Ke “Modimo yo a Godišago”!

“Yo a bjalago ga se selo gaešita le yo a nošetšago, ge e se Modimo yo a godišago.”​—1 BAKOR. 3:7.

1. Ke ka tsela efe re lego “badirišani ba Modimo”?

“BADIRIŠANI ba Modimo.” Ye ke tsela yeo Moapostola Paulo a hlalositšego tokelo yeo rena ka moka re ka bago le yona. (Bala 1 Bakorinthe 3:5-9.) Modiro woo Paulo a bego a bolela ka wona ke wa go dira barutiwa. O ile a o swantšha le go bjala peu le go e nošetša. Gore re atlege modirong woo o bohlokwa, re nyaka thušo ya Jehofa. Paulo o re gopotša gore ke “Modimo yo a godišago.”

2. Ke ka baka la’ng taba ya gore ‘Modimo ke yena a godišago’ e re thušago go ba le pono e swanetšego ka bodiredi bja rena?

² Therešo ye yeo e dirago gore re ikokobetše e re thuša go ba le pono e swanetšego ka bodiredi bja rena. Re ka šoma ka mafolofolo modirong wa go bolela le wa go ruta, eupša mafelelong tumišo ka moka e ya go Jehofa bakeng sa tšwelopele le ge e le efe yeo e ka bago gona. Ka baka la’ng? Ka gobane le ge re ka leka ka thata, ga go le o tee wa rena yo a ka kwešišago ka mo go feletšego megato ya kgolo, re se sa bolela ka go e laola. Kgoši Solomone o boletše ka boemo bjo ka mo go nepagetšego ge a be a ngwala gore: “Le medirô e dirwaxo ke Modimo a diraxo tše xo fêla, xa O e tsebe.”—Mmo. 11:5.

3. Ke go swana gofe mo go lego gona magareng ga modiro wa go bjala peu ya kgonthe le wa go dira barutiwa?

³ Na go palelwa ga rena ke go kwešiša megato ya kgolo go dira gore modiro wa rena e be wo o gakantšhago? Aowa. Go e na le moo, go dira gore e be woo o kgahlišago. Kgoši Solomone o itše: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela; xoba xo tlo mela yeno xoba yela, xoba ka dipedi.” (Mmo. 11:6) Ka kgonthe, ge go tliwa tabeng ya go bjala peu, ga re tsebe gore e tla mela kae goba ge e ba e tla gola. Dilo tše dintši di phagametše matla a rena. Selo se se swanago se ka bolelwa ka modiro wa go dira barutiwa. Jesu o ile a bontšha se ka diswantšho tše pedi tšeo di begetšwego go re hola go kgaolo 4 ya Ebangedi ya Mareka. Anke re boneng seo re ka ithutago sona diswantšhong tše tše pedi.

Mehuta e Fapa-fapanego ya Mmu

4, 5. Hlalosa ka boripana seswantšho sa Jesu sa mobjadi yo a gašago peu.

⁴ Go etša ge go begilwe go Mareka 4:1-9, Jesu o hlalosa mobjadi yo a bjalago, goba yo a gašago peu yeo e welago mafelong a fapa-fapanego, ka gore: “Theetšang. Bonang! Mobjadi o ile a tšwa a yo bjala. Ge a dutše a bjala, peu e nngwe e ile ya wela go bapa le tsela, gomme dinonyana tša tla tša e-ja tša e fetša. Peu e nngwe ya wela lekgwareng, moo ge e le gabotse e bego e se na mmu o montši, gomme ya mela ka go akgofa ka baka la ge mmu o be o sa iše fase. Eupša ge letšatši le hlaba, ya fsa, gomme ya pona ka baka la go hloka modu. Peu e nngwe ya wela meetlweng, meetlwa ya gola ya e kgama, gomme ya se tšweletše dienywa. Eupša tše dingwe tša wela mmung o mobotse, gomme ge di mela le go gola, tša thoma go tšweletša dienywa, gomme di be di enywa ga masome-tharo, ga masome-tshela le ga lekgolo.”

⁵ Mehleng ya Beibele, gantši peu e be e bjalwa ka go gašwa. Mobjadi o be a swara peu lemenong la seaparo sa gagwe goba ka gare ga seroto gomme a e gašanya gohle. Ka gona seswantšhong se, mobjadi ga a bjale peu mmung o fapa-fapanego ka boomo. Go e na le moo, peu e gašitšwego e wela mafelong a fapa-fapanego.

6. Jesu o hlalositše bjang seswantšho sa mobjadi?

⁶ Ga se ra swanela go phopholetša seo se bolelwago ke seswantšho se. Bjalo ka ge go begilwe  go Mareka 4:14-20, Jesu o ile a se hlalosa ka gore: “Mobjadi o bjala lentšu. Ka gona, ba ke peu yeo e bapilego le tsela moo lentšu le bjalwago gona; eupša gatee-tee ge ba le kwele Sathane o a tla a tšea lentšu leo le bjetšwego go bona. Ka mo go swanago ba ke peu yeo e bjetšwego lekgwareng: gatee-tee ge ba kwele lentšu, ba le amogela ka lethabo. Fela ga ba na modu go bona, eupša ba tšwela pele ka nakwana; ke moka gatee-tee ge masetlapelo goba tlaišo e tsoga ka baka la lentšu, ba a kgopša. Go sa na le e nngwe gape yeo e bjetšwego meetlweng; ye ke bao ba kwelego lentšu, eupša dipelaelo tša tshepedišo ye ya dilo le matla a forago a mahumo le dikganyogo tša dilo tše dingwe ka moka di a tsenelela gomme tša bipa lentšu, gomme la se be le dienywa. Mafelelong, yeo e bjetšwego mmung o mobotse ke bao ba theetšago lentšu ba le amogela gabotse gomme ba enywa dienywa ga masome-tharo le ga masome-tshela le ga lekgolo.”

7. Ke’ng seo se swantšhetšwago ke peu le mehuta e fapa-fapanego ya mmu?

⁷ Ela hloko gore Jesu ga a bolele gore go dirišitšwe mehuta e fapa-fapanego ya peu. Go e na le moo, o bolela ka mohuta o tee wa peu yeo e welago mehuteng e fapa-fapanego ya mmu, moo e nngwe le e nngwe ya yona e tšweletšago ka go se swane le e nngwe. Mohuta wa mathomo wa mmu o thata; wa bobedi ga o iše fase; wa boraro o tletše ka meetlwa; gomme wa bone ke o mobotse, mmu woo o tšweletšago gabotse. (Luka 8:8) Peu ye ke’ng? Ke molaetša wa Mmušo wo o hwetšwago ka Lentšung la Modimo. (Mat. 13:19) Ke’ng seo se swantšhetšwago ke mehuta e fapa-fapanego ya mmu? E swantšhetša dipelo tše di fapa-fapanego tša batho.—Bala Luka 8:12, 15.

8. (a) Mobjadi o swantšhetša mang? (b) Ke ka baka la’ng karabelo e sa swane modirong wa go bolela ka Mmušo?

⁸ Mobjadi o swantšhetša mang? O swantšhetša badirišani ba Modimo, bao ba bolelago ditaba tše dibotse tša Mmušo. Ka go swana le Paulo le Apollo, ba a bjala e bile ba a nošetša. Le ge ba šoma ka thata, go ba le mafelelo a sa swanego. Ka baka la’ng? Ka baka la go fapana ga dipelo tša batho bao ba kwago molaetša. Seswantšhong se, mobjadi ga a kgone go laola mafelelo a. Se se homotša gakaakang, kudu-kudu go bana babo rena le dikgaetšedi bao ba botegago, ba šomilego ka nywaga e mentši, mohlomongwe ka nywaga-some, gomme ba sa atlege gakaalo! * Ke ka baka la’ng go le bjalo?

9. Ke therešo efe e homotšago yeo e gatelelwago ke moapostola Paulo le Jesu?

 ⁹ Potego ya mobjadi ga e bonwe ka mafelelo a modiro wa gagwe. Paulo o be a šupa go seo ge a be a re: “Motho yo mongwe le yo mongwe o tla amogela moputso wa gagwe go ya ka boitapišo bja gagwe.” (1 Bakor. 3:8) Moputso o ya ka boitapišo, e sego go ya ka mafelelo a boitapišo bjoo. Jesu le yena o ile a gatelela ntlha ye ge barutiwa ba gagwe ba be ba boa leetong la bona la go dira boboledi. Ba be ba thabile kudu ka gobane le batemona ba be ba ikokobeletša bona ge ba diriša leina la Jesu. Le ge seo se be se ka thabiša, Jesu o itše go bona: “Le se ke la thabišwa ke gore meoya e ikokobeletša lena, eupša thabang gobane maina a lena a ngwadilwe magodimong.” (Luka 10:17-20) Le ge mobjadi a ka se bone koketšego e ntši ka baka la mafelelo a modiro wa gagwe, se ga se bolele gore ba bangwe ba be ba le mafolofolo goba ba botega go mo feta. Go fihla bokgoleng bjo itšego, mafelelo a ithekgile ka boemo bja pelo ya motheetši. Eupša mafelelong, ke Modimo yo a godišago!

Boikarabelo bja Bao ba Kwago Lentšu

10. Ke’ng seo se bontšhago ge e ba motho yo a kwago lentšu a swana le mmu o mobotse goba a sa swane le wona?

¹⁰ Go thwe’ng ka bao ba kwago lentšu? Na karabelo ya bona e be e rulagantšwe e sa le pele? Aowa. Go kgetha go swana le mmu o mobotse goba go se swane le wona ke taba ya bona. Ruri boemo bja motho bja pelo bo ka fetoga ya ba bjo bobotse goba bja mpefala. (Baroma 6:17) Seswantšhong sa gagwe, Jesu o boletše gore ‘gatee-tee ge ba bangwe ba kwele’ lentšu, Sathane o a tla a le tšea. Eupša se ga se sa swanela go direga. Go Jakobo 4:7, Bakriste ba kgothaletšwa gore ba “ganetše Diabolo,” gomme o tla ba tšhaba. Jesu o hlalosa ba bangwe e le bao mathomong ba amogelago lentšu ka lethabo eupša ka morago ba kgopša ka ge ba se “na modu go bona.” Eupša bahlanka ba Modimo ba eletšwa gore “e be ba tsemilego medu le ba theilwego motheong” e le gore ba kgone go hlaologanya “seo e lego bophara le botelele le bophagamo le go iša, le go tseba lerato la Kriste le le fetago tsebo.”—Baef. 3:17-19; Bakol. 2:6, 7.

11. Ke bjang motho a ka phemago go dumelela dipelaelo le mahumo di bipa lentšu?

¹¹ Ba bangwe bao ba kwelego lentšu ba hlaloswa e le bao ba dumeletšego “dipelaelo tša tshepedišo ye ya dilo le matla a forago a mahumo” di tsenelela gomme di bipa lentšu. (1 Tim. 6:9, 10) Ba ka phema se bjang? Moapostola Paulo o araba ka gore: “Mokgwa wa lena wa bophelo a o se be le lerato la go rata tšhelete, ge le dutše le kgotsofetše ka dilo tše di lego gona. Gobane o itše: ‘Le ka mohla nka se ke ka le tlogela le ge e le go le lahla.’”—Baheb. 13:5.

12. Ke ka baka la’ng bao ba swantšhetšwago ke mmu o mobotse ba tšweletša dienywa ka ditsela tše sa swanego?

¹² Sa mafelelo, Jesu o re tšeo di bjetšwego mmung o mobotse di “tšweletša dienywa ga masome-tharo, ga masome-tshela le ga lekgolo.” Gaešita le ge ba bangwe bao ba arabelago lentšung ba e-na le boemo bjo bobotse bja pelo e bile ba tšweletša dienywa, seo ba kgonago go se fihlelela ka go bolela ditaba tše dibotse se a fapana go ya ka maemo a bona. Ka mohlala, botšofadi goba bolwetši bjo bo fokodišago di ka dira gore ba bangwe ba se ke ba fetša nako yeo ba nyakago go e fetša modirong wa boboledi. (Bapiša le Mareka 12:43, 44.) Gape, mobjadi a ka ba le mo gonyenyane mo a ka go dirago goba a se kgone go dira selo tabeng ye, eupša o a thaba ge a bona gore Jehofa o dirile gore peu ye e gole.—Bala Psalme 126:5, 6.

Mobjadi yo a Robalago

13, 14. (a) Hlalosa ka boripana seswantšho sa Jesu sa mobjadi yo a gašago peu. (b) Ke mang yo a swantšhetšwago ke mobjadi le gona peu ke eng?

¹³ Go Mareka 4:26-29, re hwetša seswantšho se sengwe seo se tswalanago le mobjadi, se re: “Ka tsela ye mmušo wa Modimo o etša ge motho a gaša peu mmung, bošego o a robala mosegare o a tsoga, gomme peu ya hloga ya gola, gore bjang ga a tsebe. Mmu ka bowona o enywa dienywa ganyenyane-ganyenyane, pele lekgaba, ke moka lenono, mafelelong dithoro tše di tletšego seakong. Eupša gatee-tee ge seenywa  se dumela, o tsenya sekela, gobane nako ya puno e fihlile.”

¹⁴ Mobjadi yo ke mang? Ba bangwe Bojakaneng ba dumela gore se se šupa go Jesu. Eupša go ka bolelwa bjang gore Jesu o a robala le gore ga a tsebe gore peu e gola bjang? Ruri Jesu o tseba megato ya kgolo! Go e na le moo, go swana le yoo go boletšwego ka yena pejana, mobjadi yo o swantšhetša mogoeledi yo mongwe le yo mongwe wa Mmušo, yoo a bjalago peu ya Mmušo ka go dira modiro wa boboledi ka mafolofolo. Peu yeo e gašwago mmung ke lentšu leo le bolelwago. *

15, 16. Ke therešo efe yeo Jesu a ilego a e bolela mabapi le kgolo ya dibjalo le kgolo ya moya seswantšhong sa gagwe sa mobjadi?

¹⁵ Jesu o boletše ka mobjadi gore “bošego [o] a robala mosegare o a tsoga.” Se ga se go se šetše ga mobjadi. Se fo ba se swantšhetša tsela e tlwaelegilego ya bophelo yeo batho ba bantši ba e latelago. Lentšu leo le dirišitšwego temaneng ye le bontšha mokgwa wa ka mehla wa go šoma mosegare le go robala bošego. Jesu o ile a hlalosa seo se ilego sa direga ka nako yeo. O re: “Peu ya hloga [gomme] ya gola.” Ke moka a oketša ka gore: “Gore bjang ga a tsebe.” Seo se gatelelwago mo ke gore kgolo e direga ‘ka boyona.’ *

¹⁶ Jesu o be a e-ra go re’ng mo? Ela hloko gore seo se gatelelwago mo ke kgolo gotee le kamoo kgolo ye e diregago ka gona ganyenyane-ganyenyane. “Mmu ka bowona o enywa dienywa ganyenyane-ganyenyane, pele lekgaba, ke moka lenono, mafelelong dithoro tše di tletšego seakong.” (Mar. 4:28) Kgolo ye e direga ganyenyane-ganyenyane le gona ka megato. E ka se ke ya gapeletšwa goba go akgofišwa. Go bjalo le ka kgolo ya moya. Se se direga ka megato bjalo ka ge Jehofa a dumelela therešo gore e gole ka pelong ya motho yo a nago le tshekamelo e swanetšego.—Dit. 13:48; Baheb. 6:1.

17. Ke mang yo a thabago ge peu ya therešo e e-ba le mafelelo a mabotse?

¹⁷ Mobjadi o tšea karolo bjang punong “gatee-tee ge seenylwa se dumela”? Ge Jehofa a dira gore therešo ya Mmušo e gole ka dipelong tša barutiwa ba bafsa, mafelelong ba fihla boemong bjoo go bjona go rata ga bona Modimo go ba hlohleletšago go neela maphelo  a bona go yena. Ba bontšha boineelo bja bona ka go kolobetšwa meetseng. Bana babo rena bao ba tšwelago pele ba gola tsebong ba kgona go hwetša maikarabelo a oketšegilego ka phuthegong ganyenyane-ganyenyane. Dienywa tša Mmušo di bunwa ke mobjadi yo a bjetšego le bagoeledi ba bangwe ba Mmušo bao ba sa kago ba tšea karolo ka go lebanya go bjalweng ga peu yeo e tšweleditšego morutiwa yoo. (Bala Johane 4:36-38.) Ka kgonthe, ‘mobjadi le mmuni ba thaba gotee.’

Seo re Ithutago Sona Lehono

18, 19. (a) O kgothaditšwe bjang ke go hlahloba diswantšho tše tša Jesu? (b) Ke’ng seo se tlago go ahla-ahlwa sehlogong seo se latelago?

¹⁸ Ke’ng seo re ithutilego sona ka go hlahloba diswantšho tše tše pedi tšeo di begilwego go Mareka kgaolo 4? Re bona gabotse gore re na le modiro wo re swanetšego go o dira—go bjala. Ga se ra swanela go dumelela mabaka a sa rego selo le mathata a re palediša go dira modiro wo. (Mmo. 11:4) Lega go le bjalo, ka nako e swanago, re lemoga tokelo yeo re nago le yona e kgahlišago ya go ba badirišani ba Modimo. Jehofa ke yena a dirago gore go be le kgolo ya moya, o šegofatša maiteko a rena le a bao ba amogelago molaetša. Re lemoga gore re ka se ke ra gapeletša kgolo ya moya go motho le ge e le ofe. Le rena ga se ra swanela go nyama goba go fela pelo ge kgolo e nanya goba e se gona. Go homotša gakaakang go tseba gore re atlega ka baka la go botegela Jehofa gotee le tokelo yeo a re neilego yona ya go bolela “ditaba . . . tše dibotse tša mmušo . . . gore e be bohlatse go ditšhaba tšohle.”—Mat. 24:14.

¹⁹ Ke’ng se sengwe seo Jesu a re rutago sona mabapi le kgolo ya barutiwa ba bafsa le ka modiro wa Mmušo? Karabo ya potšišo yeo e hwetšwa diswantšhong tše dingwe tšeo di begilwego ka dipegong tša Ebangedi. Re tla ahla-ahla tše dingwe tša diswantšho tše sehlogong se se latelago.

[Mengwalo ya tlase]

Na o a Gopola?

• Ke go swana gofe mo go lego gona magareng ga go bjala peu ya kgonthe le go bolela molaetša wa Mmušo?

• Jehofa o lekanya bjang potego ya mogoeledi wa Mmušo?

• Ke go swana gofe moo Jesu a ilego a go gatelela magareng ga kgolo ya dibjalo le kgolo ya moya?

• Ke bjang ‘mobjadi le mmuni ba thabago gotee’?

[Dipotšišo tša Thuto]

[Diswantšho go letlakala 13]

Ke ka baka la’ng Jesu a ile a bapiša mogoeledi wa Mmušo wa Modimo le mobjadi wa peu?

[Diswantšho go letlakala 15]

Bao ba swantšhetšwago ke mmu o mobotse ba tšea karolo ka pelo ka moka modirong wa go bolela ka Mmušo, go ithekgilwe ka maemo a bona

[Diswantšho go letlakala 16]

Ke Modimo yo a godišago