Ukwenza Isikhathi Sokutaditjha Sithabise Khudlwana Begodu Sizuzise

Singalifumana njani ithabo elingeziweko ekutaditjheni iBhayibhili? Singazenza njani iinkhathi zethu zokufunda zizuzise khudlwana? Akhe sicabangele ngokurhunyeziweko amagadango amathathu aqakathekileko azosisiza sizuze khudlwana esifundweni sethu seBhayibhili somuntu mathupha.

1 THANDAZA: Igadango lokuthoma okufuze ulithathe kuthandaza. (Rha. 42:8) Kubayini? Kufuze siqale ukufunda iLizwi lakaZimu njengengcenye yokukhulekela kwethu. Ngalokho, kufuze sibawe uJehova asisize sibe sebujamweni bomkhumbulo obufaneleko begodu asiphe umoyakhe ocwengileko. (Luka 11:13) UBarbara osele anesikhathi eside asithunywa sevangeli uthi: “Ngaso soke isikhathi ngiyathandaza ngaphambi kobana ngifunde namtjhana ngitaditjhe iBhayibhili. Ngemva kwalokho, ngiyezwa bona uJehova unami begodu uyakusekela engikwenzako.” Ukuthandaza ngaphambi kokutaditjha kuvula ingqondo nehliziyo yethu bona zamukele inala yokudla okungokomoya okuphambi kwethu.

2 CABANGISISA: Ngebanga lokutlhayela kwesikhathi, abanye bagcina ngokumane nje balifunde kwaphela iLizwi lakaZimu. Nokho, balahlekelwa ziinzuzo ebebangazithola ekufundeni iBhayibhili. UCarlos, osele akhonze uJehova iimnyaka engaphezu kwa-50, ulemuke ukuqakatheka kokubekela eqadi isikhathi sokucabangisisa ukwenza ukutaditjha kwakhe kuzuzise khudlwana. Uthi: “Kwanjesi ngifunda amakhasi ambadlwana weBhayibhili ngesikhathi sinye—amakhasi angaba mabili ilanga ngalinye. Ngemva kwalokho ngizinikela isikhathi esinengana sokucabangisisa ngalokho engikufundileko khona ngizokufunda iimfundo eziqakathekileko.” (Rha. 77:12) Nesenza isikhathi sokucabangisisa, sithuthukisa ilwazi nokuzwisisa kwethu intando kaZimu.—Khol. 1:9-11.

3 KUSEBENZISE: Nesibona ukuqakatheka kwesenzo esithileko, siyazuza kikho. Ngokuqinisekileko lokho kuliqiniso ngesifundo seBhayibhili. UGabriel, umzalwana osesemutjha onesifundo seBhayibhili asenza qobe uthi, “Ukutaditjha kungisiza ngihlule iimraro yaqobe langa, begodu kungilungiselela nokobana ngisize abanye.” Uyangezelela: “Koke engikufundako ngilinga ukukusebenzisa ekuphileni kwami mathupha.” (Dut. 11:18; Josh. 1:8) Kwamambala, kunenala yelwazi elivela kuZimu esingalifumana begodu silisebenzise.—Iziy. 2:1-5.

UKUBUYEKEZA: Qala bona sinelungelo elingangani lokwemba elwazini esilinikelwa nguJehova, oMthombo wakho koke ukuhlakanipha! (Rom. 11:33) Ngalokho, ngesikhathi esilandelako newutaditjhako, qiniseka bona kokuthoma uyathandaza kuJehova umbawe akunikele ubujamo obufaneleko bomkhumbulo nomoyakhe ocwengileko. Ujame kancani khona uzokucabangisisa ngalokho okufundako. Godu, landelela begodu uzisebenzise ekuphileni kwakho kwaqobe langa izinto ozifundako. Newuthatha amagadango aqakathekileko la, uzokufumana bona isifundo sakho seBhayibhili sithabisa khudlwana begodu siyazuzisa.