Kholofelo e Kgonthišeditšwego

MO E nyakilego go ba nywaga e 2 000 e fetilego, Jesu, yo gantši a bego a bitšwa motho yo a phagamego kudu yo a kilego a phela, o ile a ahlolelwa lehu ka mo go sa lokago. Nakong ya ge a fegilwe koteng ya tlhokofatšo, sesenyi seo se bego se fegilwe kgaufsi le yena se ile sa bolela le yena ka go kwera sa re: “Xe O le Kriste, iphološê; le rena O re phološê.”

Ge a rialo, sesenyi se sengwe seo le sona se bego se fegilwe se ile sa kgalemela monna yoo sa re: “Anthe le wêna xa O boife Modimo, le xe O wetšwe ke kôtlô byalo ka Yêna? Xe e le rena xo re swanetše, xobane re dirwa se se lebanexo ditirô tša rena. Xe e le Yó, xa a ka a dira se se sa lokaxo le se tee.” Ke moka sa retologela go Jesu gomme sa kgopela ka gore: “O nkxopolê xe O e-tla ka mmušô wa xaxo.”

Jesu a fetola a re: “Ruri, ke a Xo botša lehono O tlo ba le Nna Paradiseng.”—Luka 23:39-43.

Jesu o be a na le kholofelo e kgahlišago yeo e beilwego pele ga gagwe. Moapostola Paulo o ile a lemoga tutuetšo yeo kholofelo ye e bilego le yona go Jesu ka go bolela gore: “E a kxôtleletšexo [kota ya tlhokofatšo, NW], le xe se se bexo se mo loketše e le lethabô, a dumêla xo xobošwa.”—Ba-Hebere 12:2.

 Seo se bego se akaretšwa go “lethabô” leo le bego le beilwe ka pele ga Jesu e be e le go phela gape le Tatagwe legodimong gomme mafelelong a hlankele e le Mmuši wa Mmušo wa Modimo. Go feta moo, gape o be a tla ba le lethabo la go amogela balatedi ba gagwe ba botegago le ba hlatsetšwego legodimong bao ba tla bušago le yena e le dikgoši godimo ga lefase. (Johane 14:2, 3; Ba-Filipi 2:7-11; Kutollo 20:5, 6) Ka gona, Jesu o be a bolela’ng ge a be a holofetša sesenyi seo se sokologilego gore se tla ba Paradeiseng?

Go na le Kholofelo Efe ka Sesenyi?

Monna yoo o be a sa swanelegele go buša le Jesu legodimong. Ga a akaretšwe gare ga bao Jesu a itšego ka bona: “Ba ba kxotleletšexo le Nna melekong ya-ka ké bô-lena. Xomme ke Le bea mmušô, byalo ka xe Tate a mpeile mmušô.” (Luka 22:28, 29) Lega go le bjalo, Jesu o holofeditše sesenyi gore se tla ba le yena Paradeiseng. Kholofetšo yeo e tla phethagatšwa bjang?

Monna le mosadi ba pele, Adama le Efa ba be ba beilwe ke Jehofa Modimo Paradeiseng, e lego tšhemo e kgahlišago yeo e bitšwago Edene. (Genesi 2:8, 15) Edene e be e le lefaseng, le gona Modimo o be a rerile gore lefase ka moka e be paradeise. Lega go le bjalo, Adama le Efa ga se ba kwa Modimo gomme ba ile ba ntšhwa legaeng la bona le lebotse. (Genesi 3:23, 24) Eupša Jesu o ile a utolla gore Paradeise e be e tla tsošološwa le gore e tla akaretša lefase ka moka.

Ge moapostola Petro a botšiša Jesu gore ke moputso ofe wo yena le baapostola gotee le yena ba tla o amogelago bakeng sa go mo latela, Jesu o ile a holofetša gore: “Mohla xó tl’o xo mphsafala tšohle, mohla Morwa-motho à tl’o xo dula sedulong sa letaxô la xaxwe, lena ba Le ntatetšexo Le tlo dula ditulong tše lesome le metšô e mebedi.” (Mateo 19:27, 28, mongwalo o sekamego ke wa rena.) Seo se lemogegago ke gore pegong ya Luka mabapi le poledišano ye, go e na le gore a re “xo mphsafala,” Jesu o tsopolwa a re “mehleng e tl’o xo tla [“tshepedišong e tlago ya dilo,” NW].”—Luka 18:28-30.

Ka gona, ge Jesu Kriste a dula sedulong sa gagwe sa bogoši sa letago legodimong a le gotee le bao ba tla bušago le yena, o tla hloma tshepedišo e mpsha ya go loka ya dilo. (2 Timotheo 2:11, 12; Kutollo 5:10; 14:1, 3) Ka pušo ya Kriste ya legodimong, morero wa mathomo wa Modimo wa gore lefase ka moka e be paradeise o tla phethagatšwa!

Nakong ya pušo ye ya Mmušo, Jesu o tla phethagatša kholofetšo ya gagwe go sesenyi seo se hwetšego kgaufsi le yena. O tla se tsoša, gomme monna yoo e tla ba molata wa Jesu wa lefaseng. Ka gona sesenyi se tla newa sebaka sa go fihlelela dinyakwa tša Modimo le go phela ka mo go sa felego ka tlase ga pušo ya Mmušo. Ruri re ka thaba ka baka la tebelelo yeo e theilwego Beibeleng ya go phela ka mo go sa felego Paradeiseng mo lefaseng!

Bophelo bo ka ba le Morero

Akanya ka morero wo kholofelo yeo e botse e ka re neago wona maphelong a rena. E ka re thuša gore re šireletše menagano ya rena go ditla-morago tšeo di senyago tša monagano wo o arogilego. Kholofelo yeo e ile ya swantšhwa ke moapostola Paulo le karolo ya bohlokwa ya ditlhamo tša moya. O itše re swanetše go rwala ‘kholofelo ya phološo bjalo ka kuane.’—1 Ba-Thesalonika 5:8, bapiša le NW; Psalme 37:29; Kutollo 21:3, 4.

Kholofelo yeo e matlafatša bophelo. Paradeiseng e tlago, bodutu bo tla tšeelwa sebaka ke megokgo ya lethabo ge baratiwa bao ba rategago ba tla be ba bušetšwa bophelong ke “Modimo e a kxônaxo xo tsoša le bahu.” (2 Ba-Korinthe 1:9) Ke moka tlalelo ya bofokodi bja mmele, bohloko le bogole di tla lebalwa, ka gobane ‘digole di tlo taboga bo-ka tshepe.’ Motho “nama ya gagwe e tlo boela a mphsafala go fetiša ya bofsa bja gagwe,” gomme o tlo boela “a tlo etša mola à sa le yo mofsa.”—Jesaya 35:6; Jobo 33:25, bapiša le PK.

Nakong yona yeo, ge ‘go tla be go se moagi yo a rego: Ke a babya,’ go hloka kholofelo ka baka la bolwetši bjo bo sa folego e tla fo ba selo seo se sa gopolwego. (Jesaya 33:24, bapiša le PK.) Go hloka mohola ga kgateletšego e šoro go tla fetošwa go ba “lethabô le le sa felexo.” (Jesaya 35:10) Go hloka kholofelo ka bolwetši bjo kotsi go tla nyamelela gotee le lehu ka bolona, e lego lenaba la batho la kgale.—1 Ba-Korinthe 15:26.

[Diswantšho go letlakala 18]

Dula o gopola kholofelo e kgahlišago ya lefase le lefsa la Modimo