1. ¿Tleka san sekan tiktekichiuiliaj Jehová?

SAPANOUA tiyolpakij tipouiskej itech ifamilia Jehová. Tikpiaj yolseuilistli uan san sekan tiktekichiuiliaj porque tikintlakamatij akinmej Jehová okintlali ma techyekanakan. Ijkuak okachi tikajsikamatij non okachi kuali san sekan tiktekichiuiliaj Jehová.

2. ¿Tlen tiknankiliskej itech nin tlamachtil?

² Itech nin tlamachtil tikitaskej ken kinyekanaj tokniuan. Tiknankiliskej: ¿Tlen tekitl kipiaj tokniuan siuamej itech tlanechikol? ¿Tokniuan tlakamej moneki kinyekanaskej tokniuan siuamej? ¿Tlayekankej moneki kinyekanaskej tokniuan ijkon ken kinyekanaj insiua uan inkoneuan? Achto ma tikitakan tlen kichiuaj tokniuan siuamej uan ken moneki tikintlakaitaskej.

3. ¿Tlen techpaleuis okachi ma tikinpatioitakan tokniuan siuamej?

³ Tikinpatioitaj tokniuan siuamej porque kuali kinmaluiaj infamilia, tetlapouiaj uan kinpaleuiaj tokniuan itech tlanechikol. Tla timokuayejyekouaj ken Jehová, Jesús uan ken okinseliaya tokniuan siuamej apóstol Pablo, okachi tikinpatioitaskej.

4. ¿Ken kiteititia Biblia Jehová kintlasojtla tlakamej uan noijki siuamej?

⁴ Biblia kijtoua Jehová kintlasojtla tlakamej uan siuamej. Itech achto siglo amo san sekimej okinmakak iespíritu santo para ma kichiuakan milagros uan ma tlajtokan itech okseki tlajtolmej (Hech. 2:1-4, 15-18). Tlapejpenalmej tlen tlanauatiskej iuan Jesús  yetoskej tlakamej uan siuamej (Gál. 3:26-29). Jehová kinkauilis tlakamej uan noijki siuamej nochipa ma yoltokan nikan tlaltikpak (Apoc. 7:9, 10, 13-15). Jesús noijki okinnauati tlakamej uan siuamej ma tetlapouikan (Mat. 28:19, 20). Itech amochtli Hechos kijtoua tlen okichi se tokni siuatl tlen omotokayotiaya Priscila. Ye uan inamik “okiyekajsikamatiltijkeh itlamachtilis Dios” se ixtlamatki tlen omotokayotiaya Apolos (Hech. 18:24-26).

5. Ijkon ken kijtoua Lucas 10:38, 39, 42, ¿ken okiteititi Jesús okintlakaitayaj siuamej?

⁵ Jesús okintlakaitaya siuamej. Ye amo okinchikoitaya ijkon ken fariseos okichiuayaj, teixpan amo inmiuan omotlapouiayaj nion inmiuan omotlapouiayaj tlen kijtoua iTlajtol toTajtsin Dios. Ijkuak Jesús omotlapoui iuan imachtijkauan tlen kijtosneki iTlajtol toTajtsin Dios noijki omotlapoui iuan siuamej (xiktlajtolti Lucas 10:38, 39, 42). * Noijki okinkauili iuan ma yakan ijkuak otetlapouijtinemia (Luc. 8:1-3). Noijki okinmilui sekimej siuamej ma kinmiluitij apóstoles okiyoliti toTajtsin Dios (Juan 20:16-18).

6. ¿Ken okiteititi apóstol Pablo okintlakaitaya tokniuan siuamej?

⁶ Apóstol Pablo okilui Timoteo ma kintlakaita siuamej. Okilui siuamej tlen yikipiaj miak xiuitl omonekiaya kinmitas ken inantsitsiuan uan ichpokamej omonekiaya kinmitas ken ikniuan (1 Tim. 5:1, 2). Maski Pablo okipaleui Timoteo ma kipia chikauak itlaneltokilis, okijto inantsin uan isitsin yejuan okimachtijkej tlen kijtoua “itlajkuilol Dios” (2 Tim. 1:5; 3:14, 15). Noijki carta tlen okintlajkuilili tokniuan tlen ochantiayaj Roma, ompa Pablo okijto okintlajpalouaya miakej tokniuan siuamej uan okijto intoka. Okimatiaya tlen tekitl okichiuayaj uan okintlasojkamatili (Rom. 16:1-4, 6, 12; Filip. 4:3).

7. ¿Tlen tiknankiliskej?

⁷ Ken yotikitakej Biblia amo kijtoua okachi inpati tlakamej uan amo siuamej. Tokniuan siuamej tetlasojtlaj uan tlapaleuiaj itech tlanechikol, tlayekankej kimatij yejuan tlapaleuiaj kuali ma mouikakan tokniuan uan san sekan ma kitekichiuilikan Jehová. Pero ok moneki tiknankiliskej nin: ¿Tleka Jehová kinnauatia tokniuan siuamej ualeua ma mokuatlakentikan? San tlakamej uelis yetoskej tlayekankej uan siervos ministeriales, ¿kijtosneki uelis kinyekanaskej tokniuan siuamej ken infamilia?

8. Ijkon ken kijtoua Efesios 5:23, ¿tleka amo nochtin tokniuan kinyekanaj tokniuan siuamej?

⁸ Amo. San Cristo kinyekana nochtin tokniuan siuamej (xiktlajtolti Efesios 5:23). Tokniuan tlakamej tlen kipiaj infamilia kinyekanaj insiua pero se telpochtli tlen yomoapolakti amo uelis kiyekanas inantsin (Efes. 6:1, 2). Tokniuan tlayekankej kinyekanaj tokniuan tlen pouij itech se tlanechikol pero amo uelis kinyekanaskej tokniuan siuamej ken yetoskia infamilia (1 Tes. 5:12; Heb. 13:17). Tokniuan siuamej  tlen ayakmo chantij iuan intatajuan, ok kintlakaitaskej pero intajtsin ayakmo uelis kinyekanas. Kintlakaitaj tokniuan tlayekankej pero ijkon ken tokniuan tlakamej, Jesús kinyekana.

9. ¿Tleka ualeua tokniuan siuamej moneki mokuatlakentiskej?

⁹ Jehová kineki itekipanojkauan ma kitekichiuilikan ken moneki, ik non okitlali Jesús ma kinyekana tokniuan tlakamej. Uan yejuan okintlali Jehová para ma tlamachtikan ijkuak timonechikouaj. Amo okintlali siuamej ijkon ma kichiuakan (1 Tim. 2:12). ¿Tleka? Porque okitlali Jesús ma kinyekana tlakamej, ijkon tokniuan tlen pouij itech tlanechikolmej kitekichiuiliskej Jehová ken moneki. Tla monekis se tokni siuatl ma kichiua tekitl tlen kichiuaj tokniuan tlakamej, Jehová kiluia ma mokuatlakenti (1 Cor. 11:4-7). * Tlen kinmiluia ma kichiuakan tokniuan siuamej amo kijtosneki amo kintlakaita, ijkon kiteititiaj kitlakaitaj Jehová uan akinmej ye okintlali ma tlayekanakan itech tlanechikolmej. Axkan ma tiknankilikan: ¿keman moneki tlayekanaskej tlakamej tla kipiaj infamilia uan tlayekankej?

10. ¿Tleka uelis mokuayejyekos se tlayekanki moneki kinnauatis seki tlamantli tokniuan tlen iuan monechikouaj?

¹⁰ Tlayekankej kitlasojtlaj Cristo uan noijki tokniuan porque Jehová uan Jesús kinkauiliaj ma kinmaluikan (Juan 21:15-17). Xamo se tlayekanki mokuayejyekoua  uelis kinyekanas tokniuan ken yetoskia intajtsin. Xamo kijtos: “Tla se tokni tlen kipia isiua iuan ikoneuan, kinnauatia seki tlamantli para uelis kinmaluis, se tlayekanki noijki uelis kinnauatis seki tlamantli tokniuan para ijkon kinmaluis”. Uan xamo sekimej tokniuan tlakamej uan siuamej noijki ijkon mokuayejyekouaj, ik non kinmiluiaj tlayekankej ma kinmiluikan tlen uelis kipejpenaskej ijkuak itlaj kinekij kichiuaskej. ¿Tlayekankej moneki kinyekanaskej tokniuan ijkon ken kinyekanaj infamilia?

11. ¿Tlen san se tlamantli kichiuaj tlakamej tlen kipiaj infamilia uan tlayekankej?

¹¹ Apóstol Pablo okijto se tlayekanki uan se teta ualeua san se tlamantli kichiuaj (1 Tim. 3:4, 5). Jehová kineki akinmej pouij itech infamilia tokniuan tlakamej ma kintlakamatikan. Noijki ijkon tokniuan ma kintlakamatikan tlayekankej (Col. 3:20). Ye kineki tlakamej tlen kipiaj infamilia uan tlayekankej ma kinpaleuikan akinmej kinyekanaj ma mouikakan iuan Jehová uan ma kintlasojtlakan. Uan ijkon ken tlakamej kinmakaj infamilia tlen moneki, noijki ijkon tlayekankej  ma kinpaleuikan tokniuan ijkuak moneki (Sant. 2:15-17). Noijki Jehová kineki ma kinpaleuikan ma kitlakamatikan itlanauatiluan uan “amaka makixpanawi itlajkuilol Dios” (1 Cor. 4:6).

12, 13. Ijkon ken kijtoua Romanos 7:2, ¿tleka tlakamej tlen kinyekanaj infamilia amo ijkon ken tlayekankej?

¹² Akinmej kinyekanaj infamilia amo kichiuaj seki tlamantli tlen kichiuaj tlayekankej. Jehová kinkauilia tlayekankej ma kinyektlalikan akinmej tlajtlakolchiuaj uan tla amo moyolkopaj kinkixtiaj itech tlanechikol (1 Cor. 5:11-13).

¹³ Jehová kinkauilia tlakamej tlen kipiaj infamilia ma kichiuakan seki tlamantli tlen tlayekankej amo uelis kichiuaskej. Tlakamej uelis kinnauatiskej infamilia seki tlamantli (xiktlajtolti Romanos 7:2). Uelis kinnauatiskej inkoneuan tlen hora moneki ajsitiuij inkalijtik uan noijki uelis kinyektlaliskej tla amo tetlakamatij (Efes. 6:1). Ijkuak ayamo kintlaliaj tlanauatilmej achto moneki motlapouiskej iuan insiua para kimatiskej tlen mokuayejyekouaj porque yejuan uan insiua “sanwel [san] se” (Mat. 19:6). *

14. (1) Ijkon ken kijtoua Marcos 10:45, ¿tleka Jehová okitlali Jesús ma kinyekana nochtin tokniuan? (2) ¿Tlen tekitl kichiua Cuerpo Gobernante? (Xikita recuadro “ Tekitl tlen kichiua Cuerpo Gobernante”).

¹⁴ Jehová okitemakak iKone, ijkon kinpaleuia tokniuan uan nochtin akinmej  tlaneltokaj itech Jesús (xiktlajtolti Marcos 10:45; Hech. 20:28; 1 Cor. 15:21, 22). Jesús omikik topatka, ik non, Jehová okikauili ma kinyekana nochtin tokniuan. Ik non, Jesús kinamiki kintlalis tlanauatilmej para nochtin ma kintlakamatikan; familias uan nochtin tokniuan (Gál. 6:2). Pero ye amo san kintlalia tlanauatilmej: techmaka tlen moneki uan techmaluia (Efes. 5:29).

15, 16. ¿Tlen mitsmachtia tlen okijto Marley uan Benjamín?

¹⁵ Tokniuan siuamej kitlakaitaj Cristo ijkuak kintlakamatij tokniuan tlayekankej. Se tokni tlen itoka Marley uan chanti Estados Unidos okijto: “Nechpaktia nikpaleuis nofamilia uan tokniuan tlen inmiuan nimonechikouaj. Ok moneki nikintlakamatis akinmej Jehová okintlali para ma techyekanakan: nonamik uan tlayekankej. Yejuan kipatioitaj tlen nikchiua, ik non, amo oui nikintlakaita”. Miakej tokniuan siuamej ijkon mokuayejyekouaj.

¹⁶ Tlayekankej kajsikamatij tlen kineki Jehová ma kichiuakan, ik non, kintlakaitaj tokniuan siuamej uan kipatioitaj tlen kichiuaj. Se tokni tlen itoka Benjamín uan chanti Inglaterra, okijto: “Nechpaleuia tlen tokniuan siuamej tlanankiliaj ijkuak timonechikouaj, ken moneki kuali timomachtiskej uan titetlapouiskej. Nikita kuali kinpaleuiaj tokniuan”.

17. ¿Tleka moneki tikintlakamatiskej akinmej Jehová okintlali ma techyekanakan?

¹⁷ Tinochtin: tlakamej, siuamej, akinmej kinyekanaj infamilia uan tlayekankej, tiyolpakij ijkuak tikajsikamatij tleka Jehová okintlali sekimej ma techyekanakan. Uan ijkon tikueyichiuaj toTajtsin Jehová (Sal. 150:6).