Ithute Lentšung la Modimo

Mmušo wa Modimo ke Eng?

Sehlogo se se rotoša dipotšišo tšeo o ka bago o ile wa ipotšiša tšona le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Mmušo wa Modimo ke eng?

Mmušo wa Modimo ke pušo ya legodimong. E tla tšeela dipušo tše dingwe ka moka legato gomme ya dira gore thato ya Modimo e direge legodimong le lefaseng. Ka go re’alo, Mmušo wa Modimo o tla kgotsofatša senyakwa sa rena sa pušo e lokilego.—Bala Daniele 2:44; Mateo 6:9, 10.

Mmušo o swanetše go ba le kgoši. Jehofa o kgethile Morwa wa gagwe, Jesu, gore a be Kgoši ya Mmušo wa Gagwe.—Bala Luka 1:30-33.

2. Ke ka baka la’ng Jesu e le Mmuši yo a swanelegago?

Morwa wa Modimo ke Kgoši e swanelegago ka gobane ke yo botho, o kgomarela se se nepagetšego e bile o na le matla a lekanego a go thuša batho. (Mateo 11:28-30) Ka morago ga ge a tsošitšwe bahung, Jesu o ile a rotogela legodimong gomme a thoma go leta a le ka letsogong le letona la Jehofa. (Baheberu 10:12, 13) Mafelelong, Modimo o ile a mo nea matla a go thoma go buša legodimong.—Bala Daniele 7:13, 14.

3. Ke bomang gape bao ba tlago go buša le Jesu?

Sehlopha seo se bitšwago “bakgethwa” se kgethwa ke Modimo gore se buše le Jesu legodimong. (Daniele 7:27) Ba mathomo bao ba ilego ba kgethelwa gore e be bakgethwa e be e le baapostola ba botegago ba Jesu. Jehofa o ile a tšwela pele go kgetha banna le basadi ba botegago e le bakgethwa go ba go fihla ga bjale. Go swana le Jesu, ba tsošwa ka mmele wa moya.—Bala Johane 14:1-3; 1 Bakorinthe 15:42-45.

Ke batho ba bakae bao ba yago legodimong? Jesu o ba biditše “mohlatswana.” (Luka 12:32) Ge ba feletše e tla ba ba 144 000 gomme ba tla buša lefase ba ena le Jesu.—Bala Kutollo 5:9, 10; 14:1.

  4. Mmušo wa Modimo o thomile neng go buša?

Jesu o bile Kgoši ka 1914. * Kapejana ka morago ga moo, o ile a lahlela Sathane le batemona ba gagwe lefaseng. (Kutollo 12:7-10, 12) Ga e sa le go tloga ka nako yeo, mathata a batho a ile a oketšega o šoro. Dintwa, ditšhišinyego tša lefase, ditlala, mauba a malwetši le go hloka molao ke karolo ya pontšho ya gore tshepedišo ya gona bjale ya dilo e mehleng ya yona ya bofelo. (2 Timotheo 3:1-5) Bohle bao ba nyakago go holwa ke Mmušo wa Modimo ba swanetše go ithuta kamoo ba ka latelago Kgoši, e lego Jesu.—Bala Luka 21:7, 10, 11, 31, 34, 35.

5. Mmušo wa Modimo o dira eng?

Ka modiro wa lefase ka bophara wa boboledi, Mmušo wa Modimo o šetše o thomile go thuša ba dimilione ba tšwago ditšhabeng ka moka go ithuta ditsela tša Modimo. (Mateo 24:14) O tla šireletša “lešaba le legolo” la balata ba botegago ba Jesu ge o fediša tshepedišo ya gona bjale e kgopo ya dilo mo lefaseng.—Bala Kutollo 7:9, 10, 13-17.

Lebakeng la nywaga e 1 000, Mmušo o tla fetoša lefase paradeise ganyenyane-ganyenyane. Mafelelong, Jesu o tla bušetša Mmušo go Tatagwe. (1 Bakorinthe 15:24-26) Na o tseba motho yoo o ka ratago go mmotša ka Mmušo wa Modimo?—Bala Psalme 37:10, 11, 29.

Bakeng sa tsebišo e oketšegilego, bona dikgaolo 8 le 9 tša puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

[Mongwalo wa tlase]