Ungalikhetha Njani Ingomuso Elinepumelelo?

UNGAYIFIKELELA njani ipilo enepumelelo yamambala? Enye indlela kusebenzisa amandla ararako onawo ukucabangela iimphumela yesikhathi eside yeenqunto ozenza njenganje.

Kuyavunywa, ungakuthola kubudisi ukwenza iinqunto ezingakuzuzisa ukuphila kwakho koke. Kubayini kunjalo? Ngombana kunabantu abanengi abasibhodileko abafuna ukuthola abakufunako khonokho. Isibonelo, ungabona bona ukusebenzisa isiluleko seBhayibhili kungakusiza ukwakha ubuhlobo bomndeni obuqinileko. (Kwebe-Efesu 5:22–6:4) Kodwana ukwenza njalo, kufuze wenze isikhathi somndenakho, ubalekele igandelelo lokunikela soke isikhathi sakho emsebenzini nezokuzithabisa. Njengeengcenyeni ezinengi zokuphila, kufuze ukhethe kezokuzithabisa ezihlala isikhatjhana nepumelelo ehlala isikhathi eside. Ungawafumanaphi amandla atlhogekako bona wenze ukukhetha okuhle? Landela amagadango amane la.

1 Cabangela Iimphumela Yeenqunto Zakho

Nekufuze wenze isiqunto, cabangela iimphumela yamambala yokukhetha okwenzako. IBhayibhili iyaluleka: “Uhlakaniphile loyo obone ingozi wabhaca.” (Iziyema 22:3) Nengabe uqalisisa iimphumela, ungazizwa utjhukumiseleka bona ubalekele ikambo engaba yingozi. Ngakelinye ihlangothi, newucabangela iinzuzo zesikhathi eside zesiqunto esihle, ungaqinisa ukuzimisela kwakho kokwenza isiqunto esihlakaniphileko.

Zibuze: ‘Izokuba yini iimphumela yezenzo zami nekuphela umnyaka, itjhumi leemnyaka namtjhana iimnyaka ematjhumi amabili?’ Izowathinta njani amazizwami nepilwami? Ukukhetha kwami kuzowuthinta njani umndenami nabanye engibakhathalelako? Okuqakatheke khulu zibuze: ‘Isiqunto sami sizomthabisa uZimu na? Sizobuthinta njani ubuhlobo bami naye?’ Njengombana iBhayibhili iphefumulelwe nguZimu, izokusiza ukhethe bona yini emthabisako begodu ikulemukise ngeengozi okungenzeka awuzitjheji.—Iziyema 14:12; 2 KuThimothi 3:16.

2 Zihlolele Iinqunto Ozenzako

Kunokobana bazenzele iinqunto zabo, abanengi bamane balingise abantu abababhodileko. Kodwana indlela ethileko yokuphila angekhe iphumelele kwaphela ngombana ijayelekile. Zihlolele ngokwakho iinqunto ozenzako. Qala isibonelo sakaNatalie. * Uyahlathulula: “Bengifuna umtjhado othabisako. Kodwana indlela ebengiphila ngayo yangenza ngabona bona angekhe ngiwuthole. Ekholiji boke abangani bami bekungabatjha abahlakaniphe kwamambala. Nokho, bebasolo benza iinqunto zobudlhayela ekuphileni kwabo. Bebanande batjhentjha abasana nabantazana abathandana nabo. Njengabo, bengithandana nabasana abanengi. Ukuphila ngendlela le kwangenza ngaphatheka kumbi khulu.”

UNatalie wathoma ukufunda iBhayibhili naboFakazi BakaJehova. Uthi: “Hlangana naboFakazi, ngabona abantu abatjha abathabileko nemitjhado eqinileko. Nanyana bekungasilula kimi, kancanikancani ngatjhentjha ukuphila kwami.” Waba yini umphumela? UNatalie uthi, “Bengisolo ngifuna ukutjhada nomuntu engimthanda nengimhlonipha khulu. Ngokukhamba kwesikhathi, ngatjhada nendoda esekolweni efana neyami. Ngabona bona uZimu ungiphe ukuphila  komndeni engingazange khe ngibhudange ngabo.”

3 Cabanga Ngendlela Iinqunto Ozenza Nje Ezizolithinta Ngayo Ikusasa Lakho

Ukubalekela ukucabanga ngeemphumela yesikhatjhana, godu utlhoga umbono okhanyako wekusasa olifunako begodu nokuhlela bonyana uzolifikelela njani. (Iziyema 21:5) Ungacabangi kwaphela ngeemnyaka ema-70 namtjhana ema-80 umuntu ayiphilako. Kunalokho, zibone uthabela ikusasa elithabisako okukhulunywa ngalo eBhayibhilini.

IBhayibhili ihlathulula bona ngomhlatjelo wesihlengo kaJesu Krestu, uZimu wenza ilungiselelo bona abantu bafumane ukuphila okungapheliko. (Matewu 20:28; KwebeRoma 6:23) UZimu wathembisa bona msinyana umnqophwakhe wekuthomeni ngesintu nangephasi uzokuzaliseka. Labo abathanda uZimu bazokuba nethuba lokuthabela ukuphila okungapheliko ephasini elihle elibuyiselweko. (IRhalani 37:11; ISambulo 21:3-5) Ikusaselo lingaba ngelakho nengabe wenza iinqunto ezihlala isikhathi eside.

4 Sebenzela Ukufikelela Iimnqophwakho

Khuyini ongayenza bona ube yingcenye yekusasa elithenjisiwekwelo? Thoma ngokungenisa ilwazi ngoZimu. (Jwanisi 17:3) Ilwazi elinembileko leBhayibhili lizokuqinisekisa bona iinthembiso zakaZimu ngekusasa zizokuzaliseka. Ikholo elinjalo lizokuqinisa bona wenze nanyana ngimaphi amatjhuguluko atlhogekako bona wamukelwe nguZimu.

Cabangela okuhlangabezanwe nakho kwakaMichael. Uyalandisa: “Ngathoma ukudakwa nokusebenzisa iindakamizwa nengineemnyaka eli-12. Bengiyilunga lesiqhema seenlelesi begodu ngicabanga bona ngizokufa ngingakayihlanganisi iimnyaka ema-30. Ukusilingeka kwami nokuhlangahlangana kwangenza ngalinga kanengana ukuzibulala. Bengicabanga bona kukhona ukuphila okungcono, kodwana akhenge ngikuthole.” UMichael nekasesikolweni samabanga aphakamileko, umnganakhe wathoma ukufunda iBhayibhili naboFakazi BakaJehova. UMichael naye wavuma ukufundelwa.

Lokho uMichael akufunda eBhayibhilini kwatjhentjha indlela ebekaqala ngayo ikusasa. “Ngafunda bona esikhathini esizako iphasi lizokubuyiselwa eparadeyisini nokobana abantu bazokuphila ngokuthula, bangatshwenywa lilitho. Ngathoma ukubona lokho njengekusasa lami. Ukwakha ubuhlobo obuhle noJehova kwaba mnqophwami. Nokho ngezinye iinkhathi bengibhalelwa ukuthabisa uJehova. Ngitjho nangemva kokuthoma ukufunda iBhayibhili, ngadakwa iinkhathi ezimbalwa. Godu ngalala nomntazana.”

UMichael wakuhlula njani ukuhlulekokho begodu watjhugulula ukuphila kwakhe ngokuphumelelako? Uthi: “Umuntu ongifundela iBhayibhili wangikhuthaza bona ngifunde iBhayibhili qobe langa begodu ngizihlanganise nabanye abafuna ukuthabisa uZimu. Ngatjheja bona abangani bami abalelesako basesenomthelela kimi. Nanyana besele bafana nabantu bekhaya kimi, ngahlukana nabo.”

UMichael wazenzela iimnqopho yesikhatjhana nezinto eziza qangi okwamsiza ukufikelela iimnqopho yesikhathi eside wokuvumelanisa ukuphila kwakhe neenkambisolawulo zakaZimu. Nawe ungenza okufanako. Tlola phasi kokubili umnqophwakho wesikhathi eside namagadango azokusiza bona uwufikelele. Hlanganyela iimnqophwakho nalabo abazokusekela, begodu bameme bona bagade ituthukwakho.

Ungakutshwilisi ukufunda ngoZimu nokusebenzisa isinqophiso sakhe ekuphileni kwakho. Thatha amagadango wokwakha ithando lakho ngoZimu neLizwi lakhe iBhayibhili njenganje. Lihlathulula umuntu osebenzisa iinkambisolawulo zeBhayibhili, iLizwi lakaZimu lithi: “Uyaphumelela kikho koke akwenzako.”—IRhalani 1:1-3.

[Umtlolo waphasi]