ORAAGIZIREHO enaku kandi okahurira ori nk’otsigirweho?— Oreebuurizeho yaaba hariho omuntu orikukukunda?— Abaana abamwe nibeehurira batyo. Kwonka Ruhanga naaraganisa ati: “Nyowe tindikwebwa.” (Isaaya 49:15) Ekyo ti kirungi munonga kukiteekateekaho?— Eego, Yehova Ruhanga buzima naatukunda!

Omuhandiiki omwe wa Baibuli akagira ati: ‘N’obu tata na maawe baakuntsigaho, MUKAMA naija kuunyanduura.’ (Zaaburi 27:10) Okumanya ekyo nikibaasa kutuhuumuriza, tikwo?— Yehova naatugambira ati: ‘Otatiina ahabw’okuba nkwine. . . . buzima ndyakuhwera.’—Isaaya 41:10.

Kwonka obumwe, Yehova naareka Sitaane atureetera oburemeezi. Kandi Yehova naareka Sitaane agyeza abaheereza Be. Eizooba rimwe Omuregi akareetera Yesu kubonabona munonga yaahika n’aha kubuuza Yehova ati: “Ruhanga wangye, Ruhanga wangye, n’enki ekyakuntsigisaho?” (Matayo 27:46) N’obu Yesu araabe yaabaire naabonabona akaba naamanya ngu Yehova naamukunda. (Yohaana 10:17) Kwonka kandi Yesu akaba naamanya ngu Ruhanga naareka Sitaane agyeza abaheereza Be kandi amureka abareetera kubonabona. Eshuura endiijo neija kushoboorora ahabw’enki Ruhanga naareka Sitaane kukora ekyo.

Ku turikuba turi bato, obumwe nituba nitukira kutiina. Nk’eky’okureeberaho, orabaire ori omu muhanda noogyenda okahaba?— Okatiina?— Abaana baingi nibatiina. Omwegyesa Mukuru eizooba rimwe akatebya ekitebyo ekiine akakwate n’okubura. Kwonka ti mwana owaabaire abuzire. Ekaba eri entaama.

 Omu miringo emwe ori nk’entaama. Ahabw’enki nikibaasa kugambwa ngu ori nk’entaama? Entaama tiziine maani. Nihetengyesa omuntu w’okuzireeberera kandi akazirinda. Omuntu orikuzireeberera naayetwa omuriisa w’entaama.

Omu kitebyo kye Yesu akagamba aha muriisa w’entaama owaabaire aine entaama igana. Kwonka emwe aha ntaama ezo ekabura. Neebaasa kuba yaagiire enyima y’orushozi. Kwonka bwanyima, entaama egyo ekaruga omu zindi yaahaba. Noobaasa kuteekateeka oku entaama egyo yaahuriire ku yaayeshangire eri yonka?—

Omuriisa w’entaama akaakozire ki ku yaakumanyire ngu emwe aha ntaama ze yaabura? Akaagizire ngu entaama niyo eine orubanja n’ahabw’ekyo taine kufayo? Nari akaatsigireho entaama ezindi 99 omu mwanya ogutarimu kabi reero agyenda kusherura egyo emwe? Mbwenu entaama emwe ekaabaire neyetengyesa kuteebwaho omutima etyo?— Kuri niiwe waabaire obuzire nk’entaama egyo okaayenzire ngu bakusherure?—

Omuriisa akaba naakunda munonga entaama ze zoona, nangwa n’egyo eyaabaire ebuzire. N’ahabw’ekyo akagyenda kusherura egyo eyaabaire ebuzire. Teekateeka aha kushemererwa oku entaama egyo yaagizire ku yaareebire omuriisa waayo naija!  Kandi Yesu akagira ngu omuriisa w’entaama akashemererwa ahabw’okubona entaama ye. Akashemererwa munonga ahabw’entaama emwe egyo eyaabaire ebuzire okukira ezindi 99. Mbwenu nooteekateeka ngu n’oha ori nk’omuriisa w’entaama ogwo omu kitebyo kya Yesu? N’oha orikutufaho nk’oku omuriisa w’entaama yaabaire naafayo aha ntaama ze?— Yesu akagira ngu Ishe ori omu iguru niwe arikutufaho. Kandi Ishe ni Yehova.

Yehova Ruhanga niwe Muriisa Omukuru ow’abantu be. Naakunda abo boona abarikumuheereza, otwariiremu n’abato nkaiwe. Tarikwenda ngu omwe ahariitwe ahikweho akabi nari acwekyerezibwe. Buzima ka nikihuumuriza kumanya ngu Ruhanga naatufaho munonga atyo!​—Matayo 18:12-14.

Buzima noikiririza omuri Yehova Ruhanga?— N’omuntu owaabuzima ahariiwe?— N’amazima titurikubaasa kureeba Yehova ahabw’okuba aine omubiri gw’omwoyo ogu tutarikubaasa kureeba n’amaisho gaitu. Kwonka n’omuntu owaabuzima, kandi naabaasa  kutureeba. Naamanya obu turikwetenga obuhwezi. Kandi nitubaasa kugamba nawe kurabira omu kushaba, nk’oku turikugamba n’omuntu ondiijo omu nsi. Naayenda ngu tugambe nawe kurabira omu kushaba.

N’ahabw’ekyo waagira enaku nari waahurira ori nk’otsigirweho, oine kukora ki?— Gambira Yehova. Irira haihi Yehova, naija kukuhuumuriza kandi akuhwere. Ijuka ngu Yehova naakukunda, nangwa n’obu waakuhurira ori nk’otsigirweho. Ka tureebe omu Baibuli zaitu. Aha omuri Zaaburi 23, kutandikira aha runyiriri 1 nitugambirwa tuti: “MUKAMA niwe muriisa wangye, tindikyena kintu kyona. Ambyamya omu iriisizo ry’obunyaatsi buto, antwara aha rubaju rw’amaizi agarikusheneneka.”

Yetegyereze eki omuhandiiki yaayongyeireho omu runyiriri 4: “N’obu ndiraba omu kibunda ky’okufa, tinditiina kabi koona, ahabw’okuba ori hamwe naanye; oruga rwawe n’enkoni yaawe bimpuumuza.” Okwo nikwo abantu barikwehurira, Ruhanga waabo yaaba ari Yehova. Nibahuumurizibwa baaba bari omu buremeezi. Nikwo orikwehurira otyo?—

Nk’oku omuriisa w’entaama oine rukundo arikufayo aha ntaama ze, nikwo Yehova arikufayo atyo munonga aha bantu be. Naaboreka omuhanda oguhikire, kandi bamukurata baine okushemererwa. N’obu baakuba baine oburemeezi bwingi, nibaba bataine kutiina. Omuriisa w’entaama naakoresa enkoni ye kurinda entaama ze kugira ngu  enyamaishwa zitazikora kubi. Baibuli neegamba aha ku Daudi yaarinzire entaama ze kutariibwa entare n’edubu. (1 Samueli 17:34-36) Kandi abantu ba Ruhanga nibamanya ngu Yehova naija kubarinda. Nibabaasa kuhurira baine oburinzi ahabw’okuba Ruhanga ari nabo.

Yehova buzima naakunda entaama ze kandi naazifaho munonga. Baibuli neegira eti: ‘Aryariisa entaama ze nk’omuriisa, kandi akiikire abaana b’entaama ze omu mikono.’​—Isaaya 40:11.

Tikirikukureetera kushemererwa kumanya ngu Yehova nikwo ari atyo?— Nooyenda kuba omwe aha ntaama ze?— Entaama nizihurira eiraka ry’omuriisa waazo. Niziguma haihi nawe. Noohurira Yehova?— Noomuguma haihi?— Kyaba kiri kityo toshemereire kutiina. Yehova naija kuba naiwe.