1 Timoteo 2:1-15
2 Achto ne namechiluia ximotlatlaujtikan, xiktlajtlanilikan itlapaleuilis toTajtsin Dios uan xiktlasojkamatilikan inpatka nochtin,
2 inpatka tekiuajkej uan inpatka nochtin akinmej tlanauatiaj. Ijkon kuali matiyetokan uan amo matimotekipachokan ijkuak tikueyichiuaj toTajtsin Dios ika nochi toyolo uan timochijchikauaj tikchiuaj nochi tlamantli.
3 Porque toTajtsin Dios tlen temakixtia kita kuali nin tlamantli uan kipaktia.
4 Ye kineki nochtin mamomakixtikan uan kuali makajsikamatikan tlen melauak.
5 Porque onka san se Dios uan onka san se tlakatl tlen tlapaleuia mamochiua acuerdo* tlen toTajtsin Dios okichi inuan tlakamej. Non tlakatl ye Cristo Jesús.
6 Ye omotemakak uan okitlaxtla* tlen omonekiaya uan ijkon nochtin okinmakixti imak tlajtlakoli. Non motematiltis ijkuak ajsis tonal.
7 Ikinon toTajtsin Dios onechtlali manitetlapoui uan maniyeto apóstol para maniktematilti nin tlamantli. Ijkon manikinmachti matlaneltokakan akinmej amo judíos uan makimatikan tlen melauak. Ne nikijtoua tlen melauak uan amo nitlakajkayaua.
8 Ikinon maski san kanin nanmonechikoskej nikneki tlakamej mayetokan yolchipauakej, makinmajkokuikan inmauan ijkuak motlatlaujtiaj, amo makualanikan nion amo matlananankilikan.
9 Noijki siuamej mamoyektlakentikan uan intlaken makiteititi yejuan yolyamankej uan kuali mokuayejyekouaj.* Amo sapanoua makiyektlalikan intsonkal, amo makimotlalilikan miak oro noso perlas nion amo makimotlalilikan intlaken tlen sapanoua patio.
10 Makichiuakan tlen kuali ijkon ken moneki kichiuaskej siuamej tlen kiueyichiuaj toTajtsin Dios.
11 Siuamej san matlakaktokan ijkuak kinmachtiaj uan makinkauilikan tlakamej makinyekanakan.
12 Amo nikinkauilia siuamej matlamachtikan nion amo makinnauatikan tlakamej. Yejuan moneki san matlakaktokan.
13 Porque toTajtsin Dios achto okichijchi Adán uan satepan Eva.
14 Noijki Adán amo okikajkayajkej. Okikajkayajkej Eva uan otlajtlakolchi.
15 Pero siuamej momakixtiskej porque kinpiaj inkoneuan. Yejuan momakixtiskej tla nochipa tlaneltokaskej, tetlasojtlaskej, yetoskej yolchipauakej uan kuali mokuayejyekoskej.*
Notas
^ Noso “pacto”. Xikita diccionario.
^ Xikita diccionario.
^ Noso “monejneuiliaj”.
^ Noso “monejneuiliskej”.
