2 Corintios 1:1-24

  • Pablo otetlajpalo (1, 2)

  • ToTajtsin Dios techyolseuia ijkuak titlajyouiaj (3-11)

  • Pablo ayakmo otetlajpaloto kanin okinekiaya yas (12-24)

1  Ne niPablo, niiapóstol Cristo Jesús porque toTajtsin Dios ijkon okinek. Ne uan tokni Timoteo tiktitlaniliaj nin carta itlanechikol toTajtsin Dios tlen kajki Corinto. Noijki tikintitlaniliaj nochtin tokniuan yolchipauakej tlen katej Acaya:  ToTajtsin Dios uan toTeko Jesucristo manamechtliokolikan tlen kuali uan manamechmakakan yolseuilistli.  Makiueyichiuakan iDios uan iTajtsin toTeko Jesucristo. Ye toTajtsin Dios tlen sapanoua techiknomati uan nochipa techyolseuia.  Ye techyolseuia ijkuak titlajyouiaj para matikinyolseuikan akinmej kixnamikij san tlen ouijkayotl, ijkon ken toTajtsin Dios techyolseuia.  Tejuan titlajyouiaj miak porque tiidiscípulos Cristo, pero Cristo tlapaleuia nochipa matechyolseuikan.  Tla tejuan titlajyouiaj, titlajyouiaj para timechyolseuiskej uan timechpaleuiskej. Noijki tla tejuan techyolseuiaj, techyolseuiaj para timechyolseuiskej. Timechyolseuiaj para xitlaxikokan ijkuak nantlajyouiaj ijkon ken tejuan titlajyouiaj.  Kuali tikmatij nantlaxikoskej porque tikmatij nantlajyouiaj ken tejuan uan namechyolseuiskej ken tejuan techyolseuiaj.  Nokniuan, tiknekij xikmatikan tlen ouijkayotl otikpixkej altepetl Asia. Sapanoua otitlajyouijkej, ayakmo otitlaxikouayaj uan otikijtouayaj yitiixpoliuiskiaj.  Otikmachiliayaj yitimikiskiaj. Pero tlen otechpanok otechmachti amo matikneltokakan san tejuan uelis timopaleuiskej. Otechmachti matikneltokakan toTajtsin Dios tlen kinyolitia akinmej yoixpolikej. 10  Ye otechpaleui amo matimikikan uan oksepa techpaleuis. Tejuan tikneltokaj nochipa techpaleuis. 11  Namejuan noijki uelis nantechpaleuiskej tla topatka nanmotlatlaujtiskej. ToTajtsin Dios kikakis tla miakej topatka motlatlaujtiskej uan ye techpaleuis uan ijkon miakej motlasojkamatiskej. 12  Tejuan tipakij uan tikpiaj chipauak totlalnamikilis porque ijkuak tikatej inuan oksekimej uan okachi ijkuak namouan tikatej, tikteititiaj tejuan tiyolchipauakej uan tikijtouaj tlen melauak ijkon ken toTajtsin Dios techmachtia. Noijki tipakij porque tikteititiaj toTajtsin Dios kitetliokolia tlen kuali uan amo tikteititiaj inmixtlamatilis akinmej chantij tlaltikpak. 13  Tejuan amitlaj timechijkuililiaj tlen amo uelis nankitlajtoltiskej nion tlen amo nankajsikamatiskej. Ne nikmati kuali nankajsikamatiskej nochi nin tlamantli, 14  ijkon ken tepitsin yonankajsikamatkej tejuan uelis tikchiuaskej xipakikan. Noijki namejuan nankichiuaskej matipakikan itech itonal toTeko Jesús. 15  Ne nikneltoka nin tlamantli uan oniknekiaya achto namejuan namechtlajpaloti para oksepa xipakikan. 16  Ne oniknekiaya namechtlajpaloti ijkuak niaskia Macedonia uan noijki ijkuak niualmokopaskia. Ijkon nantechonkajkauaskiaj ijkuak niaskia Judea. 17  Ijkuak onikijto ijkon nikchiuaskia amo san onikajauilmatki. Noijki amo onimokuayejyeko* nikchiuas san tlen ne nikneki para namechiluis kema uan satepan namechiluis amo. 18  Melauak tlen timechiluiaj uan uelis nankineltokaskej toTajtsin Dios. Tejuan amo tikijtouaj achto kema uan satepan tikijtouaj amo. 19  Silvano,* Timoteo uan ne otimechmatiltijkej Jesucristo, iKone toTajtsin Dios, amo kijtoua kema uan satepan kijtoua amo. Ijkuak ye kijtoua kema ijkon mochiua. 20  Porque nochi tlen toTajtsin Dios okijto kichiuas mochiua ika Jesús. Ikinon ika itoka Jesús tikiluiaj toTajtsin Dios amén uan ijkon tikueyichiuaj toTajtsin Dios. 21  ToTajtsin Dios otechpejpenki uan ye techiluia namejuan uan tejuan tiiaxkauan Cristo. 22  Ye noijki otechtlalili isello. Non sello ye espíritu santo tlen kajki toyolipan uan non kiteititia tlen satepan tikseliskej. 23  ToTajtsin Dios kimatok amo niajtok Corinto porque amo nikneki okachi namechyolkokos. 24  Amo nikijtoua tejuan timechnauatiaj ken moneki nantlaneltokaskej, namejuan nanmoyekketokej porque nantlaneltokaj. Tejuan san titlapaleuiaj para xipakikan.

Notas

Noso “oniknejneuili”.
Noijki omotokayotiaya Silas.