NOOMANYA omuringo ogurikutangaaza ogu engaro zaawe zikozirwemu? Noomanya ebintu byona ebi zirikubaasa kukora?— Reeba engaro zaawe. Bumba engaro zaawe. Hati gira eki waiha ahansi. Engaro zaawe nizibaasa kukora ebintu bingi, kandi zibikore gye. Noomanya owaahangire engaro zaitu?—

Niwe Omwe owaahangire eminwa yaitu, enyindo zaitu n’amaisho gaitu. Ni Ruhanga Ishe w’Omwegyesa Mukuru. Mbwenu shi tikirikutushemeza ahabw’okugira ngu Ruhanga akatuha amaisho?— Nigatubaasisa kureeba ebintu bingi. Nitubaasa kureeba ebirabyo. Nitubaasa kureeba obunyaatsi tureebe n’eiguru. Nitubaasa n’okureeba ebinyonyi nibirya, nk’ebyo ebiri omu kishushani. Buzima, nikishemeza ahabw’okugira ngu nitubaasa kureeba ebintu nk’ebyo, tikwo?—

Kwonka shi n’oha owaahangire ebintu ebyo? Noogira ngu bikahangwa omuntu? Ngaaha. Abantu nibabaasa kwombeka enju. Kwonka tihaine omuntu orikubaasa kukora obunyaatsi oburikumera. Tihaine omuntu orikubaasa kuhanga ekyana ky’ekinyonyi, ekirabyo nari ekindi kintu kyona ekiine amagara. Ekyo waaba nookimanya?—

Ruhanga niwe yaahangire ebintu ebi byona. Ruhanga akahanga eiguru n’ensi. Akahanga n’abantu. Akahanga omushaija n’omukazi ab’okubanza.  Yesu, Omwegyesa Mukuru akeegyesa ngu Ruhanga niwe yaahangire omushaija n’omukazi ab’okubanza.​—Matayo 19:4-6.

Yesu akamanya ata ngu Ruhanga niwe yaahangire omushaija n’omukazi? Yesu akareeba Ruhanga arikubahanga?— Eego, akamureeba. Yesu akaba ari na Ruhanga obu Ruhanga yaahanga omushaija n’omukazi. Ruhanga akabanza kuhanga Yesu atakahangire omushaija n’omukazi ab’okubanza. Yesu akaba ari maraika kandi akaba naatuura n’Ishe omu iguru, Ishe atakahangire omushaija n’omukazi.

Baibuli neetugira ngu Ruhanga akagira ati: “Ka tuhangye omuntu.” (Okutandika 1:26) Noomanya ou Ruhanga yaabaire naagamba nawe?— Akaba naagamba n’Omwana we. Akaba naagamba n’ogwo bwanyima owaizire omu nsi kandi akeetwa Yesu.

Ekyo tikirikushemeza? Teekateeka ahari eki! Twahurikiza ebi Yesu arikutwegyesa, nituba nitwegyesibwa ogwo owaabaire ari na Ruhanga obu Ruhanga yaahanga ensi n’ebintu ebindi byona. Yesu akeega bingi ahabw’okukora  n’Ishe omu iguru. N’ahabw’ekyo tikirikutangaaza okureeba ngu Yesu n’Omwegyesa Mukuru.

Nooteekateeka ngu Ruhanga obu yaabaire naatuura wenka atakahangire Mwana we akaba atashemereirwe?— Ngaaha akaba ashemereirwe. Mbwenu shi ku araabe yaabaire ashemereirwe, ahabw’enki yaahangire ebintu ebindi ebiine amagara?— Akabihanga ahabw’okuba ni Ruhanga oine rukundo. Akaba naayenda ngu nabyo bibeho kandi bigire amagara marungi. Tushemereire kwebaza Ruhanga ahabw’okutuha amagara.

Buri kintu kyona eki Ruhanga yaahangire nikyoreka rukundo ye. Ruhanga akahanga eizooba. Eizooba niryaka kandi rituha obutagatsi. Buri kintu kikaabaire nikifuka kandi tihaine ekyakubaire kiine amagara omu nsi ku ogire ngu tihariho eizooba. Tikirikukushemeza ahabw’okugira ngu Ruhanga akahanga eizooba?—

Ruhanga naagwisa n’enjura. Obumwe noobaasa kutakunda enjura ahabw’okuba yaaba neegwa torikubaasa kuza aheeru kuzaana. Kwonka enjura neehwera ebirabyo kukura. Mbwenu twareeba ebirabyo birungi, tushemereire kwebaza oha?— Ruhanga. Kandi shi tushemereire kwebaza oha twaheza kurya emboga n’ebijuma binuzire?— Tushemereire kwebaza Ruhanga ahabw’okuba niwe arikugwisa enjura kandi akajwisa n’omushana ebirikureetera ebimera kukura.

Kwonka shi omuntu ku yaakukubuuza ati: ‘Ruhanga shi akahanga abantu kandi yaahanga n’enyamaishwa?’ Noobaasa kumugarukamu ota?— Nikiba kihikire kumugarukamu oti: “Eego, akahanga abantu n’enyamaishwa.” Kwonka shi omuntu ku yaakuba atarikwikiriza ngu Ruhanga buzima akahanga abantu? Kandi shi omuntu ku yaakugira ngu abantu bakaruga omu nyamaishwa? Amazima gari ngu, ekyo tikyo Baibuli erikwegyesa. Neegira ngu Ruhanga akahanga ebintu byona ebiine amagara.​—Okutandika 1:26-31.

Kwonka omuntu naabaasa kukugira ngu tarikwikiriza ngu Ruhanga ariho. Mbwenu noobaasa kumugarukamu ota?— Noobaasa  kumworeka enju. Reero omubuuze oti: “Haine owaayombekire enju egyo?” Buri omwe naamanya ngu haine orikuba yaagyombekire. Hatariho kubangaanisa, enju terikubaasa kweyombeka.—Abaheburaayo 3:4.

Twara omuntu ogwo omu musiri reero omworekye ekirabyo. Mubuuze oti: “N’oha owaakihangire?” Ti muntu owaakihangire. Nk’oku enju etaraayeyombekire, nikwo n’ekirabyo eki kitaraayehangire. Hariho owaakihangire. Ruhanga niwe yaakihangire.

Shaba omuntu ogwo kuhurikiza ekinyonyi kirikweshongora. Reero mubuuze oti: “N’oha owaahangire ebinyonyi kandi akabyegyesa okweshongora?” Ni Ruhanga. Ruhanga niwe yaahangire eiguru n’ensi n’ebiine amagara byona. Niwe Ogwo orikuha amagara.

Kwonka, omuntu naabaasa kugira ngu naikiriza ekyo kyonka eki arikureeba. Naabaasa kugira ati: ‘Naaba ntarikukireeba, tindikubaasa kukiikiriza.’ N’ahabw’ekyo abantu abamwe nibagira ngu tibarikwikiriza ngu Ruhanga ariho ahabw’okuba tibarikubaasa kumureeba.

N’amazima ngu titurikubaasa kureeba Ruhanga. Baibuli neegira eti: ‘Tihariho muntu orikubaasa kureeba Ruhanga.’ Omu nsi tihariho mushaija nari omukazi nari omwana orikubaasa kureeba Ruhanga. N’ahabw’ekyo tihaine oshemereire kuteeraho kukora ekishushani kya Ruhanga. Kandi Ruhanga nawe naatugambira ngu titushemereire kukora ekishushani kye. N’ahabw’ekyo, tikirikubaasa kushemeza Ruhanga twaba twine ebintu nk’ebyo omu maju gaitu.​—Okuruga 20:4, 5; 33:20; Yohaana 1:18.

Kwonka shi ku turaabe tutarikubaasa kureeba Ruhanga, nitubaasa kumanya tuta ngu buzima ariho? Teekateeka ahari eki. Noobaasa kureeba omuyaga?— Ngaaha. Tihariho orikubaasa kureeba omuyaga. Kwonka noobaasa kureeba ebi omuyaga gurikukora. Omuyaga ku gurikuhuuha amataagi g’emiti nooreeba amababi g’emiti garikwehuuba. Reero omanya ngu hariho omuyaga.

Nikyo kimwe, noobaasa kureeba ebi Ruhanga yaahangire. Waareeba ekirabyo nari ekinyonyi, nooba waareeba ekintu eki Ruhanga yaahangire. N’ahabw’ekyo noobaasa kuhamya ngu buzima hariho Ruhanga.

 Omuntu naabaasa kukubuuza ati: ‘N’oha owaahangire eizooba n’ensi?’ Baibuli neegira eti: “Ruhanga akahanga eiguru n’ensi.” (Okutandika 1:1) Buzima, Ruhanga niwe yaahangire ebintu birungi ebyo byona. Ekyo tikirikukushemeza?—

Tikirikukushemeza okuba ohuriire? Nitubaasa kuhurira ebyeshongoro birungi by’ebinyonyi. Nitubaasa kureeba ebirabyo n’ebintu ebindi ebi Ruhanga yaahangire. Kandi nitubaasa kurya eby’okurya ebi Ruhanga yaatuhaire.

Tushemereire kwebaza Ruhanga ahabw’ebintu ebi byona. Ekirikukira byona, tushemereire kumwebaza ahabw’okutuha amagara. Twaba nitusiima Ruhanga, nitwija kugira eki twakora. Nitwija kukora ki?— Nitwija kworobera Ruhanga kandi tukore ebi arikutugambira omuri Baibuli. Twakora ekyo, nitubaasa kworeka ngu nitukunda Ogwo owaahangire ebintu byona.