Ekisodo 21:1-36
21 “Ye ke melao yeo o tlago go e botša Baisiraele:+
2 “Ge o ka reka lekgoba la Moheberu,+ e be lekgoba la gago ka mengwaga e tshelelago, eupša ka ngwaga wa bošupa le lokollwe ntle le go ntšha tšhelete.+
3 Ge e ba le be le se la nyala ge le be le etla go wena, le sepele le nnoši. Eupša ge e ba le na le mosadi, gona mosadi wa lona a sepele le lona.
4 Ge e ba mong wa lona a ka le nea mosadi gomme mosadi yoo a le belegela bana, mosadi yoo le bana ba gagwe e tla ba ba mong wa gagwe gomme lona le tla sepela le nnoši.+
5 Eupša ge e ba lekgoba leo le ka dulela gore: ‘Ke rata mong wa ka, mosadi wa ka le bana ba ka, ga ke nyake go lokollwa,’+
6 gona mong wa lona a le batametše kgauswi le lebati goba foreime ya lona ke moka a le phule tsebe ka nalete, e be lekgoba la gagwe bophelo ka moka, gomme Modimo wa nnete e tla ba hlatse ya seo.
7 “Ge motho a ka rekiša morwedi wa gagwe gore e be lekgoba, morwedi yoo a ka se lokollwe ka mokgwa woo makgoba a banna a lokollwago ka wona.
8 Ge e ba lekgoba leo le sa kgahle mong wa lona ebile a sa nyake go le dira yo mongwe wa basadi ba gagwe eupša a dira gore le rekwe ke motho yo mongwe, gona mong wa lona ga se a swanela go le rekišetša batho ba ditšhaba tše dingwe ka ge a le radiile.
9 Ge e ba a ka le kgethela morwa wa gagwe gore e be mosadi wa gagwe, gona a mo sware bjalo ka morwedi wa gagwe.
10 Ge e ba morwa yoo a ka nyala mosadi yo mongwe, gona morwa yoo a tšwele pele a nea mosadi wa gagwe wa mathomo yo e lego lekgoba dijo le diaparo, a be a robale le yena.*+
11 Ge e ba morwa yoo a ka se mo nee dilo tše tše tharo, gona mosadi yoo a sepele a se a patela selo, ebile a se ke a ntšha tšhelete.
12 “Motho yo a itiago yo mongwe gomme a hwa, le yena a bolawe.+
13 Eupša ge e ba motho a ka bolaya motho yo mongwe ka phošo, gona ke tla mo direla lefelo leo a ka tšhabelago go lona+ ka ge a be a sa ikemišetša go bolaya. Ka gobane nna Modimo wa nnete ga se ka thibela seo gore se se direge.
14 Ge motho a ka befelela motho yo mongwe a ba a mmolaya ka boomo,+ le bolayeng motho yoo le ge a ka tšhabela aletareng ya ka.+
15 Motho yo a itiago tatagwe le mmagwe, a bolawe.+
16 “Motho yo a tšeago motho yo mongwe ka kgang+ gomme a mo rekiša, goba a hwetšwa a mo swere,+ a bolawe.+
17 “Motho yo a rogago tatagwe le mmagwe, a bolawe.+
18 “Ge batho ba elwa gomme yo mongwe a itia yo mongwe ka leswika goba ka feisi gomme a se hwe, eupša a gobala gomme a swanelwa ke go robala mpeteng,
19 ke moka ka morago motho yoo a fola gomme a sepelasepela ka ntle a ikokotletše ka se sengwe, gona motho yo a mo iteilego a se ke a otlwa. O tla patelela feela nako yeo e senyegilego ge motho yoo a be a sa šome go fihlela ge a fodile.
20 “Ge motho a ka itia lekgoba la gagwe la monna goba la mosadi ka lepara gomme la hwela ka diatleng tša gagwe, gona motho yoo a otlwe.+
21 Eupša ge e ba lekgoba leo le ka phela letšatši letee goba a mabedi gomme ka morago la hwa, gona mong wa lona a se ke a otlwa, ka gobane o rekile lekgoba leo ka tšhelete ya gagwe.
22 “Ge batho ba elwa ke moka ba gobatša mosadi wa moimana ka phošo gomme a belega pele ga nako+ eupša gwa se be le motho yo a hwago, gona yo a mo gobaditšego a patele go ya le kamoo monna wa mosadi yoo a ka mo patedišago ka gona, a patele go ya le ka phetho ya baahlodi.+
23 Eupša ge go ka ba le yo a hwago, gona yo a mmolailego le yena a bolawe. Bophelo bo patelwe ka bophelo,+
24 leihlo ka leihlo, leino ka leino, seatla ka seatla, lenao ka lenao,+
25 go fišwa ka go fišwa, ntho ka ntho le go itiwa ka go itiwa.
26 “Ge motho a ka itia leihlo la lekgoba la gagwe la monna goba leihlo la lekgoba la gagwe la mosadi gomme a le gobatša, gona a lokolle lekgoba leo ntle le go le patediša, e le ge a patela ka baka la leihlo leo.+
27 Ge e ba a ka ntšha leino la lekgoba la gagwe la monna goba leino la lekgoba la gagwe la mosadi, gona a le lokolle e le ge a patela ka baka la leino leo.
28 “Ge poo e ka hlaba monna goba mosadi gomme a hwa, gona poo yeo e kgatlwe ka maswika,+ gomme nama ya yona e se ke ya jewa, eupša mong wa poo yeo a se ke a otlwa.
29 Eupša ge e ba poo yeo e be e tlwaetše go hlaba batho gomme mong wa yona a ile a lemošwa ka taba yeo, eupša yena a se e hlokomele ke moka ya bolaya monna goba mosadi, gona poo yeo e kgatlwe ka maswika gomme mong wa yona a bolawe.
30 Ge e ba mong wa poo yeo a ka laelwa gore a patele e le gore a se tlo bolawa, gona o swanetše go patela tšhelete yeo a laetšwego gore a e patele.*
31 Go sa šetšwe gore e hlabile mošemane goba ngwanenyana, mong wa yona a ahlolwe go šomišwa wona molao wo.
32 Ge e ba poo yeo e hlabile lekgoba la monna goba la mosadi, gona mong wa poo yeo a patele mong wa lekgoba leo ditšhelete tše 30 tša silifera, gomme poo yeo e kgatlwe ka maswika.
33 “Ge motho a ka tlogela molete o bulegile goba a epa molete gomme a se o khurumetše, ke moka poo goba tonki ya wela ka go wona,
34 gona mong wa molete woo a patedišwe.+ A patele mong wa phoofolo yeo e hwilego gomme a tšee phoofolo yeo e be ya gagwe.
35 Ge poo ya motho yo mongwe e ka gobatša poo ya motho yo mongwe gomme ya hwa, gona ba rekiše poo e phelago ke moka ba arolelane seo e rekišitšwego ka sona, le gona ba arolelane le yeo e hwilego.
36 Goba ge e ba go be go tsebja gore poo yeo e be e tlwaetše go hlaba batho eupša mong wa yona a se ke a e hlokomela, gona a patele poo ka poo gomme yeo e hwilego e be ya gagwe.
