Hebreos 9:1-28

  • Kanin okiueyichiuayaj toTajtsin Dios nikan tlaltikpak (1-10)

  • Cristo okalak iluikak ika ieso (11-28)

    • Tlapaleuia mamochiua yankuik acuerdo (15)

9  Achto acuerdo* okinpiaya tlanauatilmej para kitekichiuiliskiaj toTajtsin Dios. Noijki kaltsintli kanin okiueyichiuayaj toTajtsin Dios okatka nikan tlaltikpak.  Non kaltsintli okitlajkoxelojkej ijkuak okichijkej. Achto cuarto okitokayotiayaj Santo uan ompa okatka candelabro, mesa uan pan tlen okitemakayaj ixpan toTajtsin Dios.  Pero ikuitlapan okse tsotsoli* tilauak okatka cuarto tlen okitokayotiayaj Santísimo.  Ompa okatka se kopalkaxitl de oro uan arca tlen ika omochi acuerdo.* Non arca okatka de oro uan ijtik okatka se komitl de oro tlen okipiaya maná. Noijki ijtik okatka itlako Aarón tlen oxochikiski uan temej* kanin oijkuilitokaj itlanauatiluan toTajtsin Dios.  Ipan arca okatkaj kuajkualtsitsintin querubines. Ika inmiajasuan* otlatsakuilijtokaj kanin otetlapojpoluiayaj. Pero axkan amo moneki timotlapouiskej nochi nin tlamantli.  Ijkuak otlanki okichijkej non tlamantli, teopixkej mojmostla okalakiayaj itech achto cuarto tlen okipiaya kaltsintli para kichiuaskiaj tlen omonekiaya ijkuak okitekichiuiliayaj toTajtsin Dios.  Pero sejse xiuitl, teopixki tlen otlayekanaya okalakiaya iselti itech okse cuarto. Ye nochipa okiuikaya estli tlen okitemakaya para makitlapojpoluikan uan makintlapojpoluilikan intlajtlakol oksekimej porque amo okimatiayaj tlen okichiuayaj.  Espíritu santo okiteititi amikaj uelis kalakiskia kanin kitokayotiaj Santísimo ijkuak ok okatka achto kaltsintli.  Non kaltsintli itlaj kineskayotia itech ninmej tonalmej. Nin kiteititia tlen okitetliokoliayaj uan ijkuak okinmiktiayaj yolkamej, amo kinpaleuia akinmej kitekichiuiliaj toTajtsin Dios makipiakan sepa chipauak intlalnamikilis. 10  Nochi non san omouikaya iuan tlakuali, tlen okoniayaj, ken tlatlamantli omochipauayaj uan okipajpakayaj seki tlamantli ijkon ken kijtoua tlanauatil. Nonmej tlanauatilmej okintlalijkej para seki tlamantli tlen onka nikan tlaltikpak. Uan omonekiaya kintlakamatiskej* hasta ajsis tonal tlen omoijto para moyektlalis nochi tlamantli. 11  Pero ijkuak Cristo ouala ken teopixki tlen tlayekana uan ken teopixki tlen yitechteochijtok, okalak itech kaltsintli tlen miak ipati uan tlen okachi kuali. Nin kaltsintli amo okichijkej tlakamej uan kijtosneki amo kajki nikan tlaltikpak. 12  Ye san se uelta okalak kanin kitokayotiaj Santísimo uan amo moneki oksepa kalakis. Ye okalak ika ieso uan amo okalak ika inmieso tentsomej nion ika inmieso toros. Uan ijkon sepa otechmakixti. 13  Teopixkej kinejnekij* inmieso tentsomej uan toros. Noijki intlikonexo vacas kintlaliliaj akinmej amo chipauakej uan ijkon toTajtsin Dios kinmita chipauakej. 14  Pero ieso Cristo okachi tlapaleuia. Ye amitlaj itlajtlakol uan espíritu santo tlen nochipa kajki okipaleui mamotemaka ixpan toTajtsin Dios. Ieso kichipaua totlalnamikilis uan ayakmo tikchiuaj tlen amitlaj ipati, ikinon tiktekichiuiliaj toTajtsin Dios tlen yoltok. 15  Ye tlapaleuia mamochiua yankuik acuerdo.* Ijkon akinmej okinnotski toTajtsin Dios uelis kiseliskej tlateochiuali tlen nochipa yetos ijkon ken okinmiluijkej. Ye okimiktijkej para kintlaxtlauas* uan kinmakixtis akinmej okichijkej tlen amo kuali ijkuak okatkaj imak achto acuerdo.* 16  Ijkuak ikaj kichiua se acuerdo* moneki ixpoliuis akin kichiua acuerdo.* 17  Moneki ixpoliuis uan ijkon mochiuas acuerdo.* Pero amo mochiua tla ok yoltok akin okichi acuerdo.* 18  Ikinon achto acuerdo* opejki mochiua ika estli. 19  Ijkuak Moisés okinmatilti tlanauatilmej nochtin akinmej opouiayaj itech altepetl, okonanki inmieso toros uan tentsomej. Noijki okonanki atl, ichkatsojmitl chichiltik tlen opetlantoka, hisopo* uan okitsitsikuichili rollo uan noijki okintsitsikuichili nochtin akinmej opouiayaj itech altepetl. 20  Ye okinmilui: “Nin estli tlen ika omochi acuerdo* uan toTajtsin Dios namechnauatia xiktlakamatikan”.* 21  Noijki kaltsintli okitsitsikuichili estli uan nochi tlamantli tlen ika okitekichiuiliayaj toTajtsin Dios. 22  ITlanauatil Moisés kijtoua miak tlamantli mochipaua ika estli uan toTajtsin Dios amikaj kitlapojpoluia tla amo monokia* estli. 23  Ikinon omonekiaya ika inmieso yolkamej kichipauaskej tlen kineskayotia tlen onka iluikak. Pero tlen onka iluikak kichipauaj ika tlen okachi kuali uan amo ika inmieso yolkamej. 24  Porque Cristo amo okalak itech Santísimo tlen okichijkej tlakamej uan tlen kineskayotia melauak Santísimo. Ye okalak iluikak ikinon axkan topatka kajki ixpan toTajtsin Dios. 25  Ye amo omotemakak miak uelta. Amo okichi ken teopixki tlen otlayekanaya uan okalakiaya sejse xiuitl kanin Santísimo para kitemakas estli tlen amo iaxka. 26  Tla amo ijkon kichiuaskia, monekiskia tlajyouis miak uelta desde ijkuak ayamo ikaj okatka. Pero itech ninmej tonalmej ijkuak yitlamis tlen axkan onka, ye san se uelta omonextiko uan amo moneki oksepa monextis. Ijkon kipojpolos tlajtlakoli porque ye omotemakak makimiktikan. 27  Tinochtin san se uelta tiixpoliuij pero satepan techixkomakaskej. 28  Cristo noijki san se uelta omotemakak para kiuikas intlajtlakol miakej. Ijkuak oksepa monextis, amo monextis para kipojpoloki tlajtlakoli uan kitaskej akinmej kichiaj ika nochi inyolo makinmakixtiki.

Notas

Noso “pacto”. Xikita diccionario.
Noso “tlakemitl”, “tilmajtli”.
Noso “pacto”. Xikita diccionario.
Noso “tepejximej”.
Noso “inmajtlapaluan”, “inmastikapaluan”.
Noso “kinuelkakiskej”.
Noso “kitekitiltiaj”, “kikuij”.
Noso “pacto”. Xikita diccionario.
Xikita diccionario kanin kijtoua okitlaxtla.
Noso “pacto”. Xikita diccionario.
Noso “pacto”. Xikita diccionario.
Noso “pacto”. Xikita diccionario.
Noso “pacto”. Xikita diccionario.
Noso “pacto”. Xikita diccionario.
Noso “pacto”. Xikita diccionario.
Xikita diccionario.
Noso “pacto”. Xikita diccionario.
Noso “xikuelkakikan”.
Noso “momimiloua”, “moxauania”, “motoyaua”.