Batamela Kgaufsi le Modimo

Moahlodi yo a Dirago se se Nepagetšego ka Mehla

Genesi 18:22-32

TOKA. Go loka. Go se bebe sefahlego. Na ga o kgahlwe ke dika tše bjalo tše dibotse? Rena batho re na le kganyogo ya tlhago ya go nyaka go swarwa ka tsela e nago le toka. Ka manyami, go na le go hloka toka mo gontši lefaseng lehono. Lega go le bjalo, go na le Moahlodi yo a swanelwago ke gore re mmote—Jehofa Modimo. Ka mehla o dira se se napagetšego. Se se bontšhitšwe gabotse poledišanong yeo e bilego gona magareng ga Jehofa le Aborahama, bjalo ka ge e ngwadilwe go Genesi 18:22-32. *

Ge Jehofa a be a botša Aborahama ka phetho ya Gagwe ya go seka-seka maemo a Sodoma le Gomora, Aborahama o ile a boifa gore go ka fedišwa batho le ge e le bafe ba lokilego bao ba dulago moo, go akaretša le motlogolo’agwe e lego Lota. Aborahama o ile a lopa Jehofa ka gore: “Naa O ka fediša moloki xa mmôxô le yo mobe naa? Mohlomongwê mo motseng woo xo ka ba le baloki ba masome a fetšaxo seatla. A O ka . . . lesa xo lebalêla motse woo ka ’baka la baloki ba masome a fetšaxo seatla ba ba ka baxo xo wôna?” (Ditemana 23, 24) Modimo o ile a re o tla phološa metse yeo ge e ba go e-na le baloki ba 50 feela go yona. Aborahama o ile a lopa Jehofa ka makga a mangwe gape a mahlano, a fokotša palo ganyenyane-ganyenyane go fihla go batho ba lesome. Ka lekga le lengwe le le lengwe ge a be a fokotša palo, Modimo o ile a re a ka se fediše metse yeo ge e ba go be go e na le baloki ba bakaalo metseng yeo.

Na Aborahama o be a ngangišana le Modimo? Ga go bjalo le gatee! Seo se be se tla bontšha gore o ikgogomoša kudu. Segalo sa Aborahama sa lentšu se be se bontšha tlhompho e swanetšego le boikokobetšo. O boletše ka yena ka noši e le “lerole le molôra.” O boletše ka makga a mabedi ka tlhompho gore “hlê.” (Ditemana 27, 31) Ka godimo ga moo, mantšu a Aborahama a utollotše gore o kgodišegile gore Jehofa ga a bebe sefahlego. Aborahama o itše taba ya gore Modimo a ka fediša baloki gotee le ba kgopo e be e tla ba ‘kgole le Modimo.’ Mopatriareka yo yo a botegago o ile a bontšha kgodišego ya gagwe ya gore “Moahlodi wa lefase ka moka” o tla “[dira] se se swanetšexo.”—Temana 25.

Na Aborahama o be a nepile dilong tšeo a di boletšego? O be a nepile e bile a fošitše. O be a fošitše ge a be a šišinya gore go na le bonyenyane baloki ba lesome kua Sodoma le Gomora. Eupša o be a nepile e le ka kgonthe ge a be a re le ka mohla Modimo a ka se ke a “fediša moloki xa mmôxô le yo mobe.” Ge Modimo a fediša metse yeo e kgopo ka morago, Lota yo a lokilego le barwedi ba gagwe ba babedi ba ile ba phologa ka thušo ya barongwa.—2 Petro 2:7-9.

Pego ye e re ruta’ng ka Jehofa? Ka go botša Aborahama gore o ikemišeditše go lekola metse yeo, Jehofa ge e le gabotse o be a laletša Aborahama go ntšha sa mafahleng. Ke moka o ile a theetša ka go se fele pelo ge mogwera wa gagwe Aborahama a hlalosa dilo tšeo a tshwenyegilego ka tšona. (Jesaya 41:8) Ruri se se re ruta gore Jehofa ke Modimo yo a ikokobeditšego, yo a hlomphago le go godiša bahlanka ba gagwe ba lefaseng! Ka kgonthe, re na le mabaka ka moka a go bota Jehofa ka mo go feletšego, Moahlodi yo a dirago se se nepagetšego ka mehla.

[Mongwalo wa tlase]

[Seswantšho go letlakala 24]

Aborahama o ile a lopa Jehofa mabapi le Sodoma le Gomora