HLAPI ye yeo e dulago lebopong e bitšwago brittle star e na le sešireletši se se makatšago bogodimong bja yona. Karolo ye ya marapo a yona a mmele e tletše dilense tšeo di ka bonwago feela ka microscope tšeo di dirago gore sešireletši sa phoofotšwana ye se be bjalo ka leihlo le legolo leo le bopšago ke mahlwana a mantši.

Ela hloko: Makasine wa Natural History o re, ge borathutamahlale ba be ba hlahloba mealo e mesesane ya marapo a hlapi ya brittle star, ba ile ba bona “dinkokomana tše sa tlwaelegago tšeo di batamelanego le tšeo di lego bjalo ka galase, tšeo e nngwe le e nngwe ya tšona e lego e tshesane go feta moriri wa motho.” Dinkokomana tše tšeo di lego bjalo ka galase, tša calcium carbonate (calcite), di ipontšhitše e le dilense tša boleng bjo bo phagamego kudu tše di ka bonwago feela ka microscope tšeo di lebišago seetša go seo se bonagalago eka ke mogalatšhika o kgonago go bona dilo wo o lego ka tlase ga mealo yeo ya marapo. Go oketša moo, dilense tšeo di na le sebopego se se swanetšego bakeng sa go tšweletša seswantšho seo se nyakegago.

Go ya ka setsebi sa dikhemikhale Joanna Aizenberg, legapi leo le nago le mešomo e mebedi la hlapi ya brittle star “le bontšha selo se bohlokwa: ka thutaphedi, dilo gantši di ka dirišetšwa mešomo e fapafapanego.”

Ka go ithuta go tšwa thutapheding ya hlapi ya brittle star, banyakišiši ba thoma mokgwa o bonolo le o sa bitšego kudu wa go tšweletša dilense tše di latelanago tšeo di ka bonwago ka microscope feela tšeo di dirilwego ka calcium carbonate. Mešomo e mmalwa ya dilense tše tša go latelana e akaretša mekgwa ya go boledišana le le kgole le kgole, moo dilense tšeo di dirišetšwago go fetišetša seetša ka gare ga dithapo tšeo di bitšwago di-optical fiber.

O nagana eng? Na marapo ao go ka thwego a a bona a mmejana wa hlapi e bitšwago brittle star a bile gona ka tlhagelelo? Goba na a hlamilwe?