Xikita nochi

Tlen kiualika

 OKSEKI TLAMACHTILMEJ

¿Tleka uan keman moneki mokuatlakentis siuatl?

¿Tleka uan keman moneki mokuatlakentis siuatl?

Ijkon ken kijtoa Biblia, ¿tleka uan keman moneki mokuatlakentis siuatl? Ma tikitakan tlen Jehová okinauati tlatitlanil Pablo ma kijkuilo itech nin tlamantli. Ye techpaleuia ma tikajsikamatikan tleka ipati ma tikchiuakan san tlen kiueyichiuas toTajtsin Dios. Itech 1 Corintios 11:3-16, Pablo okijkuilo eyi tlamantli tlen moneki kitas tokni siuatl: 1) tlen tekitl kichijtos ijkuak monekis mokuatlakentis; 2) kanin yetos ijkuak kichiuas non tekitl, uan 3) tlen kiyolinia ma kitlakamati nin tlanauatil.

Tlen tekitl kichijtos. Pablo otlajto itech ome tlamantli: ijkuak motlatlaujtia uan ijkuak “kijtoa itla tlájtoli non Dios okimák” (tlaxelolmej 4 uan 5). Kuali tikmatij ijkuak timotlatlaujtiaj tikueyichiuaj Jehová. Uan axkan, ijkuak “kijtoa itla tlájtoli non Dios okimák”, kijtosneki tlamachtilistli tlen kitemakaj tlakamej uan siuamej tlen itekipanojkauan toTajtsin Dios. Ik non, ¿okijto Pablo moneki nochipa mokuatlakentiskej tokniuan siuamej ijkuak motlatlaujtiskej uan ijkuak tlamachtiskej itech Biblia? Amo. Kanin yetos uan tlen kichiuas tokni siuatl, kipaleuis kajsikamatis kox monekis mokuatlakentis.

Kanin yetos. Pablo otlajto itech ome tlamantli: ijkuak iuan ikalchanejkauan uan itech tlanechikol. Ye okijto: “Teokich ye akin kiyakana isiwa, [...] pero tla se siwatl amo mokuatlakentia  ijkuak motiotsajtsilia noso ijkuak kijtoa itla tlájtoli non Dios okimák, kipijpinatia iokich” (tlaxelolmej 3 uan 5). Itech kalchanejkej, Jehová okitlali tlakatl ma kiyekana isiua. Tla siuatl amo kitlakaitas tekitl tlen Jehová okimakak inamik, kipinatis tla kichiuas itlaj tlen san inamik kinamiki. Ma tikitakan seki neskayomej. Tla tokni moneki tlamachtis ika Biblia uan ompa kajki inamik, moneki mokuatlakentis pampa kitlakaita. Moneki ijkon kichiuas maski inamik yomoapolakti noso amo, pampa ye akin kinyekana ikalchanejkauan. * Uan tla tokni siuatl moneki motlatlaujtis, noso tlamachtis uan ompa kajki se ikone tlen yomoapolakti maski ok tsikitsin, moneki mokuatlakentis. Uan amo kichiuas pampa ikone tlayekana itech ikalchanejkauan, kichiuas pampa kiteititis kitlakaita akin yomoapolakti itech tlanechikol.

Ijkuak Pablo otlajto itech tlanechikol, okijto: “Tla aka kineki kixnamikis nin tlamachtílistli, makimati tejwah nion itlaneltokawah Dios, tikixmatih ok se tlamachtílistli” (tlaxelol 16). Itech tlanechikol san tlayekanaj tlakamej tlen yomoapolaktijkej (1 Timoteo 2:11-14; Hebreos 13:17). San tlayekankej uan siervos ministeriales kintlalia Jehová ma kimaluikan itlanechikol (Hechos 20:28). Pero ualeua uelis monekis se tokni siuatl kichiuas se tekitl tlen kinamiki kichiuas se tokni tlakatl tlen yomoapolakti. Se neskayotl, uelis monekis se tokni siuatl ma kiyekana nechikol ijkuak tetlapouitiuij, pampa amo onka se tokni tlakatl tlen uelis kichiuas nin tekitl. Noso monekis tokni siuatl kimachtis ikaj tlen nochipa yikimachtijtok uan ompa yetos se tokni tlakatl tlen yomoapolakti. * Pampa nochi nin tekitl poui itech tlamachtilistli tlen motemaka itech tlanechikol, ijkuak tokni siuatl kichiuas nin, moneki mokuatlakentis pampa ijkon kiteititis kitlakaita tlakatl.

Onka okseki tlamantli tlen ika tikueyichiuaj toTajtsin Dios itech tlanechikol kanin amo moneki ma mokuatlakenti siuatl. Se neskayotl, amo monekis mokuatlakentis ijkuak  tlanankilis itech nechikol, ijkuak tetlapouiti maski yas iuan inamik noso okse tokni tlen yomoapolakti, ijkuak kimachtis noso motlatlaujtis iuan ikone tlen ayamo moapolaktia. Pero ualeua uelis panos seki tlamantli kanin tokni siuatl amo kimatis tlen kichiuas, ijkuak ijkon kipanos moneki momachtis itech non tlamantli. * Uan maski ye yomomachti uan amo kimati tlen kichiuas, uelis mokuatlakentis ken tokni tlen moita itech tlaixkopinal.

Tlen kiyolinia. Itech tlaxelol 10 kijtoa ome tlamantli tlen kiyolinis tokni siuatl ma kitlakamati nin tlanauatil: “Moneki n siwatl mamokuatlakenti para makitakah n ángelteh milák kitlakita iokich”. Achto tlamantli tikitaj ijkuak kijtoa “makitakah” tetlakaita. Ijkuak tokni siuatl mokuatlakentia kiteititia melauak kitlakaita tlayekanalistli tlen toTajtsin Dios kinmaka tlakamej tlen yomoapolaktijkej. Ijkon kiteititia yolmelajki iuan Jehová uan kitlasojtla. Ome, kichiua “para makitakah n ángelteh”. ¿Tlen momachtiaj ángeles ijkuak se tokni siuatl mokuatlakentia?

Ángeles kuali kitaj akinmej kitekichiuiliaj toTajtsin Dios itech iluikak uan Tlaltikpak kitlakaitaj itlanauatilis. Noijki yejuan kinyolchikaua ijkuak kinmitaj tlaltikpaktlakamej tetlakamatij maski tlajtlakolejkej. Nin kinpaleuia pampa noijki moneki kitlakamatiskej Jehová, maski sekimej amo ijkon okichijkej (Judas 6). Axkan, ángeles kitaj se kuali neskayotl itech se tokni siuatl tlen kitlakamati se tokni tlakatl tlen yomoapolakti, maski tokni siuatl okachi tlamati, noso okachi ixtlamatki. Ualeua tokni siuatl uelis pouis itech tlapejpenalmej, tlen satepan  ualtlanauatis iuan Cristo. Nin tokni siuatl okachi kipias se ueyi tekitl amo ken ángeles. ¡Melauak se kuali neskayotl kitaj ángeles itech ninmej tokniuan siuamej! Se ueyi tlateochiualistli kipiaj nochtin tokniuan siuamej pampa kiteititiaj yolmelajkej uan tetlakamatij, ijkon kinmakaj se kuali neskayotl ángeles.

^ párr. 3 Se tokni siuatl amo uelis motlatlaujtis iixpan inamik, san uelis kichiuas tla inamik ayakmo ueli tlajtoa pampa kipia se kokolistli.

^ párr. 1 Se tokni siuatl amo moneki mokuatlakentis ijkuak tlamachtia iixpan se tokni tlakatl tlen ayamo moapolaktia tla amo inamik.

^ párr. 2 Pampa okachi tikmatis, xikita tlen kijtoa La Atalaya 15 de julio de 2002, itech páginas 26 uan 27, uan noijki 15 de julio de 1977, itech páginas 445 a 448.