1. Yehova naatuhiga kukora ki?

YEHOVA naatwara rukundo etarikuhinduka nk’enshonga nkuru. (Hos. 6:6) Naahiga abaheereza be nabo kugitwara batyo. Ruhanga arikukoresa nabi Miika, naatuhiga kugira rukundo nk’egyo. (Mik. 6:8) Kwonka, tutakakozire ekyo, rukundo etarikuhinduka niki?

2. Rukundo etarikuhinduka neetwariramu ki?

² Rukundo etarikuhinduka niki? Ebigambo ‘rukundo etarikuhinduka’ biri omu Baibuli eya New World Translation of the Holy Scriptures emirundi nka 230. Neeshoboororwa eta? Kurugiirira aha “Amakuru g’Ebigambo By’omu Baibuli” ni “rukundo y’okumariirira, obwesigwa, okutaruga aha rugyero, n’okuhamira munonga aha muntu. Rukundo egi eine akakwate n’ei Ruhanga ainiire abantu, nangwa n’ei abantu babiri barikugirirana.” Yehova niwe arikukirayo kworeka rukundo etarikuhinduka nk’egi. Omu kicweka eki, nituza kureeba oku Yehova ainiire abantu rukundo etarikuhinduka. Omu kicweka ekirikukurataho, nituza kureeba oku itwe abaheereza ba Yehova turikubaasa kumutooreza turikugirirana rukundo etarikuhinduka.

3. Yehova akeeyoreka ata Musa?

³ Abaisraeli baherize kuruga Misri, Yehova akeeyoreka Musa arikuranga eiziina rye n’emitwarize ye. Akagira ati: ‘[Yehova, Yehova], Ruhanga ow’okusaasira n’embabazi, otarikurahuka kugira ekiniga, oijwire embabazi [rukundo etarikuhinduka] n’amazima, orikugirira abantu embabazi enkumi n’enkumi, orikusaasira okutahikiirira n’okushiisha n’ekibi.’ (Kur. 34:6, 7) Yehova akakoresa emitwarize ye kumanyisa Musa ngu aine rukundo  etarikuhinduka. Ahabw’enki nitugira tutyo?

4-5. (a) Yehova akeeshoboororaho ata? (b) Nituza kugarukamu bibuuzo ki?

⁴ Yehova taragizire ngu aine rukundo etarikuhinduka kyonka, beitu akagira ngu aijwire rukundo etarikuhinduka. Enshoboorora egi neegambwaho endiijo emirundi omu Baibuli. (Kub. 14:18; Neh. 9:17; Zab. 86:15; 103:8; Yoel. 2:13; Yon. 4:2) Emirundi yoona egi neekwata ahari Yehova, beitu batari bantu. Mbwenu shi eki ti kikuru kureeba ngu naayegambaho nk’oine rukundo etarikuhinduka? Hatariho kubangaanisa, rukundo etarikuhinduka ni nkuru ahariwe. * Tikirikutangaaza kureeba ngu Omugabe Daudi akagira ngu rukundo etarikuhinduka, ai Yehova, neehika omu bicu. Ai Ruhanga, rukundo yaawe etarikuhinduka ka n’ey’obuguzi bwingi! N’ahabw’ekyo abantu nibahungira omu mapapa gaawe. (Zab. 36:5, 7) Nka Daudi, nitusiima rukundo ya Ruhanga etarikuhinduka?

⁵ Kubaasa kwongyera kwetegyereza rukundo etarikuhinduka, ka tugarukyemu ebibuuzo bibiri ebi: Ni baahi abu Yehova arikugirira rukundo etarikuhinduka? Kandi nitubaasa kugasirwa tuta omu bikorwa bya Yehova ebya rukundo etarikuhinduka?

6. Ni baahi abu Yehova arikugirira rukundo etarikuhinduka?

⁶ Yehova naagirira baahi rukundo etarikuhinduka? Baibuli neegira ngu nitubaasa kukunda ebintu bingi, ‘nk’eby’okuhinga,’ “viinyo n’amajuta,” “okuhanwa,” “obwengye,” okumanya, n’ebindi. (2 Bus. 26:10; Enf. 12:1; 21:17; 29:3) Kwonka rukundo etarikuhinduka, torikubaasa kugigirira ebintu kureka abantu bonka. Yehova tarikugirira buri omwe weena rukundo etarikuhinduka. Naagirira abo abaine omukago gw’omutaano nawe. Ruhanga waitu naahamira ahari banywani be. Abainiire ekigyendererwa ky’omuhendo, kandi tarikwija kurekyera aho kugumizamu naabakunda.

7. Yehova ayorekire ata ngu naakunda abantu boona okutwarira hamwe?

⁷ Yehova naakunda abantu boona okutwarira hamwe. Yesu akagambira omushaija orikwetwa Nikodemu ati: “Nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”—Yoh. 3:1, 16; Mat. 5:44, 45.

8-9. (a) Ahabw’enki naagirira abaheereza be rukundo etarikuhinduka? (b) Nituza kugumizamu kushwijuma ki?

⁸ Nk’oku kyaba kyagambirwe, rukundo etarikuhinduka Yehova naagigirira abo abaine  omukago murungi nawe, nibo baheereza be. Eki nitukireebera aha bigambo by’Omugabe Daudi na nabi Danieli. Nk’eky’okureeberaho, Daudi akagira ati: “Guma ogirire abarikukukunda embabazi nyingi [rukundo etarikuhinduka].” ‘Embabazi za [Yehova nari rukundo ye etarikuhinduka neeguma] aha barikumutiina okwiha iranaira.’ Kandi Danieli akagira ngu Ai Yehova Ruhanga ow’amazima orikugirira rukundo etarikuhwaho, abarikukukunda, bakoorobera ebiragiro byawe. (Zab. 36:10; 103:17; Dan. 9:4) Kurugiirira aha bigambo ebi, Yehova naagirira abaheereza be rukundo etarikuhinduka ahabw’okugira ngu nibamukunda, kandi niboorobera ebiragiro bye. Yehova rukundo ye etarikuhinduka naagibiikira abaheereza be ab’amazima.

⁹ Tutakatandikire kuheereza Yehova, akatugirira rukundo ei arikugirira abantu boona okutwarira hamwe. (Zab. 104:14) Kwonka, ku twatandikire kumuramya, yaatugirira na rukundo etarikuhinduka. Nangwa Yehova naahamiza abaheereza be ngu rukundo ye ‘etarikuruga aha rugyero, terikurugaho.’ (Isa. 54:10) Buzima, nk’oku Daudi yaareebire, Yehova naatwariza abarikumuhamiraho omu muringo gw’omutaano. (Zab. 4:3) Twine kwehurira tuta ahabw’okugira ngu Yehova naatutwariza omu muringo gw’omutaano? Omuhandiiki wa zaaburi akagira ngu ‘oine obwengye weena ate omutima aha bigambo ebyo’ kandi ateekateekye munonga aha bikorwa bya Yehova ebya rukundo etarikuhinduka. (Zab. 107:43) Twine obuhabuzi obwo omu biteekateeko, ka tureebe emiringo eshatu ei abaheereza ba Yehova barikugasirwa omu bikorwa bye ebya rukundo etarikuhinduka.

10. Nituhwerwa tuta rukundo ya Ruhanga etarikuhinduka? (Zaaburi 31:7)

¹⁰ Rukundo ya Yehova etarikuhinduka n’ey’ebiro byona. Rukundo egi neegambwaho emirundi 26 omuri Zaaburi 136 omu Baibuli eya New World Translation. Omushororongo gw’okubanza nigugira ngu, musiime Yehova, ahakuba rukundo ye etarikuhinduka n’ey’ebiro byona. (Zab. 136:1) Ogwa 2 kuhika aha 26, harimu ebigambo rukundo ye etarikuhinduka neegumaho ebiro byona. Twagumizamu  kushoma emishororongo eyaatsigarayo omu zaaburi egi, nitureeba emiringo mingi ei Yehova arikugumizamu naayoreka rukundo etarikuhinduka. Ebigambo ebirikugira ngu rukundo ye etarikuhinduka neegumaho ebiro byona nibituhamiza ngu rukundo ya Ruhanga terikuhwaho. Ka nikishemeza kureeba ngu Yehova tarikurahuka kurekyera aho kutukunda! Kureka, naahamira aha barikumuheereza kandi abatarikumurugaho, na munonga omu bwire bugumire. Oku turikugasirwa: Okumanya ngu Yehova naatuhamiraho, nikitureetera okushemererwa, nikituha n’amaani g’okwemera amaganya n’okuguma omu muhanda ogurikuhitsya omu magara agatahwaho.—Shoma Zaaburi 31:7.

11. Kurugiirira ahari Zaaburi 86:5, niki ekirikuhiga Yehova kusaasira?

¹¹ Ruhanga naatusaasira ahabwa rukundo ye etarikuhinduka. Yehova ku arikureeba omusiisi oyeteisize kandi akareka ebibi bye, rukundo ye etarikuhinduka neemuhiga kumusaasira. Omuhandiiki wa zaaburi Daudi akagamba ahari Yehova ati: ‘Tarikutugira nk’ebibi byaitu oku biri, n’obu kwakuba okutuzimuurira nk’okutahikiirira kwaitu oku kuri.’ (Zab. 103:8-11) Daudi kurugiirira aha byamuhikireho naamanya obusaasi oburikureetwa omutima ogurikweshinja. Kwonka nabwo akeega ngu Yehova naaba ayeteekateekire kusaasira. Niki ekirikuhiga Yehova kusaasira? Eky’okugarukamu kiri omu Zaaburi 86:5. (Kishome.) Eego, nk’oku Daudi yaagambire omu kushaba, Yehova naasaasira ahabw’okugira ngu ainiire abarikumushaba rukundo etarikuhinduka.

12-13. Waaba nooyehurira kubi ahabw’enshobe zaawe ez’enyima, niki ekirikwija kukuhwera?

¹² Twakora ekibi, kihikire kwefuuza kandi nangwa okwefuuza n’eky’oburungi bwaitu. Eki nikibaasa kutuhiga kweteisa kandi tugire eki twakora kutereeza enshobe zaitu. Kwonka bamwe aha baheereza ba Ruhanga, bakarengwa okwehurira kubi ahabw’enshobe zaabo ez’enyima. Omutima gwabo ogurikubacwera orubanja gukabahamiza ngu Yehova tarikubaasa kubasaasira, n’obu baakuba beeteisiize kimwe. Waaba oine enyehurira nk’ezo, okumanya ngu Ruhanga naaba ayeteekateekire kugirira abaheereza be rukundo etarikuhinduka, nikiija kukuhwera.

 ¹³ Oku turikugasirwa: N’obu turaabe turi abatahikiriire, nitubaasa kuheereza Yehova tushemereirwe kandi twine omutima ogutarikweshinja. Eki nikibaasika ahabw’okugira ngu ‘eshagama ya Yesu Omwana we neetwozyaho ebibi byona.’ (1 Yoh. 1:7) Waaba nooyehurira kubi ahabw’obutahikiirira, ijuka ngu Yehova naaba ayeteekateekire kusaasira abasiisi abarikweteisa. Yetegyereze oku Daudi yaagizire ngu rukundo etarikuhinduka eine akakwate n’okusaasira. Akahandiika ati: ‘Nk’eiguru oku riri ahaiguru munonga kuruga ahansi, [na rukundo etarikuhinduka ei arikugirira] abarikumutiina nikwo eri nyingi. Nk’oburugwa-izooba oku eri hare n’oburengyerwa-izooba, nikwo arikutwara atyo hare eby’okushiisha byaitu.’ (Zab. 103:11, 12) Buzima, Yehova naaba ayeteekateekire ‘kusaasirira kimwe.’—Isa. 55:7.

14. Daudi akashoboorora ata oku rukundo ya Ruhanga etarikuhinduka erikuturinda?

¹⁴ Rukundo ya Ruhanga etarikuhinduka n’eky’oburinzi omu by’omwoyo. Daudi arikushaba Yehova, akagira ati: ‘Niiwe bweshereko bwangye, noija kundinda ndekye kureeba enaku. Noija kunyehinguririza n’ebyeshongoro by’okujunwa.’ Orikwesiga Yehova naaba ayetooroirwe rukundo ye etarikuhinduka. (Zab. 32:7, 10) Nk’oku ebisiika by’orurembo ira byabaire nibirinda abari omu rurembo, n’ebikorwa bya Yehova ebya rukundo etarikuhinduka nibiturinda akabi akarikubaasa kuturemesa kuguma tumuhamiireho. Kandi, rukundo ya Yehova etarikuhinduka neemuhiga kutweyiriza haihi.—Yer. 31:3.

15. Rukundo ya Yehova etarikuhinduka neeshushana eta n’omwanya gw’oburinzi?

¹⁵ Daudi akakoresa ebigambo ebindi eby’amashushane kushoboorora oburinzi obu abantu ba Ruhanga baine. Akahandiika ati: ‘Ruhanga orikunsaasira niwe rugo rwangye orugumire.’ Kandi Daudi akongyera yaagamba ahari Yehova ati: ‘Niwe rukiri rwangye, n’orugo rwangye oruraingwa, kandi omujuni wangye, engabo yangye, kandi ou ndikwesiga.’ (Zab. 59:17; 144:2) Ahabw’enki Daudi yaagizire ngu rukundo ya Yehova etarikuhinduka eine akakwate n’oburinzi hamwe n’orugo rugumire? N’obu twakuba nitutuura nkahi omu nsi, kasita tuba turi abaheereza ba Yehova, naija kutuha oburinzi bwona oburikwetengyesa, kubaasa kurinda omukago gwaitu nawe ogw’omuhendo. Okuhamizibwa oku kuri omuri Zaaburi 91. Omuhandiiki wa zaaburi egyo akagira ngu niinyija kugira Yehova nti: “Niiwe buhungiro bwangye, kandi orugo rwangye orugumire.” (Zab. 91:1-3, 9, 14) Musa akakoresa ebigambo ebindi eby’amashushane ebirikukwata aha buhungiro. (Zab. 90:1) Kandi, Musa ari haihi kufa, akata omutima aha kashonshorekye akarikuhuumuriza. Akahandiika ati: ‘Ruhanga otarikuhwaho niwe butaaho bwawe, kandi ahansi yaawe hariho emikono etarikuhwaho.’ (Bir. 33:27) Ebigambo ‘ahansi yaawe hariho emikono etarikuhwaho’ nibitwegyesa ki ahari Yehova?

16. Twine emigisha y’emiringo ebiri eha? (Zaaburi 136:23)

¹⁶ Yehova yaaba ari obuhungiro bwaitu, nituba twine oburinzi. Kwonka nabwo, haine obu turikuba turi ahansi, turemirwe kwimuka. Omu bwire nk’obwo, Yehova naija kutukorera ki? (Shoma Zaaburi 136:23.) Naija kuta emikono ye ahansi yaitu, atwimutsye mporampora, atuhwere kugaruka kwemerera aha bigyere byaitu. (Zab. 28:9; 94:18) Oku turikugasirwa: Okumanya ngu butoosha nitubaasa kwesiga obushagiki bwa Ruhanga, nikibaasa kutuhwera kumanya ngu twine emigisha y’emiringo ebiri. Ogw’okubanza, hoona ahu turikutuura nituba twine omwanya gw’oburinzi. Ogwa kabiri, Tataitwe ow’omu iguru naatufaho munonga.

17. Ahabw’okugira ngu Yehova aine rukundo etarikuhinduka, nitubaasa kugira buhame ki? (Zaaburi 33:18-22)

¹⁷ Nk’oku twareeba, twagyezibwa, nitubaasa kuhamya ngu Yehova naija kutuhwera arikutuha obushagiki kubaasa kuguma tumuhamiireho. (2 Kor. 4:7-9) Nabi Yeremia akagira ati: ‘Embabazi za [Yehova nari rukundo ye etarikuhinduka terikuhwaho], n’okusaasira kwe nikugumaho ebiro byona.’ (Tonz. 3:22) Nitubaasa kugira obuhame ngu Yehova naija kutugirira rukundo ye etarikuhinduka ahakuba nk’oku omuhandiiki wa zaaburi yaatuhamiize, amaisho ge nigaguma aha barikumutiina, abaine amatsiko omuri rukundo ye etarikuhinduka.—Shoma Zaaburi 33:18-22.

18-19. (a) Twine kuguma nitwijuka ki? (b) Nituza kugamba ahari ki omu kicweka ekirikukurataho?

¹⁸ Nitwenda kuguma nitwijuka ki? Obu twabaire tutakatandikire kuheereza Yehova, Ruhanga akaba atwiniire rukundo ei ainiire abantu boona okutwarira hamwe. Kwonka hati obu turikumuramya, nitugasirwa omuri rukundo ye etarikuhinduka. Yehova naahigwa rukundo egyo kutubumbatira omu mikono ye ey’oburinzi. Naatweyiriza haihi, kandi naija kuhikiiriza ekigyendererwa kye ahabwaitu. Naayenda ngu tube abasinguzi! (Zab. 46:1, 2, 7) N’ahabw’ekyo, n’obu twakuba twine kugyezibwa kwa muringo ki, Yehova naija kutuha amaani agarikwetengyesa kuguma tumuhamiireho.

¹⁹ Twareeba oku Yehova arikugirira abaheereza be rukundo etarikuhinduka. Kandi naitwe, naayenda ngu tugirirane rukundo nk’egyo. Eki nitubaasa kukikora tuta? Ekicweka ekirikukurataho nikiza kugamba aha nshonga nkuru egi.