Batšofadi​—ditho Tše Bohlokwa Kudu Tša Borwarre Bja Rena Bja Bokriste

“Ba ba bjetšwego ngwakong wa Jehofa ba tlo hloga . . . Ba sa tlo bea dikenyo le botšofading bja bona.”—PSALME 92:14, 15, PK.

1. Batho ba bantši ba lebelela batšofadi bjang?

JEHOFA o rata bahlanka ba gagwe ka moka ba ba botegago, go akaretša le bao ba tšofetšego. Lega go le bjalo, go ya ka kakanyetšo ya setšhaba, ngwaga o mongwe le o mongwe mo e nyakilego go ba seripa-gare sa milione sa batšofadi kua United States ba a gobošwa goba ba a hlokomologwa. Dipego tše di swanago go tšwa lefaseng ka bophara di bontšha gore go gobošwa ga batšofadi ke bothata bja lefaseng ka bophara. Mokgatlo o mongwe o bolela gore modu wa bothata bjo ke “boemo bja kgopolo bjo bo lego gona gare ga batho ba bantši . . . bja gore batšofadi ga ba sa na mohola, ga ba sa na tšweletšo le gore ba ithekgile kudu ka thušo ya ba bangwe.”

2. (a) Jehofa o lebelela bjang bahlanka ba gagwe ba ba botegago bao ba tšofetšego? (b) Ke tlhaloso efe e ruthetšago pelo yeo re e hwetšago go Psalme 92:12-15?

² Jehofa Modimo o tšeela godimo bahlanka ba gagwe ba botegago ka go se kwanantšhe bao ba tšofetšego. O lebiša tlhokomelo go “motho wa teng”—boemo bja rena bja moya—go e na le go mafokodi a rena a nama. (2 Ba-Korinthe 4:16) Ka Lentšung la gagwe Beibele, re hwetša kgonthišetšo e latelago yeo e ruthetšago pelo: “E a lokilego o tlo mela bjalo ka mopalema, o tlo gola bjalo ka motsedara wa Libanoni. Ba ba bjetšwego ngwakong wa Jehofa, ba tlo hloga malapeng a Modimo wa rena. Ba sa tlo bea dikenyo le botšofading bja bona, ba tlo nona ya ba ba bananana. Gore ba tumiše Jehofa.” (Psalme 92:12-15, PK) Go ahla-ahlwa ga ditemana tše go tla utolla dibopego tša tema e bohlokwa yeo lena ba ba godilego le ka e kgathago borwarreng bja Bokriste.

‘Go Enywa Dienywa Botšofading’

3. (a) Ke ka baka la’ng baloki ba swantšhwa le mepalema? (b) Ke bjang batšofadi ba ka ‘enywago dienywa botšofading’?

³ Mopsalme o swantšha baloki le mepalema ‘yeo e bjetšwego malapeng a Modimo wa rena.’ Ba ‘tšwela pele ba enywa dienywa botšofading.’ Na ga o dumele gore ye ke kgopolo e kgothatšago? Mepalema e mebotse ye e otlologilego e be e tlwaetšwe go bonwa malapeng a ka Bohlabela a mehleng ya Beibele. Go oketša go mohola wa yona wa go kgabiša, mepalema e be e tšeelwa godimo ka baka la dienywa tša yona tše dintši, moo tše dingwe tša dihlare tša yona di tšwelago pele go enywa dienywa ka nywaga ya ka godimo ga e lekgolo. * Ka go dula o tsemile medu ka go tia borapeding bja therešo, le wena ka mo go swanago o ka “enywa  dienywa ka medirô e botse yohle.”—Ba-Kolose 1:10.

4, 5. (a) Ke seenywa sefe sa bohlokwa seo Bakriste ba swanetšego go se tšweletša? (b) Nea mehlala ya Mangwalo ya batšofadi bao ba ilego ba tšweletša “seenywa sa melomo.”

⁴ Jehofa o letetše gore Bakriste ba tšweletše “seenywa sa melomo”—mantšu ao a bolelwago bakeng sa go mo tumiša gotee le go tumiša merero ya gagwe. (Ba-Hebere 13:15) Na se se šoma le go wena bjalo ka motšofadi? Se tloga se šoma.

⁵ Beibele e na le mehlala ya batšofadi bao ka go se boife ba ilego ba nea bohlatse ka leina la Jehofa le ka merero ya gagwe. Moše o be a šetše a fetile “nywaxa e masome a šupaxo” ge Jehofa a be a mo roma go ba moporofeta le moemedi wa gagwe. (90:10; Ekisodo 4:10-17) Botšofadi ga se bja ka bja thibela moporofeta Daniele go nea bohlatse ka go se boife mabapi le bogoši bja Jehofa. Mohlomongwe Daniele o be a le nywageng ya gagwe ya bo-90 ge Belesatsara a be a mmitša gore a tlo hlalosa mongwalo wa seatla wa mohlolo wo o bego o le lebotong. (Daniele, kgaolo 5) Le gona go thwe’ng ka moapostola Johane yo a tšofetšego? Go ya mafelelong a modiro wa gagwe wa nako e telele, o ile a ikhwetša a golegilwe sehlakahlakeng sa Patimo “molato è le Lentšu la Modimo, è le xo hlatsêla Jesu Kriste.” (Kutollo 1:9) Ka ntle le pelaelo o ka gopola baanegwa ba bangwe ba bantši ba ka Beibeleng bao ba ilego ba tšweletša “seenywa sa melomo” nywageng ya bona ya botšofading.—1 Samuele 8:1, 10; 12:2; 1 Dikxoši 14:4, 5; Luka 1:7, 67-79; 2:22-32.

6. Ke bjang Jehofa a dirišitšego “ba baxolo” go porofeta mo mehleng ye ya bofelo?

⁶ Ge a be a tsopola moporofeta Joele wa mo-Hebere, moapostola Petro o tsebaditše gore: “Tšeo di tl’o xo dirêxa mehleng yeo ya bofelô ši-di: Ó r’yalo Modimo, ó re: Nama yohle [go akaretša le “ba baxolo”] ke tlo e thšela Môya wa-ka; ’me . . . ba tlo porofeta.” (Ditiro 2:17, 18; Joele 2:28) Ka baka leo, mo mehleng ya bofelo, Jehofa o dirišitše ditho tše di tšofetšego tša sehlopha sa batlotšwa le sa “dinku tše dingwê” go tsebatša merero ya gagwe. (Johane 10:16) Ba bangwe ba ba ba be ba dutše ba tšweletša dienywa tša Mmušo ka nywaga-some.

7. Bontšha kamoo batšofadi ba tšwelago pele ba tšweletša dienywa tša Mmušo go sa šetšwe mafokodi a mmeleng.

⁷ Nagana ka Sonia, yo a bilego mogoeledi wa nako e tletšego wa Mmušo ka 1941. Go sa šetšwe go lwantšhana le bolwetši bjo bošoro ka nako e telele, ka mehla o be a swara dithuto tša Beibele ka legaeng la gagwe. Sonia o hlalositše gore: “Go bolela ditaba tše dibotse ke karolo ya bophelo bja-ka. Ge e le gabotse ke bophelo bja-ka. Ga ke nyake go kgaotša.” E sego kgale, Sonia le mogol’agwe, Olive, ba ile ba boledišana ka molaetša wa Beibele wa kholofelo le Janet, molwetši yo a babjetšago go hwa yoo ba ilego ba gahlana le yena ka phapošing ya go letela ngaka bookelong. Mmago Janet, e lego Mokatholika yo a ineetšego, o ile a kgahlišwa kudu ke kgahlego ye e lerato yeo e bontšhitšwego morwedi wa gagwe moo a ilego a amogela thuto ya legae ya Beibele gomme gabjale o dira tšwelopele e botse. Na o ka diriša dibaka tše di swanago bakeng sa go tšweletša dienywa tša Mmušo?

8. Ke bjang Kalebe yo a tšofalago a ilego a bontšha go bota Jehofa, gomme ke bjang batšofadi ba Bakriste ba ka ekišago mohlala wa gagwe?

⁸ Ka go tšwela pele ka sebete modirong wa go bolela ka Mmušo go sa šetšwe mafokodi a botšofadi, Bakriste ba ba tšofetšego ba latela mehlaleng ya mo-Isiraele yo a botegago Kalebe, yoo a ilego a sepela le Moše lešokeng ka nywaga-some e mene. Kalebe o be a e-na le nywaga e 79 ge a be a tshela Noka ya Jorodane go ya Nageng ya Kholofetšo.  Ka morago ga go lwa gare ga madira a phenyo a Isiraele ka nywaga e tshela, a ka ba a ile a kgotsofala gomme a dula a se sa dira selo. Eupša ga se a dira bjalo, ka sebete o ile a kgopela kabelo e thata ya go thopa “metse e mexolo ya dibô” tikologong ya dithaba ya Juda, naga yeo e dulwago ke ba-Enaki, banna ba bogolo bjo bo sa tlwaelegago. Ka thušo ya Jehofa, Kalebe o ile a “ba raka ka mo Morêna a boletšexo.” (Jošua 14:9-14; 15:13, 14) Re go kgonthišetša gore Jehofa o na le wena ge o dutše o tšwela pele o tšweletša dienywa tša Mmušo botšofading, go etša ge a be a e-na le Kalebe. Le gona ge e ba o dula o botega, o tla go dumelela go phela lefaseng la gagwe le lefsa leo a le holofeditšego.—Jesaya 40:29-31; 2 Petro 3:13.

“Ba tlo Nona ya ba ba Bananana”

9, 10. Ke bjang Bakriste ba ba tšofetšego ba dulago ba tiile tumelong le go dula ba e-na le matla a bona a moya? (Bona lepokisi le le lego go letlakala 13.)

⁹ Ge a lebiša tlhokomelo tabeng ya go enywa ga bahlanka ba ba tšofetšego ba Jehofa, mopsalme o opetše ka gore: “E a lokilego o tlo mela bjalo ka mopalema, o tlo gola bjalo ka motsedara wa Libanoni. Ba sa tlo bea dikenyo le botšofading bja bona, ba tlo nona ya ba ba bananana.”—Psalme 92:13, 15, PK.

¹⁰ O ka boloka bjang matla a gago a moya go sa šetšwe botšofadi? Sephiri sa botse bja sa ruri bja sehlare sa mopalema ke ge e ba se e-na le mothopo o lekanego wa meetse a hlwekilego. Ka mo go swanago, o ka thekgwa ke meetse a therešo ya Beibele ka thuto ya gago ya Lentšu la Modimo le ka go kopanela le mokgatlo wa gagwe. (Psalme 1:1-3; Jeremia 17:7, 8) Matla a gago a moya a go dira gore o be setho sa bohlokwa go badumedi-gotee le wena. Ela hloko kamoo se se ilego sa itlhatsela e le therešo tabeng ya Moperisita yo Mogolo yo a tšofetšego e lego Joyada.

11, 12. (a) Ke tema efe ya bohlokwa yeo Joyada a e kgathilego historing ya mmušo wa Juda? (b) Joyada o ile a diriša bjang tutuetšo ya gagwe go godiša borapedi bja therešo?

¹¹ Mohlomongwe Joyada o be a e-na le nywaga ya ka godimo ga e lekgolo ge Kgošigadi Athalia a be a thopa taolo ya Juda ka go bolaya ditlogolwana tša gagwe. Joyada yo a tšofetšego o be a ka dira’ng? Ka nywaga e tshela, yena le mosadi wa gagwe ba ile ba uta Joase yoo e bego e le yena moja-bohwa a nnoši wa bogoši yo a bego a šetše tempeleng. Ke moka, ka go gata mogato o makatšago, Joyada o ile a tsebatša Joase wa nywaga e šupago e le kgoši gomme a ahlolela Athalia polao.—2 Koronika 22:10-12; 23:1-3, 15, 21.

¹² E le moleti wa kgoši, Joyada o ile a diriša tutuetšo ya gagwe go godiša borapedi bja therešo. Yena “le sethšaba ka moka le kxoši ba dira kxwêranô ya xore sethšaba ka moka e bê sa Morêna.” Ka ditaelo tša Joyada, batho ba ile ba phušola ngwako wa modimo wa maaka e lego Baali, gomme ba tloša dialetare tša ona, diswantšho le baperisita. Le gona e bile ka tlase ga tlhahlo ya Joyada moo Joase a ilego a tsošološa ditirelo tša tempeleng gomme a dira modiro wo o bego o nyakega kudu wa go lokiša tempele. “Joase bophelong bya xaxwe ka moka ó dirile tše di kxahlilexo Morêna, xobane ó be a rutwa ke Joyada moperisita.” (2 Koronika 23:11, 16-19; 24:11-14; 2 Dikxoši 12:3) Ka morago ga ge a hwile a e-na le nywaga e 130, Joyada o ile a newa tlhompho e kgethegilego ya go bolokwa le dikgoši ka gobane “tše a di diretšexo Isiraele le Modimo le Ngwakô wa Modimo e be e le tše botse.”—2 Koronika 24:15, 16.

13. Ke bjang Bakriste ba ba tšofetšego ba ka ‘direlago Modimo le ngwako wa gagwe botse’?

¹³ Mohlomongwe boemo bjo bo fokolago bja tša maphelo goba maemo a mangwe a lekanyetša seo o ka se dirago bakeng sa go godiša borapedi bja therešo. Gaešita le ge seo se le bjalo, o sa dutše o ka kgona go ‘direla Modimo le ngwako wa gagwe botse.’ O ka bontšha phišego bakeng sa ngwako wa Jehofa wa moya ka go ba gona le ka go tšea karolo dibokeng tša phuthego le ka go tšea karolo bodireding bja tšhemo le ge e le neng ge go kgonega. Go ikemišetša ga gago go amogela keletšo ya Beibele le go thekga ga gago ka potego “molaki e a bôtêxaxo yo bohlale” gotee le phuthego, go tla ba le mafelelo a matlafatšago go borwarre bja Bokriste. (Mateo 24:45-47) Le gona o ka tutueletša barapedi-gotee le wena “leratong le medirong e botse.” (Ba-Hebere 10:24, 25; Filemone 8, 9) Le gona o tla ba tšhegofatšo go ba bangwe  ge e ba o dira dilo ka go dumelelana le keletšo ya moapostola Paulo e rego: “Banna ba baxolo O ba eletšê xore ba hlwê bà phafoxile, e bê ba bokwala le ba thlaoloxanyô, le ba ba phedilexo [“ba mafolofolo,” An American Translation] tumelong, è le ba leratô le xo se fêle pelo. Le basadi ba baxolo e bê ba babyalo, ba swarê ka tsela ya ba bakxêthwa. E se kê ya ba baphari, le ba xo bušwa ke sebelá; a e bê baruti ba bothakxa.”—Tito 2:2-4.

14. Ke’ng seo bao e lego kgale e le balebeledi ba Bakriste ba ka se dirago go godiša borapedi bja therešo?

¹⁴ Na o hlanketše o le mogolo wa phuthego ka nywaga e mentši? Keletšo ya yo mongwe yo e bilego mogolo ka phuthegong ka nako e telele ke e rego: “Diriša ka go hloka boithati bohlale bjo o bo hweditšego go theoša le nywaga. Abela ba bangwe boikarabelo, gomme o abelane phihlelo ya gago le ba bangwe bao ba fišegelago go ithuta . . . Bona bokgoni bja ba bangwe. Bo godiše gotee le go bo hlagolela. Thea motheo bakeng sa bokamoso.” (Doiteronomio 3:27, 28) Kgahlego ya gago ya kgonthe modirong wo o katologago ka go se kgaotše wa Mmušo e tla tliša ditšhegofatšo tše dintši go ba bangwe borwarreng bja rena bja Bokriste.

‘Tumiša go Loka ga Jehofa’

15. Ke bjang Bakriste ba ba tšofetšego ba ‘tumišago go loka ga Jehofa’?

¹⁵ Bahlanka ba Modimo ba ba tšofetšego ba phetha ka lethabo boikarabelo bja bona bja go ‘tumiša go loka ga Jehofa.’ Ge e ba o le Mokriste yo a tšofetšego, mantšu a gago le ditiro di ka bontšha ba bangwe gore ‘Jehofa ke lentswe la gago, ke moila-bošaedi.’ (Psalme 92:15) Mopalema o nea bohlatse ka setu go dika tše di phagamego tša Mmopi wa wona. Eupša Jehofa o go neile tokelo ya go nea bohlatse ka yena go bao gona bjale ba amogelago borapedi bja therešo. (Doiteronomio 32:7; Psalme 71:17, 18; Joele 1:2, 3) Ke ka baka la’ng se e le sa bohlokwa?

16. Ke mohlala ofe wa ka Beibeleng wo o bontšhago bohlokwa bja go ‘tumiša go loka ga Jehofa’?

¹⁶ Ge moetapele wa mo-Isiraele e lego Jošua a be a “tšofetše à atetšwe ke matšatši,” o ile “a bitša Ba-Isiraele ka moka, baxolo ba bôná, le balaodi ba bôná, le baahlodi ba bôná,” gomme a ba gopotša ka ditirišano tša Modimo tša go loka. O itše: “[Ga gwa ka] xwa hlaêla le setee sa tše botse tše Morêna Modimo wa lena a Le boletšexo ka tšôna; ka moka di tšweletše.” (Jošua 23:1, 2, 14) Ka nakwana, mantšu a a ile a matlafatša boikemišetšo  bja batho bja go dula ba botega. Lega go le bjalo, ka morago ga lehu la Jošua, “xwa rotoxa thaká e šele ya ba ba sa tsebexo Morêna le ditirô tše kxolo tše a di diretšexo Isiraele. ’Me Ba-Isiraele ba dira tše di befetšexo Morêna ba hlankêla bô-Baali.”—Baahlodi 2:8-11.

17. Jehofa o ile a dirišana bjang le batho ba gagwe mehleng yeno?

¹⁷ Potego ya phuthego ya Bokriste ya mehleng yeno ga se ya ithekga ka bohlatse bjo bo bolelwago bja bao e lego kgale ba hlankela Modimo. Lega go le bjalo, tumelo ya rena go Jehofa le dikholofetšong tša gagwe e matlafatšwa ke ge re ikwela ka noši dipego tša “ditirô tše kxolo” tšeo a di diretšego batho ba gagwe mo mehleng ye ya bofelo. (Baahlodi 2:7; 2 Petro 1:16-19) Ge e ba o be o dutše o kopanela le mokgatlo wa Jehofa ka nywaga e mentši, o ka gopola nako ya ge go be go e na le bagoeledi ba sego kae ba Mmušo tikologong ya geno goba nageng ya geno goba ge modiro wa boboledi o be o lebeletšane le kganetšo e šoro. Ge nako e dutše e feta, o bone Jehofa a tloša mapheko a itšego gomme a ‘akgofiša’ kgolo ya Mmušo. (Jesaya 54:17; 60:22, PK) O lemogile go hlaloswa ka mo go kwagalago ga ditherešo tša Beibele gomme o bone dikaonefatšo tše di tšwelago pele tša karolo e bonagalago ya mokgatlo wa Modimo. (Diema 4:18; Jesaya 60:17) Na o nyaka go aga ba bangwe ka go boledišana le bona ka phihlelo ya gago ya mabapi le ditirišano tša Jehofa tša go loka? Se se ka ba le mafelelo a tutuetšago le a matlafatšago gakaakang borwarreng bja Bokriste!

18. (a) Bontšha mafelelo a swarelelago a go ‘tumiša go loka ga Jehofa go ba bangwe.’ (b) Wena ka noši o bone bjang go loka ga Jehofa?

¹⁸ Go thwe’ng ka dinako tša ge o be o bona tlhokomelo e lerato ya Jehofa le tlhahlo ya gagwe bophelong bja gago ka noši? (Psalme 37:25; Mateo 6:33; 1 Petro 5:7) Kgaetšedi yo a tšofetšego yo a bitšwago Martha o be a tlwaetše go kgothatša ba bangwe ka go ba botša gore: “Go sa šetšwe gore go direga eng, le ka mohla o se ke wa lahla Jehofa. O tla go thekga.” Keletšo ye e ile ya ba le mafelelo a matla kudu go Tolmina, e lego yo mongwe wa barutwana ba Beibele ba Martha, yoo a kolobeditšwego nywageng ya mathomong a bo-1960. Tolmina o gopola gore: “Ge monna wa-ka a be a e-hwa, ke ile ka ikwa ke nyamile kudu, eupša mantšu ao a ile a ntira gore ke ikemišetše gore ke se ke ka foša seboka le se se tee. Ka gona Jehofa o ile a mmatlafatša e le ka kgonthe gore ke tšwele pele.” Go theoša le nywaga, Tolmina o ile a nea barutwana ba gagwe ba bantši ba Beibele keletšo e swanago. Ka kgonthe, ka go nea kgothatšo le go bolela ka ditirišano tša Jehofa tša go loka, o ka dira mo gontši go aga tumelo ya badumedi-gotee le wena.

Jehofa o Tšeela Godimo Batšofadi ba ba Botegago

19, 20. (a) Jehofa o lebelela bjang ditiro tša bahlanka ba gagwe ba ba tšofetšego? (b) Ke’ng seo se tlago go ahla-ahlwa sehlogong se se latelago?

¹⁹ Lefase la lehono, leo le tsebjago ka go hloka  tebogo, ga le na nako ya batšofadi. (2 Timotheo 3:1, 2) Ge ba gopolwa, gantši ke ka baka la dilo tšeo ba di fihleletšego nakong e fetilego—seo ba bego ba le sona, go e na le seo ba lego sona. Ka mo go fapanego, Beibele e re: “Modimo xa a bebe motho, xa a lebale medirô ya lena, le leratô le Le itapišitšexo ka lôna ’ineng la xaxwe mola Lè dirêla bakxêthwa, Lè ba dirêla le byale.” (Ba-Hebere 6:10) Therešo ke gore Jehofa Modimo o gopola pego ya gago ya nakong e fetilego ya mediro ya go botega. Eupša le gona o go tšeela godimo bakeng sa seo o tšwelago pele o se dira tirelong ya gagwe. Ee, o lebelela batšofadi ba ba botegago e le bao ba enywago dienywa, bao ba phedilego gabotse moyeng e bile e le Bakriste ba mafolofolo—bohlatse bjo bo phelago bja matla a gagwe.—Ba-Filipi 4:13.

²⁰ Na o lebelela ditho tšeo di tšofetšego tša borwarre bja Bokriste ka tsela yeo Jehofa a di lebelelago ka yona? Ge e ba o dira bjalo, o tla tutueletšega go bontšha lerato la gago go tšona. (1 Johane 3:18) Sehlogo se se latelago se tla ahla-ahla tše dingwe tša ditsela tše di šomago tša go bontšha lerato le bjalo go hlokomeleng dinyakwa tša bona.

[Mengwalo ya ka tlase]

[Dipotšišo tša Thuto]

[Lepokisi go letlakala 13]

Kamoo ba Ilego ba Dula ba Tiile Tumelong ka Gona

Ke’ng seo se thušitšego bao e lego kgale e le Bakriste go dula ba tiile tumelong le go kgomarela matla a bona a moya? Se ke seo ba bangwe ba se boletšego:

“Go bala mangwalo ao a lebišago tlhokomelo tswalanong ya rena le Jehofa ke gabohlokwa kudu. Mašegong a mantši, ke bolela ka hlogo Psalme 23 le 91.”—Olive, o kolobeditšwe ka 1930.

“Ka mehla ke be ke kgonthišetša gore ke ba gona polelong e nngwe le e nngwe ya kolobetšo le go theetša ka kelohloko, bjalo ka ge eka go be go kolobetšwa nna. Go dula ke naganne gabotse ka boineelo bja-ka e bile mogato o bohlokwa wa go dula ke botega.”—Harry, o kolobeditšwe ka 1946.

“Go rapela letšatši le letšatši ke gabohlokwa—ka mehla o kgopela thušo ya Jehofa, tšhireletšo le tšhegofatšo, ‘o mo tseba ditseleng tša gago ka moka.’” (Diema 3:5, 6)—Antônio, o kolobeditšwe ka 1951.

“Go theetša diphihlelo tša bao ba sa dutšego ba hlankela Jehofa ka mafolofolo ka morago ga nywaga e mentši gakaakaa go tsošološa boikemišetšo bja-ka bja go dula ke mmotegela ka go se kwanantšhe.”—Joan, o kolobeditšwe ka 1954.

“Ke gabohlokwa gore motho a se ke a nagana kudu ka yena ka noši. Seo re nago le sona re se hweditše ka baka la botho bjo bo sa swanelago bja Modimo. Go ba le pono ye go dira gore re dule re lebeletše tseleng e nepagetšego bakeng sa dijo tša moya tšeo di nyakegago e le gore re kgotlelele go fihla bofelong.”—Arlene, o kolobeditšwe ka 1954.

[Caption on page 11]

Batšofadi ba tšweletša dienywa tše bohlokwa tša Mmušo

[Caption on page 14]

Matla a moya a batšofadi ke selo sa bohlokwa kudu

Dikarabo tša Gago ke Dife?

• Ke bjang batšofadi ‘ba enywago dienywa’?

• Ke ka baka la’ng matla a moya a Bakriste ba ba tšofetšego e le selo sa bohlokwa?

• Ke bjang batšofadi ba ka ‘tumišago go loka ga Jehofa’?

• Ke ka baka la’ng Jehofa a tšeela godimo bahlanka ba gagwe ba nako e telele?