a ser publiká, un Testigu di edat avansá a topa un bisiña ku a bis’é: “Den e korant djawe tin un bunita artíkulo tokante Testigunan di Yehova!” E ruman muhé por a duna un testimonio i despues laga e señora ku e foyeto Testigunan di Yehova den Siglo Binti.

Ademas di klarifiká algun konsepto robes tokante Testigunan di Yehova, e areglonan ei en konekshon ku open house i programa di dedikashon na Salon di Reino nobo a stimulá e publikadónan pa invitá mas hende n’e reunionnan. Sí, den hopi pais, inkluso Finlandia, hende a haña sa ku Salon di Reino di Testigunan di Yehova ta habrí pa tur hende.