Nkazaarirwa Netherlands omu 1948. Omwaka ogwakuratsireho, eka yaitu ekafurukira São Paulo, Brazil. Abazaire bangye bakaba nibakira kuza omu kanisa, kandi bwanyima y’okurya kyakiro tukaba nitukira kushoma Baibuli nk’eka. Omu 1959 tukagaruka twafuruka, kwonka aha murundi ogu tukaza United States, twatuura omu kyanga kya Massachusetts.

Tata akaba naakora munonga kubaisaho eka yaitu ey’abantu munaana. Akaba naakira kukora emirimo y’okuguza ebintu, okwombeka enguuto, kandi akakoraho n’aha kishaayi ky’enyonyi. Boona omuka bakashemererwa ku yaatungire omurimo gw’okukora aha kishaayi ky’enyonyi ahakuba tukaba nitubaasa kurambura emyanya mingi.

Obu naabaire ninshoma, nkaba ninkira kwebuuza nti: ‘Ninza kukora murimo ki naakura?’ Banywani bangye abamwe bakacwamu kuza aha yunivasite, kandi abandi bo baaza omu mahe. Kwonka nyowe, nkaba tarikwenda kuza omu mahe, ahakuba nkaba ntarikukunda kutongana nari kurwana. Nkacwamu kuza aha yunivasite kwetantara amahe. Kwonka omunda omu mutima, nkaba niinyenda kuhwera abandi, ndikuteekateeka ngu nikibaasa kundeetera okumarwa.

Aha yunivasite, nkaba ninkunda kwega aha ntwaza y’abantu, ahabw’okugira ngu nkaba niinyenda kumanya obukomooko bw’amagara. Tukaba nitwegyesibwa ngu ebintu bikabaho birikuruga omu bindi, kandi abashomesa bakaba nibenda twikirize ngu enyegyesa egyo ehikire. Kwonka nyowe nkaba nindeeba ngu eshoboorora ezimwe tizirikwetegyerezibwa gye, oine kwikiririza eryo, ekirikutaana n’emitindo ya saayansi.

Omu kibiina tukaba tutarikwegyesibwa emitindo y’emicwe. Kureka, tukaba nitwegyesibwa kuta mutima aha kuba abasinguzi nk’okurikubaasika. Nkaba ninyehurira gye naaba ndi na bagyenzi bangye turikweshemeza, turikukoresa n’emibazi, kwonka okushemererwa okwo kukaba kuhwaho juba. Nkatandika kwebuuza nti: ‘Buzima egi niyo mbeera erikureeta okumarwa?’

Bwanyima y’obwire, nkafurukira omu rurembo Boston kandi naatandika kushoma aha yunivasite. Obu naabanza kureeba Abajurizi ba Yehova, nkaba ninkora omu kihuumuro, kutunga esente z’okushashura aha ishomero. Omukozi mugyenzi wangye akangambira aha bunabi oburikukwata aha “omwanya gw’emyaka mushanju” oburi omu Danieli eshuura ya 4 kandi yaanshoboororera ngu turi omu bwire bw’emperu. (Dan. 4:13-17) Nketegyereza ngu naagumizamu ningaaniira n’omushaija ogwo ebirikukwata aha Baibuli embeera yangye ekaba naija kuhinduka. N’ahabw’ekyo, nkacwamu kumwetantara nk’oku kirikubaasika.

Aha yunivasite, nkatwara amashomo agaabaire nigaija kumbaasisa kuheereza nka nyekundiire omuri South America. Nkaba ninteekateeka ngu okuhwera abandi ndikubakorera ebirungi nikiija kundeetera kugira ekigyendererwa. Kwonka nketegyereza ngu eki nakyo kikaba kitarikundetera okumarwa. Nkatamwa nangwa naaruga n’aha yunivasite omwaka ogwo.

Omu Mei 1970, nkaza Amsterdam, Netherlands, kukora aha kishaayi ky’enyonyi omurimo ogu tata yaabaire naakora. Omurimo ogwo, gukaba nigumbaasisa kuza omu mwanya mingi, nk’okutaayaaya omu mahanga g’Africa, America, Europe, na Asia. Kwonka juba nketegyereza ngu n’obu ndaabe ninkira kutaayaaya omu mahanga ago, goona gakaba gaine oburemeezi burikushushana kandi tihaine owaabaire naabaasa kubushoboorora. Nkaba niinyendera kimwe kuhikiiriza ekigyendererwa kyangye ekikuru, n’ahabw’ekyo nkacwamu kugaruka United States kushoma aha yunivasite ei naabaire ninshomeramu omuri Boston.

Obu naabaire ndi aha ishomero, nketegyereza ngu nkaba ntarikutunga eby’okugarukamu by’ebibuuzo byangye ebirikukwata aha kigyendererwa ky’okubaho. Ahabw’okutamanya eky’okukora, nkabuuza omushomesa ow’obuhangwa bw’abantu obuhabuzi. Kikaantangaaza ku yaangizire ati: “Ahabw’enki oine kugumizamu nooyega? Ahabw’enki otarikubirugaho?” Akakigamba omurundi gumwe. Kwonka nkagyenda obwa mpererayo.

Ahabw’okugira ngu nkaba ntarikumanya ekigyendererwa ky’okubaho, nkacwamu kuza omu kigombe ky’abarikwetwara nk’abarikureetaho obusingye. Nyowe n’abandi tukaba nituzengyerera omuri United States kuhika Acapulco, Mexico. Tukaba nitutuura n’abantu abarikukunda kweherera bonka kandi abatarikwefeerayo. Kwonka juba  nketegyereza ngu embeera yaabo ekaba etarikukora makuru nari kureeta okushemererwa okwabuzima. Kureka, entwaza yaabo ekaba neetwariramu ebikorwa by’oburyarya.

Bwanyima y’obwire, nkagaruka kuteekateeka aha kirooto kyangye ky’omu buto. Nkaba niinyenda kugyendera aha maizi ntari muvugi w’emeeri, kureka nk’orikugikurira. Kubaasa kuhikiiriza ekyo, nkaba nyine kutunga eryato eryangye ahabwangye. Ahabw’okugira ngu Tom mugyenzi wangye akaba aine ebigyendererwa nk’ebyangye, tukacwamu kuvuga eryato kwetoorora ensi. Nkaba niinyenda kutunga omwanya murungi oguri nka paradiso aha kirwa ogutariho ebiragiro by’abantu.

Nyowe na Tom tukaza Arenys de Mar, haiha na Barcelona, Spain. Niyo twaguzire eryato rya fuuti 31 eririkwetwa Llygra. Tukatandika kutereeza eryato ryaitu kugira ngu rigyende gye aha nyanja. Ahabw’okugira ngu tukaba tutarikurahukiriza kuhika ahu turikuza, eryato tukarihamu ingini kubaasa kutunga omwanya gurikumara gw’okutamu amaizi g’okunywa. N’ahabw’ekyo kubaasa kuvuga eryato ryaitu, tukakomeraho enkatsi ibiri eza fuuti 16. Empereruka, tukavuga kuza aha kizinga Seychelles, ekiri omuri Indian Ocean. Tukaba twine ekigyendererwa ky’okurambura ebicweka bya burugwa izooba bw’Africa na Cape of Good Hope, eya South Africa. Tukaba nitukoresa enyonyoozi, maapu, ebitabo, n’ebindi ebirikuhwera kumanya ahu turiyo nituza. Kikaba nikishemeza kumanya ahu turikuza.

Omu bwire bukye, tuketegyereza ngu eryato ryaitu ry’embaaho kandi erikuzire, tiririkubaasa gye embeera y’enyanja. Rikaba nirizamu nka lita 22 z’amaizi buri shaaha ahabw’okufumuka! Nk’oku naaba naabagambiire omu kutandika, ku haabaireho eihunga ry’amaani nkatiina munonga naashaba omurundi gwangye gw’okubanza bwanyima emyaka mingi, nindaganisa Ruhanga ngu ku ndahonokeho, ninyija kuteeraho kumumanya. Eihunga rikacureera, kandi naahikiiriza eki naaraganiise.

Nkatandika kushoma Baibuli ndi aha ryato. Teebereza ori aha gati ya Mediterranean Sea oyetooroirwe eby’enyanja ebirikuguruka, emigoye, kandi orikureeba ahantu ahu otarikubaasa kurenzya amaisho. Omu kiro, nkaba ninshemererwa kureeba enyonyoozi z’omu mwanya, reero nyongyera kuhamya ngu hariho Ruhanga orikufayo aha bantu.

Bwanyima y’obwire, tukahika aha nyambukiro ya Alicante, Spain, kubaasa kuguza eryato ryaitu erikuzire kutunga esente z’okugura erindi eriboneire. Kikaba kitoorobi kutunga ow’okugura eryato rikuzire ritaine ingini kandi rifumukire! Kwonka nabwo, bukaba buri obwire burungi bw’okushoma Baibuli.

Ku naayongyeire kushoma Baibuli, nkatandika kugireeba nk’ekitabo ekirikubaasa kutuhwera kuba abasinguzi. Kikaantangaaza kureeba oku Baibuli erikutuhiga kutwaza omu muringo ogushemeire, okugira emicwe mirungi, reero naayebuuza ahabw’enki abantu baingi otwariiremu naanye turikwehuzya ebi erikwegyesa, kandi obwo turikweyeta Abakristaayo.

N’ahabw’ekyo nkamariirira kukora empindahinduka z’amaani, naarekyera aho kukoresa emibazi. Nkaba niinyebuuza yaaba hariho abantu abarikugyendera aha mitindo ya Baibuli erikukwata aha micwe, kandi nkaba niinyenda kubasherura. Nkashaba Ruhanga omurundi gwa kabiri kumpwera kubabona.

Nkaba nindeeba ngu n’eky’oburyo kushwijuma buri diini kubaasa kumanya ehikire. Nkaba ninkira kureeba amaramizo maingi gariho omusharaba, naaba nindaba aha nguuto za Alicante. Kwonka ahabw’okugira ngu ebirikukira obwingi bikaba biriho ebishushani nkaba niimanya ngu tiyo diini ehikire.

Eizooba rimwe rya Sande omu ihangwe, nkaba ndi aha kabungo ahari kureebana n’enyambukiro y’enyanja, ndikushoma Yakobo 2:1-5, aharikugira ngu kigwire kutwara abagaiga nk’arikukira abandi. Ku naabaire ndi aha ryato ningaruka omu ka, nkareeba omwanya gw’okuramizamu guhandiikireho ebigambo: “Ekyombeko ky’Obukama eky’Abajurizi ba Yehova.”

Nkateekateeka nti: ‘Ninyija kutaayaayira abantu aba, ndeebe oku baraantwarize.’ N’ahabw’ekyo nkataaha omu Kyombeko ky’Obukama ntaine nkaito omu bigyere, nkurize ebireju kandi njwaire empare ya giini etagukire. Owaabaire naayakiira abantu akantwara naashutama haihi n’omukazi okaikwire owaampweraire omu kushuuruura ebyahandiikirwe omu Baibuli. Bwanyima y’oruteerane, boona abaabaire bari omu ruteerane bakaija kundamutsya kandi eki kikaanshemeza munonga. Omushaija omwe akanyeta owe kugaaniira ahari Baibuli, kwonka ahabw’okugira ngu nkaba ntakaherize kugishoma, nkamugira ngu, “ninyija kukumanyisa kundayetebeekanise.” Bwanyima, nkatandika kwija omu nteerane zoona.

Bwanyima ya saabiiti nyingiho, nkaza ow’omushaija ogwo kandi yaagarukamu ebibuuzo byangye arikukoresa Baibuli. Bwanyima ya saabiiti emwe, akampa enshaho eijwire emyenda erikureebeka gye munonga. Akangira ngu owaabaire naajwara emyenda egyo akateebwa omu kihome ahabw’okworobera ekiragiro ky’omu Baibuli eky’okukundana n’okuteejumba omu kwega eby’entaro. (Isa. 2:4; Yoh. 13:34, 35) Hati nkahamiza kimwe ngu mboine abantu abu mbaire ninsherura abarikuta omu nkora obuhabuzi bwa Baibuli oburikukwata aha micwe! Hati ekigyendererwa kyangye eky’okubona paradiso kikahinduka kyaba eky’okwega Baibuli kugyetegyereza. N’ahabw’ekyo nkagaruka omu Netherlands.

Nkamara ebiro bina kuhika omu rurembo rwa Groningen, omuri Netherlands. Nkaba nyine kutunga omurimo gw’okwebaisaho. Aha ibaiziro rimwe ahu naagiire kushaba omurimo, bakaba nibenda kubanza kumanya ediini yangye. Nkabagira ngu ndi, “Omujurizi wa Yehova.” Mukama w’eibaiziro ku yaakimanyire akakairirimba aha maisho. Reero yaangira ngu, “ninyija kukweta.” Kwonka taranyetsire.

 Nkaza aha ibaiziro erindi, naabuuza mukama waaryo yaaba naayenda obuhwezi. Akambuuza aha bikwatiraine n’obwegyese bwangye n’emirimo ey’enyima. Nkamugira ngu nkaba naakanikireho eryato ry’embaaho. Ekyantangaarize, akangira ati: “Noobaasa kutandika kukora eihangwe eri, kwonka hariho ekintu kimwe eki ndikukushaba. Tindikwenda oburemeezi aha ibaiziro ryangye, ahakuba ndi omwe aha Bajurizi ba Yehova kandi niingyendera aha misingye ya Baibuli.” Nkamureeba aha maisho ndikumwenya, reero naamugira nti: “Nikyo kimwe naanye!” Ahabw’okugira ngu nkaba nkurize eishokye n’ebireju, akangira ati: “Ninyija kukwegyesa Baibuli!” Nkaikiriza ngu anyegyese. Hati nkamanya ahabw’enki omushaija ow’okubanza yaayangire kumpa omurimo. Yehova akaba ariyo naagarukamu okushaba kwangye. (Zab. 37:4) Nkakora omu ibaiziro ry’ow’eishe-emwe ogwo, kumara omwaka gumwe. Omu bwire obwo, akanyegyesa Baibuli, reero bwanyima naabatizibwa Jenwari 1974.

Bwanyima y’okwezi kumwe, nkaba payoniya w’obutwire, ekyandeeteire okushemererwa kwingi. Okwezi okwakuratsireho, nkaza Amsterdam kushagika guruupu ery’Orusipania eyaabaire eherize kutandikwaho. Ka kyandeeteire okushemererwa kwingi kwegyesa abeegi omu Rusipania n’omu Rupotuguezi! Omu Mei 1975, nkatunga omugisha gw’okuba payoniya w’omutaano.

Eizooba rimwe, munyaanyazi-itwe Ineke payoniya w’omutaano akaija omu nteerane zaitu ez’Orusipania kutwanjuririra omwegi we wa Baibuli orikuruga Bolivia. Nyowe na Ineke tukacwamu kuhandiikirana amabaruha kubaasa kumanyana, bwanyima tukeetegyereza ngu twine ebigyendererwa ebirikushushana. Tukataaha hamwe omu bushwere 1976 kandi twagumizamu turi baapayoniya b’omutaano kuhika 1982, obu twayetwa kuza omu ishomero rya Gileadi erya 73. Tukatangaara ku baatugizire ngu tuze East Africa, ahu twaheereize kumara emyaka etaano turi Mombasa, Kenya! Omuri 1987, tukashabwa kuza kuheereza omuri Tanzania, ahu omurimo gw’okubuurira gwabaire gugarukire kwikirizibwa. Tukatuurayo kumara emyaka 26, reero bwanyima twagaruka Kenya.

Okuhwera abantu abacureezi kwega Baibuli kituhweraire kugira ekigyendererwa ekyabuzima. Nk’eky’okureeberaho, omwegi wangye w’okubanza omuri Mombasa akaba ari omushaija ou naatungire ndikuza kubuurira omu rweteeraine. Bwanyima nkamuha magaziini ibiri, reero yaagira ati: “Ku ndaaheze kushoma ezi, nkore ki ekindi?” Saabiiti eyaakuratsireho nkatandika kumwegyesa Baibuli ndikukoresa akatabo You Can Live Forever in Paradise on Earth, kandi nibwo kaabaire kaherize kushohozibwa omu Ruswahili. Akabatizibwa bwanyima y’omwaka gumwe, kandi yaaba payoniya w’obutwire. Kuruga obwo, we n’omukazi we bahweraire abantu abarikuhika nka 100 kwehayo bakabatizibwa.

Ku naamanyire ekigyendererwa ky’okubaho, nkeehurira nk’omushuubuzi orikusherura eruuru y’omutaano, ku yaagiboine akaba atarikwenda kugifeerwa. (Mat. 13:45, 46) Nkaba niinyenda kukoresa obwire bwangye ndikuhwera abandi kumanya ekigyendererwa ky’okubaho ekihikire. Nyowe n’omukazi wangye, tureebe oku Yehova arikuhwera abaheereza be kumanya ekigyendererwa omu kubaho ekihikire.