Un Dolor Profundo y Duradero

RECIENTEMENTE, un investigado kier a haya sa con hende desconsola debi na morto di un ser keri ta sinti despues di tempo. El a manda un lista di pregunta pa algun mayor kende nan yiu a muri varios aña pasa. No ta tur e mayornan a contesta. Un tata cu yama Vladimir, kende su yiu homber a muri cinco aña mas prome, a splica cu te ainda e tin hopi dificultad pa papia tocante su yiu. *

Un tristesa cu ta dura largo asina no ta straño cerca mayornan kende nan yiu a muri. Dies aña pasa William su yiu homber di 18 aña a muri hoga. William a skirbi: “Te ainda mi tin e dolor di e perdida ei, y lo e keda tanten mi ta na bida.” Cinco aña despues cu Lucy su yiu homber a muri di un malesa inespera, Lucy a skirbi: “E prome dianan, mi tabata blo pensa: ‘E cos aki no por ta berdad.’ Mi tabata sinti como si fuera mi tabatin un pesadiya teribel y cu un poco despues lo mi a lanta for di soño. Despues di poco tempo mi a cuminsa realisa cu di berdad el a muri y cu lo e no bin cas mas. Mi yiu a muri cinco aña pasa, pero te ainda mi ta yora su morto, specialmente ora mi ta mi so.”

Dicon mayornan cu a perde un yiu, manera Vladimir, William y Lucy, ta sinti un dolor asina profundo y duradero? Laga nos considera algun motibo.

Dicon Asina Tanto Tristesa?

Ora un baby nace den un famia, e mayornan ta experencia emocionnan cu bo no ta haya den ningun otro relacion humano. Djis carga nan yiu chikito, wak e drumi of mir’e smile ta duna nan un felicidad y satisfaccion profundo. Mayornan amoroso ta stima nan yiunan y ta cuida nan bon. Nan ta entrena nan yiunan pa comporta nan mes bon y pa nan tin bon manera. (1 Tesalonicensenan 2:7, 11) Segun cu e muchanan ta desaroya como resultado di e esfuersonan aki, e mayornan ta sinti nan orguyoso y ta cuminsa carga gran speransa pa nan.

Mayornan amoroso ta traha duro pa percura pa e necesidadnan di nan yiunan. Podise cu regularidad nan ta spar cen of cosnan material pa asina den futuro nan por yuda nan yiunan cuminsa cu nan propio famia. (2 Corintionan 12:14) E tremendo inversion di emocion, tempo, esfuerso y placa aki cu mayornan ta hinca den nan yiunan ta indica un solo cos: mayornan ta cria nan yiunan pa biba, no pa muri. Ora un yiu muri, e trabou di cri’e ta keda na mitar y e speransa cu e  mayornan tabatin p’e ta cai na awa. Ta como si fuera e muraya di morto a blokia e caminda di amor y cariño cu tabata pasa di e mayornan pa e yiu. E luga cu nan yiu homber of yiu muher tabatin un tempo den nan curason, awor ta bashi. E mayornan ta sinti un tristesa profundo cu no ta bai facilmente.

Bijbel ta confirma cu mayornan kende nan yiu a muri ta carga un dolor inmenso y persistente. Describiendo loke a pasa ora cu patriarca Jacob a tende cu su yiu homber Jose a ser mata, Bijbel ta bisa: “Jacob a scheur su pañanan y a pone paña-di-saco na su heup, y a tene rou hopi dia pa su yiu [of, “hopi tempo el a keda yora morto di su yiu”, BPK]. E ora ei tur su yiu hombernan y tur su yiu muhernan a lanta pa consol’e, ma el a nenga di wordo consola. Y el a bisa: ‘Siguramente lo mi baha bai den Seol [of, graf] na rou pa mi yiu homber.’” Añanan despues, Jacob ainda tabata pena pa su yiu, cu el a asumi tabata morto. (Genesis 37:34, 35; 42:36-38) Un otro ehempel den Bijbel ta di e muher fiel Noemi cu a experencia e morto di su dos yiu hombernan. El a keda hopi tristo y tabata kier a cambia su nomber di Noemi, cu a nifica “Placentero”, pa Mara, cu a nifica “Marga.”​—Ruth 1:3-5, 20, 21, nota na pia di pagina.

Sinembargo, Bijbel ta bai mas leu cu djis confirma e tristesa cu mayornan ta sinti. E ta indica tambe con Jehova ta duna fortalesa na esnan cu ta desconsola. Den e siguiente articulo, nos lo considera algun di e maneranan cu Dios ta duna consuelo na hende cu ta pena pa morto di un ser keri.

[Nota]