1. Kuhikaana n’ebiri omu 1 Petero 3:8, ahabw’enki nitukunda kuba n’abantu abarikufayo aha nyehurira zaitu n’embeera zaitu?

NITUKUNDA kuba n’abantu abarikufayo aha nyehurira zaitu n’embeera zaitu. Nibeeta omu bigyere byaitu, barikuteeraho kwetegyereza ebi turikuteekateeka n’oku turikwehurira. Nibamanya kare eki turikwenda reero batuhwera obundi tutakashabire n’obuhwezi. Nitusiima abantu ‘abarikutugirira embabazi.’ *—Shoma 1 Petero 3:8.

2. Ahabw’enki twine kuteeraho kugirira abandi esaasi?

² Abakristaayo twena, nitwenda kugirira abandi embabazi, nari esaasi. Kwonka buzima, nikibaasa kutwetengyesa kwongyeramu amaani. Ahabw’enki? Enshonga emwe n’okugira ngu tituhikiriire. (Rom. 3:23) N’ahabw’ekyo twine kurwanisa omuze gw’obuzaariranwa ogw’okweteekateekaho twenka. Kandi baingi ahariitwe nitubaasa kugumirwa kugirira abandi embabazi ahabw’oku twakuziibwe n’ebi twarabiremu. Obundi, nitubaasa kuba nitugyemeserezibwa abantu abu tutwire nabo. Omu biro ebi eby’aha mperu, baingi tibarikufayo aha nyehurira z’abandi. Omu mwanya gw’ekyo, ‘nibeekunda.’ (2 Tim. 3:1, 2) Niki ekirikubaasa kutuhwera kusingura embeera ezirikutureetera kugumirwa kufayo aha bandi?

3. (a) Nitubaasa kuboneza tuta omuringo ogu turikufayo aha bandi? (b) Nituza kushwijuma ki omu kicweka eki?

³ Nitubaasa kwongyera kugirira abandi embabazi turikutooreza Yehova Ruhanga n’Omwana we, Yesu Kristo. Yehova ni Ruhanga oine rukundo, kandi naatuteeraho eky’okureeberaho kirungi  eky’okufayo aha bandi. (1 Yoh. 4:8) Yesu akooreka gye emitwarize ya Ishe. (Yoh. 14:9) Obu yaabaire ari omu nsi, akooreka oku abantu barikubaasa kugirira abandi esaasi. Omu kicweka eki, nituza kubanza kushwijuma oku Yehova na Yesu boorekire ngu nibafayo aha nyehurira z’abandi. Bwanyima nituza kureeba oku turikubaasa kubatooreza.

4. Ebiri omu Zefania 2:8 nibyoreka bita ngu Yehova naafayo aha nyehurira z’abaheereza be?

⁴ Baibuli neeyegyesa ngu Yehova naafayo aha nyehurira z’abaheereza be. Nk’eky’okureeberaho, teekateeka aha ku Yehova yaayehuriire obu Abaisraeli aba ira baabaire nibagyezibwa. Ekigambo kya Ruhanga nikigira ngu omu kubonabona kwabo kwona nawe akagira obusaasi. (Isa. 63:7-9.) Bwanyima Yehova arikukoresa nabi Zefania, akagira ngu abantu be baatwarizibwa kubi, nooba nooshusha ngu niwe baatwariza kubi. (Shoma Zefania 2:8) Buzima ogu ka n’omuringo gw’amaani ogu Yehova arikworekamu ngu naafayo aha bantu be!

5. Ha eky’okureeberaho kworeka eki Yehova yaakozire kuhwera abaheereza be abaabaire nibabonabona.

⁵ Yehova naakora ekirikukira aha kusaasibwa abaheereza be abarikubonabona. Naagira eki yaakora kubahwera. Nk’eky’okureeberaho, obu Abaisraeli baabaire nibabonabonesibwa omu buhuuku Misri, Yehova akeetegyereza obusaasi bwabo kandi kyamuhiga kubaiha omu kubonabona okwo. Akagambira Musa ati: “Buzimazima ndeebire okubonabonesibwa kw’abantu bangye . . . , naahurira okutaka kwabo . . . nimmanya obusaasi bwabo, [ninyija kushuuma] kubajuna, kubaiha omu mikono y’Abanyamisri.” (Kur. 3:7, 8) Ahabw’okugira ngu Yehova akasaasibwa abantu be, akabacungura kubaiha omu buhuuku. Bwanyima y’ebyasha bingi, Abaisraeli bari omu Nsi Eyaaraganisiibwe, bakatandika kutaahirirwa abazigu baabo. Yehova akatwaza ata? “Ku yaabaire ahurira entsinda yaabo ahabw’abo abarikubahata nibabatuntuza, abagirira embabazi.” N’aha murundi ogu, Yehova ahabw’embabazi ze akahwera abantu be. Akoohereza abaramuzi kujuna Abaisraeli kutakorwa kubi abazigu baabo.—Bar. 2:16, 18.

6. Ha eky’okureeberaho kworeka ngu Yehova naafayo n’aha nyehurira z’omuntu oine emiteekateekyere etahikire.

 ⁶ Yehova naafayo aha nyehurira z’abaheereza be nangwa n’obu obumwe barikuba baine emiteekateekyere etahikire. Teekateeka ahari Yona. Ruhanga akamwohereza kuza kugambira Abanineeve obutumwa bw’okucwa orubanja. Ku baayeteisize, Ruhanga akacwamu kubasaasira. Kwonka eki tikirashemeize Yona. Akaguubwa “kubi munonga” ahakuba obunabi bwe oburikukwata aha kucwekyerera tiburahikiriire nk’oku yaabaire naayenda. Kwonka Yehova akagumisiririza Yona, kandi yaamuhwera kuhindura emiteekateekyere ye. (Yon. 3:10–4:11) Bwanyima, Yona akeetegyereza enshonga, nangwa na Yehova akamukoresa kuhandiika ebirikukwata aha miteekateekyere ye kutugasira.—Rom. 15:4. *

7. Oku Yehova atwire naakoragana n’abaheereza be nikituhamiza ki?

⁷ Oku Yehova atwire naakoragana n’abantu, nikituhamiza ngu ainiire abaheereza be embabazi. Naamanya obusaasi n’okubonabona kwa buri omwe ahariitwe. Yehova buzima ‘naamanya emitima y’abaana b’abantu.’ (2 Bus. 6:30) Naayetegyereza gye ebiteekateeko byaitu byona, enyehurira zaitu ez’omunda, n’obugarukiro bwaitu. Kandi tarikubaasa ‘kutwikiriza kugyezibwa ekigyezo eki tutarikubaasa.’ (1 Kor. 10:13) Okutuhamiza omu muringo ogu ka nikitugumya!

8-10. Ni nshonga ki ezirikubaasa kuba zaareeteire Yesu kufayo aha bandi?

⁸ Obu Yesu yaabaire ari omuntu arikutuura omu nsi, akaba naafayo munonga aha bandi. Hariho enshonga nk’ishatu ezaareeteire Yesu kufayo aha bandi. Ey’okubanza, nk’oku kyaba kyagambirwe, Yesu akooreka gye emitwarize nk’eya Ishe. Yesu akaba naakunda abantu nka Ishe. N’obu Yesu araabe yaashemereirwe obu yaabaire naakora na Yehova omu kuhanga byona, kwonka okukira munonga akakunda abantu. (Enf. 8:31) Yesu akahigwa rukundo kufayo aha nyehurira z’abandi.

⁹ Enshonga ya kabiri, Yesu nawe akaba naabaasa kumanya ebiri omu mitima y’abantu nka Yehova. Akaba naabaasa kumanya ebigyendererwa by’abantu n’enyehurira zaabo. (Mat. 9:4; Yoh. 13:10, 11) N’ahabw’ekyo Yesu ku yaayetegyereize ngu abantu baine obusaasi omu mutima, akabahuumuriza ahabw’okubafaho.—Isa. 61:1, 2; Luk. 4:17-21.

¹⁰ Eya kashatu, Yesu nawe akatunga oburemeezi nk’obw’abandi bantu. Nk’eky’okureeberaho, Yesu akakurira omu ka y’abooro. Arikukora na Yosefu ishe owaamworoire, akeega kukora emirimo egumire. (Mat. 13:55; Mak. 6:3) Nikireebeka Yosefu akafa Yesu akiri omu nsi. N’ahabw’ekyo Yesu ashemereire kuba yaagizire obusaasi bw’okufeerwa omukundwa. Kandi Yesu akaba naamanya eki kirikumanyisa kuba omu ka erimu abantu b’ediini zitarikushushana. (Yoh. 7:5) Embeera ezo n’ezindi nyingi zishemereire kuba zaahweraire Yesu kwetegyereza oburemeezi bw’abantu ba butoosha n’enyehurira zaabo.

11. Ni ryari obu Yesu yaakyoreka butunu ngu naafayo aha bandi? Shoboorora. (Reeba ekishushani eky’aha mutwe.)

¹¹ Okufayo kwa Yesu kukareebwa butunu obu yaakora eby’okutangaaza. Yesu tarakozire eby’okutangaaza ahabw’okugira ngu akaba aine kubikora. Akaba ‘agirira embabazi’ abarikubonabona. (Mat. 20:29-34; Mak. 1:40-42) Nk’eky’okureeberaho, teekateeka aha ku Yesu yaabaire naayehurira arikwiha omushaija ofiire amatu omu bantu baingi kumukiza bari bombi,  nari obu yaazoora mutabani w’efaakazi omwe wenka. (Mak. 7:32-35; Luk. 7:12-15) Yesu akasaasibwa abantu abo, kandi akaba naayenda kubahwera.

12. Ebiri omuri Yohaana 11:32-35 nibyoreka bita ngu Yesu akasaasibwa Mariza na Mariamu?

¹² Yesu akooreka ngu naafayo ahari Mariza na Mariamu. Ku yaareebire baine amaganya ahabw’okufeerwa munyaanyabo Laazaaro, nawe akarira. (Shoma Yohaana 11:32-35.) Tararizire ahabw’okugira ngu akaba atakibaasa kuba na munywani we Laazaaro. Ahakuba akaba naamanya ngu ariyo naaza kumuzoora. Kureka, Yesu akarira ahabw’okukwatwaho n’okwetegyereza enyehurira za banywani be abakundwa.

13. Ahabw’enki nikitugumya kumanya ngu Yesu naasaasibwa abandi?

¹³ Nitugasirwa munonga twamanya ngu Yesu akaba naagirira abandi embabazi. N’amazima, itwe tituhikiriire nkawe. Kwonka nitumukunda ahabw’oku yaabaire naatwariza gye abandi. (1 Pet. 1:8) Nikitugumya kumanya ngu hati n’Omugabe naategyeka omu Bukama bwa Ruhanga. Naija kwihaho okubonabona kwona. Niwe ahikire kuhwera abantu kukira enkojo ezaareetsirweho obutegyeki bwa Sitaane, ahabw’okugira ngu nawe akabaho omuntu. Buzima, twine omugisha gw’okugira Omwebembezi orikubaasa “kusaasira hamwe naitwe omu bweremwa bwaitu.”—Heb. 2:17, 18; 4:15, 16.

14. Ebiri omu Abaefeso 5:1, 2, nibituhiga kukora ki?

¹⁴ Twateekateeka aha ku Yehova na Yesu baagiriire abandi embabazi, nikituhiga kuteeraho kusaasibwa abandi. (Shoma Abaefeso 5:1, 2.) Titurikubaasa kumanya ekiri omu mitima y’abantu nka Yehova na Yesu. Kwonka nabwo, nitubaasa kuteeraho kwetegyereza enyehurira z’abandi n’ebi barikwenda. (2 Kor. 11:29) Okutashushana n’abantu abarikweyendeza omu nsi, nituteeraho kwanga ‘kweta aha byaitu twenka, kureka nitweta n’aha by’abandi.’—Fil. 2:4.

15. Ni baahi okukira munonga abaine kufayo aha bandi?

¹⁵ Abareeberezi b’ekibiina okukira munonga nibo baine kufayo aha bandi. Nibamanya ngu n’obujunaanizibwa bwabo kureeberera entaama eziri ahansi y’obushoboorozi bwabo. (Heb. 13:17) Abareeberezi baine kukoresa okwetegyereza kubaasa kuhwera ab’eishe-emwe bagyenzi baabo. Nibabaasa kworeka bata ngu nibafayo aha bandi?

16. Omureeberezi orikufayo aha bandi naakora ki, kandi ahabw’enki eki ni kikuru?

¹⁶ Omureeberezi oine embabazi naamara obwire ari n’Abakristaayo bagyenzi be. Naabuuza ebibuuzo kandi ahurikiza gye atarikubashara ekirimi. Eki ni kikuru na munonga ow’eishe-emwe yaaba naayenda kugamba enyehurira eziri omu mutima gwe, kwonka arikugumirwa kutunga ebigambo bihikire eby’okukoresa. (Enf. 20:5) Omureeberezi yaahayo obwire bwe ayekundiire, ab’eishe-emwe bagyenzi be nibamwesiga, nibamunywana, kandi nibamukunda.—Byak. 20:37.

17. Niki eki ab’eishe-emwe na banyaanyazi-itwe baingi barikukira kutwara nka kikuru aha bareeberezi? Ha eky’okureeberaho.

¹⁷ Ab’eishe-emwe na banyaanyazi-itwe baingi nibagira ngu omutwarize ogu barikukira kutwara nka mukuru aha bareeberezi, n’okufayo kwabo aha nyehurira z’abandi. Ahabw’enki? “Kyorobi kugamba nabo, ahakuba nooba noomanya ngu nibaija kukwetegyereza,” Adelaide nikwo arikugira. Naayongyeraho ati: “Noobaasa kumanya ngu bakwiniire esaasi kurugiirira aha ku barikugarukamu waaba noogamba nabo.” Ow’eishe-emwe omwe orikusiima oku omureeberezi yaamutwariize naagira ati: “Nkareeba amaisho g’omureeberezi omwe  gaijura amarira obwo arikuteekateeka aha mbeera yangye. Ekishushani ekyo nikiija kuguma omu biteekateeko byangye.”—Rom. 12:15.

18. Nitubaasa kworeka tuta ngu nitufayo aha bandi?

¹⁸ Kwonka abareeberezi tibo bonka abaine kufayo aha bandi. Twena nitubaasa kugira omutwarize ogu. Tuta? Teeraho kwetegyereza oburemeezi bw’ab’eishe-emwe nari abu orikutuura nabo. Fayo aha minyeeto omu kibiina, abarwaire, abaine emyaka ya bukuru, n’abafeereirwe abakundwa baabo. Babuuze oku bari. Hurikiza gye buzima baaba nibakugambira oku barikwehurira. Bahwere kukireeba ngu buzima nooyetegyereza embeera yaabo. Yeheyo kubahwera omu muringo ogu orikubaasa. Twena twakora tuti, nituba nitworeka rukundo eyaabuzima omu bikorwa.—1 Yoh. 3:18.

19. Twaba nituhwera abandi ahabw’enki twine kuba tweteekateekire kuhinduramu?

¹⁹ Twine kuba tweteekateekire kuhinduramu twaba nituteeraho kuhwera abandi. Ahabw’enki? Ahakuba embeera mbi nizireetera abantu kutwaza omu miringo etarikushushana. Abamwe nibaba beeteekateekire kugamba, kandi abandi nibahunamira oburemeezi bwabo. Nituba nitwenda kuhwera, kwonka twine kwetantara kubuuza ebibuuzo ebirikukwata aha bi omuntu arikwenda kwetsigariza. (1 Tes. 4:11) Nangwa n’obu abamwe baakutugambira, obumwe nitubaasa kureeba ngu emiteekateekyere yaabo tehikire. Kwonka tushemereire kumanya ngu nikwo barikwehurira batyo. Nituba twine kurahuka kuhurikiza kwonka tutarahuka kugamba.—Mat. 7:1; Yak. 1:19.

20. Nituza kugamba ahari ki omu kicweka ekirikukurataho?

²⁰ Oyihireho okufayo aha abandi omu kibiina, twine n’okworeka omutwarize murungi ogu omu buheereza bwaitu. Nitubaasa kworeka tuta ngu nitufayo aha bandi omu murimo gw’okuhindura abantu abeegi? Nituza kugamba aha nshonga egi omu kicweka ekirikukurataho.