Ezivela Ebulungelweni Lethu

Ukubulunga Izinto Zethu Eziligugu Zesikhathi Esidlulileko

ABANTU bakaJehova banelifa elingokomoya elinothe khulu. Umlando okarisako welifelo awufumaneki kwaphela eencwadini kodwana neenthombeni, ekulandiseni kwabantu mathupha, neentweni egade sisetjenziswa ekadeni ezihlobene nokukhulekela, umsebenzethu wokutjhumayela nomlando wethu. Kodwana kuzuzisa ngani ukubulunga izinto ezinjalo nokwenza irhubhululo emlandweni wethu wesikhathi esidlulileko? Nokho, iinhloko zeemndeni yakwa-Israyeli wekadeni bekufuze zazise amadodanazo iimthetho nezenzo ezirarako zakaJehova ukwenzela bona “zibeke ithemba lazo kuZimu.”—Rha. 78:1-7.

Sekusikhathi eside irhubhululo lezinto ezibulungiweko linendima ekuzalisekeni kweemnqopho kaJehova. Ngokwesibonelo, abaphikisi nebalinga ukujamisa umsebenzi etempelini eJerusalema, irhubhululo elisemthethweni lamarekhodi asebulungelweni lemilando elisehlokodorobho yamaMede i-Ekbhathana kwaveza incwadi eyakhitjhwa yiKosi uKoresi ebeyigunyaza ukwakhiwa okunjalo. (Ezra 6:1-4, 12) Ngalokho, itempeli lakhiwa kabutjha ngokuvumelana nentando kaZimu. Godu iimthombo yebulungelo yasetjenziswa mtloli weVangeli uLuka, ‘owahlolisisa ngokunembileko zoke iintwezi ngokulandelana kwazo.’—Luka 1:1-4.

ISihlopha Esibusako sinekareko edephileko emlandweni wethu ongokwezulwini. Likhuluma ngetlhogeko yokubulunga, yokutlola umlando, nokudlulisa  ilifa lethu elingokomoya, elinye ilunga leSihlopha Esibusako lathi, “Bona sazi bonyana siyaphi, kufuze sazi lapho sivela khona.” Ngebanga lalokho, kusandu kujanyiswa umnyango obizwa ngokobana yi-Writing Archives emzimkhulu wephasi loke eBrooklyn, eNew York, begodu unqotjhiswa yiKomidi Yokutlola.

“I-ALBHAMU YOMNDENETHU NEZINTO EZILIGUGU”

Ngokukhamba kwesikhathi izinto ezenzeke esikhathini esidlulileko kujayelekile bona zitjhabalale, begodu abanengi bethu bafise ngathana babulunga umlando opheleleko womndenabo. Kwanje emnyangweni we-Writing Archives, kwenziwa umsebenzi omkhulu ukwenzela bona kubulungwe begodu kutlolwe phasi ngokunotha nokukhula kwelifa lethu. Iinthombe ezibulungwe ngokuyelela eBulungelweni zingaqalwa njengengcenye ‘ye-albhamu yomndeni.’ Iincwadi zethu zokuthoma, ukulandisa kwabantu mathupha okuthabisako nezinto ezisikhumbuzo eziqakatheke khulu zihlangana kwezinto eziligugu ezibulungwe eBulungelweni. Izinto ezinjalo ‘zimagugu alilifa’ asikhanyisela ngelifa lethu elingokwezulwini begodu zisisiza bona siqale ingomuso lomndeni wethu ongokomoya ngokuqiniseka.

Sikumema bona uziqalele amaBulungelo la usebenzisa isihloko sethu esitjha esithi “Ezivela Ebulungelweni Lethu.” Sizokuvela ngeenkhathi ezithileko kumagazini ofundwako we-Sithalasokulinda. Ngokwesibonelo, kumagazini olandelako, sihlela ukugadangisa ukulandisa okuneenthombe okwenzelwe ukuphendula iimbuzo nasi: Beyiyini iKoloyana YeDawn? Yasetjenziswa bobani? Beyisetjenziswa nini, begodu ngamuphi umnqopho?

Njenge-albhamu yomndeni yeemkhumbulo, ibuthelelo eliseBulungelweni lisitjela okunengi ngathi nangabokhokho bethu abangokomoya—ngekholo nesibindi salabo abangaphambi kwethu, ngezinto ezithabisako neentjhijilo zokukhonza uBabethu wezulwini onethando nangesinqophiso sakaZimu nokusekela abantu bakhe ngokungabhalelwako. (Dut. 33:27) Siyaqiniseka bona uJehova uzoyibusisa iimzamo eragela phambili yokubulunga umlando wethu ongokomoya bona sibe munye kunanini ngaphambili begodu siqiniselwe ukwenza intando yakhe.

[Ibhoksi/Isithombe ekhasini 31]

Ukuliqalela Eduze

Nekulungiselelwa iincwadi zethu zobuKrestu, ama-DVD, nezinye izinto ezisekelwe eBhayibhilini, abatloli bethu, abagwali, abarhubhululi, nabanye basebenzisa iinsetjenziswa ezibulungiweko. Ngalokho, i-Writing Archives iyayelela begodu ithatha amagadango wamambala wokubuthelela nokubulunga izinto ezingokomlando ezivela emthonjeni enjengama-ofisi wegatja, eminyangweni yeBethel, emabandleni, ebantwini mathupha, neenhlanganweni zephasi. Cabangela ukurhunyezwa komsebenzi lo:

Ukubuthelela Nokuhlola: Izinto eziyingakajayeleki zingezelelwa qobe ebuthelelweni leBulungelo lethu. Ezinengi zazo zinikelwe namtjhana zabolekiswa ngomusa babantu mathupha iimndenabo enomlando omude wokukhonza uJehova ngokuthembeka. Ukuhlola nokumadanisa izinto ezinjalo kusiza ekukhuliseni indlela esizwisisa ngayo umlando wethu newalabo egade baphila ngeenkhathezo.

Ukuhlela Ibuthelelweli: Ibuthelelo le-Writing Archives lenziwa ziinkulungwana zezinto, ezinye zineemnyaka engaphezu kwelikhulu ubudala. Zihlukile ngokwakheka, ubukhulu nangokuqaleka begodu kufuze zihlelwe kuhle ukwenzela bona zizokusetjenziswa ngokuzako.

Ukuvuselelwa Nokubulungwa: Iincwadi ezingonakala lula nezinto egade zisetjenziswa ekadeni ziyalungiswa begodu zibulungwe kusetjenziswa iindlela zobukghwari zokuvuselela izinto. Amadokhumenti, iinthombe, izinto ezivela eendabeni, amafilimu, namarekhodi abulungwa ekhomphyutheni. Ngalokho sezingafunyanwa kwiinsetjenziswa ze-electronic ukubalekela ukusebenzisa amadokhumenti wamambala namtjhana ezinye izinto zomlando eziligugu.

Ukubulungwa Nokuzisebenzisa Godu: Izinto ezibulungiweko zibulungwe ngendlela ehlelekileko nevikelekileko ukukhandela bona zingalahleki begodu zingonakaliswa mkhanyo nomdzwela. Kwenziwa ihlelo lekhomphyutha elizokusiza ekurhubhululeni nekufumaneni izinto eziligugwezi zemlandweni wethu.

[Iinthombe ekhasini 32]

1. Isikhangiso se-“Photo-Drama of Creation.” 2. Incwadi yokutlolisela ukuthunyelwa iincwadi. 3. Ikoloyi enesipikara. 4. Isigubuzeso se-Sithalasokulinda saka-Apreli 15, 1912. 5. Imininingwana yejele ka-J. F. Rutherford. 6. Umbhobho we-WBBR. 7. I-Phonograph. 8. Isikhwama sokuthwala iincwadi. 9. Amaphuzu womuntu mathupha. 10. Ithelegramu eya ku-J. F. Rutherford.