Nos Tur Tin Mester di Elogio

E DIA ei kos a bai bon pa e mucha muhé chikitu. Maske e mama tabatin ku straf e na otro okashonnan, riba e dia partikular aki el a hasi hopi ko’i bon mucha. Sin embargo, e anochi ei despues ku e mama a pone e mucha drumi, e mama a tend’é ta yora. Ora el a puntr’é pakiko e ta tristu, e mucha a kontestá yorando: “Mi no tabata bon mucha awe?”

E pregunta ei a duel e mama hopi. Semper e tabata kla pa straf su yu muhé. Pero awor, maske el a ripará kuantu esfuerso e chikitin a hasi pa komportá su mes bon, tòg e mama no a elogi’é niun tiki.

No ta mucha chikitu so tin mester di elogio i animashon. Nos tur tin mester di esei, meskos ku nos tin mester di konseho i korekshon.

Kon nos ta sinti ora nos haña elogio sinsero? Esaki no ta laga nos sinti bon i e no ta drecha nos dia? Probablemente nos ta pensa ku si e persona a tuma nota di loke nos a hasi, e ta interesá den nos. Esei ta duna nos e siguransa ku loke nos a hasi a bal e esfuerso, i e ta motivá nos pa sigui traha duru den futuro. No ta nada straño ku elogio sinsero ta pone ku nos ta sinti nos atraí na un persona ku ta tuma tempu pa animá nos.—Proverbionan 15:23.

Hesukristo a komprondé ku hende tin mester di elogio. Den su ilustrashon tokante talento, e shon (simbolisando Hesus mes) a duna hopi elogio na kada un dje esklabonan fiel, bisando: “Hopi bon, mi bon i fiel esklabo.” Esta un animashon! Maske nan abilidat i logronan tabata diferente, nan a haña e mesun elogio.—Mateo 25:19-23.

Pues, laga nos kòrda riba e mama dje mucha muhé chikitu. Nos no tin nodi warda te ora otronan kuminsá yora pa nos elogiá nan. Mas bien, nos por hasi esfuerso pa buska oportunidat pa elogiá otro. Sí, nos tin bon motibu pa duna elogio sinsero na tur oportunidat.