Na o be o Tseba?

Na go be go le bohlokwa ka tsela e itšego e kgethegilego gore go bolelwe gore moapostola Petro o be a dula le mošogi wa matlalo pele a ka botšwa gore a ye go Koronelio?

▪ Pego yeo e lego go Ditiro e bolela gore Petro o ile a dula “matšatši a sego kae . . . Jopa le mošogi yo mongwe wa matlalo yo a bitšwago Simone,” yo a bego a na le “ntlo hleng ga lewatle.” (Ditiro 9:43; 10:6) Bajuda ba be ba lebelela mošomo wa mošogi wa matlalo e le o sa hlwekago le o nyatšišago. Talmud e bea bašogi ba matlalo maemong a ka tlase ga bao ba olelago boloko. Modiro wa Simone o be o mo kopanya ka mehla le ditoto tša diphoofolo, e lego seo se bolelago gore o be a dula a le boemong bja go se hlweke ka mokgwa wa borapedi. (Lefitiko 5:2; 11:39) Go ya ka methopo e sa swanego yeo e bolelago ka taba ye, go ka direga gore Simone o be a diriša meetse a lewatle mošomong wa gagwe, e bile go ka direga gore lefelo leo a bego a šomela go lona le be le le ka ntle ga motse ka gobane go šoga matlalo e be le “mošomo o tšweletšago monkgo.”

Go sa šetšwe se, go bonagala Petro a se a ka a gana go dula le Simone. Se se bontšha gore mohlomongwe Petro o be a ithutile go gana mekgwa ya Bajuda yeo e bego e apareditše ya go kgetholla batho bao ba bego ba ba tšea ba sa seka, go swana le kamoo Jesu a ilego a gana kgethollo e bjalo pele ga gagwe.—Mateo 9:11; Luka 7:36-50.

Ke eng seo se bolelwago ke mantšu a Jesu a rego “wena ka noši o boletše”?

▪ Ge Jesu a be a gapeletšwa ke Kayafa, moperisita yo a phagamego wa Mojuda, gore a bolele ge e ba e be e le Kriste, Morwa wa Modimo, Jesu o ile a araba ka gore: “Wena ka noši o boletše.” (Mateo 26:63, 64) Jesu o be a era gore’ng?

Jesu o be a sa leke go phaela potšišo ya Kayafa ka thoko. Go bonagala polelwana e rego “wena ka noši o boletše” e be e le sekapolelo seo se tlwaelegilego sa Sejuda seo se tiišetšago gore seo se boletšwego ke therešo. Ka mohlala, Talmud ya Jerusalema, e lego puku ya bodumedi ya Sejuda yeo e kgobokeditšwego lekgolong la bone la nywaga C.E., e anega ka monna wa Mojuda yoo e itšego ge a botšišwa gore rabi o hwile, a araba ka gore: “O boletše.” Se se ile sa tšewa e le tiišetšo ya gore ge e le gabotse rabi o be a hwile.

Jesu o be a hlompha matla a taolo a moperisita yo a phagamego a go ka mo eniša gore a bolele therešo. Go oketša moo, ge a be a ka homola go be go ka naganwa gore Jesu o be a gana gore ke yena Kriste. Ka gona, go arabela ga Jesu ka gore: “Wena ka noši o boletše” e be e le karabo ya go dumelelana le moperisita yo a phagamego. Pegong ya Mareka e swanago le ye, Jesu ge a be a hlohlwa ke Kayafa gore a utolle ge e ba e be e le Mesia, o ile a araba ka sebete a re: “Ke nna yena.”—Mareka 14:62; bona gape le Mateo 26:25 le Mareka 15:2.

[Seswantšho go letlakala 18]

Lefelo la go šogela matlalo la Fez, Morocco