Storia di Bida

Nos Buskeda di Tesoro A Produci Rikesa Duradero

Segun e relato di Dorothea Smith y Dora Ward

Ki clase di tesoro nos tabata busca? Nos tabata dos mucha muher cu e deseo ferviente di participa den cumplimento di e mandamento di Hesus: “Bai y haci tur e nacionnan discipel di mi.” (Mateo 28:19) Laga nos splica con e buskeda aki a produci rikesa duradero.

DOROTHEA: Mi a nace na aña 1915, un poco despues cu Prome Guera Mundial a cuminsa. Mi tabata e di tres yiu den nos famia. Nos tabata biba cerca di Howell, na Michigan, Merca. Mi tata no tabata un persona religioso, pero mi mama si tabata un muher temeroso di Dios y el a purba siña nos pa sigui e Dies Mandamentonan. Un cos cu a precup’e tabata cu ni ami ni mi ruman homber Willis, ni mi ruman muher Viola, no tabata miembro di un iglesia.

Ora mi tabatin 12 aña, mi mama a dicidi cu mi mester a batisa como miembro di e Iglesia Presbiteriano. Mi ta corda cla cla e dia di mi bautismo. Dos baby, carga pa nan mama, a batisa pareu cu mi. Mi a sinti masha berguensa mes cu nan a batisa mi hunto cu baby. E pastor a spat un par di gota di awa riba mi cabes y murmura algun palabra cu mi no a compronde. En realidad, e dos babynan ei mes tabata sa mas tocante bautismo cu mi!

Un dia na aña 1932, un auto a core drenta den nos cura, y mi mama a bai wak ta ken tabata na porta. Tabata dos yoncuman cu a ofrece buki religioso. Un di nan a introduci su mes como Albert Schroeder. El a mustra mi  mama algun literatura publica pa Testigonan di Jehova. Mi mama a tuma e bukinan. E publicacionnan ei a yud’e acepta e berdad for di e Palabra di Dios.

E Buskeda di Tesoro Ta Cuminsa

Cu tempo mi a muda bai Detroit pa biba cerca mi ruman muher. Einan mi a topa un señora di edad cu tabata bishita mi ruman muher pa siñ’e Bijbel. E combersacionnan ei a pone mi corda riba un programa semanal di radio cu mi tabata scucha na cas hunto cu mi mama. E programa ei tabata consisti di un discurso di 15 minuut basa riba un topico biblico y presenta pa J. F. Rutherford, kende tabata hiba delantera den Testigonan di Jehova e tempo ei. Na 1937 nos a cuminsa asocia cu e prome congregacion di Testigonan di Jehova na Detroit. E siguiente aña mi a batisa.

Na principio di decada di 1940, nan a anuncia cu Testigonan di Jehova tabata bai habri un scol cu yama Galaad na South Lansing, New York, pa entrena rumannan pa bira misionero. Ora mi a tende cu algun di e graduadonan di e scol ei lo a haya invitacion pa sirbi den exterior, mi a pensa den mi mes: ‘Esei ta algo pa mi!’ Mi a pone como meta pa mi bai Galaad. Lo tabata un gran privilegio di por busca “tesoro” den otro pais, es decir, busca hende cu ta desea di bira discipel di Cristo Hesus!​—Hageo 2:6, 7.

Yegando Pocopoco na Mi Meta

Na april 1942, mi a kita for di trabou y a cuminsa sirbi como pionero, of predicado di tempo completo, na Findlay, Ohio, hunto cu un grupo di cinco ruman muher spiritual. Einan no tabatin un congregacion cu a tene e reunionnan regularmente, pero nos tabata anima otro dor di lesa articulonan for di e publicacionnan cristian hunto como grupo. Durante mi prome luna como pionero, mi a laga 95 buki cu hende interesa! Mas o menos un aña y mei despues, mi a haya e asignacion pa sirbi como pionero special na Chambersburg, Pennsylvania. Einan mi a join un grupo di cinco otro pionero, cu a inclui Dora Ward, un ruman muher cristian di Iowa. Ami cu Dora a bira partner den e trabou di pionero. Nos a batisa e mesun aña, y nos tabatin e mesun deseo di asisti na Scol di Galaad y sirbi den exterior como misionero.

Na cuminsamento di 1944, e dia grandi a yega! Nos tur dos a haya invitacion pa asisti na e di cuater klas di Galaad. Nos a cuminsa na augustus di e aña ei. Pero prome cu mi sigui, laga Dora conta bo con bin el a bira mi partner di hopi aña den e buskeda di tesoro.

 Ansioso pa Cuminsa Predica Tempo Completo

DORA: Semper mi mama tabata pidi Dios den oracion pa e yud’e compronde Su Palabra. Un diadomingo mi tabata hunto cu ne ora nos a tende un charla na radio di J. F. Rutherford. Na final di e discurso, mi mama a declara: “Esaki ta e berdad!” Poco despues, nos a cuminsa studia e publicacionnan di Testigonan di Jehova. Na 1935, tempo mi tabatin 12 aña, mi a asisti na un discurso di bautismo cu un Testigo di Jehova a duna, y mi a sinti e deseo sincero di dedica mi bida na Jehova. Tres aña despues mi a batisa. Mi dedicacion y bautismo a yuda mi mantene mi metanan bibo durante e añanan cu mi mester a sigui bai scol. Mi tabata ansioso pa caba scol pa mi por a cuminsa sirbi como pionero.

E tempo ei e grupo di Testigo cu nos tabata asocia cu ne tabata reuni como congregacion na Fort Dodge, Iowa. Nos mester a haci hopi esfuerso pa asisti na e reunionnan cristian. E tempo ei, e articulonan di estudio di E Toren di Vigilancia no tabatin pregunta pa considera durante e reunion di congregacion. Nan tabata pidi e publicadornan pa entrega pregunta di antemano na e ruman cu a conduci e Estudio di Toren di Vigilancia. Tur dialuna anochi, ami cu mi mama tabata prepara un pregunta pa cada paragraf, y nos tabata duna e conductor esakinan di manera cu e por a scohe cua e ta uza.

De bes en cuando, nos congregacion tabata haya bishita di un superintendente biahero. Un di e rumannan ei, John Booth, a yuda mi cuminsa predica di cas pa cas ora mi tabatin 12 aña. Cu 17 aña, mi a puntr’e con mi tin cu yena un solicitud pa traha pionero, y el a yuda mi. Mi no por a imagina mi cu nos camindanan lo a crusa atrobe y cu lo el a bira un amigo pa bida largo!

Como pionero, mi tabata traha hopi biaha cu Ruman Dorothy Aronson, un predicado di tempo completo cu tabata 15 aña mas grandi cu mi. Nos tabata partner den e trabou di pionero te ora cu el a haya invitacion pa asisti na e prome klas di Galaad na 1943. Despues di esei, mi a sigui traha pionero mi so.

Oposicion No Por Para Nos

E decada di 1940 tabata añanan dificil pa nos debi na e ambiente patriotico cu Segundo Guera Mundial a fomenta. Ora nos tabata predica di cas pa cas, hende tabata tira nos hopi biaha cu webo putri, tomati hecho y tin bes asta cu piedra! Un prueba mas serio a presenta ora cu nos tabata ofrece e revistanan Toren  di Vigilancia y Consuelo (awor Spierta!) na skina di caya. Polis, instiga pa opositornan religioso, tabata acerca nos y menasa di aresta nos si nan a bolbe haya nos ta predica publicamente.

Claro cu nos tabata nenga di stop di predica, y nan tabata hiba nos warda di polis pa interoga nos. Despues cu nan a laga nos bai, nos tabata bolbe bek na e mesun skina di caya y tabata ofrece e mesun revistanan. Riba conseho di e ruman hombernan responsabel, nos a uza Isaias 61:1 y 2 pa defende nos posicion. Un biaha un polis jong a acerca mi, anto tur nervioso mi a recita e versiculonan ei p’e. Pa mi sorpresa, el a bira lomba cana bai! Segun mi, e angelnan tabata proteha nos.

Un Dia Inolvidabel

Na 1941 mi tabatin e goso di asisti na un congreso di cinco dia di Testigonan di Jehova na St. Louis, Missouri. Durante e congreso ei, Ruman Rutherford a pidi pa tur mucha entre 5 pa 18 aña di edad sinta den e seccion principal di e stadion. Tabatin miles di mucha. Ruman Rutherford a cuminda nos dor di zuai su lenso. Nos tur a zuai bek. Despues cu el a duna un discurso di un ora, el a bisa: “Muchanan, boso tur cu ta di acuerdo pa haci e boluntad di Dios y cu a tuma boso posicion na banda di Dios su gobierno teocratico den man di Cristo Hesus y cu pues a bai di acuerdo pa obedece Dios y su Rei, por fabor lanta para.” E 15.000 muchanan a lanta para pareu, y ami tabata un di nan! E orador a agrega: “Boso tur cu ta bai haci tur loke ta posibel pa conta otronan tocante e Reino di Dios y e bendicionnan cu e ta trece cu ne, por fabor bisa Si.” Nos a hacie, y a sigui un tremendo aplauso.

Despues el a presenta e buki nobo Yiunan, * y un fila largo di hobennan a bin na plataforma, caminda Ruman Rutherford a duna cada un di nos un ehemplar di e buki nobo. Tabata masha emocionante! Awe, un cantidad grandi di e muchanan cu a haya un buki na e ocasion ei ta sirbiendo Jehova te ainda celosamente rond mundo, papiando tocante e Reino di Dios y su husticia.​—Salmo 148:12, 13.

Despues di a traha pionero pa tres aña, mi a keda masha contento di haya e asignacion pa sirbi como pionero special na Chambersburg! Einan mi a topa Dorothea, y no a tarda masha cu nos a bira inseparabel. Nos tabata yen di energia y entusiasmo hubenil, ansioso pa aumenta nos participacion den e trabou di predica. Hunto nos a cuminsa cu un buskeda di tesoro cu a dura henter nos bida.​—Salmo 110:3.

Un par di luna despues cu nos a cuminsa sirbi como pionero special, nos a topa un graduado di e prome klas di Galaad, Albert Mann. E tabata a punto di bai su asignacion den exterior. El a anima nos pa acepta cualkier asignacion den exterior cu nos haya.

Hunto na Scol

DORA CU DOROTHEA: Imagina bo nos goso ora nos a cuminsa cu nos entrenamento como misionero! E prome dia di scol, Albert Schroeder, e ruman cu 12 aña prome a laga e serie di buki Estudio di e Scritura cu e mama di Dorothea, a registra nos na e scol. John Booth tambe tabata einan. Awor e tabata sirbidor di hacienda na e Hacienda di Reino, caminda e scol tabata situa. Mas despues, ambos ruman homber a sirbi como miembro di e Cuerpo Gobernante di Testigonan di Jehova.

Na Scol di Galaad, nos a studia e berdadnan mas profundo di Bijbel. Esei tabata un entrenamento excelente. Tabatin 104 studiante den nos klas, incluso e prome studiante stranhero for di Mexico. E tabata purba mehora su Ingles mientras cu nos tabata purba siña Spaño. Esta emociona nos tabata e dia cu Ruman Nathan H. Knorr a parti nos asignacionnan pa exterior! Mayoria di nos a keda asigna na Centro- y Sur America; nos dos lo a bai Chile.

 Buscando Tesoro na Chile

Pa nos por a drenta Chile, nos mester a haya un visa, locual a tuma basta tempo. Pues, despues cu nos a gradua na januari 1945, nos a sirbi como pionero na Washington, D.C., pa un aña y mei. Ora cu nos a haya nos visa, nos a bira parti di un grupo di nuebe misionero cu a haci e biahe pa Chile. Shete di nan tabata di e klasnan anterior di Galaad.

Varios ruman cristian a bin topa nos na nos yegada na e capital, Santiago. Un di nan tabata Albert Mann, e graduado di Galaad cu a anima nos un par di aña prome. El a bin Chile un aña prome cu nos, hunto cu Joseph Ferrari di e segundo klas di Galaad. Tabatin menos cu 100 publicador den henter Chile ora nos a yega. Nos tabata ansioso pa busca y haya mas tesoro, esta, hendenan di curason honrado, den nos asignacion nobo.

Nos a ser asigna pa sirbi den un cas di misionero na Santiago. Pa nos tabata un experencia nobo di biba como parti di un famia grandi di misionero. Fuera di dedica un cantidad fiho di ora den e trabou di predica, tur misionero mester a cushna un biaha pa siman pa e famia. Nos a pasa nos momentonan di berguensa. Un biaha, nos a prepara cuki cayente como desayuno pa nos famia hambra, pero ora nos a saca e cukinan for di forno, nos a ripara cu nan tabatin un holo desagradabel. Luga, nos a uza baking soda en bes di baking powder! Un hende a pone e baking soda den un bleki bashi di baking powder.

Sinembargo, e erornan cu nos a haci segun cu nos tabata siña Spaño a causa mas berguensa ainda. Un famia grandi cu nos tabata studia Bijbel cu ne casi a stop di studia pasobra nan no por a compronde ta kico nos tabata bisa nan. Pero dor di busca e textonan den nan mes Bijbel, nan a logra siña e berdad, y cinco di nan a bira Testigo di Jehova. Den e añanan ei, misioneronan nobo no tabata haya un curso pa siña e idioma. Nos tabata cuminsa mesora den e trabou di predica y a purba siña e idioma for di e hendenan cu nos tabata predica na dje.

Nos a conduci hopi estudio di Bijbel, y algun di nos studiantenan a progresa lihe. Cu otronan nos mester a tene mas pasenshi. Teresa Tello, un damita, a scucha e mensahe di e berdad y a bisa: “Por fabor, bin bek y conta mi mas.” Nos a bolbe 12 biaha sin hay’e. Tres aña a pasa. Un dia nos tabata na un asamblea den un teater na Santiago. Ora nos tabata saliendo for di asamblea riba diadomingo, un hende a yama: “Señorita Dora, Señorita Dora!” Ora nos a bira wak, tabata Teresa. E tabata di bishita cerca su ruman muher na otro banda di caya y el a bin na e teater pa wak ta kico tabata pasando. Esta un goso di top’e atrobe! Nos a haci areglo pa studia Bijbel cu ne, y poco despues el a batisa. Despues el a bira pionero special. Awe, un 45 aña despues, ainda Teresa ta den sirbishi di pionero special.​—Eclesiastes 11:1.

 Descubriendo Tesoro den “Santo”

Na 1959 nos a ser asigna na Punta Arenas​—cu ta nifica “Punta di Santo”​—e punto di mas zuid di Chile su costa di 4.300 kilometer largo. Punta Arenas ta un teritorio extraordinario. Den lunanan di zomer, e dianan ta largo; te cu diesun or y mei djanochi tin lus di dia. Nos por a pasa hopi dia den sirbishi pero no sin obstaculo, pasobra zomer ta trece bientonan fuerte di Antartica. Lunanan di winter ta sumamente friu, y e dianan ta cortico.

A pesar di e retonan aki, Punta Arenas tin su aspectonan fascinante. Den zomer, parti west di shelo ta constantemente yen di nubia diki di awasero. De bes en cuando, awa ta bira basha riba bo cabes, pero despues biento ta cuminsa supla y seca bo bek. Caba ta sigui un bunita regenboog segun cu solo ta sali dor di e nubianan. E regenboognan aki tin biaha ta keda oranan largo, bai y bin segun cu solo ta penetra cu su rayonan dor di e nubianan di awasero.​—Job 37:14.

E tempo ei tabatin masha tiki publicador na Punta Arenas. Nos como ruman muher tabatin cu conduci e reunionnan den e congregacion chikito local. Jehova a bendiciona nos esfuersonan. Trintishete aña despues, nos a bolbe na e area aki pa un bishita. Kico nos a haya? Seis congregacion progresivo y tres Salon di Reino bunita. Ki un goso cu Jehova a permiti nos descubri tesoronan spiritual den e santonan den zuid ei!​—Zacarias 4:10.

Mas Tesoro na “Beach Hancho”

Despues di a sirbi pa tres aña y mei na Punta Arenas, nos a ser asigna pa sirbi na e ciudad portuario di Valparaiso. E stad ta consisti di 41 sero cu ta rondona un bahia cu bista riba Ocean Pacifico. Nos a consentra nos actividadnan di predica riba un di e seronan aki, Playa Ancha. Durante e 16 añanan cu nos a keda einan, nos a mira un grupo di mucha homber cristian progresa asina bon spiritualmente cu awe nan ta sirbi como superintendente biahero y como anciano cristian den congregacionnan rond Chile.

Nos siguiente asignacion como misionero tabata Viña del Mar. Nos a sirbi einan pa tres aña y mei te ora cu un temblor a causa daño na e cas di misionero. Nos a bai bek Santiago, caminda 40 aña prome nos a cuminsa cu nos sirbishi di misionero. Cosnan a cambia einan. Tabatin un sucursal nobo, y e edificio di sucursal bieu a bira un cas pa tur misionero cu tabatin ainda na e pais. Mas despues nan a cuminsa uza e cas ei como e luga pa tene e Scol di Entrenamento Ministerial. E tempo ei, Jehova a bolbe demostra su bondad amoroso na nos. Nos cinco misionero cu tabata di edad avansa a haya e invitacion pa bin biba na Betel. Durante e tempo cu nos a sirbi aki na Chile nos a haya 15 diferente asignacion. Nos a mira e obra crece for di menos cu 100 publicador te na alrededor di 70.000 publicador! Tabata un goso di por a busca tesoro na Chile durante 57 aña!

Nos ta sinti nos masha bendiciona cu Jehova a permiti nos haya asina tanto hende​—realmente tesoro​—cu te awe ta util den Jehova su organisacion. Durante e mas cu 60 añanan cu nos ta sirbiendo Jehova hunto, nos por bisa di curason cu nos ta di acuerdo cu e sintimentonan cu Rei David a expresa ora el a skirbi: “Ki grandi ta bo bondad, cu bo a warda pa esnan cu tin temor di bo!”​—Salmo 31:19.

[Nota]

[Plachi na pagina 9]

Dorothea na 2002 y den e trabou di predica na 1943

[Plachi na pagina 10]

Predicando den caya na Fort Dodge, Iowa, na 1942

[Plachi na pagina 10]

Dora, 2002

[Plachi na pagina 12]

Dorothea cu Dora pafo di nan prome cas di misionero na Chile, 1946