Nsumuinu 29:1-27
29 Muntu udi ukolesha nshingu wende* panyima pa mumane kubedibua misangu ya bungi+Nebamutshibule diakamue kakuyi mushindu wa kuondopibuaye.+
2 Padiku bantu bakane ba bungi, bantu badi basanka,Kadi padi muntu mubi ukokesha, bantu badi batua mikemu.+
3 Muntu udi munange meji udi usankisha tatuende,+Kadi muntu udi ulamakanangana ne bandumba udi utulakaja biuma biende.+
4 Mukalenge udi ushindamija ditunga ku kulumbuluisha kuakane,+Kadi muntu udi ukeba mbuejilu udi ukebela ditunga kabutu.
5 Muntu udi ulabidila muinendeUdi welela makasa ende bukondo.+
6 Dishipa dia mikenji dia muntu mubi didi dimuteya,+Kadi muntu muakane udi wela mbila ne disanka ne udi usanka.+
7 Muntu muakane udi uditatshisha bua manême a bapele,+Kadi muntu mubi kena uditatshisha bua bualu bua nunku to.+
8 Baditambishi badi batemesha kapia mu tshimenga,+Kadi bantu badi ne meji badi bepula tshiji.+
9 Padi muena meji ukokangana ne mutshimbakane,Nekuikale dielelangana mbila ne tuseku, kadi kakuyi tshipeta tshia nsongo.+
10 Bantu badi ne nyota ya mashi mbakine muntu yonso udi kayi ne bualu,*+Ne bobu badi bakeba bua kuangata muoyo* wa bena bululame.*
11 Muntu mutatakane udi upatula bionso bidiye nabi munda,*+Kadi muena meji udi ubikanda ne lutulu luonso.+
12 Padi mfumu uteya ntema ku malu a dishima,Bena mudimu bende bonso nebalue bantu babi.+
13 Muntu mupele ne mukengeshanganyi badi ne bualu bua muomumue ebu:*
Yehowa udi upesha mêsu abu bonso babidi butoke.*
14 Padi mukalenge ulumbuluisha bapele biakane,+Nkuasa wende wa bukalenge neikale anu mushindame.+
15 Lukodi* ne mubelu bidi bifila meji,+Kadi muana udibu kabayi bakanda udi ufuishisha mamuende bundu.
16 Padi bantu babi bavulangana, dishipa dia mikenji didi divula,Kadi bantu bakane nebamone dikuluka diabu.+
17 Nyoka muanebe, yeye neakupeshe dikisha;Ne neakupeteshe* disanka dinene.+
18 Muaba udi kawuyi tshikena kumona,* bantu kabena badikanda,+Kadi bantu badi batumikila mukenji mba diakalenga.+
19 Mêyi nkayawu kaakubela muena mudimu to,Bualu nansha mudiye ujingulula, kena utumikila to.+
20 Udi mumone muntu udi ne lukasa ku dipatula dia mêyi ende anyi?+
Kudi ditekemena dia bungi bua muntu mutshimbakane kupita buende yeye.+
21 Bobu bengeleke muena mudimu katshia ku buana buende,Nealue muntu udi kayi ne dianyisha pashishe.
22 Muena tshiji tshia lukasa udi usonsola dikokangana;+Muena luonji lua lukasa udi ushipa mikenji bikole.+
23 Didibandisha dia muntu nedimupuekeshe,+Kadi muntu udi ne lungenyi lua didipuekesha neapete butumbi.+
24 Muena dia muivi mmudikine yeye muine.*
Udi mua kumvua lubila lua kuya kufila bujadiki,* kadi yeye kena uya kuamba bualu.+
25 Kuzakala kumpala kua* bantu mbuteyi,*+Kadi muntu udi weyemena Yehowa neakubibue.+
26 Bantu ba bungi badi bakeba bua kuyukila ne* mfumu,Kadi kudi Yehowa ke kudi muntu upetela dilumbuluisha diakane.+
27 Muntu udi kayi muakane udi tshintu tshibi kudi bantu bakane,+Kadi muntu udi njila wende mululame udi tshintu tshibi kudi muntu mubi.+
Mamanyisha
^ Anyi “udi anu ne mutu mukole.”
^ Anyi “udibu kabayi babanda ne bualu.”
^ Anyi “anyima.”
^ Anyi pamuapa: “Kadi muena bululame udi ukeba bua kukuba muoyo wende.”
^ Ku mua.: “nyuma wende yonso.”
^ Ku mua.: “batutakena.”
^ Mmumue ne: Udi ubapesha muoyo.
^ Anyi “dilongesha; dinyoka.”
^ Anyi “neapeteshe anyima webe.”
^ Anyi “tshikena kumona tshia buprofete; dibuluibua.”
^ Anyi “mmukine anyima wende.”
^ Anyi “mutshipu udi ne mulawu.”
^ Anyi “Kutshina.”
^ Anyi “kudi kuela buteyi.”
^ Anyi pamuapa: “bakeba kuanyishibua kudi.” Ku mua.: “badi bakeba mpala wa.”
