Ekisodo 39:1-43
39 Ba tšea garane e talalerata, wulu e phepolo le garane e khwibidukhwibidu,+ ba dira diaparo tše di rokilwego gabotse tša go hlankela sekgethweng. Ba direla Arone diaparo tše kgethwa,+ go ya le ka mokgwa wo Jehofa a bego a laetše Moshe.
2 Betsalele a dira efoda*+ ka garane ya gauta, garane e talalerata, wulu e phepolo, garane e khwibidukhwibidu le linene e boletiana.
3 Ba kgatla diphaphathi tša gauta gore e be tše disesane, ke moka Betsalele a di segaganya gore e be digarane. A di logaganya le garane e talalerata, wulu e phepolo, garane e khwibidukhwibidu le linene e boletiana, e le gore a kgabiše efoda.
4 Ba direla efoda mašelana a mabedi ao a rokeletšwego magetleng ao a kopanyago karolo ya ka pele le ya ka morago.
5 Lepanta la go e tlema gore e dule gabotse+ le lona ba le dira ka garane ya gauta, garane e talalerata, wulu e phepolo, garane e khwibidukhwibidu le linene e boletiana, go ya le ka mokgwa wo Jehofa a bego a laetše Moshe.
6 Ke moka ba tšea maswika a mabedi ao a bitšwago onikisi ba a tsenya ka dilong tša go swara maswikana tša gauta. Ba ngwala maina a barwa ba Isiraele go ya le ka mokgwa woo selo sa go dira setempe se ngwalwago ka gona.+
7 Betsalele a tsenya maswika ao mašelaneng ao a rokeletšwego magetleng a efoda gore maswika ao a gopotše Modimo ka barwa ba Isiraele.+ A dira bjalo go ya le ka mokgwa wo Jehofa a laetšego Moshe ka gona.
8 A dira phaphathiana ya sehubeng,+ a e kgabiša bjalo ka efoda. E be e dirilwe ka garane ya gauta, garane e talalerata, wulu e phepolo, garane e khwibidukhwibidu le linene e boletiana.+
9 Phaphathiana yeo e be e na le mahlakore a mane ao a lekanago ge e be e hlatlagantšwe gabedi. Ba dira gore ge e hlatlagantšwe gabedi botelele bja yona e be disenthimithara tšeo e ka bago tše 20,* gomme bophara bja yona e be disenthimithara tšeo e ka bago tše 20.
10 Ba e tsenya methaladi e mene ya maswikana. Mothaladi wa pele o be o na le leswikana leo le bitšwago rubi le la topase le la emeralede.
11 Mothaladi wa bobedi o be o na le leswikana la thekoise le la safire le la jasepere.
12 Mothaladi wa boraro o be o na le leswikana la lesheme le la agate le la amethisete.
13 Mothaladi wa bone o be o na le leswikana la kirisolite le la onikisi le la jade. Mašobana ao maswikana ao a bego a tsena go ona e be e le a gauta.
14 Maswikana ao a be a latelana go ya ka maina a barwa ba Isiraele ba 12. A be a ngwadilwe ka mokgwa woo selo sa go dira setempe se ngwalwago ka gona. Leswikana le lengwe le le lengwe le be le ngwadilwe leina la yo mongwe le yo mongwe wa ba meloko e 12.
15 Mo phaphathianeng ya sehubeng ya go tsenya maswikana, ba dira ditšhaene tšeo di logilwego bjalo ka dithapo ka gauta yeo e sego ya tswakwa le selo.+
16 Ke moka, moo phaphathianeng yeo ba dira mašobana a mabedi a gauta dikhoneng tša yona tše pedi tša ka godimo.
17 Ka morago ga moo ba tsenya dithapo tšeo tše pedi tša mmala wa gauta mašobaneng a mabedi ao a lego dikhoneng tša phaphathiana yeo ya sehubeng.
18 Ba tsenya dithapo tše pedi mašobeng a mabedi ao a lego mašelaneng ao a lego magetleng a efoda karolong ya yona ya ka pele.
19 Ke moka ba dira mašobana a mangwe a mabedi a gauta mo dikhoneng tše pedi tša lešela la ka gare la phaphathiana ya sehubeng leo le lebanego le efoda.+
20 Ka morago ga moo ba dira le mašobana a mangwe a mabedi a gauta mo dikhoneng tše pedi tša lešela la ka gare la phaphathiana ya sehubeng leo le lebanego le efoda. Ba dira le mašobana a mangwe a mabedi karolong ya ka pele ya efoda, ka tlasana ga mašela a mabedi ao a lego magetleng, kgauswi le moo e kgomagantšwego gona ka godingwana ga lepanta leo le logilwego la efoda.
21 Mafelelong ba tlemelela phaphathiana yeo ya sehubeng mašobaneng a efoda ka thapo e talalerata, e le gore phaphathiana yeo e se ke ya šutha le gore e dule e le ka godingwana ga lepanta la efoda. Ba dira bjalo go ya le ka mokgwa woo Jehofa a bego a laetše Moshe ka gona.
22 Betsalele a dira seaparo sa go hloka matsogo seo se aparwago ka tlase ga efoda, a se dira ka garane e talalerata. A se dira ka mokgwa woo motho yo a logago a dirago ka gona.+
23 Seaparo seo sa go hloka matsogo se be se bulegile mo kgareng, se bulegile ka mokgwa woo seaparo sa ntwa se bulegilego ka gona. Moo se bulegilego gona, morumo wa sona wo o se dikologago o be o tiile bjalo ka seaparo sa ntwa e le gore se se ke sa gagoga.
24 Moo seaparo se bego se mennwe gona ba se kgabiša ka diswantšho tša digarenate ka go logaganya garane e talalerata, wulu e phepolo le garane e khwibidukhwibidu.
25 Ba dira le ditloloko ka gauta yeo e sego ya tswakwa le selo, ke moka ba di tsenya magareng ga diswantšho tša digarenate go dikologa moo seaparo sa go hloka matsogo se bego se mennwe gona.
26 Tloloko e nngwe le e nngwe ya gauta ba e latelanya le seswantšho sa garenate go dikologa moo seaparo sa go hloka matsogo se bego se mennwe gona. Seaparo seo se be se aparwa ke baperisita ge ba hlankela Modimo. Ba se dira go ya le ka mokgwa woo Jehofa a bego a laetše Moshe.
27 Ka morago ga moo ba direla Arone le barwa ba gagwe diaparo ka linene e boletiana,+
28 ba dira le tuku+ ka linene e boletiana, dilo tša go rwala hlogong tšeo di kgabišitšwego+ ka linene e boletiana le marokgwana a ka gare+ ka linene e boletiana.
29 Ba dira le lepanta ka go logaganya linene e boletiana, garane e talalerata, wulu e phepolo le garane e khwibidukhwibidu. Ba di dira ka mokgwa woo motho wa go loga a logago ka gona. Dilo tše ka moka ba di dira go ya le ka mokgwa woo Jehofa a bego a laetše Moshe ka gona.
30 Mafelelong ba dira tšhipi e kgethwa ya go phadima ka gauta yeo e sego ya tswakwa le selo,* gomme ba e ngwala ka mokgwa wo selo sa go dira setempe se ngwalwago ka gona, ka mantšu ao a rego: “Bokgethwa ke bja Jehofa.”+
31 Ke moka ba tsenya thapo e talalerata tšhiping yeo e le gore ba e bofelele godimo ga tuku. Ba dira go ya le ka mokgwa woo Jehofa a bego a laetše Moshe ka gona.
32 Ka gona mošomo ka moka wa taberenakeleng, e lego tenteng ya kopano, wa fela ka ge Baisiraele ba be ba dirile dilo ka moka go ya le ka mokgwa wo Jehofa a bego a laetše Moshe.+ Ba be ba dirile dilo tlwaa, go ya le ka mokgwa woo ba bego ba laetšwe ka gona.
33 Ba tliša taberenakele+ yeo go Moshe, ba tliša tente+ le ditlabakelo tša yona ka moka, e lego dihuku tša yona,+ diforeime tša yona,+ dikota tša yona,+ diphilara tša yona le maotwana a yona ao a nago le mašoba.+
34 Ba tliša selo sa yona se sekhwibidu+ sa go khupetša seo se dirilwego ka matlalo a dinku tše tona le selo sa yona sa go khupetša seo se dirilwego ka matlalo a boleta a phoofolo ya ka meetseng gotee le gareteine ya go šira Areka.+
35 Ba tliša le areka yeo e nago le maswika ao a ngwadilwego Melao ya Modimo, dikota tša yona+ le sekhurumelo sa yona.+
36 Tafola, dibjana tša yona ka moka+ le senkgwa seo se neetšwego Modimo.
37 Sehlomelamabone sa go dirwa ka gauta yeo e sego ya tswakwa le selo, mabone a sona+ ao a beilwego ka go latelana, didirišwa tša sona ka moka+ le makhura a go tšhuma mabone.+
38 Aletare+ ya gauta, makhura a go tlotša motho ge a kgethwa,+ seorelo sa go nkga bose+ le gareteine+ ya mojako wa taberenakele.
39 Aletare ya koporo,+ sefo ya yona ya koporo, dikota tša yona+ le dibjana tša yona ka moka,+ sekotlelo sa go hlapela le selo seo se bewago go sona.+
40 Digareteine tša lapa, diphilara tša lona le maotwana a diphilara tšeo ao a nago le mašoba,+ gareteine+ ya mojako wa lapa, dithapo le dipikiri tša tente ya lona+ le didirišwa ka moka tša ka taberenakeleng, e lego tenteng ya go kopana.
41 Diaparo tšeo di logilwego gabotse tša go hlankela ka sekgethweng, diaparo tše kgethwa tša moperisita Arone+ le diaparo tša barwa ba gagwe tša boperisita.
42 Baisiraele ba ile ba dira dilo ka moka go ya le ka mokgwa wo Jehofa a bego a laetše Moshe ka gona.+
43 Ge Moshe a lebelela mošomo ka moka woo ba o dirilego, o ile a bona gore ba be ba o dirile go ya le ka mokgwa wo Jehofa a bego a ba laetše ka gona. Ke moka Moshe a ba šegofatša.
