MOLAHLWA ke motho yoo ba bangwe ba sa mo amogelego e le karolo ya sehlopha sa bona. A ka ba a na le mmala o sa swanego le wa bona goba e le wa setšhaba se šele, a bolela goba a dira dilo ka tsela e fapanego. Na o fela o ikwa eka o molahlwa?— *

Anke re boleleng ka monna yo a bego a ikwa ka tsela yeo. Leina la gagwe e be e le Mefiboshethe. Anke re kweng gore e be e le mang le lebaka leo ka lona a bego a ikwa e le molahlwa. Ge e ba o fela o ikwa eka o molahlwa, o ka ithuta mo gontši go Mefiboshethe.

Mefiboshethe e be e le ngwana wa Jonathane, mogwera yo a rategago wa Dafida. Pele ga ge Jonathane a ka hwela ntweng, o ile a botša Dafida a re: ‘O bontšhe bana ba ka botho.’ Dafida o ile a ba kgoši. Ka morago ga nywaga e mentši o ile a gopola mantšu a Jonathane gomme Mefiboshethe o be a sa dutše a phela. O ile a ba le kotsi e šoro ge e be e sa le ngwana. O ile a se kgone go sepela gabotse bophelo bja gagwe ka moka. Na o kgona go bona lebaka leo ka lona a bego a ka a ikwa eka ke molahlwa?—

Dafida o be a nyaka go bontšha morwa wa Jonathane botho. Ka gona Dafida o ile a rulaganyetša gore Mefiboshethe a agelwe legae kgauswi le la gagwe kua Jerusalema, gomme o ile a beelwa madulo tafoleng ya Dafida ya go jela. Monna yo a bitšwago Tsiba, gotee le barwa ba gagwe le bahlanka ba gagwe, o ile a dirwa mohlanka wa Mefiboshethe. Dafida o ile a godiša morwa wa Jonathane e le ka kgonthe! Na o tseba gore go ile gwa direga’ng ka morago ga moo?—

Dafida o ile a ba le mathata ka lapeng la gagwe. Abesalomo, yo mongwe wa barwa ba Dafida, o ile  a mo hlanogela gomme a leka go ba kgoši. Dafida o ile a swanelwa ke go tšhabiša bophelo bja gagwe. Mefiboshethe o be a nyaka go sepela le Dafida nakong ya ge ba bangwe ba bantši ba be ba sepela le yena. Bagwera ba ba Dafida ba be ba tseba gore e be e le kgoši e swanetšego. Eupša Mefiboshethe ga se a kgona go ya le yena ka gobane o be a sa kgone go sepela gabotse.

Ke moka Tsiba o ile a botša Dafida gore Mefiboshethe o be a šetše ka gobane o be a tloga a nyaka go ba kgoši. Dafida o ile a kgolwa maaka ao! Ka gona o ile a nea Tsiba phahlo ka moka ya Mefiboshethe. Go se go ye kae ke ge Dafida a fenya ntweng ya gagwe kgahlanong le Abesalomo gomme a boela Jerusalema. Bjale Dafida o ile a kwa ge Mefiboshethe a itlhalosa. Dafida o ile a phetha ka gore Mefiboshethe le Tsiba ba arolelane phahlo. O nagana gore Mefiboshethe o ile a dira’ng?—

Ga se a ka a ngongorega gore phetho ya Dafida e be e sa bontšhe toka. Mefiboshethe o be a tseba gore kgoši e be e nyaka khutšo gore e kgone go dira modiro wa yona gabotse. Ka gona o ile a re Tsiba a tšee phahlo ka moka. Seo se bego se le bohlokwa kudu go Mefiboshethe e be e le gore mohlanka wa Jehofa e lego Dafida o be a boile Jerusalema e le kgoši.

Mefiboshethe o ile a tlaišega kudu. O be a fela a ikwa eka ke molahlwa. Eupša Jehofa o be a mo rata e bile a mo hlokomela. Re ka ithuta’ng go se?— Gaešita le ge re dira se se nepagetšego, ba bangwe ba ka bolela maaka ka rena. Jesu o itše: “Ge e ba lefase le le hloya, le tsebe gore le ntlhoile pele ga ge le hloya lena.” Batho ba ile ba ba ba bolaya Jesu! Re ka kgodišega gore ge e ba re dira se se nepagetšego, Modimo wa therešo, Jehofa, o tla re rata—gomme Morwa wa gagwe, Jesu, le yena o tla re rata.