Nsumuinu 20:1-30
20 Mvinyo udi musekianganyi,+ maluvu makole adi ntomboji;+Muntu udibi bipambuisha kena ne meji to.+
2 Kutshinyishangana* kua mukalenge kudi bu mukungulu wa ntambue;*+Muntu udi ujudija tshiji tshiende udi uteka muoyo wende mu njiwu.+
3 Mbualu bua lumu kudi muntu padiye udikanda ku matandu,+Kadi muntu yonso mutshimbakane neadibuejamu.+
4 Muena lulengu kena udima mu muvu wa mashika makole,*Nunku neikale ulombangana mu tshikondo tshia dinowa pikalaye kayi ne tshintu.*+
5 Meji* a mu muoyo wa muntu adi bu mâyi male,Kadi muntu udi ne dijingulula dia malu udi uasuna.
6 Bantu ba bungi badi bamba mudibu ne dinanga dia lulamatu,Kadi nnganyi udi mua kupeta muntu wa lulamatu?
7 Muntu muakane udi wendela mu muoyo wende mutoke.+
Bana bende* badi balua panyima pende mba diakalenga.+
8 Padi mukalenge usomba mu nkuasa wende wa bukalenge bua kulumbuluisha+Udi utata malu mabi onso ne mêsu ende.+
9 Nnganyi udi mua kuamba ne: “Ndi mutokeshe muoyo wanyi;+Ndi mukezuke, tshiyi ne mpekatu”?+
10 Bintu bia bujitu bia kupima nabi bujitu bidi kabiyi bijalame ne bipiminu bia dishima,*Bubidi buabi mbintu bibi kumpala kua Yehowa.+
11 Nansha muana* badi bamumanyina ku malu adiye wenza,Bikala bienzedi biende bikezuke ne biakane.+
12 Ditshi didi diumvua ne dîsu didi dimona,Yehowa mmubienze bubidi buabi.+
13 Kunangi tulu, tshianana neubuele mu bupele.+
Kangula mêsu ebe, nunku neukute biakudia.+
14 Musumbi wa tshintu udi wamba ne: “Ki ntshimpe to, ki ntshimpe to!”Pashishe udi uya, udi uditumbisha.+
15 Or udiku, kudi kabidi mabue a koraye* a bungi,Kadi mishiku ya dimanya idi tshintu tshia mushinga mukole.+
16 Angata tshilamba tshia muntu bikalaye mufile tshieya bua muenyi;+Kuata tshintu tshiende lukole bikalaye muenze nanku bua mukaji wa ku babende.*+
17 Diampa dipetela ku dishima ndishême kudi muntu,Kadi pashishe mukana muende nemuwule tente ne nsoka.+
18 Ku dishintakaja dia ngenyi,* malu malongolola neende bimpe,*+Ne ku buludiki bua meji,* luangana mvita yebe.+
19 Mushiminyinyanganyi wa malu udi wenda upatula malu masokoka;+Kudisangishi ne muntu udi munange kujanangana.*
20 Muntu udi wela tatuende ne mamuende mulawu,Nebajime muendu wende padi mîdima ilua.+
21 Bumpianyi bupetela bangabanga ku lukukaKabuakuikala dibenesha ku ndekelu to.+
22 Kuambi ne: “Nempingaje bubi ku bubi!”+
Tekemena Yehowa,+ ne yeye neakupandishe.+
23 Bintu bia bujitu bia kupima nabi bujitu bidi kabiyi bijalame* mbintu bibi kumpala kua Yehowa,Ne bipiminu bia dishima ki mbimpe to.
24 Yehowa ke udi uludika makasa a muntu;+Mmunyi mudi muntu mua kujingulula njila wende?*
25 Mbuteyi kudi muntu bua kuela dîyi lukasa lukasa ne: “Tshia tshijila!”+
Kadi anu pashishe welangana meji a tshivuaye muditshipe.+
26 Mukalenge wa meji udi umbusha bantu babi+Ne wendeshila lukata lua kushipula nalu pambidi pabu.+
27 Mueyelu wa muntu mmuendu wa Yehowa,Ne udi ukonkonona tshidiye munda muende menemene.
28 Dinanga dia lulamatu ne lulamatu bidi bikuba mukalenge;+Udi ushindamija nkuasa wende wa bukalenge ku dinanga dia lulamatu.+
29 Butumbi bua bansongalume mbukole buabu,+Ne bulengele bua bantu bakulumpe nnsuki yabu mitoke.+
30 Mibundabunda ne mputa bidi biumbusha* malu mabi,+Ne mitutu idi itokesha tshidi muntu munda menemene.
Mamanyisha
^ Anyi “Kukuatshishangana buôwa.”
^ Anyi “muana wa ntambue wa musalala.”
^ Anyi “hiver.”
^ Anyi pamuapa: “Neakebe mu tshikondo tshia dinowa kadi kakupeta tshintu.”
^ Anyi “Mapangadika.” Ku mua.: “Mubelu.”
^ Ku mua.: “Bana bende ba balume.”
^ Anyi “Mabue abidi mashilangane a kupima nawu bujitu ne bipiminu bibidi bishilangane.”
^ Anyi “muana wa balume.”
^ Anyi “muntu wa ku babende.”
^ Anyi “mubelu.”
^ Anyi “neajadikibue.”
^ Anyi “bulombodi bua meji.”
^ Anyi “udi ulobeshangana ne mishiku yende.”
^ Anyi “Mabue abidi mashilangane a kupima nawu bujitu.”
^ Anyi “njila wa kuyila?”
^ Anyi “bisukula.”
