Ekisodo 30:1-38
30 “O dire aletare, e be lefelo la go fišetša diorelo. O e dire ka kota ya mohlare wa mošwana.
2 E be ya disenthimithara tšeo e ka bago tše 45 ka botelele, le bophara bja yona e be disenthimithara tšeo e ka bago tše 45. E lekane mahlakoreng ka moka a mane, gomme botelele bja yona go ya godimo e be disenthimithara tšeo e ka bago tše 89. Manaka a yona a dirwe ka kota yeo go dirilwego aletare ka yona.
3 O e pente ka gauta yeo e hlwekilego karolong ya yona ya ka godimo, mahlakoreng a yona ka moka le manakeng a yona. O e direle morumo wa gauta karolong ya ka godimo ya aletare.
4 O e direle le mekgoko e mebedi ya gauta ka tlasana ga morumo wa yona. E be ka mahlakoreng a mabedi a yona a go lebana, gore e tle e be ya go tsenya dikota tša go e rwala.
5 O dire dikota tšeo ka mošwana gomme o di pente ka gauta.
6 O bee aletare yeo pele ga gareteine yeo e lego kgauswi le areka yeo e nago le maswika ao a ngwadilwego melao ya Modimo, le pele ga sekhurumelo seo se khurumeditšego areka yeo, moo ke tlago go iponagatša go wena.
7 “Mesong e mengwe le e mengwe Arone a fiše diorelo tša go nkga bose mo go yona. A dire gore di thunye muši moo aletareng ge a lokiša mabone.
8 Ge Arone a laeta mabone ao mantšiboa* pele e eba leswiswi, a fiše seorelo. Ke seorelo seo le tlago go dula le se direla nna Jehofa go tloga gona bjale go ya pele.
9 Moo aletareng, le se ke la fiša seorelo seo se sa dumelelwago ke molao goba go neela sebego sa go fišwa goba sebego sa mabele. Le gona le se ke la tšhela sebego sa dino go yona.
10 Go tloga gona bjale go ya pele, gatee ka ngwaga, Arone a tšee a mangwe a madi a phoofolo ya go dira sehlabelo sa go lebalelwa dibe a a tšhele manakeng a aletare gore a hlwekiše aletare yeo. Aletare ke e kgethwakgethwa go nna Jehofa.”
11 Ke moka Jehofa a re go Moshe:
12 “Ka mehla ge le bala Baisiraele, yo mongwe le yo mongwe wa bona a nee nna Jehofa topollo bakeng sa bophelo bja gagwe, e le gore ke se tlo ba otla nakong ya ge ba balwa.
13 Motho yo mongwe le yo mongwe yo a balwago o swanetše go ntšha moneelo wo: Digrama tše tshela tša silifera,* gomme le kale silifera yeo le diriša tsela ya go kala ya lefelong le lekgethwa. Moneelo woo le swanetšego go o neela nna Jehofa ke digrama tše tshela tša silifera.
14 Yo mongwe le yo mongwe yo a balwago, go tloga ka wa mengwaga e 20 go ya godimo, a ntšhetše nna Jehofa moneelo.
15 Bahumi ba se ke ba ntšha moneelo o montšhi gomme badiidi ba se ke ba ntšha wa ka tlase ga digrama tše tshela tša silifera, e le gore le ntšhetše nna Jehofa moneelo gore le patelele maphelo a lena.*
16 O tšee tšhelete go Baisiraele bakeng sa go phološa maphelo a bona, gomme o e diriše go thekga dilo tšeo di dirwago ka taberenakeleng e le gore nna Jehofa ke gopole Baisiraele.”
17 Jehofa a tšwela pele a bolela le Moshe a re:
18 “O tšee koporo o dire sekotlelo sa go hlapela le selo seo se bewago go sona. O bee sekotlelo seo magareng ga taberenakele le aletare, gomme o tšhele meetse ka gare ga sona.
19 Arone le barwa ba gagwe ba hlapele matsogo a bona le maoto a bona ka go sona.
20 Ge ba tsena ka taberenakeleng ba hlape ka meetse gore ba se hwe. Ba hlape le ge ba tsena ka taberenakeleng goba ge ba batamela aletare go tlo direla nna Jehofa sebego sa go fišwa.
21 Ba hlape matsogo a bona le maoto a bona gore ba se hwe. Wo ke molao wa bona wa go ya go ile, go tloga gona bjale go ya pele e be molao wo o šomago go Arone le go ditlogolo tša gagwe.”
22 Jehofa a tšwela pele a bolela le Moshe a re:
23 “O tšee dinkgišabose tše di nkgago bose kudu tše di latelago: O tšee mira e tiilego ya dikhilograma tše tshelelago, sinamone ya go nkga bose ya dikhilograma tše tharo, semela sa go nkga bose seo se bitšwago kalamo sa dikhilograma tše tharo,
24 le dikhilograma tše tshela tša mohuta o mongwe wa sinamone.* Di kalwe go ya le ka tsela yeo dilo di kalwago ka yona lefelong le lekgethwa, le makhura a mohlware a dilithara tšeo e ka bago tše nne.
25 Ka dinkgišabose tšeo o dire makhura a makgethwa a go tlotša motho ge a kgethwa, a tswakwe gabotse kudu. E be makhura a makgethwa a go tlotša motho ge a kgethwa.
26 “O tšee makhura ao o tlotše taberenakele le areka yeo e nago le maswika ao a ngwadilwego melao ya ka.
27 O tlotše le tafola le dibjana tša yona ka moka, sehlomelamabone le didirišwa tša sona gotee le aletare ya diorelo,
28 le aletare ya dibego tša go fišwa le dibjana tša yona ka moka gotee le sekotlelo sa go hlapela le selo seo se bewago go sona.
29 O di kgethe gore di dirišetšwe go ntlhankela, gore e be tše kgethwakgethwa. Di kgwathwe feela ke motho yo e lego yo mokgethwa.
30 O kgethe Arone le barwa ba gagwe, o ba tlotše ka makhura dihlogong tša bona gore e be baperisita ba ka.
31 “O bolele le Baisiraele o re: ‘Makhura a e tla ba a makgethwa mo go nna, e tla ba a go tlotša motho ge a kgethwa melokong ya lena ka moka.
32 Batho ba se ke ba tlola ka wona, e bile le se ke la diriša metswako ya wona go dira makhura a go swana le wona. Ke selo se sekgethwa. A dule e le a makgethwa go lena.
33 Motho le ge e le ofe yo a dirago setlolo sa go swana le ona le yo a tlotšago motho yo e sego moperisita ka ona, a bolawe.’”
34 Ke moka Jehofa a re go Moshe: “O tšee dinkgišabose tše di latelago: Setlolo se se bitšwago setakite, senkgišabose se se bitšwago onika le se se bitšwago galebanume le seorelo seo se sego sa tswakwa ka selo sa go nkga bose. Ka moka ga tšona di lekane.
35 O dire seorelo ka tšona. Seorelo seo e be motswako wa dinoko, dinoko tšeo di tswakwe gabotse, di be le letswai, di se ke tša tswakwa ka selo e bile e be tše kgethwa.
36 O šile se sengwe sa sona e be lerojana, gomme o bee se sengwe sa sona pele ga areka yeo e nago le maswika ao a ngwadilwego melao ya ka yeo e lego ka taberenakeleng, e lego moo ke tlago go iponagatša go wena. Seorelo seo e be selo se sekgethwakgethwa go lena.
37 Seorelo seo o tlago go se dira ka motswako wo, le se ke la itirela sona. O dule o se tšea e le selo se sekgethwa go nna Jehofa.
38 Mang le mang yo a dirago seorelo sa go swana le sona e le ge a nyaka go ipshina ka monkgo wa sona, a bolawe.”
Mengwalo ya tlase
^ Phetolelo ya lentšu ka lentšu e re, “magareng ga mantšiboa a mabedi.”
^ Phetolelo ya lentšu ka lentšu e re, “seripagare sa shekele.” Shekele e tee e lekana le digera tše 20. Bona Dit. B14.
^ Phetolelo ya lentšu ka lentšu e re, “gore le direle maphelo a lena poelano.”
^ Phetolelo ya lentšu ka lentšu e re, “kasia.” Bona Tlhaloso ya Mantšu.
