1-2. Re tlo ithuta’ng sehlogong se?

KA DINAKO tše dingwe re ka nagana kamoo bophelo e lego bjo bokopana le kamoo bo tletšego ka mathata. (Jobo 14:1) Seo se ka fela se re nyamiša. Bahlanka ba bangwe ba Jehofa ba nakong e fetilego ba ile ba ikwa ka tsela yeo. Ba bangwe ba bona ba be ba nyaka le go hwa. (1 Dikg. 19:2-4; Jobo 3:1-3, 11; 7:15, 16) Eupša ka mehla Jehofa o ile a ba kgothatša le go ba matlafatša. Mehlala ya bona e ile ya ngwalwa ka Beibeleng gore re kgone go e bala le gore e re kgothatše.—Baroma 15:4.

² Sehlogong se re tlo ithuta ka ba bangwe ba bahlanka ba Jehofa bao ba ilego ba kgotlelela mathata ao a bego a ba nyamiša. Re tlo ithuta ka Josefa morwa wa Jakobo, Naomi wa mohlologadi le ngwetši ya gagwe Ruthe, Molefi yo a ngwadilego Psalme 73 le moapostola Petro. Jehofa o ile a ba matlafatša bjang? Rena re ka ithuta’ng mehlaleng ya bona? Dikarabo tša dipotšišo tše di tla re kgodiša gore “Jehofa o kgauswi le ba dipelo tše di robegilego,” e bile “o phološa ba meoya e nyamilego o šoro.”—Ps. 34:18.

3-4. Ke’ng seo se ilego sa diragalela Josefa ge e be e sa le lesogana?

³ Josefa o be a na le mengwaga e ka bago e 17 ge a be a lora ditoro tše pedi tšeo di bego di etšwa go Modimo. Ditoro tšeo di be di bontšha gore ka letšatši le lengwe Josefa e be e tlo ba yo bohlokwa e bile lapa la gabo le be le tlo mo hlompha. (Gen. 37:5-10) Eupša ka moragonyana ga gore a lore ditoro tšeo, o ile a welwa ke mathata. Ka nako yeo bana babo ba be ba sa mo hlomphe le gatee. Ba ile ba mo rekiša ya ba lekgoba. Ka morago ga nako e itšego, o ile a ba lekgoba ntlong ya mohlankedi yo mogolo wa Egipita e lego Potifara. (Gen. 37:21-28) Bophelo bja Josefa bo  ile bja fetoga ka ponyo ya leihlo. O be a se sa dula gae le tatagwe yo a bego a mo rata. E be e le lekgoba kua Egipita, a šomela monna yo a bego a sa tsebe Jehofa.—Gen. 39:1.

⁴ Dilo di ile tša mpefala le go feta ge mosadi wa Potifara a latofatša Josefa ka maaka a gore o be a nyaka go mo kata. Potifara ga se a ka a nyaka go tseba ge e ba seo ke nnete. O ile a lahlela Josefa kgolegong moo a ilego a tlengwa ka ditšhipi. (Gen. 39:14-20; Ps. 105:17, 18) Ka ge Josefa e be e sa le lesogana, re ka ipotšiša gore o ile a ikwa bjang ge a be a latofatšwa ka gore o be a nyaka go kata mosadi wa Potifara. Maaka ao a ka ba a ile a dira gore batho ba bolele dilo tše mpe ka Modimo wa Josefa e lego Jehofa. Ruri Josefa o be a na le mabaka a kwagalago a gore a ikwe a nyamile!

5. Josefa o ile a thušwa ke’ng gore a se ke a dula a nyamile?

⁵ Ge Josefa e be e sa le lekgoba e bile a le kgolegong, go be go se na seo a ka se dirago go fetoša boemo bjo a bego a le go bjona. O ile a thušwa ke’ng gore a se ke a dula a nyamile? O ile a dira mešomo ka moka yeo a bego a abetšwe go e dira go e na le gore a dule a naganne ka dilo tšeo a ka se kgonego go di dira. Sa bohlokwa le go feta, Josefa o be a dula a nyaka go kgahliša Jehofa. Ka baka leo Jehofa o ile a šegofatša dilo ka moka tšeo Josefa a bego a di dira.—Gen. 39:21-23.

6. Josefa a ka ba a ile a kgothatšwa bjang ke ditoro tšeo a kilego a di lora?

⁶ Josefa a ka ba a ile a kgothatšwa gape ke ditoro tšeo a kilego a di lora tšeo di bego di etšwa go Jehofa. Di ile tša mmontšha gore o be a tla bona ba gabo gape le gore maemo a gagwe a be a tla kaonefala. Seo se ile sa direga. Ge Josefa a be a na le mengwaga e ka bago e 37, ditoro tša gagwe di ile tša thoma go phethagala ka tsela yeo a bego a se a e letela!—Gen. 37:7, 9, 10; 42:6, 9.

7. Go ya ka Petro wa Pele 5:10, ke’ng seo se tlago go re thuša go kgotlelela mathata?

⁷ Seo re ka ithutago sona. Go ithuta ka Josefa  go re gopotša gore lefase ga le na toka, e bile batho ba tlo re swara gampe. Le Mokristegotee le rena a ka re kgopiša. Eupša ge re bona Jehofa e le Leswika goba Sebo sa rena, re ka se dule re kgopišegile goba ra tlogela go mo hlankela. (Ps. 62:6, 7; bala 1 Petro 5:10.) Re swanetše go gopola gore Josefa o be a na le mengwaga e ka bago e 17 ge a be a lora ditoro tšeo di tšwago go Jehofa. Se se bontšha gore Jehofa o thekga bafsa bao ba mo hlankelago. Lehono bafsa ba bantši ba swana le Josefa. Le bona ba na le tumelo go Jehofa. Ba bangwe ba bona ba išitšwe dikgolegong ba se na molato ka gobane ba sa nyake go tshela melao ya Jehofa.—Ps. 110:3.

8. Ke’ng seo se ilego sa diragalela Naomi le Ruthe?

⁸ Naomi le lapa la gagwe ba ile ba huduga ba yo dula nageng ya Moaba ka baka la tlala e kgolo yeo e bego e wetše naga ya Juda. Ge ba le nageng ya Moaba, monna wa Naomi e lego Elimeleke o ile a hlokofala ke moka a tlogela Naomi le barwa ba bona ba babedi. Ge nako e dutše e eya, barwa bao ba ile ba nyala basadi ba Bamoaba e lego Ruthe le Oropa. Ka morago ga mengwaga e ka bago e lesome, barwa ba Naomi le bona ba ile ba hlokofala ba šia basadi ba bona ba se na bana. (Ruthe 1:1-5) Re ka nagana kamoo basadi ba ba bararo ba bego ba nyamile ka gona! Ke nnete gore Ruthe le Oropa ba be ba ka nyalwa gape. Eupša ke mang a bego a tlo hlokomela Naomi yo a bego a tšofala? Naomi o ile a nyama kudu moo a ilego a ba a re: “Le se ke la mpitša Naomi. Mpitšeng Mara, ka gobane Ramatlaohle o nkwešitše bohloko kudu.” Naomi yo a bego a kwele bohloko o ile a dira phetho ya go boela Betlelehema, ke moka Ruthe a sepela le yena.—Ruthe 1:7, 18-20.

9. Go ya ka Ruthe 1:16, 17, 22, Ruthe o ile a kgothatša bjang Naomi?

⁹ Ke’ng seo se ilego sa thuša Naomi ge a be a nyamile kudu? O ile a thušwa ke lerato leo Ruthe a ilego a mmontšha lona. Ka mohlala, Ruthe o ile a bontšha gore o rata Naomi ge a be a kgetha go sepela le yena. (Bala Ruthe 1:16, 17, 22.) Ge ba fihla Betlelehema, Ruthe o ile a šoma ka thata gore yena le Naomi ba kgone go hwetša dijo goba mabele. Seo se ile sa dira gore batho ka moka ba bone gore Ruthe e be e le mosadi wa go loka e bile a šoma ka thata.—Ruthe 3:11; 4:15.

10. Jehofa o ile a bontšha bjang gore o be a na le taba le batho ba go diila ba go swana le Naomi le Ruthe?

¹⁰ Jehofa o ile a nea Baisiraele molao wo o bego o bontšha gore o be a kwela bohloko badiidi ba go swana le Naomi le Ruthe. O ile a ba botša gore ge ba buna ba tlogele tše dingwenyana gore badiidi ba kgone go di topa. (Lef. 19:9, 10) Seo se dirile gore Naomi le Ruthe ba se ke ba tšama ba kgopela dijo. Ba be ba kgona go di hwetša ba se ba di kgopela go motho.

11-12. Boase o ile a dira’ng gore Naomi le Ruthe ba thabe?

¹¹ Ruthe o be a topa mabele ka tšhemong ya monna wa mohumi yo a bitšwago Boase. Boase o ile a kgahlwa ke tsela yeo Ruthe a bego a rata Naomi le go mmotegela. Mafelelong Boase o ile a nyala Ruthe ke moka a reka le mašemo ao e bego e le a lapa la Naomi gore e tle e be bohwa bja bana ba Ruthe. (Ruthe 4:9-13) Boase le Ruthe ba ile ba ba le ngwana yoo leina la gagwe e bego e le Obede, ke moka ka morago Obede o ile a ba rakgolo wa Kgoši Dafida.—Ruthe 4:17.

¹² Re ka nagana ka tsela yeo Naomi a ilego a thaba ka yona ge a be a kukile lesea leo ke moka a leboga Jehofa ka thapelo! Naomi le Ruthe ba tlo thaba le go feta ge ba tsošwa bahung e bile ba ekwa gore Obede e ile ya ba rakgolokhukhu wa Mesia yo a bego a holofeditšwe, e lego Jesu Kriste.

13. Re ka ithuta dilo dife tše bohlokwa kanegelong ya Naomi le Ruthe?

¹³ Seo re ka ithutago sona. Ge re welwa ke mathata re ka kwa bohloko le go nyama kudu. E  bile ra bona eka go ka se tsoge gwa loka. Eupša yeo ke nako e botse ya gore re ithekge ka Jehofa le bana babo rena ka phuthegong. Ke nnete gore ga se ka mehla moo Jehofa a ka fedišago mathata a rena. Ka mohlala, ga se a ka a tsoša monna wa Naomi le barwa ba gagwe bahung. Eupša o tla re thuša gore re kgotlelele mathata a rena a diriša bana babo rena le dikgaetšedi ka phuthegong.—Die. 17:17.

14. Ke ka baka la’ng Molefi yo mongwe a ile a nyama kudu?

¹⁴ Psalme 73 e ngwadilwe ke Molefi yo mongwe. Molefi yo o ile a ba le tokelo ya go hlankela Jehofa tempeleng. Eupša go ile gwa ba le nako yeo a ilego a nyama kudu. O ile a nyamišwa ke’ng? O ile a thoma go duma batho bao ba bego ba dira dilo tše mpe le ba go ikgantšha. Ga se gore o be a nyaka go dira dilo tšeo tše mpe, eupša o be a bona eka batho bao ba phela bophelo bjo bokaone go feta bja gagwe. (Ps. 73:2-9, 11-14) Ba be ba bonagala eka ba na le dilo ka moka, mahumo, bophelo bjo bo thabišago e bile ba se na mathata. Ge Molefi yo a bona dilo tše ka moka o ile a nyama kudu ke moka mafelelong a re: “Ruri ke ga lefeela ge ke hlwekišitše pelo ya ka le ge ke hlapa diatla tša ka go bontšha gore ga ke na molato.” Go nyama moo go be go ka mo dira gore a tlogele go hlankela Jehofa.

15. Go ya ka Psalme 73:16-19, 22-25, Molefi yo a ngwadilego Psalme ye o ile a thušwa ke’ng ge a be a nyamile?

¹⁵ Bala Psalme 73:16-19, 22-25. Molefi yo o ile a “tsena ka sekgethweng se sekgethwa sa Modimo.” Ge a be a le moo ntlong ya Jehofa a na le ba bangwe bao ba hlankelago Jehofa, o ile a kgona go naganišiša le go rapela Jehofa a mmotša ka tsela yeo a bego a ikwa ka yona. O ile a thoma go bona gore tsela yeo a bego a nagana ka yona e be e le ya bošilo, e bile e be e ka dira gore a se sa ba le segwera se sebotse le Jehofa. O ile a bona gape gore batho bao ba dirago dilo tše mpe ba sepela “mo go thedimošago” e bile ba tlo fedišwa “ba sa letela.” Molefi yo o be a swanetše go lebelela dilo ka tsela yeo Jehofa a di lebelelago ka yona gore a se sa dula a nyamile le go duma bao ba dirago dilo tše mpe. Go dira bjalo go ile gwa mo thuša gore a boele a thabe. O ile a bolela gore: “Ka ntle le wena ga ke na se sengwe seo se nkgahlago mo lefaseng.”

16. Re ka ithuta’ng go Molefi yo a ngwadilego Psalme 73?

 ¹⁶ Seo re ka ithutago sona. Le ka mohla re se ke ra duma batho bao ba dirago dilo tše mpe bao ba bonagalago eka ba thabile. Lethabo la bona ke la nakwana e bile ba ka se hwetše bophelo bjo bo sa felego. (Mmo. 8:12, 13) Ge re ka ba duma re tlo nyama gomme ra se sa ba le segwera se sebotse le Jehofa. Ge o ka thoma go ikwa ka tsela yeo Molefi yo a ilego a ikwa ka yona, ekiša seo a ilego a se dira. Theetša dikeletšo tša Jehofa e bile o fetše nako le batho bao ba mo hlankelago. Ge e ba o rata Jehofa go feta selo le ge e le sefe, o tla hwetša lethabo la kgonthe. E bile o tla dula o sepela tseleng e išago “bophelong bja kgonthe.”—1 Tim. 6:19.

17. Ke dilo dife tšeo di ilego tša nyamiša Petro?

¹⁷ Moapostola Petro e be e le monna wa go ba le mafolofolo. Eupša ka dinako tše dingwe o be a bolela le go dira dilo a se a nagana pele, ke moka ka moragonyana a itshole ka seo a se boletšego goba a se dirilego. Ka mohlala, ge Jesu a be a botša baapostola ba gagwe gore o tlo tlaišwa le go bolawa, Petro o ile a mo kgalemela ka gore: “O ka se feleletše ka tsela ye le gatee.” (Mat. 16:21-23) Ke moka Jesu o ile a phošolla Petro. Ge lešaba le be le tlo swara Jesu, Petro o ile a kitimela go kgaola tsebe ya mohlanka wa moperisita yo a phagamego. (Joh. 18:10, 11) Jesu o ile a phošolla Petro gape. Lebakeng le lengwe Petro o ile a bolela ka go itshepa gore le ge baapostola ba bangwe ba ka tlogela Jesu, yena a ka se tsoge a mo tlogetše! (Mat. 26:33) Eupša Petro o be a se na sebete go ya kamoo a bego a nagana ka gona. Bošegong bjona bjoo o ile a boifa batho ke moka a gana gore o tseba Jesu ka makga a mararo. O ile a nyama kudu ke moka “a tšwela ka ntle a lla gabohloko.” (Mat. 26:69-75) O swanetše go ba a ile a ipotšiša ge e ba Jesu a ka tsoga a mo lebaletše.

18. Jesu o ile a thuša bjang Petro ge a be a nyamile?

¹⁸ Le ge Petro a be a nyamile, ga se a ka a tlogela go hlankela Jehofa. Ka morago ga go dira phošo yeo o ile a tšwela pele a hlankela Jehofa  le baapostola ba bangwe. (Joh. 21:1-3; Dit. 1:15, 16) O ile a thušwa ke’ng gore a se sa ikwa a nyamile? O ile a thušwa ke go gopola gore Jesu o ile a mo rapelela gore tumelo ya gagwe e se ke ya fela. Le gona Jesu o ile a botša Petro gore ge a šetše a itshotše a matlafatše bana babo. Jehofa o ile a araba thapelo yeo ya Jesu yeo e tšwago pelong. Ka moragonyana, Jesu o ile a iponagatša go Petro gore a mo kgothatše. (Luka 22:32; 24:33, 34; 1 Bakor. 15:5) Jesu o ile a iponagatša le go baapostola ba gagwe ka moka ka morago ga gore ba fetše bošego ka moka ba leka go rea dihlapi eupša ba se ba rea selo. Ka nako yeo Jesu o ile a nea Petro sebaka sa gore a mmontšhe gore o a mo rata. Jesu o be a lebaletše mogwera yo wa gagwe e bile o ile a mo nea modiro o mongwe.—Joh. 21:15-17.

19. Go ya ka Psalme 103:13, 14, Jehofa o re lebelela bjang ge re dira sebe?

¹⁹ Seo re ka ithutago sona. Tsela yeo Jesu a ilego a swara Petro ka yona e re bontšha gore o na le kgaugelo go swana le Tatagwe. Ka gona, ge re dira diphošo re se ke ra nagana gore Jehofa a ka se tsoge a re lebaletše. Re swanetše go dula re gopola gore ke Sathane a nyakago re nagana gore Jehofa a ka se tsoge a re lebaletše. Le gona re swanetše go dula re nagana kamoo Jehofa a re ratago ka gona le gore o tseba mafokodi a rena e bile o ikemišeditše go dula a re lebalela. E bile re swanetše go mo ekiša ge ba bangwe ba re kweša bohloko.—Bala Psalme 103:13, 14.

20. Re tlo ithuta’ng sehlogong se se latelago?

²⁰ Seo re ithutilego sona ka Josefa, Naomi le Ruthe, Molefi yo a ngwadilego Psalme 73 le Petro, se re kgonthišetša gore ka nnete “Jehofa o kgauswi le ba dipelo tše di robegilego.” (Ps. 34:18) Ka dinako tše dingwe o dumelela gore re welwe ke mathata e bile re ikwe re nyamile. Eupša ge Jehofa a re thuša go kgotlelela mathata, tumelo ya rena e tia le go feta. (1 Pet. 1:6, 7) Sehlogong se se latelago re tlo ithuta kamoo Jehofa a thušago bahlanka ba gagwe ba botegago bao mohlomongwe ba nyamišago ke mafokodi a bona goba mathata ao a ba welago.