Dipotšišo tše Tšwago go Babadi

Ke eng seo se bolelago ke mantšu a lego go Ba-Hebere 12:4 a rego: “Xa Le ešo la lwa ntwa ya madi”?

Polelwana ‘go lwa ntwa ya madi’ e bolela go kgotlelela ntweng go fihla ntlheng ya go hwa, go tšholla madi a bophelo a motho e le ka kgonthe.

Moapostola Paulo o be a tseba gore ka baka la tumelo ya bona, Bakriste ba bangwe ba ba-Hebere ba be ba šetše ba ‘kgotleletše ntwa e kgolo ya ditlaišego.’ (Ba-Hebere 10:​32, 33) Ge a be a šupa seo, go bonala Paulo a be a diriša tshwantšhišo ya ntwa diphadišanong tša mabelo tša Gerika, tšeo di bego di ka akaretša mabelo, papadi ya go penyana (wrestling), matswele, discus le javelin. Ka go dumelelana le seo, o ile a kgothaletša Bakriste-gotee le yena go Ba-Hebere 12:1 (NW) gore: “Anke gape re roleng boima le ge e le bofe le sebe se se raretšago gabonolo gomme re kitimeng lebelo le le beilwego pele ga rena ka kgotlelelo.”

Ditemaneng tše tharo ka morago go Ba-Hebere 12:4, Paulo a ka ba a be a tloga go seswantšho sa tša mabelo a e-ya go phadišano ya tša matswele. (Bobedi bja tšona di tšwelela go 1 Ba-Korinthe 9:​26.) Bo-ramatswele ba bogologolo ba be ba tatetša matswele le manakailana a bona ka marala a mokgopa. Marala a ka ba a bile a okeditšwe ka “morodi, masenke goba ditsekana tša tšhipi, tšeo di bego di tšweletša dikgobadi tše kotsi go bo-ramatswele.” Dipapadi tše bjalo tše sehlogo di be di baka go phulega ga madi, ka dinako tše dingwe di baka le lehu.

Lega go le bjalo, Bakriste ba ba-Hebere ba be ba e-na le mehlala e lekanego ya bahlanka ba botegago ba Modimo bao ba ilego ba tlaišega le go swarwa ga sehlogo, le go fihla ntlheng ya go hwa, “ntwa ya madi.” Ela hloko taba e dikologilego yeo go yona Paulo a ilego a lebiša tlhokomelo go seo babotegi ba mehleng ya kgale ba ilego ba lebeletšana le sona:

“Ba thumilwe ka mafsika, ba hlokofatšwa, ba sêxakanywa, ba bolawa ka dithšoša, ba nênêra bà apere dikobô tša dinku le dipudi, è le badiidi le bahlaki le bahlokofatšwa.” Ka morago ga moo, Paulo o ile a gatelela Mophethi wa tumelo ya rena, Jesu gore: “E a kxôtleletšexo [kota ya tlhokofatšo, NW], a dumêla xo xobošwa, a kxôna xo y’o dula ka letsoxong le letona la sedulô sa boxoši bya Modimo.”—Ba-Hebere 11:​37; 12:2.

Ee, ba bantši ba ile ba “lwa ntwa ya madi,” e lego, go fihla ntlheng ya go hwa. Ntwa ya bona e be e le se se fetago ntwa ya ka gare malebana le sebe sa go hlaelela tumelo. E be e le ba botegago ka tlase ga kgobošo e šoro ya ka ntle, ba boloka potego ya bona go fihlela lehung.

Ba bafsa ka phuthegong ya Jerusalema, mohlomongwe ka go ba Bakriste ka morago ga tlaišo e šoro ya nakong e fetilego ba be ba fokoditše lebelo, ga se ba ka ba lebeletšana le diteko tše bjalo tše feteletšego. (Ditiro 7:​54-60; 12:​1, 2; Ba-Hebere 13:7) Lega go le bjalo, gaešita le diteko tše nyenyane di be di nyamiša ba bangwe ba bona go tšwela pele ka phadišano; ba be ba ‘lapa dipelo gomme ba lesetša.’ (Ba-Hebere 12:3) Ba be ba swanetše go dira tšwelopele go fihla ba godile ka mo go lekanego. Seo se be se tla aga bokgoni bja bona bja go kgotlelela —selo le ge e le sefe seo se bego se ka tla, gaešita le ge se be se ka akaretša go gobošwa mmeleng go fihla ntlheng ya gore ba hwe.Ba-Hebere 6:1; 12:​7-11.

Bakriste ba bantši mehleng yeno ba ‘lwele ntwa ya madi,’ ba tlaišwa ka baka la gore ba be ba ka se kwanantšhe Bokriste bja bona. Go e na le go tšea mantšu a Paulo go Ba-Hebere 12:4 e le sebaki sa tšhošetšo, re ka a tšea e le a bontšhago bokgole bjo ka bjona re ka ikemišetšago go bo fihlelela go dula re botegela Modimo ka go se kwanantšhe. Ka morago lengwalong le swanago le le yago go ba-Hebere, Paulo o ngwadile gore: “A re leboxeng ka xo dirêla Modimo ka mo xo mo kxahlaxo, ka xo Mo xodiša le xo mmoifa.”—Ba-Hebere 12:​28.