Delphine yo go boletšwego ka yena sehlogong se se fetilego o re dipelaelo tša gagwe di be di mo dira gore a nyake go ipolaiša bjala. Beibele ga e ganetše go nwa bjala ka tsela e lekanetšego, eupša e re: “O se ke wa ba gare ga bao ba nwago beine kudu.” (Diema 23:20) Go nwa kudu go dira gore batho ba lwale kudu, go senya ditswalano e bile go baka mahu a dimilione ngwaga le ngwaga. Bontši bja mathata a a be a ka phengwa ge nkabe batho ba latela keletšo e bohlale ya Beibele.

Delphine o ile a e latela. Ga bjale o re: “Ke ile ka lemoga gore bjala bo be bo sa fediše dipelaelo tša ka. Ke ile ka diriša bohlale bjo bo hwetšwago lengwalong la Bafilipi 4:6, 7 leo le rego: ‘Le se ke la belaela ka selo, eupša dilong tšohle tsebišang Modimo.’ Bošegong bjo bongwe le bjo bongwe ge ke be ke ikwa ke nagana kudu e bile ke na le dipelaelo tše dintši, ke be ke rapela Jehofa. Ke be ke mmotša ka maikwelo a ka ka moka go akaretša a kgalefo, go kwa bohloko le go hloka kholofelo. E bile ke be ke mo kgopela gore a nthuše go hwetša ditsela tšeo di ka dirago gore ke be le kholofelo bophelong. Mesong ke be ke kgonthišetša gore ga ke sa ikwa ka tsela yeo. Mokgwa woo wa go rapela o nthušitše gore ke dule ke nagana ka dilo tšeo ke nago le tšona go e na le go nagana ka tšeo ke se nago tšona. Ke ile ka dira phetho ya go tlogela bjala. Ka ge ke be ke tšea khutšo yeo ke bego ke e hweditše e le bohlokwa, ke be ke se sa nyaka e ntahlegela.”

Boitshwaro bjo bobe ke e nngwe ya dilo tše dikgolo tšeo di bakelago batho bohloko le manyami. Eupša melao ya motheo ya Beibele e ka re thuša go phema tše dingwe tša dibaki tšeo tše dikgolo—ka mohlala, go bapala ka lerato le go bogela diswantšho tša batho bao ba sa aparago. Lesogana le lengwe leo le bitšwago Samuel le re: “Go be go le bonolo go bapala ka lerato. Ka dinako tše dingwe ke be ke ikwa gore ga ke kgahlwe ke kgarebe e itšego eupša o hwetše gore yona e a nkgahlegela, gomme seo se be se mpea boemong bja go bapala ka lerato.” Samuel o ile a lemoga gore gantši o be a pharwa ka molato wa gore o bapetše ka lerato, le ge a be a sa dire seo ka maikemišetšo gomme mafelelong seo se ile sa mo dira gore a bapale ka lerato ka boomo. Eupša mokgwa woo o ile wa mo tshwenya. Ga bjale o re: “Mokgwa woo o be o le kotsi ka gobane o be o dira gore ke be le boithati.”

Samuel o ile a bala sehlogo seo se ngwaletšwego bafsa wepesaeteng ya jw.org. Le gona o ile a naganišiša ka lengwalo la Diema 20:11, leo le rego: “Mošemane o ipontšha ka ditiro tša gagwe ge e ba modiro wa gagwe o sekile e bile o lokile.” Seo se ile sa mo thuša bjang? Samuel o ile a lemoga gore mokgwa wa gagwe wa go bapala ka lerato o be o sa seka e bile o sa loka. Ga bjale o re: “Ke ithutile gape gore mofsa yoo a bapalago ka lerato o hlagolela dika tšeo di tlo mo dirago gore e be molekane yo mobe lenyalong. Ke ile ka thoma go ipotšiša gore mosadi yo ke tla bego ke mo nyetše o be a tla ikwa bjang ge a mpona ke bapala le mosadi yo mongwe ka lerato. Seo se ile sa dira gore ke lemoge gore mokgwa woo o kotsi. Taba ya gore mokgwa woo o bonolo ga e re gore o lokile.” Samuel o ile a fetoga. Go phema go bapala ka lerato go mo thušitše gape gore a pheme go itshwara gampe.

Antonio o be a le kotsing e kgolo ya go wela boitshwarong bjo bobe: O be a lemaletše go bogela diswantšho tša batho bao ba sa aparago. Le ge a be a nyetše mosadi yo a bego a mo rata kudu, o be a sa kgone go kgaotša mokgwa woo. O re go nagana ka lengwalo la 1 Petro 5:8 go tloga go mo thušitše kudu. Lengwalo leo le re: “Dulang le hlaphogetšwe, le phakgame. Lenaba la lena Diabolo o sepelasepela go swana le tau e rorago, a nyaka yo a kago go mo metša.” Antonio o hlalosa ka gore: “Diswantšho tša batho ba sa aparago di gohle, gomme diswantšho tšeo di ka dula monaganong. Ruri temana yeo e nthušitše go nagana ka yoo a tlogago a bakile diteko tše. Ke ile ka swanelwa ke go ithuta go gopola ka pela gore diswantšho tšeo tša batho ba sa aparago di tšwa go Diabolo. Ga bjale ke a tseba gore ke Jehofa feela yo a ka nthušago gore ke ‘dule ke hlaphogetšwe le go phakgama,’ e le gore ke kgone go lwantšha mekgwa yeo monaganong wa ka, pelong ya ka le lenyalong la ka.” Antonio o ile a hwetša thušo yeo a bego a tloga a e nyaka gomme mafelelong a kgona go tlogela mokgwa wa gagwe o mobe. Sona seo se mo thušitše go phema le mathata a magolo.

Ruri Beibele e nea keletšo e šomago yeo e ka re thušago go phema mathata a magolo. Eupša go thwe’ng ka mathata ao a šetšego a tsemile medu e bile go bonala a ka se tloge? Anke re boneng kamoo Lentšu la Modimo le ka re thušago ka gona go lebeletšana le mathata a bjalo.