Xikita nochi

Pampa tikitas okse menú

ITlaixpantijkauan Jehová

náhuatl del centro

¿Tleka iTlaixpantijkauan Jehová amo kichiuaj iCena toTeko ken oksekimej tlaneltokalismej?

¿Tleka iTlaixpantijkauan Jehová amo kichiuaj iCena toTeko ken oksekimej tlaneltokalismej?

Tejuan tikilnamikij imikilis Cristo ken kijtoa Biblia, tlen noijki motokayotia “isena n Toteko” (1 Corintios 11:20). Pero okseki tlaneltokalismej tlen kineltokaj uan costumbres tlen kipiaj, amo kisaj itech Biblia.

¿Tleka kichiuaj?

Tikchiuaj iCena toTeko pampa tikilnamikij tlen Jesús okichi topatka, uan ijkon tikteititiaj timotlasojkamatij (Mateo 20:28; 1 Corintios 11:24). Nin iluitl amo kichiua ayakmo ma tikpiakan tlajtlakoli. Biblia amo kijtoa techtlapojpoluiskej tla tikchiuaj iCena toTeko, kijtoa uelis techtlapojpoluiskej tla titlaneltokaj itech Jesús (Romanos 3:25; 1 Juan 2:1, 2).

¿Keski uelta kichiuaj?

Jesús okinmilui imachtijkauan ma kilnamikikan imikilis, pero amo okijto keski uelta omonekiaya kichiuaskej (Lucas 22:19). Sekimej kineltokaj moneki mochiuas sejse metstli, sejse semana, nochipa, miak uelta itech se tonal noso san keman kinekiskej kichiuaskej. Pero moneki tikmatiskej seki tlamantli.

Jesús okipeualti iCena toTeko ijkuak judíos okichiuayaj Pascua; uan seki horas satepan omikik (Mateo 26:1, 2). Amo san ye okinek ijkon kichiuas. Biblia kineskayotia imikilis Jesús ken ichkatsin tlen okikuayaj itech Pascua (1 Corintios 5:7, 8). Pascua omochiuaya sejse xiuitl (Éxodo 12:1-6; Levítico 23:5). Akinmej okichiuayaj ken Cristo itech achto siglo noijki okilnamikiayaj imikilis Cristo sejse xiuitl, uan iTlaixpantijkauan Jehová noijki tikchiuaj ijkon ken kijtoa Biblia.

¿Keman uan tlen hora kichiuaj?

Tlen Jesús okichi, amo san techpaleuia ma tikmatikan keski uelta moneki tikilnamikiskej imikilis, noijki techpaleuia ma tikmatikan keman uan tlen hora moneki tikchiuaskej nin iluitl. Ye okichi itech tonal 14, metstli nisán, xiuitl 33 satepan ijkuak yokalak Tonaltsin, ijkon ken okijtoaya calendario tlen okitekitiltiayaj hebreos (Mateo 26:18-20, 26). Tiitlaixpantijkauan Jehová noijki itech non tonal tikilnamikij imikilis Cristo uan tikchiuaj ijkon ken akinmej okichiuayaj ken Cristo itech achto siglo.

Itech tonal 14, metstli nisán, xiuitl 33 ouetski viernes, pero sejse xiuitl uelis uetsis itech okse tonal. Pampa uelis tikmatiskej keman uetsis tonal 14, metstli nisán, tiiTlaixpantijkauan Jehová tikpoaj tonal ken okipoayaj judíos ijkuak okatka Jesús, uan amo ken axkan kichiuaj judíos.

Pan uan vino

Itech nin yankuik iluitl, Jesús okitekitilti pan tlen amo okipiaya levadura uan vino chichiltik tlen omoka ijkuak okichijkej Pascua (Mateo 26:26-28). Ik non, tejuan noijki tiktekitiltiaj pan tlen amo kipia levadura uan okseki tlamantli uan tiktekitiltiaj vino fermentado, amo tiktekitiltiaj vino tlen kipia azúcar noso okseki tlamantli.

Seki tlaneltokalismej kitekitiltiaj pan tlen kipia levadura. Pero itech Biblia, levadura kineskayotia tlajtlakoli uan tlen amo kuali (Lucas 12:1; 1 Corintios 5:6-8; Gálatas 5:7-9). Ik non, pan tlen amo kipia levadura uan okseki tlamantli kuali kineskayotiaj itlalnakayo Cristo tlen amo kipia tlajtlakoli (1 Pedro 2:22). Okseki tlaneltokalismej amo kitekitiltiaj vino, kitekitiltiaj iayo uvas, amo kichiuaj tlen kijtoa Biblia. Ijkon kichiuaj pampa kijtoaj amo kuali ma tikonikan alcohol, pero Biblia amo ijkon kijtoa (1 Timoteo 5:23).

Pan uan vino amo inakayo nion ieso Jesús, san itlaj kineskayotiaj

Pan tlen amo kipia levadura uan vino chichiltik tlen tiktekitiltiaj ijkuak tikilnamikij iCena toTeko kineskayotia itlalnakayo uan ieso Cristo. Amo mokuepaj itlalnakayo uan ieso ken sekimej kineltokaj. Noijki amo moneloa ika inakayo uan ieso. Ma tikitakan tlen kijtoa Biblia itech non tlamantli.

  • Tla Jesús kinnauatiskia imachtijkauan ma konikan ieso, kinmiluijtoskia amo ma kitlakamatikan tlanauatil tlen toTajtsin Dios okitlali itech estli, ijkuak okijto amo ma kikuakan estli (Génesis 9:4; Hechos 15:28, 29). Pero nin amo kuali yetoskia, pampa Jesús amo keman kinmiluiskia amo ma kintlakamatikan tlanauatilmej tlen toTajtsin Dios okitlali itech estli (Juan 8:28, 29).

  • Tlatitlanilmej amo okonikej ieso Jesús pampa ye okijto non yoak kinokiskia, non okiteititi ayamo omikiaya (Mateo 26:28).

  • Jesús omikik san se uelta (Hebreos 9:25, 26). Tla ijkuak kichiuaskiaj iCena toTeko pan mokuepaskia itlalnakayo uan vino ieso, akinmej kikuaskiaj pan uan koniskiaj vino, yetoskia ken nochipa kimiktijtoskiaj Jesús.

  • Jesús okijto: “Ijkí xikchiwakah para nonnechilnamikiskeh”, ye amo okijto: “Ijkin xikchiuakan pampa oksepa ma nimiki” (1 Corintios 11:24).

Ken okitlajtolkuepkej sekimej tlaxelolmej itech Biblia non kichiua sekimej ma kineltokakan pan uan vino mokuepaj itlalnakayo uan ieso Jesús. Se neskayotl, itech sekimej Biblias okitlajtolkuepkej ken Jesús kijtoskia:

“Ye nin noesso” (Mateo 26:28). Pero tlen Jesús okijto uelis motlajtolkuepas ken: “Nin kijtosneki noeso” noso “nin kineskayotia noeso”. Ijkon ken nochipa okintekitiltiaya neskayomej ijkuak otlamachtiaya, noijki itech nin tlajtoli okitekitilti se neskayotl (Mateo 13:34, 35).

¿Akinmej kikuaj pan uan konij vino?

Ijkuak iTlaixpantijkauan Jehová kichiuaj iCena toTeko, amo miakej kikuaj pan uan konij vino. ¿Tleka?

Ieso Jesús okichi ma yeto yankuik tlajtolsenkaualistli, uan nin okipatkayoti tlajtolsenkaualistli tlen Jehová okichi iuan altepetl Israel (Hebreos 8:10-13). Akinmej katej itech yankuik tlajtolsenkaualistli kikuaj pan uan konij vino ijkuak kilnamikij iCena toTeko. Amo nochtin akinmej kichiuaj ken Cristo uelis ijkon kichiuaskej san “akimeh Dios okinnotski” (Hebreos 9:15; Lucas 22:20). Ninmej tlaltikpaktlakamej tlanauatiskej iuan Jesús itech iluikak. Biblia kijtoa san 144,000 kipiaskej non tlateochiualistli (Lucas 22:28-30; Apocalipsis 5:9, 10; 14:1, 3).

Amo miakej tlanauatiskej iuan Cristo, pero “senmiaktikeh tlaltikpaktlakah” nochipa tichantiskej itech Tlaltikpak (Lucas 12:32; Apocalipsis 7:9, 10). Maski akinmej tikchiaj tichantiskej itech Tlaltikpak amo tikkuaj pan nion tikonij vino, san timonechikoaj pampa tikilnamikij iCena toTeko uan ijkon tikteititiaj timotlasojkamatij pampa Jesús omikik topatka (1 Juan 2:2).

Amochtli El Espíritu Santo, la Iglesia y los sacramentos kijtoa itech página 12: “La Escritura no emplea el término ‘sacramento’: habla de ‘misterio’. [...] El Nuevo Testamento no aplica, sin embargo, el término misterio al bautismo y a la Eucaristía [celebración de la Cena del Señor]”.

Xikita amochtli The New Schaff-Herzog Encyclopedia of Religious Knowledge, volumen IV, páginas 43, 44, uan McClintock and Strong’s Cyclopedia, volumen VIII, página 836.

Xikita amochtli The New Cambridge History of the Bible, volumen 1, página 841.

Maski calendario tlen kitekitiltiaj judíos itech ninmej tonalmej kijtoa achto tonal itech metstli nisán peua ijkuak metstli selik, amo ijkon okichiuayaj itech achto siglo. Judíos itech achto siglo okimatiayaj metstli nisán opeuaya ijkuak metstli selik peua mota itech Jerusalén, nin panoa se noso seki tonalmej satepan ijkuak kisa metstli selik. Ik non, iTlaixpantijkauan Jehová amo kilnamikij imikilis Cristo ijkuak judíos kichiuaj Pascua itech ninmej tonalmej.

Xikinmita Biblias: A New Translation of the Bible, tlen okijkuilo James Moffatt; The New Testament—A Translation in the Language of the People, tlen okijkuilo Charles B. Williams; uan The Original New Testament, tlen okijkuilo Hugh J. Schonfield.