NAGANA o sepela tseleng ya leswiswi mantšiboeng a mangwe. Le ge e le kgale letšatši le sobetše, ga o ikwe o timetše ka gobane o swere thotšhe e bogale yeo e tla go thušago. Ge o bonega fase o kgona go bona moo o gatago gona. Le gona ge o bonega kua pele, lebone la yona leo le phadimago le kgona go go bontšha tsela gabotse.

Beibele e swana le thotšhe yeo ka ditsela tše itšego. Ka ge re bone dihlogong tše di fetilego, Lentšu la Modimo le ka re thuša go lebeletšana le seo se lego ka pele ga rena, e lego mathata ao re kopanago le ona letšatši le letšatši lefaseng le leo le hlakahlakanego. E bile Beibele ga e dire seo fela. E re nea le pono e phadimago ka bokamoso, gomme seo se re thuša gore re bone le go latela tsela yeo e išago lethabong le kgotsofalong tša ka mo go sa felego. (Psalme 119:105) E dira seo bjang?

A re boneng ditsela tše pedi tšeo ka tšona Beibele e re fago kholofelo ka bokamoso: 1 E dira gore re tsebe gore re phelela’ng, e bile 2 e re ruta gore re ka aga bjang segwera sa ka mo go sa felego le Mmopi wa rena.

Beibele e nea keletšo e ka botwago mabapi le kamoo re ka lebeletšanago le mathata a rena, eupša ga se puku feela ya go nea batho dikeletšo. Beibele ga e re kgothaletše go hlwa re nagana kudu ka mathata a rena, go e na le moo e re ruta gore re tshwenyege ka batho ba bangwe. Re tla tseba gore re phelela eng ge re ka dira bjalo.

Ka mohlala, ela hloko molao wa motheo wa Beibele o rego: “Go na le lethabo le legolo go neeng go feta go amogeleng.” (Ditiro 20:35) Na o sa gopola la mafelelo ge o be o thuša motho ka dilo tšeo a di hlokago? Goba mohlomongwe ka ge o ile wa leka ka gohle go theetša ge mogwera wa gago a be a go ntšhetša sa mafahleng? Na ga se wa ikwa o kgotsofetše ka morago ga gore motho yo mongwe a thabe ka baka la seo o mo diretšego sona?

Re thaba kudu ge re fana ntle le go letela se sengwe ka morago. Mongwadi yo mongwe o itše: “Go bonagala go sa kgonege gore o ikgafe ntle le go hwetša  selo sa go feta seo o fanego ka sona, le ge e le gore o dirile seo o sa nagane ka go hwetša moputso le ge e le ofe.” Eupša ge re dira sohle seo re ka se kgonago, kudukudu bakeng sa bao ba sa kgonego go itirela selo, re hwetša moputso. Re bontšha gore re tshwenyega ka batho ba bangwe. Ka gona, re šoma kgauswi le Mmopi, yo a lebelelago ditiro tšeo tša botho e le go adima yena. (Diema 19:17) O tšeela godimo ditiro tšeo re di direlago batho ba tlasana, e bile o tshepiša go re bušetša ka bophelo bjo bo sa felego lefaseng la paradeise. Ruri yeo ke kholofetšo e kgahlišago kudu ka bokamoso!—Psalme 37:29; Luka 14:12-14. *

Go feta tšohle, Beibele e re ruta gore ge re rapela Modimo a nnoši wa therešo, e lego Jehofa, re tla tseba gore re phelela eng. Lentšu la gagwe le re kgothaletša gore re mo tumiše, re mo godiše le go mo theetša, ka ge a swanelwa ke seo. (Mmoledi 12:13; Kutollo 4:11) Ge re dira bjalo, re lemoga seo se kgahlišago le seo re ka naganišišago ka sona: Ge e le gabotse, re kgahliša Mmopi wa rena. Jehofa o re lopa ka gore: “Hlalefa gomme o thabiše pelo ya ka.” (Diema 27:11) Nagana feela—ge re dira diphetho tšeo di theilwego melaong ya motheo yeo e lego ka Beibeleng, re thabiša pelo ya Tatago rena yo lerato wa legodimong. Ka baka la’ng? Ka gobane o a re hlokomela e bile o nyaka gore re holege ka go latela tlhahlo ya gagwe. (Jesaya 48:17, 18) Ge e le gabotse, na go na le morero o mongwe o fetago wa gore re rapele Mmuši wa legohle le go phela ka tsela yeo e thabišago pelo ya gagwe?

Gape Beibele e re ruta gore re gwerane le Mmopi wa rena. Mangwalo a re: “Batamelang Modimo gomme o tla le batamela.” (Jakobo 4:8) Ka dinako tše dingwe, re ka ipotšiša ge e ba go kgonega gore re gwerane le Mmopi Ramatlaohle. Eupša Beibele e re kgonthišetša gore ge e ba re ‘tsoma Modimo,’ re tla “mo hwetša e le ka kgonthe” ka gobane “ga a kgole le yo mongwe le yo mongwe wa rena.” (Ditiro 17:27) Keletšo ya Beibele ya gore re be bagwera ba Modimo e tloga e le bohlokwa bakeng sa bokamoso bja rena. Ka tsela efe?

Nagana ka se: Le ge re ka leka ka gohle, ga go le o tee wa rena yo a ka kgonago go fenya lenaba la rena le legolo, e lego lehu. (1 Bakorinthe 15:26) Lega go le bjalo, Modimo ke wa ka mo go sa felego. A ka se tsoge a hwile, gomme o nyaka gore bagwera ba gagwe le bona ba phele ka mo go sa felego. Beibele e re diriša mantšu a bonolo eupša e le a kgahlišago go re botša seo Jehofa a se nyakago bakeng sa bao ba mo tsomago. E re: “Anke [le] phele ka mo go sa felego.”—Psalme 22:26.

O ka gwerana bjang le Modimo ka mo go sa felego? Tšwela pele o ithuta ka yena ka go bala Lentšu la gagwe e lego Beibele. (Johane 17:3; 2 Timotheo 3:16) Mo kgopele gore a go thuše go kwešiša Mangwalo. Beibele e re kgonthišetša gore ge e ba re ‘tšwela pele re kgopela Modimo’ bohlale ka go tšwa pelong, o tlo re nea bjona. * (Jakobo 1:5) Sa mafelelo ke gore o katanele go diriša seo o ithutago sona gomme o dumelele Lentšu la Modimo gore e be “lebone dinaong tša [gago]” le “seetša tseleng ya [gago]”—gona bjale le ka mo go sa felego.—Psalme 119:105.