MPANTTA 17

Makhaleloni Yesu arinaawe?

TOCAR

Neetthucaka citthu Yesu cuulumilyaawe ni cipankilyaawe ukati waaryaawe va watuninyani va, ninawoonelela makhalelwaawe. Ni iyo itthwiiyo inaanikavihera utepa waapatthanana athumwaane, Yehova. Makhaleloni Yesu arinaawe? Ni manannani ninlamuliyeehu untakiha muukumini wihu?

1. Manannani Yesu cinlikanacaawe ni Athumwaane, Yehova?

Yesu hokhala ni Athumwaane myaakha imiliyau cene wiirimu ni howiitthucera citthu cinci. Phimaana, Yesu noopuwela ni nopanka citthu cotheene khampa Yehova. (Nsome Joau 5:19.) Khweeliini, Yesu naatakiha sana-saana makhalelo aathumwaane. Phimaana, uyo aheera: “Ule konne mi, ciicammo howoona Apaapa.” (Joau 14:9) Mwiitthucaka cinene makhalelo a Yesu, nnaahala uncuweleeha Yehova. Wootakihera, woona mananna Yesu caawaceraawe atthu unawuukaviherani woona mananna cinoowaceraaweni Yehova.

2. Manannani Yesu cithoonyenryaawe wiira nanfenta Yehova?

Yesu heera: “Wiira atthu ntuninyani acuwele wiira kinawaafenta Apaapa, kinaapanka khampa cikirumilyaaya.” (Joau 14:31) Ukati Yesu waaryaawe va watuninyani va, ahothoonyihera wiira nawaafenta cinene Athumwaane awiiwelelaka nhina wo citthu cotheene. Hataa ukhalaka wiira ikwaha ikhwaawe waanonrika upanka iyo itthwiiyo. Uhiya commo, Yesu waanoncivela uwiitthuciha atthu myaha caathumwaane ni waakavihera atthwaayo waapatthanana.—Joau 14:23.

3. Manannani Yesu cithoonyenryaawe wiira nawaafenta atthu?

Ibiiblya ineera wiira Yesu ‘intepa uncivela akhanle apinaatamu.’ (Miruku 8:31, mawehero) Yesu aanaathoonyera unamaana atthu otheene; uyo aanaatafiti atthu otheene nimananna mamocaaru. Uhiya commo, uyo waanoncivela ukati wotheene wuuluma moolumo oolipiha ni antthuna waakavihera atthu. Miiriirya caapankilyaawe canthoonyera wiira kahi paahi uyo ahaana ikuru, masi ciicammo canthoonyera wiira anwoonela uthunku atthu. (Markus 1:40-42) Uyo aanaawacera atthu otheene saana ni khaapanka nthanlo. Yesu ahaamini uhuvihaciya ni wiiviya kontha uyo nawaafenta atthu, masi uyo naafenta venci cinene ale aneettela citthu ciitthucihilyaawe.—Nsome Joau 15:13, 14.

MUNCERERE WIITTHUCA WINYU

Ncuwele makhalelo makhwaawe arinaawe Yesu. Ciicammo, ncuwele mananna nyuuva oothoonyihera nifento ni ukhala namavaha khampa uyova.

4. Yesu nawaafenta Athumwaane

Ntakihero na Yesu ninaaniitthuciha mananna oothoonyihera wiira ninanfenta Nluku. Nsome Luka 6:12 ni Joau 15:10; 17:26. Mwamalihaka usoma, moopele mwaha nna nikohonna:

Manannani ninlamuliyeehu untakiha Yesu ni uthoonyihera wiira ninanfenta Yehova?

Yesu aanaafenta Athumwaane ni uyo anwuulumana apankaka nivekelo

5. Yesu nawaawacera atthu ampheela ukaviheriya

Yesu aanaawacera atthu cinene uvikana inanna ceewaceraawe. Uyo anvarela nteko ukatyaawe ni ikuru cawe wiira aakavihere atthu, hataa ukhalaka wiira howoocya. Nsome Markus 6:30-44, ni mwamalihaka usoma, moopele mwaha ala makohwaala:

Manannani Yesu caathoonyiheraawe wiira aanaawacera atthu?—Nwehe iveerusu 31, 34, 41, ni 42.
Kontha isiyani Yesu waanoncivela waakavihera atthu?—Nwehe iveerusu 34.
Nihoona wiira Yesu antakiha makhalelo aathumwaane. Iyo itthwiiyo inniitthuciha isiyani ya Yehova?
Manannani ninlamuliyeehu uthoonyihera wiira ninawaawacera atthu toko Yesu caawaceraawe?

6. Yesu namavaha

Yesu khaarina citthu cinci. Masi citthu vakaani caakhalanaawe, aanaameela akhunanawe. Ni uyo neera wiira nintakihe. Nsome Miteko 20:35, ni mwamalihaka usoma, moopele mwaha nna nikohonna:

Khampa Yesu cinryaawe, isiyani inhala unikavihera ukhala ootteeliya?

Moone IVIDIYU, ni mwamalihaka woona, moopele mwaha nna nikohonna:

IVIDIYU: “Uvaha unaatteeliha nrima cinene uvirikana ni waakhela” —Ividiyu yoothikileliya (4:00)

Hataa hi nihikhalanaka citthu cinci, manannani cinlamuliyeehu uthoonyera ukhala anamavaha?

Mwaanaacuwela?

Ibiiblya inniitthuciha wiira nihaana ninlompaka Yehova mwa ncina na Yesu. (Nsome Joau 16:23, 24.) Napankaka iyo, ninaathoonyihera wiira ninaavaha ifayita itthu ipankilyaawe Yesu wiira nimpatthanane Yehova.

ATTHU AKIINA ANEERA: “Nluku khanwacera mahuviho aapinaatamu.”