Nsumuinu 1:1-33
1 Nsumuinu ya Solomo,+ muana wa Davidi,+ mukalenge wa Isalele:+
2 Bua kulonga* meji+ ne kuitaba dinyoka;Bua kujingulula mêyi a meji;
3 Bua kupeta mubelu+ udi ufila busunguluji,Buakane,+ dimanya kutapulula malu,*+ ne bululame;*
4 Bua kupesha bantu badi kabayi ne dimanya budimu;+Bua kupesha nsongalume dimanya ne bukokeshi bua kunana lungenyi.+
5 Muena meji udi uteleja ne udi upeta malongesha a bungi;+Muntu udi ne dijingulula dia malu udi upeta meji a kulombola nawu*+
6 Bua kujingulula lusumuinu ne ngakuilu musokome,*Mêyi a bena meji ne nshinga yabu.+
7 Ditshina* dia Yehowa didi ntuadijilu wa dimanya.+
Anu bantu batshimbakane ke badi bapetula meji ne mubelu.+
8 Muananyi, teleja mubelu wa tatuebe,+Ne kulekedi dilongesha* dia mamuebe.+
9 Biobi bidi tshikata tshimpe tshia lumu bua mutu webe+Ne tshilengejilu tshimpe bua nshingu webe.+
10 Muananyi, benji ba mpekatu bobu bakeba kukulobesha, kuitabi to.+
11 Bobu bambe ne: “Luaku tuye.
Tualamine bua kuela mashi panshi.
Netubutame, bindile bantubadi kabayi ne bualu bua kubenzela bibi kakuyi bualu.
12 Netubamine ne muoyo bu mudi Lukita* luenza,Bajima, bu mudi bantu badi baya muinshi mu dijimba.
13 Tunyenge biuma biabu bionso bia mushinga mukole;Netuwuje nzubu yetu ne bintu binyenga.
14 Udi ne bua kudisanga netu,*Ne netuabanyangane bitudi tuiba bungi bua muomumue.”*
15 Muananyi, kubalondi to.
Kudiatshi makasa ebe mu njila wabu,+
16 Bualu makasa abu adi aya lubilu bua kuenza malu mabi;Badi baya lukasa bua kuela mashi panshi.+
17 Kuela bukondo nyunyi mutangile kudi bushuwa tshianana.
18 Ke bualu kayi bantu aba badi baalamina bua kuela mashi panshi;Badi babutama bua kuangata mioyo* ya bakuabu.
19 Eyi ke njila ya bantu badi bakeba bua kupetela bintu mu njila mubi,Bikala mua kushipesha muoyo* wa badi babipeta.+
20 Meji malelela+ adi ela mbila mu musesu.+
Adi atungunuka ne kubandisha dîyi diawu miaba ya tshinsangansanga.+
21 Adi ela mbila mu masangu a* misesu idi ne bantu ba bungi.
Ku bibuelelu bia biibi bia musoko adi amba ne:+
22 “Nuenu badi kabayi ne dimanya, nenunange dipanga too ne dîba kayi?
Nuenu basekianganyi, nenunange disekangana too ne dîba kayi?
Ne nuenu batshimbakane, nenukine dimanya too ne dîba kayi?+
23 Itabayi mubelu wanyi.*+
Nunku nennupumuine nyuma wanyi;Nennumanyishe mêyi anyi.+
24 Bualu mvua mubikile, kadi nuvua anu nubenga,Mvua muolole tshianza tshianyi, kadi kakuvua muntu uvua uteya ntema,+
25 Nuakatungunuka ne kulengulula ngenyi yanyi yonsoNe kubenga mubelu wanyi,
26 Meme panyi nenseke padi tshipupu tshinukuata;Nenseke padi tshinudi nutshina tshilua,+
27 Padi tshinudi nutshina tshilua bu mvula wa tshipepele tshikole,Ne tshipupu tshienu tshilua bu tshipepele tshikole,Padi dikenga ne lutatu binukuata.
28 Dîba adi nebatungunuke ne kumbikila, kadi meme tshiakubandamuna;Nebankebe ne muoyo mujima, kadi kabakumpeta to,+
29 Bualu bavua bakine dimanya,+Ne kabakasungula bua kutshina Yehowa to.+
30 Bakabenga ngenyi yanyi;Kabakanemeka mubelu wanyi wonso to.
31 Nunku nebambule bipeta bibi bia* njila wabu,+Ne nebukute mubelu wabu* bobu bine.
32 Bualu dibenga kutumikila dia bantu badi kabayi ne dimanya nedibashipe,Dibenga kutshiuka malu dia batshimbakane nedibabutule.
33 Kadi muntu udi unteleja neasombe mu bukubi+Ne kakutatshishibua kudi buôwa bua tshipupu.”+
Mamanyisha
^ Ku mua.: “kumanya.”
^ Anyi “tshidi tshiakane.”
^ Anyi “buakane.”
^ Anyi “buludiki bua meji.”
^ Anyi “lusumuinu.”
^ Anyi “Dinemeka.”
^ Anyi “mukenji.”
^ Anyi “netusangile tshibombi (tshibuta) tshimue.”
^ Anyi “Ela netu nshobo yebe.”
^ Anyi “anyima.”
^ Anyi “anyima.”
^ Ku mua.: “ku mutu kua.”
^ Anyi “Kudimukayi pandi nnubela.”
^ Ku mua.: “nebadie mamuma a.”
^ Anyi “meji adibu baluka; malu adibu bapangadija.”
