Ekisodo 13:1-22
13 Jehofa o ile a tšwela pele a bolela le Moshe a re:
2 “Morwa yo mongwe le yo mongwe wa mathomo wa Moisiraele le mpheng yena.* Maitšibulo ka moka a batho le a diphoofolo ke a ka.”+
3 Ke moka Moshe a botša setšhaba a re: “Le gopoleng letšatši le leo le tšwilego Egepeta+ ka lona moo le bego le le makgoba, ka gobane Jehofa o dirišitše maatla a gagwe a magolo go le ntšha moo.+ Ka gona le se ke la ja selo seo se nago le komelo.
4 Le tšwa mo lehono ka kgwedi ya Abibi.*+
5 Ge Jehofa a le fihlišitše nageng ya Bakanana, Bahethe, Baamore, Bahefe le Bajebusi,+ e lego naga yeo a tshepišitšego borakgolokhukhu ba lena gore o tla le nea yona,+ yona naga yeo e elago maswi le todi ya dinose,+ lena le keteke monyanya wo ka yona kgwedi ye.
6 Le fetše matšatši a šupago le eja dinkgwa tšeo di se nago komelo+ gomme letšatšing la bošupa e be monyanya wa Jehofa.
7 Le fetše matšatši a šupago le eja dinkgwa tšeo di sa omelwago.+ Mo go lena, ga se gwa swanela go hwetšwa selo seo se nago le komelo.+ Le gona gohle moo le lego gona, go se ke gwa hwetšwa folouru yeo e dubilwego yeo e ometšwego.
8 Le gona letšatšing leo, le botše bana ba lena gore: ‘Re dira monyanya wo ka baka la seo Jehofa a re diretšego sona ge re be re etšwa Egepeta.’+
9 Tiragalo yeo e tla le gopotša seo se diregilego, gwa ba bjalo ka ge eka e ngwadilwe seatleng sa lena gotee le diphatleng tša lena,+ e le gore le tle le bolele ka molao wa Jehofa ka gobane Jehofa o le ntšhitše Egepeta a diriša maatla a gagwe.
10 Ngwaga o mongwe le o mongwe le latele molao wo ka nako ya gona.+
11 “Ge Jehofa a le fihliša nageng ya Bakanana, yeo a enetšego lena le borakgolokhukhu ba lena gore o tla le fa yona,+
12 gona le neeng Jehofa ngwana yo mongwe le yo mongwe yo motona yo e lego wa mathomo, gotee le leitšibulo le lengwe le le lengwe la phoofolo e tona yeo le nago le yona. Maitšibulo ka moka a matona ke a Jehofa.+
13 Leitšibulo le lengwe le le lengwe la tonki o le rekolle ka nku, gomme ge e ba o ka se le rekolle, gona o le kgaole molala. O rekolle le morwa wa gago yo mongwe le yo mongwe yo e lego wa mathomo.+
14 “Ge barwa ba lena ba ka le botšiša gore: ‘Ke ka baka lang le dira se?’ Le ba botše le re: ‘Ke ka gobane Jehofa o ile a diriša maatla a gagwe a magolo gore a re ntšhe Egepeta moo re bego re le makgoba.+
15 Farao o ile a thatafiša hlogo gomme a gana gore re sepele.+ Ka gona, Jehofa a bolaya maitšibulo ka moka a batho le a diphoofolo nageng ya Egepeta.+ Ke ka baka leo re direlago Jehofa sehlabelo ka phoofolo e nngwe le e nngwe e tona ya leitšibulo, le go rekolla barwa ba rena ka moka ba mathomo.’
16 Tiragalo yeo e tla le gopotša seo se diregilego, gwa ba bjalo ka ge eka e ngwadilwe seatleng sa lena gotee le diphatleng tša lena,+ ka gobane Jehofa o dirišitše maatla a gagwe go re ntšha Egepeta.”
17 Ge Farao a tlogela Baisiraele gore ba sepele, Modimo o ile a dira gore ba se sepele ka tsela yeo e fetago nageng ya Bafilisita le ge e be e le ya kgauswi, ka gobane o itše: “Ge setšhaba se lebane le ntwa, se ka itshola gore se tlogile Egepeta gomme sa nyaka go boela morago.”
18 Ka gona Modimo o ile a dira gore ba sepele ka tsela yeo e rarelago ya lešoka yeo e lego kgauswi le Lewatle le Lekhwibidu.+ Eupša Baisiraele ba tšwile nageng ya Egepeta ba rulagantšwe gabotse, go swana le dihlopha tša mašole.
19 Moshe o be a swere le marapo a Josefa ka gobane Josefa o be a dirile gore barwa ba Isiraele ba dire keno, a re: “Ruri Modimo o tla le thuša, gomme ge le tloga mo, le tšeeng marapo a ka le sepele le ona.”+
20 Ba tloga Sukothe ba yo hloma ditente tša bona kua Ethama mollwaneng wa lešoka.
21 Jehofa o be a ba eta pele mosegare a šomiša leru gore a ba bontšhe tsela,+ gomme bošego a ba bontšha tsela ka mollo gore ba kgone go sepela mosegare le bošego.+
22 Leru leo le be le sa tloge pele ga setšhaba mosegare, le mollo o be o sa tloge pele ga setšhaba bošego.+
Mengwalo ya Tlase
^ Phetolelo ya lentšu ka lentšu e re, “le mo direng yo mokgethwa.”
