OMU shuura ibiri ezi tuheerize, n’abantu bangahi abu tushomireho abaazoirwe?— Ni bataano. Omuri abo abaana bakaba bari bangahi?— Bakaba bari bashatu. Owa kana akaba ari omutsigazi. Nooteekateeka ngu ekyo nikyoreka ki?—

Ekyo nikyoreka ngu Ruhanga naakunda n’abaana abato. Kwonka naija kuzoora n’abantu abandi baingi. Mbwenu shi Ruhanga naija kuzoora abo abaakozire ebirungi bonka?— Nitubaasa kuteekateeka tutyo. Kwonka, hariho abantu baingi abatarayegire mazima agarikukwata ahari Yehova Ruhanga n’Omwana we. N’ahabw’ekyo bakakora ebibi ahabw’okugira ngu bakeegyesibwa ebitahikire. Nooteekateeka ngu Yehova naija kuzoora abantu nk’abo?—

Baibuli neegira eti: “Haryabaho okuzooka kw’abahikiriire n’abatahikiriire.” (Ebyakozirwe 24:15) Ahabw’enki abo abaabaire batahikiriire, nari abatarakozire birungi barikwija kuzoorwa?— N’ahabw’okuba tibaratungire mugisha gw’okwega ahari Yehova n’ebi arikwenda ngu abantu bakore.

 Nooteekateeka ngu abantu nibaija kuzoorwa ryari?— Teekateeka aha bu Laazaaro yaabaire afiire reero Yesu akaraganisa munyaanya Mariza ati: “Munyaanyoko naija kuzooka.” Mariza akagarukamu ati: ‘Nimmanya ku arizooka omu kuzooka kw’aha kiro ky’emperu.’ (Yohaana 11:23, 24) Mariza akaba naamanyisa ki obu yaagira ngu Laazaaro akaba naija kuzooka aha ‘kiro ky’emperu’?—

Mariza akaba yaahuriire aha kuraganisa kwa Yesu oku: ‘Abari omu bituuro boona abarikwijukwa baryarugamu.’ (Yohaana 5:28, 29) N’ahabw’ekyo aha ‘kiro ky’emperu’ nibwo abo boona abu Ruhanga arikwijuka barizoorwa. Ekiro ky’emperu eki ti kiro ky’eshaaha 24. Nikiija kumara emyaka rukumi. Baibuli neegira ngu aha kiro ekyo, ‘Ruhanga aryacwera abantu abari omu nsi orubanja.’ Abu araacwere orubanja nibaija kutwariramu abo abaraabe bazoirwe.​—Ebyakozirwe 17:31; 2 Petero 3:8.

Ekiro ekyo ka nikiija kuba kirungi! Omu myaka rukumi egyo, abantu baingi abaafiire nibaija kuzoorwa. Omwanya ogu baraatuuremu bwanyima y’okuzooka Yesu akagweta Paradiso. Ka tureebe ahu Paradiso eraije kuba n’oku embeera ziraije kuba nizishusha.

Harikuburayo eshaaha nka ishatu Yesu akafeera aha muti, akagambira omushaija owaabaire ahanikirwe aha muti aha rubaju rwe, ebirikukwata ahari Paradiso. Omushaija ogwo akaba ahanikirwe ahabw’ebibi ebi yaabaire akozire. Kwonka ku yaareebire kandi akahurira n’ebyabaire nibigambwa ahari Yesu, akatandika kumwikiriza. Akagira ati: “Ku oriija omu bukama bwawe, onyijukye.” Yesu akamugarukamu ati: ‘Buzimazima  ninkugambira eri izooba nti: Oryaba naanye omuri Paradiso.’​—Luka 23:42, 43.

Yesu akaba naamanyisa ki obu yaagamba ekyo? Paradiso eri nkahi?— Teekateeka ahari eki. Omu kutandika Paradiso ekaba eri nkahi?— Ijuka, Ruhanga akata omuntu w’okubanza Adamu n’omukazi we Haawa omu paradiso aha omu nsi. Omwanya ogwo gukaba nigwetwa Edeni. Hakaba harimu enyamaishwa, kwonka zikaba zitari z’akabi aha bantu. Kandi hakaba harimu emiti eriho ebijuma bingi binuzire hamwe n’omugyera muhango. Ka gwabaire guri omwanya murungi gw’okutuurwamu!—Okutandika 2:8-10.

N’ahabw’ekyo ku turikushoma ngu enkozi y’ebibi egyo neija kuba omu Paradiso, tushemereire kuteekateeka aha nsi egi ehindwirwe omwanya murungi gw’okutuurwamu. Mbwenu shi Yesu naija kutuura n’ogwo owaabaire ari enkozi y’ebibi aha omu nsi omuri Paradiso?— Ngaaha. Noomanya ahabw’enki atarikwija kuba ari aha?—

N’ahabw’okuba Yesu naija kuba ari omu iguru nk’Omugabe arikutegyeka abariba bari omu nsi omuri Paradiso. N’ahabw’ekyo Yesu naija kuba ari n’omushaija ogwo ekirikumanyisa ngu Yesu naija kumuzoora kandi amuhe ebi arikwetenga byona. Kwonka shi ahabw’enki Yesu naija kwikiriza omushaija ogwo owaabaire ari enkozi y’ebibi kutuura omuri Paradiso?— Ka tureebe yaaba nitubaasa kutunga eky’okugarukamu.

Mbwenu shi omushaija ogwo enkozi y’ebibi atakagambire na Yesu, akaba naamanya ebigyendererwa bya Ruhanga?— Ngaaha, akaba  atarikubimanya. Akakora ebibi ahabw’okuba akaba atarikumanya amazima agarikukwata ahari Ruhanga. Omuri Paradiso naija kwegyesibwa ebirikukwata aha bigyendererwa bya Ruhanga. Reero naija kutunga omugisha kworeka ngu buzima naakunda Ruhanga arikukora ebi akunda.

Mbwenu shi buri omwe oraazoorwe naija kutuura omu nsi omuri Paradiso?— Ngaaha, ti boona. Noomanya ahabw’enki?— Ahabw’okuba abamwe nibaija kuzoorwa kuba na Yesu omu iguru. Nibaija kutegyeka nawe nk’abagabe barikutegyeka abariba bari omuri Paradiso. Ka tureebe oku ekyo turikukimanya.

Ekiro ekyahererukireyo Yesu atakafiire, akagambira entumwa ze ati: ‘Omu nju ya Tata omu iguru harimu emyanya mingi ey’okutuuramu, kandi ninza kubatebeekanisiza omwanya.’ Bwanyima Yesu akabaraganisa ati: “Ndyagaruka aha, mbatware ei ndi; okwo ei ndi, naimwe mube niyo mwatuura.”​—Yohaana 14:2, 3.

 Yesu akaza nkahi bwanyima y’okuzooka?— Akagaruka omu iguru kutuura n’Ishe. (Yohaana 17:4, 5) N’ahabw’ekyo Yesu akaraganisa entumwa ze n’abakuratsi be abandi ngu naija kubazoora batuure nawe omu iguru. Okwo nibaija kukorayo ki na Yesu?— Baibuli neegira ngu abeegi be abaine omugabo omu ‘kuzooka okw’okubanza’ nibaija kutuura omu iguru kandi bategyekye ensi ‘nawe nk’abagabe okumara emyaka rukumi.’​—Okushuuruurwa 5:10; 20:6; 2 Timoseo 2:12.

Ni bangahi abarikwija kutunga omugabo omu ‘kuzooka okw’okubanza’ kandi abarikwija kutegyeka nk’abagabe?— Yesu akagambira abeegi be ati: ‘Mutatiina, imwe obusyo obukye, ahabw’okuba Shoimwe naasiima munonga kubaha obukama.’ (Luka 12:32) ‘Ab’obusyo obukye’ abo abarikuzoorwa kutuura na Yesu omu Bukama bwe obw’omu iguru, omubaro gwabo nigumanywa. Baibuli neeyoreka ngu ‘emitwaro ikumi n’ena n’enkumi ina’ nibazoorwa kuruga omu nsi.—Okushuuruurwa 14:1, 3.

N’abantu bangahi abarikwija kutuura omu nsi?— Baibuli terikugamba mubaro gwabo. Kwonka Ruhanga akaba yaagambiire Adamu na Haawa obu baabaire bari omu kibanja Edeni kuzaara abaana bakaijuza ensi. Buzima, ekyo tibarakihikiriize. Kwonka naija kuhamya ngu ekigyendererwa kye eky’okwijuza omu nsi abantu barungi kyahikiirizibwa.​—Okutandika 1:28; Isaaya 45:18; 55:11.

Ka nikiija kuba ekirikushemeza okutuura omuri Paradiso! Ensi yoona neija kuba nk’omusiri murungi gurikushemeza. Neija kuba erimu ebinyonyi bingi, enyamaishwa hamwe n’emiti mirungi eya buri muringo. Tihaine orikwija kugira obusaasi, kurwara nari kufa. Abantu boona nibaija kukundana. Twaba nitwenda kutuura omuri Paradiso ebiro byona, obu nibwo bwire kwetebeekanisa.